Read SEBR SÕNGO, 1998 A Luk koe‑noogo 1 Bible Online

A Luk koe‑noogo 1 - SEBR SÕNGO, 1998 bible

A Luk koe‑noogo 1

¹Neb wʋsg makame n gʋls bũmb nins sẽn maan tõnd sʋkã.

²B sẽn gʋlsã zemsa wa neb nins sẽn dag n yãnd yellã hal a sɩngrẽ sẽn togs tõndã, la b lebg koe-noogã moaandbã.

³Teofill sõngo, mam sẽn fees n bao n bãng fãa neb nins sẽn bils maamã nengẽ wã, mam tagsame tɩ yaa neer tɩ mam me gʋls yãmb n wilg yɛlã sẽn pʋg taab to-to,

⁴tɩ yãmb tõe n deeg tɩ bũmb nins b sẽn dag n zãms yãmbã yaa sɩda.

⁵Wakat ning a Erood sẽn dag n yaa Zʋʋde rĩmã, maan-kʋʋd a ye n dag n be tɩ b boond t'a Zakari. Yẽnda yaa maan-kʋʋd a Abiya sull a ye neda. A pagã yaa maan-kʋʋd kãsem a Aarõ yagenga, la a yʋʋr la a Elizabɛte.

⁶Bãmb b yiibã fãa dag n yaa nin-tɩrs Wẽnnaam nifẽ, la b da sakda Zu-soabã tõodã la b noyã fãa sõama.

⁷La b rag n ka tar biig ye. Bala, a Elizabɛt da yaa kiiri, la b yiibã fãa da kʋʋlame.

⁸Daar a yembre, a Zakari buudã sẽn da tog n ges maoongã yelle, a Zakari dag n maanda maan-kʋʋr tʋʋmdã Wẽnnaam taoore.

⁹Bala, b dag n maana bãnde, wa sẽn zems maan-kʋʋdbã miningu, n yãk yẽnda t'a kẽ Zu-soabã roogẽ wã n yõog wisdã.

¹⁰La neb kʋʋngã dag n bee yɩng wisdã yõogr wakat n pʋʋsdẽ.

¹¹La Zu-soabã malɛɛk puka a meng ne a Zakari, n yas wisdã yõogr tẽn-kugrã rɩtgo.

¹²La a Zakari sẽn yã malɛɛkã, a yɛɛsame, tɩ rabeem yõk-a.

¹³Malɛɛkã yeela yẽnda yaa: Zakari, da zoe rabeem ye, bala, Wẽnnaam leoka fo pʋʋsgo. Fo pag a Elizabɛt na n doga bi-ribl n kõ-fo. La fo na n pʋda a yʋʋr t'a Zã.

¹⁴Fo na n paama sũ-noog n kɩdme, la neb wʋsg na n maana sũ-noog a rogmã yĩnga.

¹⁵Bala, yẽnda na n yɩɩ nin-kãseng Zu-soabã nifẽ. Yẽnda kõn yũ reezẽ rãam wall bõn-yũudl sẽn yilimd neng ye. Sɩɩg-sõng na n pida yẽnda a ma sẽn na n dog-a wakat bala.

¹⁶A na n kɩtame tɩ Israyɛll kamb wʋsg lebg n wa Zu-soabã sẽn yaa bãmb Wẽnnaamã nengẽ.

¹⁷Yẽnda na n kẽna Wẽnnaam taoor ne sɩɩg ning la pãng ning a Eli sẽn dag n tarã, n kɩt tɩ ba-rãmbã paam zems-n-taar ne b kamba, n kɩt tɩ kɩɩsdbã paam yam n lebg nin-tɩrse. La a na n sõnga nebã tɩ b segl n sa Zu-soabã yĩnga.

¹⁸A Zakari soka malɛɛkã yaa: «Bõe n na n kɩt tɩ mam bãng bõn-kãnga? Bala, mam yaa nin-kẽema, la m pagã me yʋʋm ka paood ye.»

¹⁹La malɛɛkã leoka yẽnda yaa: «Mam yaa a Gabriyɛlle, n be Wẽnnaam taoore. B tʋma maam tɩ m wa n gom ne foom la m togs-f koe-no-kãnga.

²⁰Gese, fo na n lebga muka, la fo kõn tõog n gome, hal tɩ ta wakat ning bõn-kãngã sẽn na n paam pidsgã, fo sẽn ka tẽ mam goamã, tɩ b yaool n na n paam pidsgu, b wakat sã n ta wã yĩnga. »

²¹Wakat-kãnga, nebã da gũuda a Zakari, la a sẽn kaoosd wẽnd doogẽ wã yɛɛsa bãmba.

²²La a sẽn yi, a ka tõog n gom ne nebã ye. La b bãngame t'a yãnda yãab wẽnd doogẽ wã. La a sɩngame n bils bãmb ne magbo, la a ket n yaa muka.

²³La a Zakari tʋʋmdã rasem sõor sẽn pidi, a kuila a yiri.

²⁴La wakat bilf sẽn paase, a pag a Elizabɛt rɩka pʋga. La yẽnda soondame hal tɩ ta kiis a nu.

²⁵La a yeelame yaa: Ad bũmb ning Zu-soabã sẽn maan n kõ maam, n zems wakat ning bãmb sẽn yãk yam n na n yiis bũmb ning sẽn dag n yaa mam yãnd nebã sʋkã.

²⁶Kiis a yoob soabã wakate, Wẽnnaam tʋma malɛɛk a Gabriyɛlle, Galɩle tẽng a yembr sẽn boond tɩ Nazarɛte,

²⁷pa-kuil a yembr nengẽ, b sẽn da rɩk n kõ a Davɩɩd yageng a Zozɛfe. Pʋg-sadã yʋʋr la a Maari.

²⁸Malɛɛkã waa yẽnda nengẽ n yeel-a yaa: Mam pʋʋsda foom, ned ning Wẽnnaam sẽn ning barkã. Zu-soabã bee ne foom.

²⁹Gom kãens namsa a Maari t'a sokd a meng tɩ pʋʋs-kãngã võor yaa bõe?

³⁰Malɛɛkã yeel-a lame yaa: Maari, da zoe rabeem ye. Bala, fo paama bark Wẽnnaam nifẽ.

³¹Gese, fo na n dɩka pʋga, n dog bi-ribla, la f na n pʋda a yʋʋr t'a Zeezi.

³²Yẽnda na n yɩɩ nin-kãsenga, la b na n boond-a lame tɩ Sẽn-Ka-To Bi-ribla. Zu-soab a Wẽnnaam na n kõo yẽnda a yaab a Davɩɩd naam.

³³Yẽnda na n sooga a Zakoob buudã wakat sẽn kõn sa, la a naamã kõn zĩnd saab wakat ye.

³⁴A Maari soka malɛɛkã tɩ bõn-kãng na n yɩɩ wãn n yɩ tɩ yẽnda nan ka mi raoa?

³⁵La malɛɛkã leok-a lame yaa: Sɩɩg-sõng na n waa fo zugu, la Wẽn-kẽemdã pãngã na n luda foom ne b maasem. Yaa woto yĩng la b na n bool bi-sõng ning fo sẽn na n dogã tɩ Wẽnnaam Bi-ribla.

³⁶Ad fo kẽem a Elizabɛt me rɩka pʋg a kʋʋlem wakate, n na n dog bi-ribla. B sẽn dag n boond yẽnda tɩ kiirã, a tara kiis a yoob pʋg moasã.

³⁷Bala, bũmb ka be Wẽnnaam sẽn ka tõe ye.

³⁸Dẽ, a Maari yeelame yaa: Mam yaa Zu-soabã tʋmtʋmd poaka. Bɩ yãmb sẽn yeel bũmb ningã yɩ. La malɛɛkã loogame n bas-a.

³⁹Da-kãens pʋgẽ, a Maari yikame n kẽng Zʋʋde tẽng a yembr sẽn be tãmsã sẽnẽ wã tao-tao.

⁴⁰A Maari kẽe a Zakari zakẽ, n pʋʋs a Elizabɛte.

⁴¹A Elizabɛt sẽn wʋm a Maari pʋʋsgã bala, biigã sẽn be yẽnda pʋgẽ wã virsame, la a Elizabɛt pida ne Sɩɩg-sõngo.

⁴²A zẽka a koɛɛg n yeele: Fo tara Wẽnnaam bark n yɩɩd pagbã fãa. La biigã sẽn be fo pʋgẽ wã me tara barka.

⁴³Maana a wãn tɩ mam wa paam tɩ m Zu-soabã ma wat m nengẽ?

⁴⁴Bala, ade, fo pʋʋsmã sẽn kẽ mam tʋbrẽ wã yee, la biigã sẽn be mam pʋgẽ wã sẽn virs ne sũ-noogo.

⁴⁵Bark bee pag ning sẽn tẽ tɩ Zu-soabã sẽn yeel yẽnda wã na n paama pidsgã zugu.

⁴⁶La a Maari yeelame yaa: Mam sɩɩgã pẽgda Zu-soabã,

⁴⁷la mam sũur pida ne sũ-noogo, mam fãagd a Wẽnnaam yĩnga.

⁴⁸Bala, bãmb gesa b tʋmtʋmd-poakã a sik-m-mengã pʋgẽ. Bala, sẽn sɩng ne moasã, ad zamaan fãa neb na n yeelame tɩ bark bee mam zugu.

⁴⁹Bala, Pãng‑Soabã maana bõn-kãsems n kõ maam. Bãmb yʋʋr yaa sõmblem.

⁵⁰«Bãmb nimbãan-zoeerã paada neb nins sẽn zoet bãmbã zutu, zamaan woo zamaane.»

⁵¹Bãmb wilga b nug pãnga. Bãmb sãeega neb nins sẽn dag n tar wuk-m-meng tagsd b sũyã pʋsẽ wã.

⁵²Bãmb deega pãens rãmbã naam n bas-ba, la b zẽk sik-m-mens rãmbã.

⁵³Bãmb tɩgsa kom sẽn tar b rãmbã ne arzegse, la b kɩt tɩ arzegsã rãmb loog zaalem.

⁵⁴Bãmb sõnga b tʋmtʋmd a Israyɛlle, la b tẽeg b nimbãan‑zoeerã,

⁵⁵ wa b sẽn dag n yeel tõnd yaab-rãmbã tɩ b na n maana a Abrahaam ne a yagensã neer wakat fãa wã.

⁵⁶A Maari paa ne a Elizabɛt sẽn kolg kiis a tãabo, n yaool n lebg n kuil a yiri.

⁵⁷A Elizabɛt rogem wakat taame. La a roga bi-ribla.

⁵⁸Yẽnda yagsã ne a roagdbã wʋmame tɩ Zu-soabã puka b nimbãan-zoeer ne yẽnda, la b lagma ne-a n paam sũ-noogo.

⁵⁹Rogmã rasem a nii daare, bãmb waa ne bi-bilfã n na n kẽes bãongo, la b da rat n pʋda a yʋʋr t'a Zakari wa a baaba.

⁶⁰La a ma wã gomame n yeel tɩ ayo! T'a yʋʋr na n yɩɩ a Zã.

⁶¹Nebã yeela a Elizabɛt tɩ yẽnda roagdbã sʋka, ned ka be n tar yʋ-kãng ye.

⁶²La bãmb bilsa biigã baaba ne nus n dat n bãng a sẽn dat tɩ b pʋd biigã yʋʋr ninga.

⁶³A Zakari kosa walga, n gʋls tɩ biigã yʋʋr la a Zã. La nebã fãa yɛɛsame.

⁶⁴Wakat-kãng bala, a Zakari zelemd lakame t'a sɩng n gomd n pẽgd Wẽnnaam.

⁶⁵Rabeem yõka b yagsã fãa. La koe-kãng saaga Zʋʋde tẽmsã fãa sẽn be tãmsã sʋkã. Nebã dag n gomda bõn-kãng yell ne taaba.

⁶⁶Neb nins fãa sẽn wʋm gomdã da tagsda a yelle, la b sokdẽ tɩ bi-kãngã na n yɩɩ bõe biiga? Bala, Zu-soabã pãng dag n bee ne-a.

⁶⁷Biigã ba a Zakari pida ne Sɩɩg-sõngo, n gom pĩnd-n-bãngr goam n yeele:

⁶⁸Pẽgr Zu-soabã sẽn yaa Israyɛll nebã Wẽnnaam, bãmb sẽn wa n ges b nebã n fãag-bã yĩnga,

⁶⁹la bãmb sẽn kõ tõnd fãagd sẽn tar pãnga, sẽn yit a Davɩɩd sẽn yaa bãmb tʋmtʋmdã buud pʋgẽ

⁷⁰wa bãmb sẽn dag n gom ne b no-rɛɛs-sõamyã noy hal wakat sẽn kaoose,

⁷¹tɩ b na n fãaga tõnd n yiis d bɛɛbã la neb nins fãa sẽn kis-b tõndã nusẽ wã.

⁷²Woto, bãmb zoee tõnd yaab-rãmbã nimbãanega, n tẽeg bãmb kãab-sõngã yelle,

⁷³wa bãmb sẽn dag n kãabe, n wẽen n yeel tõnd yaab a Abrahaam

⁷⁴tɩ b na n fãaga tõnd n yiis d bɛɛbã nusẽ, la b kõ tõnd pãn-tõog tɩ pʋʋs bãmb ne sõmblem la tɩrlem bãmb taoor hal tõnd vɩɩmã tɛka, tɩ rabeem kaẽ ye.

⁷⁵

⁷⁶La foom a bi-bilfã, b na n boola foom tɩ Sẽn‑Ka‑To no-rɛɛsa. Bala, fo na n lʋɩɩ Zu-soabã taoore n maneg bãmb soayã,

⁷⁷la f kɩt tɩ nebã bãng tɩ yaa ne yel‑wẽnã sugr kosg la b na n paam fãagre,

⁷⁸tõnd Wẽnnaamã nimbãan-zoeerã sẽn yaa kãsengã yĩnga. Yaa nimbãan-zoeerã yĩng la sõorã sẽn pukdã na n wa tõnd nengẽ,

⁷⁹n kõ neb nins sẽn zĩ lik pʋgẽ la kũum maasmẽ wã vẽenem, la a tɛ tõnd tɩ d tũ laafɩ sore.

⁸⁰La biigã bɩtame t'a yam paasdẽ. La a paa weoogẽ wã hal tɩ ta daar ning a sẽn puk a meng ne Israyɛll nebã.