Read SEBR SÕNGO, 1998 A Mark koe‑noogo 9 Bible Online

A Mark koe‑noogo 9 - SEBR SÕNGO, 1998 bible

A Mark koe‑noogo 9

¹A Zeezi leb n yeela nebã yaa: «Sɩd‑sɩda mam yeta yãmba, tɩ yãmb neb kẽer kõn ki tɩ b ka yãnd Wẽnnaam soolmã sẽn wat ne pãng la ziir ye.»

²Rasem a yoob zugẽ, a Zeezi peega a Pɩyɛɛr ne a Zã la a Zak n tall-b n yi kɛɛnga, n dʋ tãn-lug-lug zugu, zĩig neb sẽn ka be. La a Zeezi tedga bãmb taoore.

³Bãmb futã rag n pɩndame, n yaa peels n yɩɩd dũni neb sẽn tõe n kɩt tɩ yɩ.

⁴A Eli ne a Moyiis puka bãmb taoore, n gom ne a Zeezi.

⁵A Pɩyɛɛr yeela a Zeezi yaa: «Karen-saamba, yaa sõama tɩ tõnd pa ka, tɩ d tilg fu-rot a tãabo: a yembr yãmb yĩnga, a yembr a Moyiis yĩnga, la a yembr a Eli yĩnga.»

⁶A rag n ka mi a sẽn yet ye. Bala, rabeem kãseng n dag n kẽ-ba.

⁷Sawadg waa n luda bãmba, la koɛɛg yii sawadgẽ wã n yeele: «Ad‑a yaa mam Bi-ribl-nongre. Kelg-y-yã-a.»

⁸Tao-tao bala, karen-biisã wẽnesame n ges zĩiga fãa, la b ka yã ned a to, sã n ka a Zeezi bal sẽn yɛs ne bãmbã ye.

⁹Bãmb sẽn sigd tãngã, a Zeezi yeela b karen-biisã tɩ b ra saag n togs ned bũmb nins b sẽn yã wã, hal tɩ Ninsaal Bi-riblã vʋʋg n bas kũum ye.

¹⁰Bãmb talla koe-kãng bãmb sʋka, la b soka taab tɩ vʋʋg n bas kũumã› võor yaa bõe?

¹¹Karen-biisã soka bãmb woto: «Yaa bõe tɩ tõog karen-saam-dãmbã yetẽ tɩ yaa tɩlɛ t'a Eli reng n wa?»

¹²Bãmb leok-b lame yaa: «Sɩda, a Eli n na n deng n wa n lebs n maneg bũmba fãa. La yaa bõe tɩ b gʋls tɩ yaa tɩlɛ tɩ Ninsaal Bi-riblã nams wʋsgo la b paam paoogre?

¹³La mam yeta yãmb t'a Eli waame, la nebã maana yẽnda wa b sẽn date, wa b sẽn pĩnd n gʋls n gom a yellã.»

¹⁴La bãmb sẽn kolg b karen-biis a taabã nengẽ, bãmb yãnda neb kʋʋng wʋsg sẽn gũbg bãmba, la tõog karen-saam-dãmb sẽn wẽed nokoɛɛm ne bãmba.

¹⁵La nebã sẽn yã a Zeezi wã, a ling-b‑la wʋsgo, la b zoeeme n tɩ pʋʋs-ba.

¹⁶A Zeezi soka nebã: «Yaa bõe yell la yãmb gomd ne bãmba?»

¹⁷La rao a yembr n zĩnd kʋʋngã sʋk n leok bãmba: «Karen-saamba, mam waa ne m biig yãmb nengẽ. Zĩn sẽn kɩtd tɩ ned lebg mukã n tar-a.

¹⁸A sẽn yõk-a zĩig ning fãa, a lubd-a-la tẽnga tɩ tãntãmpuud yit a noorẽ wã, tɩ biigã wãbd a yẽn n tɩrdẽ. La mam kosa yãmb karen-biisã tɩ b rig zĩnã la b ka tõog ye.

¹⁹A Zeezi leoka bãmba: «Yãmba, zamaan‑kãngã neb sẽn ka tẽebo, mam na n zĩnda ne yãmb hal tɩ ta wakat bʋgo? Mam na n maana sũ-mar ne yãmb hal tɩ ta wakat bʋgo? Tall-y biigã n wa ka.»

²⁰La b tall-a lame n wa bãmb nengẽ. Tao-tao bala, zĩnã sẽn yã a Zeezi, a rĩmsa biigã ne pãnga, hal t'a lʋɩ tẽng n bilimdẽ t'a tãntãmpuud yita.»

²¹A Zeezi soka a ba wã yaa: «Wakat bʋg la a sɩng n maand biigã a woto?» Yẽnda leokame: «Hal a yãadem wakate.

²²La naoor wʋsgo, a lub-a-la bugmẽ bɩ koomẽ n dat n kʋ-a. La yãmb sã n tõe n maana bũmb bɩ y zoe d nimbãaneg n sõng-do.»

²³A Zeezi yeela yẽnda yaa: «Yãmb sã n tõe? Ned ning fãa sẽn tẽed tõee bũmb fãa.»

²⁴Tao-tao bala, biigã ba zẽka a koɛɛg n yeele: «Mam tẽedame. Sõng-y‑ma, tɩ m tẽebã paoodame.»

²⁵A Zeezi sẽn yã kʋʋngã sẽn zoet n watẽ wã, bãmb lenga zĩn-dẽgdã n yeel-a: «Zĩn sẽn maand ned t'a lebg muk la wʋngã, mam yeta foom, yi n bas biigã la f ra leb n kẽ-a yɛs ye.»

²⁶La zĩnã kelmame, n zugs biigã ne pãng t'a lebg wa kũum, la a yi n bas-a. Neb kẽer yeelame t'a kiime.

²⁷La a Zeezi gãda a nug n zẽk-a, la a yik n yalsa yĩngri.

²⁸Wakat ning a Zeezi sẽn kẽ roogẽ tɩ neb a taab ka be be, bãmb karen-biisã soka bãmb yaa: «Bõe tɩ tõnd ka tõog n dig zĩn-kãngã?»

²⁹A Zeezi yeela bãmba: «Zĩn‑kãngã buud ka yita, tɩ sã n ka ne pʋʋsg ye.»

³⁰Bãmb yii be n pɩʋʋg Galɩle. La a Zeezi rag n ka rat tɩ ned bãng bãmb sẽn beẽ ye.

³¹Bala, bãmb zãmsa b karen-biisã n yeele: «B na n ninga Ninsaal Bi-riblã neb nusẽ. B na n kʋ-b lame, la b kʋʋbã rasem a tãab daare, b na n vʋʋgame.»

³²La bãmb karen-biisã ka wʋm gom‑kãng võor ye, la b zoee rabeem n ka sok bãmb ye.

³³Bãmb taa Kapɛrnaom, la a Zeezi sẽn kẽ roogẽ, b soka b karen-biisã: «Yaa bõe poorẽ la yãmb dag n wẽed nokoeemd ne taab sorã zugã?»

³⁴La b sĩndame, bala, bãmb sẽn dag n be sorã zugã, b rag n wẽeda nokoeemd ne taab n dat n bãng sẽn yaa-a kãseng n yɩɩd bãmb sʋka.

³⁵ Dẽ, a Zeezi zĩndame n bool b karen-biis piig la a yiibã n yeel-b yaa: «Ned sã n dat n yɩ taoor soaba, bɩ a yɩ nebã fãa poorẽ soaba, la nebã fãa tʋmtʋmda.»

³⁶Bãmb peega bi-bilfu n yals-a bãmb sʋka, n mobg-a n yeel b karen-biisã yaa:

³⁷«Ned sã n deeg bi-bilf a woto mam yĩnga, yaa maam la a reeg yã. La ned sã n deeg maam, ka maam la a reeg ye, yaa sẽn tʋm-a maamã la a reeg yã.»

³⁸A Zã yeela bãmb yaa: «Karen-saamba, tõnd yãnda rao a yembr t'a rigd zĩn-dãmb ne yãmb yʋʋre, n yaool n ka tõnd tũud-n-taag ye. La tõnd gɩdg-a lame a sẽn ka tũud tõndã yĩnga.»

³⁹A Zeezi leokame n yeele: «Da gɩdg-y-yã-a ye. Bala, ned ka be sẽn na n maan bõn-bãnd ne mam yʋʋre, n wẽneg n sãbs maam ye.

⁴⁰Ned sã n ka kis tõndo, a bee ne tõndo.

⁴¹Mam yeta yãmb sɩda, tɩ ned ning fãa sẽn na n kõ yãmb koom tɩ y yũ yãmb sẽn yaa Kiris nebã yĩnga, a soab kõn kong a keoor ye.»

⁴²La ned sã n maan kom-bãooneg kãens sẽn tẽed maamã ned a yembr t'a lʋɩ, sẽn yaa neer n yɩɩd a soab yĩnga, yaa b sẽn na n loe a yubl ne neer kugr n lob-a ko-kãsengã pʋgẽ.

⁴³ Fo nug sã n kɩt tɩ f lʋɩ yel‑wẽnd pʋgẽ bɩ f fiuug‑a tɩ fo sẽn na n kẽ vɩɩm sẽn kõn sɛ pʋgẽ ne nug yende, rẽ sãoo fo sẽn na n kẽ bugum sẽn ka kiid pʋgẽ ne f nus a yiibã. Fo nug sã n dat n maan foom tɩ f lʋɩ, bɩ f fiuug-a. Yaa neer tɩ fo yɩ nug-yend n paam vɩɩm sẽn kõn sa, n yɩɩd fo sẽn na n tall f nus a yiibã n tɩ kẽ bug-tẽnga, bugum sẽn ka kiid pʋgẽ,

⁴⁴[zĩig ning bãmb zũnzũy sẽn ka kiida la bugum sẽn ka kiida.]

⁴⁵Fo naoor sã n dat n maan foom tɩ f lʋɩ, bɩ f fiuug-a. Yaa neer tɩ fo yɩ nao-yende, n paam vɩɩm sẽn kõn sa, n yɩɩd fo sẽn na n tall f nao a yiibã n tɩ kẽ bug-tẽnga,

⁴⁶[zĩig ning bãmb zũnzũy sẽn ka kiida, la bugum sẽn ka kiida.]

⁴⁷Fo nif sã n dat n maan foom tɩ f lʋɩ, bɩ f feoog-a. Yaa neer tɩ f yɩ nin-feoog n kẽ Wẽnnaam soolmẽ, n yɩɩd tɩ tall f nin a yiibã n tɩ kẽ bug-tẽnga,

⁴⁸«zĩig ning bãmb zũnzũy sẽn ka kiida la bugum sẽn ka kiida.»

⁴⁹Bala, ned fãa na n paama yuglg ne bugum wa yamsem.

⁵⁰Yamsem yaa bõn-sõngo. La yamsem noosem sã n yi, yãmb na n maana bõe t'a leb n yɩ noogo? Tall-y yamsem noosem n zĩnd ne taab ne laafɩ.