Read SEBR SÕNGO, 1998 A Matye koe‑noogo 6 Bible Online

A Matye koe‑noogo 6 - SEBR SÕNGO, 1998 bible

A Matye koe‑noogo 6

¹Gũus-y y mens n da tʋm tẽebã tʋʋm nebã nin gesg yĩng tɩ b tõe n yãnd yãmb ye. Y sã n maan a woto, yãmb kõn paam keoor yãmb ba sẽn be arzãnã nengẽ ye.

²Woto yĩnga, fo sã n na n sõng naong rãmba, da kɩt tɩ b peeb baorg fo taoor wa zãmb dãmbã sẽn maand karen-dotẽ la soayã zut tɩ nebã tõe n waoog-bã ye. Mam yeta yãmb sɩd tɩ bãmb zoe n paamda b keoore.

³La fo sã n kõt naong rãmba, da sak tɩ f nug-goabg bãng f nug-rɩtgã sẽn maand bũmb ningã ye.

⁴Woto, fo kũunã na n yɩɩ soosgo, la fo ba sẽn yã tɩ fo soosame n kõ wã, bãmb na keo foom.

⁵Yãmb sã n pʋʋsdẽ, bɩ y ra maan wa zãmb dãmbã sẽn maandã ye: bãmb nong n yalsda yĩngri, karen-dotẽ la so-tiisẽ n pʋʋsdẽ, tɩ nebã tõe n yãnd bãmba. Mam yeta yãmb sɩd tɩ bãmb zoee n paamda b keoore.

⁶La fo sã n na n pʋʋse, kẽ f roogẽ n pag kʋɩlenga, n pʋʋs f ba sẽn be zĩig sẽn solge. La fo ba sẽn yã tɩ fo soosame n pʋʋse, bãmb na n keoo foom.

⁷Yãmb sã n pʋʋsdẽ, bɩ y ra gom n leb n gom gom-vɩɩd wa buud a taabã sẽn maandã ye. Bãmb tẽedame tɩ b goamã wʋsgã yĩnga, Wẽnnaam na n leoka bãmb pʋʋsgã.

⁸Da yɩ-y wa bãmb ye, bala sẽn deng yãmb sẽn na n kosã, yãmb ba wã zoe n mii bũmb nins yãmb sẽn datã.

⁹Woto yĩnga, ad yãmb sẽn tog n pʋʋs to-to: Tõnd ba sẽn be arzãna, bɩ yãmb yʋʋrã paam waoogre,

¹⁰tɩ yãmb soolmã wa, tɩ yãmb daab maan tẽng zug wa sẽn maand arzãnã.

¹¹Kõ-y tõnd d daar woo daar dɩɩbã dũndã.

¹²Kõ-y tõnd sugr d beegr yĩnga, a wa tõnd me sẽn kõt d bɛɛgdbã sugrã.

¹³Da bas-y tõnd tɩ d kẽ makr pʋgẽ ye. Fãag-y tõnd wẽng soabã nugẽ, [tɩ yãmb n so soolem la pãnga la waoogre, wakat sẽn kõn sa. Ãmina!]

¹⁴Yãmb sã n kõ nebã sugr b beegr yĩnga, yãmb ba sẽn be arzãnã na n kõo yãmb me sugri.

¹⁵La yãmb sã n ka kõ nebã sugr b beegr yĩnga, yãmb ba kõn kõ yãmb me sugr y beegrã yĩng ye.

¹⁶Yãmb sã n loe noore, bɩ y ra gãnem y nens wa zãmb dãmbã sẽn gãnemd b nens tɩ wilg nebã tɩ bãmb loee noorã ye. Mam yeta yãmb sɩd tɩ bãmb zoe n paamda b keoore.

¹⁷La foom, fo sã n loe noor bɩ f sõog f zug kaam la f widg f nenga,

¹⁸tɩ fo no-loeerã ra yɩ nebã nin gesg yĩng ye, la a na n yɩ f ba sẽn be zĩig sẽn solgã yĩnga. La f baaba sẽn yã tɩ fo soosame n loe noorã, bãmb na keo foom.

¹⁹Da bĩng‑y paoong yãmb yĩng dũniyã zug ka tɩ mogd bɩ tẽngempiisim sãamd-b lame, la wagda kẽed n wʋkdame.

²⁰Bĩng-y yãmb paoongã arzãna, tɩ mogd bɩ tẽngempiisim ka sãamd-a be ye, la wagda ka kẽed be n wʋk-a ye.

²¹Bala, fo paoong sẽn be zĩig ningã, fo sũur me na n zĩnda beenẽ.

²²Nif yaa yĩng fɩtla. Fo nif sã n yaa sõama, fo yĩngã tõr na n pida ne vẽenem.

²³La fo nif sã n ka sõama, fo yĩngã tõr na n yɩɩ lika. Dẽ yĩnga, vẽenem ning sẽn be fo pʋgẽ wã sã n yaa lika, lik-kãng na n yɩɩ bida.

²⁴Ned ba a yembr ka tõe n sak zu-soben-dãmb a yiib ye. Bala, a na n kisga a yembr la a nong a to wã, wala a loe a meng ne a yembr la a paoog a to wã. Yãmb ka tõe n sak Wẽnnaam la y sak arzegs me ye.

²⁵Dẽ n kɩt tɩ mam yet yãmb tɩ y ra maan yɩɩr ne y vɩɩmã yelle, yãmb sẽn na n dɩ bũmb ninga, la y sẽn na n yũ bũmb ninga, wala y maan yɩɩr ne y yĩngã yelle, yãmb sẽn na n yeelg bũmb ningã ye. Vɩɩm ka yɩɩd dɩɩb la, bɩ yĩng ka yɩɩd futu?

²⁶Ges-y bõn-pɩgsã sẽn yɩgd yĩngrã. Bãmb ka bʋta, b ka tigsda, b ka suiid baoẽ ye. La yãmb ba sẽn be arzãnã rɩlgda bãmba. Yãmb ka yɩɩd bãmb wʋsg sɩda?

²⁷Yãmb ned a bõe n tõe n paas a vɩɩmã woglem kãntɩɩg a yembr tãa a sẽn maand yɩɩr yĩnga?

²⁸La yaa bõe tɩ y na n maan yɩɩr ne fut yelle? Tags-y weoog rulg-lɛlem sẽn bɩt to-to wã yelle. Bãmb ka tʋmda, b ka wĩid lamd me ye.

²⁹La baoosgo, mam yeta yãmb t'a Salmo mengã ne a sẽn dag n tar ziir to‑to wã fãa, ka tõog n yeelg a meng tɩ be neer n ta rulg lelemd a yembr ye.

³⁰Yãmb tẽeb bilf rãmba! Sã n yaa tɩ Wẽnnaam nagsa mood ning sẽn be weoogẽ dũndã n na n dɩ bugum beoogã, woto, bãmb kõn ges yãmb fut yell n yɩɩd sɩda?

³¹Dẽ yĩnga, bɩ y da maan yɩɩr n sokd y mens y sẽn na n dɩ wall y sẽn na n yũ bũmb ninga, wall y sẽn na n yeelg bũmb ninga ye.

³²Bala, yaa neb nins sẽn ka pʋʋsd Wẽnnaamã n baood bõn-kãense. Yãmb ba sẽn be arzãnã miime tɩ yãmb data bõn-kãense.

³³Deng‑y n bao-y Wẽnnaam soolmã ne bãmb tɩrlmã, la b na n kõo yãmb bõn-kãens fãa n paase.

³⁴Dẽ yĩnga, bɩ y da maan yɩɩr ne beoog yell ye, bala, daar fãa yell sek-a lame.