Read SEBR SÕNGO, 1998 A Mark koe‑noogo 3 Bible Online

A Mark koe‑noogo 3 - SEBR SÕNGO, 1998 bible

A Mark koe‑noogo 3

¹A Zeezi leb n kẽe karen-doogã pʋgẽ, la rao a yembr n dag n be be t'a nug ki.

²La Fariizẽ-dãmbã gũusa a Zeezi n dat n bãng b sã n na n maaga yẽnda Zʋɩf-rãmbã vʋʋsgã daare, sẽn na n yɩlẽ n paam n dõd bãmba.

³A Zeezi yeela rao ningã nug sẽn ki wã yaa: «Yik n yaas sʋk ka!»

⁴La b soka Fariizẽ-dãmbã yaa: «Dẽ yĩnga, noor beeme tɩ maan neer vʋʋsgã daar bɩ, bɩ tɩ maan wẽnga? Tɩ fãag ned bɩ, bɩ tɩ kʋ-a? La b sĩndame.»

⁵A Zeezi wẽneg n gesa b fãa ne sũ-yikri la ne sũ-sãanga, b sũyã sẽn diglmã yĩngã. La b yeela raoã yaa: «Tẽeg f nugã.» Raoã tẽegame la a nugã vʋʋgame.

⁶Fariizẽ-dãmbã yiime n yẽs ne a Erood poorẽ dãmba[1] tao-tao n bao b sẽn na n maan to-to n menes a Zeezi.

⁷A Zeezi ne b karen-biisã kẽnga ko‑kãsengã sẽnẽ. La neb wʋsg yii Galɩle, la Zʋʋde, la Zeruzalɛm, la Yidume, la Zʋrdẽ rʋʋnde, la Tɩɩr ne Sɩdõ tẽmse, n tũ bãmba.

⁸Neb kʋʋng‑kʋʋng sẽn wʋm bũmb nins fãa bãmb sẽn maanã waa bãmb nengẽ.

⁹A Zeezi yeela b karen-biisã tɩ b pẽneg kogl-bil yam-yam wakat fãa bãmb yĩnga, tɩ kʋʋngã ra wa n dɩdg bãmb ye.

¹⁰Bãmb sẽn maagd neb wʋsgã yĩng kɩtame tɩ bãad-dãmb wʋsg dag n maoodẽ n dɩdgd taab n dat n sɩɩs bãmba.

¹¹Zĩn-dãmb nins sẽn yaa rẽgdã sã n yãnd bãmba, b wõgemdeda bãmb taoor n kelem n yeele: «Yãmb yaa Wẽnnaam Bi-ribla.»

¹²La a Zeezi rag n tãsd‑b lame tɩ b sĩndi la b ra moon b yʋʋrã ye.

¹³Rẽ zugẽ, bãmb dʋʋ tãngã n bool b sẽn dat b rãmbã tɩ b wa bãmb nengẽ.

¹⁴Bãmb yãka raop piig la a yiib tɩ b pa ne bãmba,

¹⁵tɩ b tõe n tʋm-b tɩ b tɩ moon koe-noogã, ne pãn-tõog tɩ rig zĩn-dãmba.

¹⁶Ad raop piig la a yiibã bãmb sẽn yãkã: a Sɩmo b sẽn pʋd a yʋʋr t'a Pɩyɛɛre,

¹⁷a Zak sẽn yaa a Zebde biigã, ne a ba-biig a Zã, a Zeezi sẽn pʋd b yʋy tɩ Boanergɛɛse, sẽn dat n yeel tɩ sa-kɛlems kamba,

¹⁸a Ãndere, a Filipi, a Bartelemi, a Matye, a Toma, a Alfe biig a Zake, a Tade,

¹⁹a Sɩmo sẽn boond tɩ zelot la a Zʋdaas Iskaryo, ned ning sẽn zãmb-a a Zeezi wã.

²⁰A Zeezi kuila yir ne b karen-biisã. La neb kʋʋng wʋsg tigma taab yɛs hal tɩ bãmb ka tar sẽk n na n dɩ ye.

²¹A Zeezi roagdbã sẽn wʋm bõn-kãnga, b waame n na n peeg-ba, bala, b rag n tagsdame t'a Zeezi rag n zʋbsdame.

²²La tõog karen-saam-dãmbã sẽn yi Zeruzalɛmã yeelame: Belzebull n so bãmba. Bãmb digda zĩn-dãmbã ne zĩn-dãmbã naab pãnga.

²³A Zeezi boola bãmba, n gom ne bãmb ne yel-bũnd n yeele: «Sʋtãanã na n yɩɩ a wãn n dig sʋtãana?

²⁴Soolem neb sã n welg taab n gõdg n zabd ne taaba, soolem‑kãng na wã.

²⁵La yir a yembr neb sã n welg taab n gõdg n zabd ne taaba, yi-kãng na wã.

²⁶Woto, Sʋtãanã sã n zabd ne a menga, a welgame la a ka tõe n yals ye, a yell sãamame.

²⁷Ned ka tõe n kẽ pãng soab roogẽ n wʋk a teedo, a sã n ka reng n sẽb-a ye. La a sã n sẽb-a, a tõe n yaool n wʋka a roogã teedo.

²⁸Mam yeta yãmb sɩd tɩ ninsaalbã yel-wẽnã fãa b sẽn maandã, la paoogr nins fãa b sẽn paoogdã tõe n paama sugri.

²⁹La ned sã n paoog Sɩɩg-sõngo, a ka tõe n paam sugr abada. Yel-wẽn‑kãng paada ne-a wakat sẽn kõn sa.»

³⁰A Zeezi goma a woto b sẽn yeel tɩ zĩn-dẽgd n tar bãmbã yĩnga.

³¹A Zeezi ma ne b ma-biis waa n yalsa yɩng n tʋm tɩ b bool-b tɩ b wa.

³²Kʋʋngã rag n zĩndame n gũbg bãmba, la b yeela a Zeezi yaa: «Ad y ma ne y ma-biisã bee yɩng n baood yãmba.»

³³La b leokame: «Mam ma yaa ãnda, la m ma-biis yaa ãnda rãmba?

³⁴La b wẽnemdame n ges neb nins sẽn zĩ n gũbg bãmbã n yeele: Ad m ma ne m ma-biisi.

³⁵Bala, ned ningã fãa sẽn maand-a Wẽnnaam daabo, ada soab n yaa mam ma-bi-raoogo, la m ma-bi-poaka, la m ma.»