Read SEBR SÕNGO, 1998 A Matye koe‑noogo 24 Bible Online

A Matye koe‑noogo 24 - SEBR SÕNGO, 1998 bible

A Matye koe‑noogo 24

¹A Zeezi sẽn yi wẽnd doogẽ wã n loogdẽ, b karen-biisã kolgame n wilg bãmb tɩ b ges a meebã sẽn yaa to-to

²A Zeezi leoka bãmb n yeele: «Yãmb nee bõn-kãensã fãa? Sɩd-sɩda, mam yeta yãmb tɩ kugr baa a yembr kõn pa a to zug ye. B na n leeb-b-la zãng n lubi.»

³Bãmb zĩnda oliiv tɩɩs tãngã zugu, la bãmb karen-biisã waa bãmb nengẽ neb sẽn ka be be wakat n yeel-b yaa: «Togs-y tõnd wakat ning bõn-kãens fãa sẽn na n zĩndã, la bãnd ning sẽn na n wilg tɩ yãmb watame la tɩ dũni na n sɛɛme wã.»

⁴A Zeezi leok-b lame n yeele: «Gũus-y y mens tɩ ned da tudg yãmb ye.

⁵Bala, neb wʋsg n na n wa rɩk mam yʋʋrã n yetẽ: ‹Yaa maam la Kirisã.› La b na n tudga neb wʋsgo.

⁶Yãmb na n wʋmame tɩ b gomd zab yelle, la y wʋm zab rãamde. Yõk-y y mens n da yɛɛs ye. Bala, bõn-kãens fãa tog n waame. La ket n nan ka wakat sɛɛb ye.

⁷Soolem na n yika zabr ne soolem a to, tɩ rĩung yik ne rĩung a to, la kom ne tẽn-digimdg na n zĩnda zĩig-zĩiga.

⁸Yõwã fãa na n yɩɩ wa rogem toog sɩngr bala.

⁹Dẽ, b na n namsa yãmba, n kʋ yãmba, la soolem fãa nebã na n kisga yãmb mam yʋʋrã yĩnga.

¹⁰Bõn-kãng na n waa ne neb wʋsg lʋɩɩse. B na n zãmba taaba, n kisg taaba.

¹¹Belgr no-rɛɛsdb wʋsg na n pukame la b na n belga neb wʋsg n tõoge.

¹²Wẽngã maaneg sẽn na n lebg wʋsgã yĩnga, neb wʋsg nonglem na n boogame.

¹³La ned ning fãa sẽn na n mao-a tɩ wakat ta, a na paam fãagre.

¹⁴Wẽnnaam soolmã koe-no-kãngã na n moona dũni gill fãa, tɩ yɩ kaset soolem toay‑toayã fãa nebã yĩnga. Dẽ, wakat sɛɛb na yaool n ta.

¹⁵Yaa woto yĩng tɩ yãmb sã n yãnd sãoong bõn-wẽngã Wẽnnaam no-rɛɛs a Dãniyɛll sẽn dag n gom a yellã sẽn be zĩ-sõngẽ wã, bɩ sẽn karemd-a wã gũusi,

¹⁶bɩ neb nins sẽn be‑b Zʋʋde wã zoe n dʋ tãmsã,

¹⁷bɩ ned ning sẽn be bɛoong zug da sig n kẽ a roogẽ n na n dɩk bũmb be ye,

¹⁸la bɩ ned ning sẽn be a pʋʋgẽ ra leb a poorẽ n na n tɩ rɩk a fuug ye.

¹⁹Toog bee Pagb nins sẽn tʋtã, la sẽn yẽsemd kamb wakat-kãngã zugu.

²⁰Pʋʋs-y Wẽnnaam tɩ y zoeesã ra yɩ waood wẽnd bɩ vʋʋsg daar ye.

²¹Bala, wakat-kãnga, to-kãseng n na n zĩndi, la a buud ka zĩnd hal dũni sɩngr wakat tɩ ta masã ye, la a buud kõn tol n zĩnd yɛs ye, abada.

²²La da-kãens sõorã sã n dag n ka boogẽ, ned baa a yembr dag n kõn põsẽ ye. La b booga da-kãens sõor nin-tũusdsã yĩnga.

²³Dẽ, ned sã n yeel yãmb tɩ Kirisã bee ka wall ka sẽnẽ, bɩ y ra tẽ a soab ye.

²⁴Bala, belgr kiris-rãmb la belgr no-rɛɛsdb n na n puki. B na n maana bõn-kãsemse, la bõn-yɛɛsdse, hal tɩ b sã n tõe menga, b na n tudga nin-tũusdsã mense.

²⁵Gese, mam pĩnd n togsa yãmb bõn-kãnga.

²⁶Dẽ, b sã n yeel yãmb tɩ ad Kirisã bee we-rasempʋɩɩgẽ wã, bɩ y ra kẽng ye, wall ad b bee roogẽ wã, bɩ y ra tẽ ye.

²⁷Sɩda, a wa sa-yãgb sẽn yit yaang n yãg n tãagd nin-taoorã, Ninsaal Bi-riblã waoong me na n yɩɩ a woto.

²⁸Dɩgr sẽn be zĩig ning fãa, yɩbrend na tigs taab be.»

²⁹Tao-tao bala, ra-kãens toogã zugẽ, wĩndgã na n sobgame, kiuugã peelem kõn leb n zĩnd ye, ãdsã na n yii yĩngr n sʋʋge, la saasẽ pãensã na n digimdame.

³⁰Wakat-kãnga, Ninsaal Bi-riblã bãnd na yaool n puk saasẽ. Buud nins fãa sẽn be dũniyã zugã neb na n wiisame, la b na n yãnda Ninsaal Bi-riblã sẽn zao sawat n wat ne pãn-kãsenga la ne ziiri.

³¹Bãmb na n tʋma b malegs ne baor‑kẽeng koe-kãsenga, tɩ b tigs bãmb nin-tũusdsã sẽn be dũniyã kɩrems a naasã, hal yaang la nin‑taoore.

³²Reeg-y kankangã yel-bũndã tɩ yɩ zãmsg y yĩnga. Kankang sã n wa n tãood wil-poala, n sɩng n tobdẽ, yãmb miime tɩ sig-noy kolgame.

³³Woto me, yãmb me sã n wa n yãnd bõn-kãensã fãa, bɩ y bãng tɩ Ninsaal Bi-riblã kolgame la b bee dignoorẽ.

³⁴Sɩd sɩda, mam yeta yãmb tɩ zamaan‑kãngã kõn sa tɩ bõn-kãensã fãa ka maan ye.

³⁵Saasẽ la tẽng na looge, la mam goamã kõn loog ye.

³⁶Sã n yaa ne a daarã la a wakatã, ned baa a yembr ka mi ye: malegsã sẽn be arzãnã ka mi, Bi-riblã ka mi. Yaa ba wã bal n mi.

³⁷Bũmb ning sẽn zĩnd a Nowe wakatã n na n zĩnd Ninsaal Bi-riblã waoong wakat me.

³⁸Bala, rasem nins sẽn deng sãoong sa-kãsengã, nebã dag n dɩtame la b yũuda, n kẽed kãadem la b yiisd b kamb kãadem, hal tɩ ta daar ning a Nowe sẽn kẽ koom koglgã pʋgẽ wã.

³⁹Bãmb dag n ka tẽed yell hal tɩ sãoong sa-kãsengã wa n kãag bãmb fãa. Na n yɩɩ a woto me Ninsaal Bi-riblã waoong wakate.

⁴⁰Dẽ, raop a yiib sẽn na n be pʋʋgẽ n kooda: b na n dɩka a yembre la b bas a yembre.

⁴¹Pagb a yiib na n bee neerẽ n werda: tɩ b rɩk a yembre la b bas a yembre.

⁴²Rẽ yĩnga, neend-yã, yãmb sẽn ka mi daar ning yãmb Zu-soabã sẽn na n wa wã yĩnga.

⁴³Bãng-y tɩ yir soab sã n dag n bãngẽ wagdr sẽn na n wa yʋngã wakat ninga, a dag n na n gũume la a ka na n bas-a t'a poog a roogã ye.

⁴⁴Woto yĩnga, yãmb me segl n sɛ, bala, Ninsaal Bi-riblã na n waa wakat ning yãmb sẽn ka tagsd tɩ b na waame wã.

⁴⁵Dẽ wã, tʋmtʋmd bʋg n tar yam n yaa sɩd soaba, t'a soaalã lʋɩɩs-a a nebã taoore, t'a tõe n kõ-b rɩɩb wakat fãa sẽn segde?

⁴⁶Tʋmtʋmd‑kãng soaalã sã n lebg n wa n mik t'a maanda a woto, tʋmtʋmdã sũur na n yɩɩ noogo.

⁴⁷Sɩd-sɩda, mam yeta yãmb t'a soaalã na n kɩtame t'a soog bũmb nins fãa yẽnda sẽn tarã.

⁴⁸La a sã n yaa tʋmtʋmd yoog sẽn yet t'a soaalã kaoosda waoongo,

⁴⁹a sã n sɩng n pãb a zĩnd-n-taasã, a sã n naag rã-yũudbã n dɩtẽ la a yũuda,

⁵⁰a soaalã na n waa daar ning a sẽn ka tẽeda, la wakat ning a sẽn ka mi ye.

⁵¹La a na n sɩbg-a-la sõama, tɩ bũmb ning sẽn paamd zãmb dãmbã paam-a, zĩig ning yãbr la yẽn wãbr sẽn na n zĩndã.