Read SEBR SÕNGO, 1998 A Matye koe‑noogo 7 Bible Online

A Matye koe‑noogo 7 - SEBR SÕNGO, 1998 bible

A Matye koe‑noogo 7

¹Da bʋ-y neb a taab bʋʋdo, tɩ b ra wa bʋ yãmb bʋʋd ye.

²Bala, yãmb sẽn bʋʋd nebã bʋʋd to-to wã, b na n bʋʋ yãmb me bʋʋd a woto. Yaa ne makdg ning yãmb sẽn tar n makdẽ wã la b na n mak n lebs yãmba.

³Yaa bõe tɩ fo ne moogã sẽn be f ba-biigã nifẽ n yaool n ka ne sug-raoogã sẽn be fo mengã nifẽ wã?

⁴Walla fo na n maana a wãn n yeel f ba-biig t'a bas tɩ f yãk moog sẽn be a nifẽ, tɩ sug-raoog yaool n be f rẽndẽ?

⁵Zãmb soaba! Reng n yãk sug-raoogã sẽn be fo nifẽ wã n yaool n tõog n yãnd moogã sẽn be f ba-biigã nifẽ wã neer n yãke.

⁶Da rɩk-y bõn-sõama n kõ baas ye, la y da rɩk y kĩndi n lob kurkuy taoor tɩ b tõe n tab-b-la ne b nao la b wẽnemd n pogl yãmba.

⁷Kos-y tɩ b na n kõ-y lame. Bao-y tɩ y na n yãndame. Kabs-y tɩ b na n paka kʋɩlengã tɩ y kẽ.

⁸Bala, ned ning sẽn kot‑a na paame, ned ning sẽn baood‑a na n yãndame, la b na n paka kʋɩleng tɩ ned ning sẽn kabsd kẽ.

⁹Ãnda yãmb sʋkã biig n na n kos-a bur t'a kõ-a kugri?

¹⁰Wall a kos-a zĩnf t'a kõ-a waafo?

¹¹Dẽ, yãmb sẽn yaa nin-wẽnsã sã n mi tɩ kõ y kambã bõn-sõama, ka Wẽnnaam n mi n yɩɩd n na n kõ neb nins sẽn kot bãmbã bõn-sõama sɩda?

¹²Yãmb sẽn dat tɩ nebã maan yãmb bũmb ningã, bɩ yãmb me maan bõn-kãens me n kõ‑ba. Yõwã yaa Wẽnnaam tõogo la b no-rɛɛsdbã noore.

¹³Tũ-y zag-no-sẽkã n kẽ. Bala, zag-noor ning sẽn kẽesd sãoong zĩigẽ wã, ne sor ning sẽn dabd-a be wã yaa yalemse, la neb wʋsg n tũud be.

¹⁴La zag-noor ning sẽn kẽesd vɩɩm pʋgẽ wã yaa sẽka, tɩ sor ning sẽn dabd-a be wã yaa bãanega, la yaa neb bilf bal n yãt-a.

¹⁵Gũus-y yãmb mens ne zĩrẽ no‑rɛɛsdbã sẽn wat yãmb sʋk wa piis tɩ b pʋsẽ wã, b yaa digd-n-yĩid-toosã.

¹⁶Biis nins bãmb sẽn womdã n na n kɩt tɩ yãmb bãng-ba. Dẽ yĩnga yãmb kaooda sib kɛglg zugu, walla y wobd kankam gõpayãndg zugu?

¹⁷Tɩ-sõng fãa womda bi-sõama, la tɩ-wẽng fãa womda bi-yoodo.

¹⁸Tɩ-sõng ka tõe n wom bi-yood ye, la tɩ-wẽng me ka tõe n wom bi-sõama ye.

¹⁹B kɛɛda tɩɩg ning fãa sẽn ka womd bi-sõama wã n tugund bugum.

²⁰Dẽ, yaa ne biis nins bãmb sẽn womdã la yãmb na n bãng-ba.

²¹Ka ned ning fãa sẽn boond maam tɩ Zu-soaba! Zu-soaba! N na n kẽ arzãn soolmẽ ye. Yaa ned ning bal sẽn maand-a mam ba sẽn be arzãnã raab n na n kẽ.

²²Badaare, neb wʋsg na n yeela maam yaa: Zu-soaba! Zu-soaba! Tõnd dag n ka togs bãngr goam ne yãmb yʋʋre, la d dig zĩn-dãmb ne yãmb yʋʋre, la d maan bõn-bãn wʋsg ne yãmb yʋʋr sɩda?

²³La mam na n yeel-b lame: «Mam zɩ n bãng yãmb lɛ-lɛ. Tʋʋm-wẽns maandbã, yi-y mam taoore.»

²⁴Woto yĩnga, ned ning fãa sẽn wʋmd goam nins mam sẽn yetã n tũudẽ, yẽnda na n yɩɩ wa yam soab sẽn me a roog kugr zugu.

²⁵Saag niime, koom zoee wʋsgo, sobg fugame n wẽ roogã la a ka lʋɩ ye. Bala, b yẽbg‑a‑la pĩig zugu.

²⁶La ned ning fãa sẽn wʋmd goam nins mam sẽn yetã n ka sakdẽ, yẽnda na n yɩɩ wa yalem sẽn me a roog bĩisr zugu.

²⁷Saag niime, koom zoee wʋsgo, sobg fugame n wẽ roogã. A lʋɩɩme, la a sãoongã yɩɩ kãsenga.

²⁸A Zeezi sẽn gom koe-kãens n sa, bãmb zãmsgã yɛɛsa nebã.

²⁹Bala, bãmb zãmsa nebã wala ned sẽn tar noor ne a sẽn maandã, la a ka wa bãmb tõog karen-saam-dãmbã ye.