Read SEBR SÕNGO, 1998 A Matye koe‑noogo 25 Bible Online

A Matye koe‑noogo 25 - SEBR SÕNGO, 1998 bible

A Matye koe‑noogo 25

¹Dẽ, arzãn soolem na n yɩɩ wa pa-kuil-n-dãmb piig sẽn dɩgs b fɩtl dãmb n yi n na n tɩ seg pʋg-paal sɩdã.

²Bãmb sʋkã neb a nu yaa yalemba, tɩ nu wã ya yam dãmba.

³Yalembã sẽn na n dɩgs b fɩtl dãmbã, b ka zɩ kaam ye.

⁴La yamã rãmb rɩgsa b fɩtl dãmbã, la b zɩ kaam ne tʋgdo.

⁵La pʋg-paal sɩdã sẽn kaoosd waoongã yĩnga, gõeem yõka b fãa tɩ b gũsi.

⁶Kɛleng n zẽk yʋn-sʋkã n yeele: «Pʋg-paalã sɩd watame! Yi-y n seg-y-yã-a.»

⁷Dẽ, pa-kuil-n-dãmb kãens fãa yikame n maneg b fɩtl dãmba.

⁸Yalembã kosa yam dãmbã tɩ b yãk b kaamã bilf n kõ-b tɩ bãmb fɩtl dãmbã sɩnga kũum.

⁹Yam dãmbã leok-b lame n yeele: «Ayo! Ka na n sek tõnd ne yãmb me ye. Kẽng-y ka-koaasdbã nengẽ n tɩ ra y mens yĩng tɩ rẽnda n são.»

¹⁰Bãmb sẽn wa n kẽnd n na n tɩ ra wã, pʋg-paalã sɩd taame. Pʋg-sadb nins sẽn dag n segl n sɛ wã tũu yẽnda n kẽ kãadmã tigr doogẽ, la b paga kʋɩlengã.

¹¹Pa-kuil-n-dãmb a taabã yaool n wa waame n yeele: «M soaala! M soaala! Pak-y tɩ d kẽ!»

¹²La a leoka bãmb yaa: «Sɩd-sɩdã, mam ka mi yãmb ye.»

¹³Woto yĩnga, bɩ y gũ![5] Bala, yãmb ka mi daarã, wall wakatã ye.

¹⁴Arzãn soolmã leb n na n yɩɩ wa rao a yembr sẽn dat n tog sore, n bool a tʋmtʋmdbã, n dɩk a paoongã n pʋɩ-ba.

¹⁵A kõo ned a yembr talã a nu, n kõ a yiib soabã talã a yiibu, la a kõ tãabẽ soabã talã a yembre, n zems ned kam fãa sẽn tõe n tall n tʋme, la a bas n tog sore.

¹⁶A sẽn loog bal yee, la sẽn deeg-a talã a nu wã loog yã, n tɩ tall-b n leeb n paam yõod talã a nu n paase.

¹⁷Sẽn deeg-a talã a yiibã me maana a woto, n paam yõod talã a yiib n paase.

¹⁸La sẽn deeg-a talã a yembr tãa wã tɩ tuka bok tẽnga, n bus a zu-soabã ligdi.

¹⁹Sẽn wa n kaoose, tʋmtʋmd-kãens zu-soabã waame n zĩnd ne-b n na n geele.

²⁰Sẽn dag n deeg-a talã a nu wã kolgame, la a talla talã a nu wã a sẽn paamã n wa ne n yeele: «Zu-soaba, yãmb dag n kõo maam talã a nu. La ad talã a nu a taab mam sẽn tʋm n paame.»

²¹A zu-soabã yeel-a lame: «Yaa sõama, tʋmtʋmd sõng sẽn maand sɩda! Fo maana sɩd ne bũmb bilfu, la mam na n kɩtame tɩ fo ges bũmb wʋsg yelle. Wa n paam pʋɩɩr ne f zu-soabã sũ-noogo.»

²²Sẽn dag n deeg-a talã a yiibã me kolgame n yeele: «Zu-soaba, yãmb dag n kɩsa maam talã a yiibu, la ad talã a yiib a taab mam sẽn tʋm n paame.»

²³A zu-soabã yeel-a lame: «Yaa sõama, tʋmtʋmd sõng sẽn maand sɩda! Fo maana sɩd ne bũmb bilfu, la mam na n kɩtame tɩ fo ges bũmb wʋsg yelle. Wa n paam pʋɩɩr ne f zu-soabã sũ-noogo.»

²⁴Sẽn dag n deeg-a talã a yembr tãa wã yaool n kolgame n yeele: «Zu-soaba, mam dag n miime tɩ yãmb yaa nen-kɛgeng soaba, n kẽebd y sẽn ka bʋdẽ, la y wʋkd y sẽn ka yɛdgẽ ye.

²⁵Dẽ n kɩt tɩ rabeem yõk maam tɩ mam kẽng n tuk bok tẽng n solg y talã wã. Ad-y y talã wã! Deeg-y-yã‑a.»

²⁶A zu-soabã yeel-a lame: «Tʋmtʋmd-wẽng sẽn yaa kʋɩɩma, fo rag n miime tɩ mam kẽebda m sẽn ka bʋdẽ ye, la m wʋkd m sẽn ka yɛdgẽ ye.

²⁷Sã n yaa a woto, fo rag n tog n tɩ ningẽ‑la mam ligdã bãnkẽ, tɩ m sã n wa lebg n wa, bɩ m deeg-a ne yõodo.

²⁸Deeg-y-yã a talã wã n kõ ned ning sẽn tar-a talã piigã.

²⁹Bala, b na n kõo ned ning sẽn tar-a wã t'a paam hal wʋsgo, la sẽn ka tar-a wã, b na n deega baa bũmb bilf ning a sẽn tarã n bas-a.

³⁰La sã n yaa ne tʋmtʋmd ning sẽn ka-a yõodã, lob-y-yã-a lik bida sẽn be yɩngã pʋgẽ, beenẽ na n yɩɩ wiisg la yẽn wãbr n na n zĩndi.»

³¹Ninsaal Bi-riblã sã n wa ne b ziirã, la ne b malegsã fãa, b na n zaoonda b ziir geerã zugu.

³²Soolem toay‑toayã fãa neb na n tigma bãmb taoore. Bãmb na n welga nebã ne taab wa rũm-kɩɩm sẽn welgd piis ne bʋʋsã.

³³Bãmb na n ninga piisã b rɩtgo, la b ning bʋʋsã b goabga.

³⁴Dẽ, Rĩmã na n yeela sẽn be‑b bãmb dɩtgã yaa: «Yãmb dãmb sẽn tar m ba wã barkã, wa-y-yã! Reeg-y soolmã sẽn dag n segl yãmb yĩng hal dũni naaneg wakatã tɩ yɩ y pʋɩɩre.

³⁵Bala, kom yõka maam, la yãmb kõo maam dɩɩb tɩ m dɩ. Ko-yũud yõka maam, la yãmb kõo maam koom tɩ m yũ. Mam dag n yaa sãana, la yãmb sika maam y yiri.

³⁶Mam dag n yaa beelle, la yãmb kõo maam fuug tɩ m yeelge. Mam dag n yaa bãada, la yãmb waa n gesa maam. Mam dag n bee bi-bees roogẽ, la yãmb waa n gesa maam.»

³⁷La nin-tɩrsã na n yeelame: «Zu-soaba, dabʋr la tõnd yãnd yãmb tɩ kom tar yãmb tɩ tõnd kõ yãmb tɩ y rɩ, wall tɩ ko-yũud tar yãmb tɩ tõnd kõ yãmb koom tɩ y yũ?

³⁸Dabʋr la tõnd yãnd yãmb tɩ y ya sãan tɩ tõnd sik yãmb d yiri, wall tɩ y ya beell tɩ tõnd kõ yãmb fuugu tɩ yeelge?

³⁹Dabʋr la tõnd yãnd yãmb tɩ y ya bãada, wall y be bi-bees roogẽ tɩ tõnd wa n ges yãmba?»

⁴⁰Dẽ, Rĩma na n leoka bãmba: «Sɩd-sɩda, mam yeta yãmb tɩ wakat ning fãa yãmb sẽn maan bõn-kãens kom-kãensã sẽn yaa bõoneg n yɩɩda, la b ya mam ba-biisã, yaa maam la yãmb maan yã.»

⁴¹Dẽ poore, b na n yeela neb nins sẽn be-b bãmb goabgã yaa: «Yãmb dãmb kãab-wẽng sẽn be y zutã, zãag‑y ne maam! Kẽng-y bugum sẽn paad wakat sẽn kõn sa wã pʋgẽ, bugum ning sẽn segl sʋtãanã ne a malegsã yĩngã.

⁴²Bala, kom yõka maam, la yãmb ka kõ maam dɩɩb tɩ m dɩ ye. Ko-yũud yõka maam, la yãmb ka kõ maam koom tɩ m yũ ye.

⁴³Mam dag n yaa sãana, la yãmb ka sik maam y yir ye. Mam dag n yaa beelle, la yãmb ka kõ maam fuug tɩ m yeelg ye. Mam dag n yaa bãada, la mam zĩnda bi-bees roogẽ tɩ yãmb ka wa n ges maam ye.»

⁴⁴La bãmb me na n leokame yaa: «Zu-soaba, dabʋr la tõnd yãnd yãmb tɩ kom wall ko-yũud tar yãmba, wall y yaa sãan bɩ beelle, bɩ bãada, wall y be bi-bees roogẽ la keta tõnd n ka sõng yãmba?»

⁴⁵La b na n leoka bãmb yaa: «Sɩd-sɩda, mam yeta yãmb tɩ wakat ning fãa yãmb sẽn tõdg n ka maan kom-kãens sẽn yaa bõoneg n yɩɩd fãa wã ned a yembr bõn-kãense, yaa maam la yãmb ka maane.»

⁴⁶La nin-kãens na n kẽe sɩbgr sẽn kõn sa pʋgẽ, la nin-tɩrsã na n kẽe vɩɩm sẽn kõn sa pʋgẽ.