Read SEBR SÕNGO, 1998 A Matye koe‑noogo 23 Bible Online

A Matye koe‑noogo 23 - SEBR SÕNGO, 1998 bible

A Matye koe‑noogo 23

¹Dẽ, a Zeezi goma ne neb kʋʋngã la ne b karen-biisã n yeele:

²Tõog karen-saam-dãmbã ne Fariizẽ-dãmbã bee a Moyiis zĩigẽ.

³Dẽ wã, maan-y bũmb nins b sẽn na n yeel yãmbã, la y tũ bũmb nins b sẽn na n zãms yãmbã, la y ra maan wa bãmb sẽn maandã ye. Bala, bãmb yetame la b yaool n ka maandẽ ye.

⁴Bãmb sẽbda zɩɩb sẽn yaa zɩsd n tʋkd nebã, n yaool n ka rat n sɩɩs-b ne b nug-bil ye.

⁵Bãmb maanda b tʋʋmã fãa nebã nin gesg yĩnga. Woto, bãmb maanda b pʋʋsgã gãn[4] tɩ yaa yalemse, la b kɩtdẽ tɩ b futã zerd yaa wogdo.

⁶Bãmb nonga naam zĩndg zĩis rɩɩb zĩisẽ la karen-dotẽ.

⁷Bãmb nonga nebã pʋʋsem raasẽ, la b nongẽ tɩ nebã boond bãmb tɩ karen-saamba.

⁸La yãmba, ra kɩt-y tɩ nebã boond yãmb tɩ karen-saamb ye. Bala, yãmb karen-saamb yaa a yembr tãa, la yãmb fãa yaa ba-biisi.

⁹Da bool-y ned baa a yembr tãa dũni ka tɩ ba ye. Bala, ned a yembr tãa n yaa yãmb ba, soab ning sẽn be-a saasẽ wã.

¹⁰Da kɩt-y tɩ nebã bool yãmb tɩ taoor dãmb ye. Bala, ned a yembr tãa n yaa taoor soaba, yaa a Kirisi.

¹¹Sẽn yaa-a kãseng n yɩɩd yãmb sʋkã, bɩ a yɩ yãmb tʋmtʋmda.

¹²Ned sã n zẽk a menga, b na n sik-a lame, la ned sã n sik a menga, b na n zẽk-a lame.

¹³Yãmba, tõog karen-saam-dãmbã, la Fariizẽ-dãmb sẽn yaa zãmb dãmbã, yãmb na paam toogo! Bala, yãmb pagda arzãn soolmã tɩ nebã ka tõe n kẽ ye. Yãmb mensã ka kẽede, la yãmb ka basd neb nins sẽn dat n kẽ wã me tɩ b kẽ ye.

¹⁴[Yãmba, tõog karen-saam-dãmbã, la Fariizẽ-dãmb sẽn yaa zãmb dãmba, yãmb na paam toogo! Bala, yãmb sɛɛsda pʋg‑kõap paoongo, n pʋʋsd pʋʋs-wogd n belgd nebã. Bõn-kãng yĩnga, yãmb sɩbgr na n yɩɩ toog n yɩɩda.]

¹⁵Yãmba, tõog karen-saam-dãmba, la Fariizẽ-dãmb sẽn yaa zãmb dãmba, yãmb na paam toogo! Bala, yãmb saagda ko-kãsengã ne tẽngã fãa n baood ned sẽn na sak yãmb kaorengã. La yãmb sã n paam neda, yãmb kɩtdame t'a lebg bug-tẽng ned sẽn yaa wẽng n yɩɩd yãmb naoor a yiibu.

¹⁶Yãmb sẽn yaa tɛtb sẽn yaa zoensã, yãmb na paam toogo! Bala, yãmb yetame tɩ ned sã n wẽen ne wẽnd doogã, ka tar yell ye, la a sã n wẽen ne sãnemã sẽn be wẽnd doogẽ wã, yaa tɩlɛ t'a pidsi.

¹⁷Ka-yam dãmb la zoense, bʋg n yaa kãseng n yɩɩda, sãnemã bɩ, bɩ wẽnd doogã sẽn kɩtd tɩ sãnemã lebg bõn-sõngã?

¹⁸Yãmb leb n yetame tɩ ned sã n wẽen ne tẽn-kugrã, rẽ ka be ye, la tɩ ned sã n wẽen ne kũunã sẽn be tẽn-kugrã zugã, yaa tɩlɛ t'a pidsi.

¹⁹Zoensã, bʋg n yaa kãseng n yɩɩda, kũunã bɩ, bɩ tẽn-kugrã sẽn kɩtd tɩ kũunã lebg bõn-sõngã?

²⁰Ned ning sẽn wẽend ne tẽn-kugrã wẽenda ne tẽn-kugrã la ne bũmb ning sẽn be a zugã.

²¹Ned ning sẽn wẽend ne wẽnd doogã wẽenda ne roogã la ne ned ning sẽn so-a roogã.

²²La ned ning sẽn wẽend ne arzãn wẽenda ne Wẽnnaam geerã la ne a soab sẽn zao a zugã.

²³Yãmba, tõog karen-saam-dãmba, la Fariizẽ-dãmb sẽn yaa zãmb dãmbã, yãmb na paam toogo! Bala, yãmb yãkda zẽ-vãad wa mant la anet la kume piig pʋɩɩre, la yãmb basda bũmb ning sẽn yaa kãseng n yɩɩd fãa tõogã pʋgẽ: yaa nimbãan-zoeere la sɩd maanego. Yaa bõn-kãensã la yãmb tog n maane, la y ra bas sẽn ketã me ye.

²⁴Tɛtb sẽn yaa zoense, yãmb yoogda koom n kokd dũmpigli, n yaool n vend yʋgemde.

²⁵Yãmba, tõog karen-saam-dãmba, la Fariizẽ-dãmb sẽn yaa zãmb dãmbã, yãmb na paam toogo! Bala, yãmb nedgda ko-yũudum wamd ne laag poore, tɩ b pʋsã yaool n pid ne fãab la yĩng ratem sakre.

²⁶Fariizẽ sẽn yaa zoanga, deng n nedg ko-yũudum wamdã ne laagã pʋg tɩ yɩ yɩlemde, tɩ b poayã me na yɩ yɩlma.

²⁷Yãmba, tõog karen-saam-dãmba la Fariizẽ-dãmb sẽn yaa zãmb dãmbã, yãmb na paam toogo! Bala, yãmb wẽnda wa yaad sẽn puus goor tɩ yaa pɛɛlga, tɩ b yɩngã ya neere, tɩ b pʋsã yaool n pid ne kũum kõaba, la rẽgd buud fãa.

²⁸Yãmb me, nebã sã n get yãmb yɩngã, yãmb yaa wa nin-tɩrse. La pʋgẽ wã, yãmb pida ne zãmbo la tʋʋm-wẽnse.

²⁹Yãmba, tõog karen-saam-dãmba, la Fariizẽ-dãmb sẽn yaa zãmb dãmba, yãmb na paam toogo! Bala, yãmb meta Wẽnnaam no-rɛɛsdbã yaado, la y nagsd nin-tɩrsã yaado,

³⁰la y yetẽ tɩ yãmb sã n dag n vɩɩmdẽ y ba-rãmbã zamaanẽ, yãmb dag n kõn naagẽ bãmb n daag Wẽnnaam no-rɛɛsdbã zɩɩm ye.

³¹Ne gom-kãense, yãmb kaooda y mens bʋʋdo, n wilgdẽ tɩ yãmb yaa neb nins sẽn kʋ-b Wẽnnaam no-rɛɛsdbã kamba.

³²Beneere, bɩ y kell n maan y yaab-rãmbã tʋʋmd n baase.

³³Wiisã! Wag-toos buudu! Yãmb na n yɩɩ a wãn n põs bug-tẽng sɩbgrã?

³⁴Yaa woto yĩng la mam tʋmd yãmb Wẽnnaam no-rɛɛsdba, la yam dãmba, la tõog karen-saam-dãmba. Yãmb na n kʋʋ kẽere, n ka kẽer da-pɩgs zutu. Yãmb na n pãba b taabã y karen-dotã pʋse, la y na n namsa bãmb tẽng-tẽnga.

³⁵Sẽn na yɩlẽ tɩ nin-tɩrsã fãa zɩɩm sẽn daag dũniyã zugã, sẽn sɩng ne a Abɛll tɩ ta a Berikɩya biig a Zakari yãmb sẽn kʋ wẽnd doogã ne tẽn-kugrã sʋkã, zɩɩm taal zĩnd yãmb zutu.

³⁶Sɩd-sɩda, mam yeta yãmb tɩ bõn-kãens fãa na n waa zamaan‑kãngã nebã zutu.

³⁷Zeruzalɛm! Zeruzalɛm! Fo sẽn kʋʋd Wẽnnaam no-rɛɛsdba, la f lobd neb nins b sẽn tʋm fo nengẽ wã kugã! Naoor wʋsgo mam dag n tʋlg n tigsa f kambã wa no-yãang sẽn põgended a no-bi a pɩgsẽ, la yãmb ka sak ye.

³⁸Gese, b na n basa y roogã vɩʋʋg ne-yã.

³⁹Bala, mam yeta yãmb tɩ yãmb ka na n leb n yãnd maam yɛs hal tɩ ta wakat ning yãmb sẽn na n yeele: «Bark bee soab ning sẽn wat ne Zu-soabã yʋʋrã zugu.»