Read SEBR SÕNGO, 1998 A Matye koe‑noogo 22 Bible Online

A Matye koe‑noogo 22 - SEBR SÕNGO, 1998 bible

A Matye koe‑noogo 22

¹A Zeezi leb n wẽe bãmb yel-bũnd n yeele:

²Arzãn soolem wẽnda wa rĩm sẽn maan pʋg-peegr tigr a bi-ribl yĩnga.

³Yẽnda tʋma a tʋmtʋmdb tɩ b tɩ yeel neb nins yẽnda sẽn dag n boolã tɩ b wa, la b rag n ka rat n wa ye.

⁴Yẽ leb n tʋma tʋmtʋmdb a taab n yeel-b tɩ b kẽng n tɩ yeel neb nins yẽnda sẽn dag n boolã n yeel‑ba: «Mam segla tigrã rɩɩb n sɛ, mam kʋʋ m nag-nobdse, la m rũm-nobdse. Bũmba fãa seglame n sɛ. Wa-y pʋg-peegr tigrã.»

⁵La b sẽn ka nand boolgã yĩnga, b loogame. Bãmba rãmb kẽnga b pʋtẽ, tɩ bãmba rãmb kẽng leebgo.

⁶La neb a taabã yõga tʋmtʋmdbã n nams-ba, la b kʋ-ba.

⁷Rĩmã sũur yikame t'a tʋm a tãb-biisã tɩ b tɩ sãam nin-kʋʋdb kãense, la b yõog b tẽngã bugum.

⁸Dẽ, a yaool n yeela a tʋmtʋmdbã yaa: «Pʋg-peegrã tigr seglame n sɛ. La neb nins mam sẽn boolã dag n ka zems tɩ rɩ-a ye.

⁹Woto wã, kẽng-y so-tiisẽ wã n tɩ bool neb nins fãa yãmb sẽn na yã wã tɩ b wa.»

¹⁰Tʋmtʋmdbã saa soayã zut n tigs neb nins fãa b sẽn yã wã, nin-wẽns la nin-sõamyã, hal tɩ tigrã roog pid ne nebã.

¹¹Rĩmã kẽeme n na n ges nebã sẽn paam boolgã, la a yãnda rao a yembr be sẽn ka yer pʋg-peegrã tigr fuug ye.

¹²A yeel-a lame: «M zoa, fo maana a wãn n wa n kẽ ka n ka yeelg pʋg-peegrã tigr fuugu?» La raoã ka tõog n leok tɩ bũmb ye.

¹³Dẽ, rĩmã yeela tʋmtʋmdbã yaa: «Sẽb-y-yã a nao wã ne a nusã, n lob-a lik bida sẽn be yɩngã pʋgẽ. Yãbr la yẽn wãbr na n zĩnda be.»

¹⁴Bala, b sẽn bool b rãmbã yaa kʋʋng wʋsgo, la b sẽn tũus b rãmbã sõor paoodame.

¹⁵Dẽ, Fariizẽ-dãmbã kẽng n tɩ yẽsa ne taaba, n na n bao sor ning b sẽn na n maan n bẽd a Zeezi ne b mengã noor goam n yõke.

¹⁶Bãmb tʋma b karen-biis kẽer ne a Erood poorẽ dãmb a Zeezi nengẽ. Bãmb yeela a Zeezi yaa: «Karen-saamba, tõnd miime tɩ yãmb yaa sɩd soaba, la yãmb zãmsda nebã Wẽnnaam soayã ne sɩd n ka zoet ned ye. Bala, yãmb ka get ninsaalbã sẽn yaa to-to wã ye.

¹⁷Togs-y-do. Ne yãmb tagsgo, noor beeme tɩ yao Sezaar yõor yaoodo bɩ?»

¹⁸La a Zeezi sẽn mi bãmb sɩlmã, b yeel-b lame yaa: «Zãmb dãmba, bõe tɩ y bẽt maam?

¹⁹Wilg-y maam ligd ning yãmb sẽn tar n yaood yõor yaoodã.» La b wilga bãmb deniye a yembre.

²⁰La a Zeezi soka bãmba: «Maasmã ne gʋlsmã sẽn be lagfã zugã yaa ãnda rẽnda?»

²¹La b leokame: «Yaa Sezaar dẽnda.» Dẽ a Zeezi yeela bãmba: «Sã n yaa woto, bɩ y lebs Sezaar bũmb ning sẽn yaa Sezaar dẽnda, la y lebs Wẽnnaam bũmb ning sẽn yaa Wẽnnaam dẽnda.»

²²Gom-kãens yɛɛsa bãmba, la b basa a Zeezi n looge.

²³Badaar bala, Saduusẽ-dãmbã, sẽn yet-b tɩ kũum vʋʋgr ka be wã kolga a Zeezi n sok-b sok-kãnga:

²⁴«Karen-saamba, a Moyiis yeelame tɩ ned sã n ki n ka bas biiga, a ba-biig na n deega pʋg‑kõorã n dog kamb a ba-biigã sẽn ki wã yĩnga.

²⁵La ba-biis a yopoe n dag n be tõnd sʋka. Kãsmã peega paga, la a kiime. La a sẽn ka paam biig yĩnga, a basa a pagã ne a yao wã.

²⁶Yiib soabã me yɩɩ a woto, tɩ ta tãab soabã, hal tɩ ta b yopoe wã fãa.

²⁷Bãmb fãa sẽn ki n sɛ, pagã me kiime.

²⁸Kũum vʋʋgrã wakate, bʋg ba-biisã a yopoe wã sʋk n na n soog pagã? Bãmb fãa la sẽn tall-a wã la!»

²⁹A Zeezi leoka bãmb yaa: «Yãmb bee tudgr pʋgẽ, yãmb sẽn ka wʋmd gʋls-sõamyã wall Wẽnnaam pãngã võorã.

³⁰Bala, kũum vʋʋgrã wakate, raop ka na n leb n peeg pagba, pagb ka na n kuil sɩdba, la b na n yɩɩ wa Wẽnnaam malegsã sẽn be arzãnã.

³¹La ne kũum vʋʋgrã yelle, yãmb nan ka karem Wẽnnaam sẽn yeelã la?:

³²‹Mam yaa a Abrahaam Wẽnnaam, a Izak Wẽnnaam, la a Zakoob Wẽnnaam›? Wẽnnaam ka kũum Wẽnnaam ye, bãmb yaa nin-vɩɩs Wẽnnaam.»

³³La a Zeezi zãmsgã linga neb kʋʋngã sẽn dag n kelgd bãmbã.

³⁴Fariizẽ-dãmbã sẽn wʋm t'a Zeezi kɩtame tɩ Saduusẽ-dãmbã noyã muma, b tigsa taaba.

³⁵La bãmb ned a yembr sẽn yaa tõog karen-saamb soka a Zeezi sokr n na n mak bãmba:

³⁶«Karen-saamba, tõodã sʋka, bʋg n yaa kãseng n yɩɩda?»

³⁷A Zeezi leoka yẽnda n yeele: «Nong Zu-soaba fo Wẽnnaam ne f sũur fãa, la ne f sɩɩgã fãa, la ne f tagsgã fãa.»

³⁸Yẽnda n yaa pipi tõogo, n leb n yɩɩd b fãa.

³⁹La tõog a to me sẽn pʋgd yẽnda n yaa kãseng wa yẽnda: «Nong f to wa f menga.»

⁴⁰Tõodã fãa ne Wẽnnaam no-rɛɛsdbã koees fãa yẽbga tõ-kãensã b yiibã zutu.

⁴¹Fariizẽ-dãmbã sẽn tigmã, a Zeezi sok-b-la woto:

⁴²«Yãmb tagsda bõe ne Kirisã yelle? B yaa ãnda biiga?» B leokame: «A Davɩɩde.»

⁴³La a Zeezi yeel-b lame: «La yɩta a wãn t'a Davɩɩd gom ne Sɩɩg-sõng pãng n bool bãmb tɩ Zu-soaba?» bãmb yeelame:

⁴⁴«Zu-soabã yeela mam Zu-soabã yaa: ‹Zĩnd mam dɩtgo, hal tɩ m kɩt tɩ f tab f bɛɛbã.›»

⁴⁵A Davɩɩd sã n boonda bãmb tɩ Zu-soaba, bãmb leb n yɩta wãn n yaa yẽnda biiga?

⁴⁶Ned baa a yembr ka tõog n yãnd gomd n leok bãmb ye. La sẽn sɩng ne badaare, ned baa a yembr ka leb n saag n sok bãmb bũmb ye.