Read SEBR SÕNGO, 1998 A Matye koe‑noogo 4 Bible Online

A Matye koe‑noogo 4 - SEBR SÕNGO, 1998 bible

A Matye koe‑noogo 4

¹Dẽ, Sɩɩg-sõng talla a Zeezi n kẽng we-rasempʋɩɩgẽ tɩ sʋtãanã na n mak bãmba.

²La bãmb sẽn loe noor rasem pis-naase, wĩndg ne yʋngo, kom yaool n yõka bãmba.

³Dẽ sʋtãanã kolgame n yeel bãmb yaa: Yãmb sã n yaa Wẽnnaam Bi-ribla, bɩ y kɩt tɩ kug-kãensã lebg buri.

⁴A Zeezi leokame: «A gʋlsame tɩ ninsaal ka na n vɩ ne rɩɩb bal ye, la yaa ne goam nins fãa sẽn yit Wẽnnaam noorẽ wã.»

⁵Sʋtãanã talla bãmb n kẽng Zeruzalɛm, tẽn-sõngẽ wã, n zĩndg bãmb Wẽnd doogã zug n yeel-b yaa:

⁶«Yãmb sã n yaa Wẽnnaam Bi-ribla, bɩ y yɩk n tiims tẽnga, bala, a gʋlsame tɩ bãmb na n kɩtame tɩ b malegsã gũ yãmba, la b na n zãa yãmb ne b nusi, tɩ y naoor ra wa lak kugr ye.»

⁷A Zeezi yeela yẽnda yaa: «A gʋlsame me tɩ f ra mak Zu-soabã sẽn yaa fo Wẽnnaamã ye.»

⁸Sʋtãana leb n talla bãmb n kẽng tãn-lug-lug zugu, n wilg bãmb dũniyã soolem toay-toayã fãa ne b ziirã n yeel bãmb yaa:

⁹«Yãmb sã n wõgemd n waoog maam, mam na n kõo yãmb yõwã fãa.»

¹⁰A Zeezi yeela yẽnda: Kẽng n looge, Sʋtãanã! Bala, a gʋlsame tɩ f waoog Zu-soabã fo Wẽnnaam la f sak bãmb b yen bal tãa.

¹¹Dẽ, sʋtãana basa a Zeezi, la malegs waame n sõng bãmba.

¹²A Zeezi sẽn wʋm tɩ b kẽesa a Zã bi-bees roogo, b loogame n kẽng Galɩle.

¹³Bãmb yii Nazarɛt n kẽng Kapɛrnaom sẽn be ko-kãsengã noorã, Zabulõ ne Neftali soolmẽ wã,

¹⁴tɩ bũmb ningã Wẽnnaam no-rɛɛs a Ezayi sẽn dag n togsã paam pidsgu:

¹⁵Zabulõ tẽnga, Neftali tẽnga, sor sẽn dabd ko-kãsengã sẽnẽ n be Zʋrdẽ rʋʋnde, Galɩle, bu-zẽms sẽn vɩ a pʋgẽ,

¹⁶neb sẽn zĩ lik bida pʋgẽ wã yãnda vẽen-kãsenga, la vẽenem puka neb nins sẽn dag n zĩ kũum tẽngẽ la a maasmẽ wã yĩnga.

¹⁷Sẽn sɩng ne wakat-kãnga, a Zeezi sɩngame n moondẽ n yetẽ: «Tek-y yam n kos sugr tɩ arzãn soolem kolgame.»

¹⁸A Zeezi sẽn kẽng Galɩle ko-kãsengã noore, b yãnda raop a yiib sẽn yaa ba-biisi, a Sɩmo b sẽn boond t'a Pɩyɛɛr ne a ba-biig a Ãndere, tɩ b lobd zĩm-gãmbr ko-kãsengã pʋgẽ. Bãmb dag n yaa zĩm-yõagdba.

¹⁹A Zeezi yeel-b lame yaa: «Wa n tũ-y maam, tɩ m na n kɩtame tɩ y lebg nin-baoodba.»

²⁰Tao-tao bala, bãmb basa zĩm-gãmba wã n tũ a Zeezi.

²¹Bãmb sẽn kẽng taoor bilfu, b leb n yãnda raop a yiib sẽn yaa ba-biisi, a Zebde kom-dibli a Zak ne a ba-biig a Zã tɩ b be koom koglgẽ ne b ba a Zebde n tõgd b zĩm-gãmba. La a Zeezi bool-b lame.

²²Tao-tao bala, bãmb basa b koom-koglgã ne b ba wã n tũ a Zeezi.

²³A Zeezi saaga Galɩle soolmã fãa n zãms nebã b karen-dotã pʋse, n moon Wẽnnaam soolem koe-noogã, n maag bãad-dãmba, la koms-rãmb buud fãa sẽn be nebã sʋka.

²⁴Bãmb yʋʋr saaga Siiri soolem fãa, la b talla bãad-dãmba, ne neb nins fãa yĩns tood buud toay-toay sẽn namsdã, zĩn sẽn tar-b rãmba, la neb sẽn lʋɩt kisĩnkĩiri, la ki-boaga n wa bãmb nengẽ, la a Zeezi maaga bãmba.

²⁵Neb kʋʋng yii Galɩle ne Dekapoll la Zeruzalɛm ne Zʋʋde la tẽms sẽn be Zʋrdẽ rʋʋndã n tũ bãmba.