Read SEBR SÕNGO, 1998 A Matye koe‑noogo 5 Bible Online

A Matye koe‑noogo 5 - SEBR SÕNGO, 1998 bible

A Matye koe‑noogo 5

¹A Zeezi sẽn yã neb kʋʋngã, b rʋʋ tãng zug n zĩndi, la b karen-biisã kolga bãmba.

²Dẽ a Zeezi sɩngame n zãms bãmb n yeele:

³Bark bee sik-m-mens rãmbã zutu, bala arzãn soolem yaa bãmb dẽnda.

⁴Bark bee sũ-sãang rãmbã zutu, bala b na n paama belsgo.

⁵Bark bee sũ-maasem dãmbã zutu, bala b na n sooga dũniyã.

⁶Bark bee tɩrlem kom la a ko-yũud sẽn tar-b rãmbã zutu, bala b na n tɩgame.

⁷Bark bee nimbãan-zoɛtbã zutu, bala Wẽnnaam na n zoee bãmb me nimbãanega.

⁸Bark bee pʋ-peelem dãmbã zutu, bala bãmb na n yãnda Wẽnnaam.

⁹Bark bee zab-paasdbã zutu, bala b na n boola bãmb tɩ Wẽnnaam kamba.

¹⁰Bark bee neb nins b sẽn namsd‑b tɩrlmã yĩngã zutu, bala arzãn soolem yaa bãmb dẽnda.

¹¹Bark bee yãmb zutu, nebã sã n gomd yãmb wẽnga, la b namsd yãmba la b sa n sãamd yãmb yʋʋr mam yĩnga.

¹²Maan-y sũ-noog n kɩdme, yãmb keoor sẽn na n yɩ kãseng arzãn pʋgẽ wã yĩnga. Bala, b rag n namsa Wẽnnaam no-rɛɛsdbã sẽn deng yãmbã me a woto.

¹³Yãmb yaa dũniyã yamsem. La yamsem noosem sã n yi, ned na n yɩ a wãn t'a leb n lebg yamsem? A ka leb n tar yõod ye, a tɛk yaa b lob-a yɩng tɩ nebã tab-a ne nao.

¹⁴Yãmb yaa dũniyã vẽenem. Tẽng sẽn be tãng zug ka tõe n solg ye.

¹⁵Ned ka yõgend fɩtl n na n fõgen-a ne peoog ye. A na n dogl-a-la fɩtl doagendgã zug t'a kõt nebã fãa sẽn be roogã pʋgẽ wã vẽenem.

¹⁶ Bɩ yãmb vẽenem yãg a woto me nebã sʋka, tɩ bãmb tõe n yãnd yãmb tʋʋm‑sõamyã la b waoog yãmb ba sẽn be arzãnã.

¹⁷Da tags-y tɩ mam waame n na n sãam tõogã ne Wẽnnaam no-rɛɛsdbã noy ye. Mam ka wa n na n sãam-b ye, la yaa tɩ pids-ba.

¹⁸Bala, mam yeta yãmb sɩda, tɩ hal tɩ yĩngr la tẽng looge, ɩ[1] ba a yembr la kargr ba a yembr sẽn be tõogã pʋgẽ kõn loog hal tɩ fãa paam pidsg ye.

¹⁹Dẽ yĩnga, tõ-kãensã sʋka, ned sã n kɩɩs tõog a yembr sẽn yaa-a bilf n yɩɩda, la a zãms nebã tɩ b maan a woto, b na n boola yẽnda tɩ yao-zʋʋg arzãn soolmẽ. La b na n boola ned ning sẽn sakd-bã, la sẽn zãmsd nebã tɩ b sak-bã tɩ nin-kãseng arzãn soolmẽ.

²⁰Bala, mam yeta yãmb tɩ yãmb tɩrlmã sã n ka yɩɩg tõog karen-saam-dãmbã ne Fariizẽ-dãmbã tɩrlem, yãmb kõn kẽ arzãn soolmẽ ye.

²¹Yãmb wʋmame tɩ b rag n yeela kʋdem-dãmbã tɩ b ra kʋ ye, la tɩ ned sã n kʋ a to, a zemsame tɩ bʋ-kaoodbã kao a bʋʋdo.

²²La mam yeta yãmb tɩ ned sũur sã n yik ne a ba-biiga, a zemsame tɩ bʋ-kaoodbã kao yẽnda bʋʋdo. Ned sã n yeel a ba-biig t'a ka bark ye, a zemsame tɩ kaorengã yɛl bʋ-bʋʋdbã kao a bʋʋdo. La ned sã n yeel a ba-biig tɩ yalma, yẽnda soab zemsa bug-tẽnga.

²³Woto yĩnga, fo sã n wa ne f kũun tẽn-kugrã taoore, n zĩnd be n tẽeg tɩ f ba-biig n tar yell ne foom,

²⁴bɩ f bas f kũunã tẽn-kugrã taoore, n deng n kẽng n tɩ maneg f yellã ne f ba-biigã, n yaool n wa kõ f kũunã.

²⁵Maneg f yell ne f zabd-n-taagã tao-tao, yãmb sẽn ket n be sor zug n dabda, tɩ yẽnda ra ning foom bʋ-bʋʋdã nugẽ, tɩ bʋ-bʋʋdã ning foom gũud nugẽ t'a kẽes foom bi-bees roog ye.

²⁶Mam yeta foom sɩda, tɩ fo kõn yi be hal tɩ f yao-a a yaoolem lagf ye.

²⁷Yãmb wʋmame tɩ b rag n yeelame tɩ b ra yo ye.

²⁸La mam yeta yãmb tɩ ned ning fãa sẽn get pag ne ratem wẽng zoe n maana yoob ne-a a sũurẽ.

²⁹Fo rɩtg nifã sã n wat ne fo lʋɩɩs bɩ f feoog-a n lob yɩɩga, bala, fo yĩngã will a yembr sã n sãam n são b sẽn na n lob fo yĩngã tõr bug-tẽnga.

³⁰La fo nug‑rɩtg sã n wat ne fo lʋɩɩs bɩ f fiuug-a n lob yɩɩga, bala, fo yĩngã will a yembr sã n sãam n são b sẽn na n lob fo yĩngã tõr bug-tẽnga.

³¹B rag n yeelame tɩ ned sã n bas a pag bɩ a kõ-a baosg sebre.

³²La mam yeta yãmb tɩ ned sẽn basd a pag tɩ ka yoob yĩnga, a kɩtdame t'a kẽ yoobo. La ned ning fãa sẽn dɩkd pag b sẽn bas maanda yoobo.

³³Yãmb leb n wʋmame tɩ b rag n yeela kʋdem dãmbã a woto: «Da wẽen tɩ yaool n ka sɩd ye, la fo sẽn pʋlem Zu-soabã ne bũmb ninsã, pids-ba.»

³⁴La mam yeta yãmb tɩ y ra wẽen lae-lae ye. Da wẽen-y ne arzãn ye, bala a yaa Wẽnnaam geere.

³⁵Da wẽen-y ne tẽngã ye, bala a yaa bãmb nao roagendga. Da wẽen-y ne Zeruzalɛm ye, bala a yaa rĩm-kãseng tẽnga.

³⁶Da wẽen ne f zug me ye, bala fo ka tõe tɩ f zoobg ba a yembr lebg pɛɛlg bɩ sablg ye.

³⁷Bɩ yãmb n-yẽe yɩ n-yẽe, tɩ y ayo yɩ ayo. Sã n yɩɩd a woto, sẽn paasã yita wẽng soabã nengẽ.

³⁸Yãmb wʋmame tɩ b rag n yeelame tɩ nif nif yĩnga, la yẽnd yẽnd yĩnga.

³⁹La mam yeta yãmb tɩ y ra rok y sũur ne ned sẽn maand yãmb wẽng ye. Ned sã n wẽ fo rɩtg yɛgdgã pɛk bɩ f wẽnemd a to wã me n kɩs-a.

⁴⁰Ned sã n dat n bool foom bʋʋd zĩigẽ n deeg f fu-bila, bɩ f kɩs-a fu-kãsengã me.

⁴¹Ned sã n modg foom tɩ f yãag-a nao-yakem tusr bɩ f yãag-a nao-yakem tus a yiibu.

⁴²Ned sã n kos foom bũmb bɩ f kõ-a. La ned sã n dat n peng foom bũmb bɩ f ra mong-a ye.

⁴³Yãmb dag n wʋmame tɩ b yeelame tɩ f nong f to la f kisg f bɛyã.

⁴⁴La mam yeta yãmb tɩ y nong y bɛɛbã [la y ning neb nins sẽn kãabd yãmb wẽngã zut barka, la y maan neb nins sẽn kis yãmbã neere] la y pʋʋs neb nins sẽn maand yãmb wẽngã, la sẽn namsd yãmbã yĩnga,

⁴⁵tɩ yãmb tõe n yɩ yãmb ba sẽn be arzãnã kamba. Bala, bãmb kɩtdame tɩ bãmb wĩntoogã zẽkd nin-wẽnse, la nin-sõamyã yĩnga, la b kɩtdẽ tɩ saagã niid nin-tɩrse, la sẽn ka-b tɩrsã yĩnga.

⁴⁶Yãmb sã n nong neb nins sẽn nong yãmbã bala, bõe keoor la yãmb na n paame? Yaood dɛɛgdbã me ka maand a woto sɩda?

⁴⁷La yãmb sã n pʋʋsd y ba-biisã bala, bõe la yãmb maand n yɩɩd y taabã? Neb nins sẽn ka pʋʋsd Wẽnnaamã me ka maand a woto sɩda?

⁴⁸Dẽ yĩnga, bɩ yãmb yɩ neb sẽn zems zãnga, a wa yãmb ba sẽn be arzãnã sẽn zems zãngã.