Read SEBR SÕNGO, 1998 A Luk koe‑noogo 10 Bible Online

A Luk koe‑noogo 10 - SEBR SÕNGO, 1998 bible

A Luk koe‑noogo 10

¹Rẽ poore, Zu-soabã leb n yãka neb pis-yopoe la a yiib a taaba, n tʋm bãmb yiib‑yiib tɩ b reng bãmb taoor n kẽng tẽng fãa la zĩig ning fãa bãmb meng sẽn tog n kẽngã.

²A Zeezi yeela bãmb yaa: «Tigsgã yaa wʋsgo la tʋmtʋmdbã sõor paoodame. Kos-y tigsgã soab tɩ b tʋm tʋmtʋmdb b tigsgẽ wã.

³Kẽng-y-yã! Ade, mam tʋmda yãmb wa piis digd-n-yĩids sʋka.

⁴Da zã-y ligd korgo, wall yolgo, wall neooda ye, la y ra yals n pʋʋs ned sor zug ye.

⁵Yãmb sã n na n kẽ yir fãa, bɩ y pʋʋs-b a woto: ‹Bɩ laafɩ zĩnd yi-kãngã pʋga.›

⁶La laafɩ ned sã n be beenẽ, yãmb laafɩ wã na n siga a zugu. La laafɩ ned sã n ka be, bɩ y loog ne y laafɩ pʋʋsem.

⁷Pa-y yi-yɛnga, n dɩtẽ la y yũud bũmb ning b sẽn na n kõ yãmbã. Bala, tʋmtʋmd toga ne a yaoodo. Da tegs-y yiy ye.

⁸Tẽng ning fãa yãmb sẽn na n kẽ tɩ b reeg yãmba, bɩ y rɩ bũmb nins b sẽn na n kõ yãmbã.

⁹Maag-y bãad-rãmb nins sẽn be beenẽ wã, la y yeel-b tɩ Wẽnnaam soolmã kolga bãmba.

¹⁰Tẽng ning fãa yãmb sẽn na n kẽ tɩ b ka reeg yãmba, kẽng-y tẽngã soay zut n yeele:

¹¹‹Yãmb tẽngã wubsg meng sẽn bol tõnd naoã, tõnd pĩmsd-a lame n basd ne yãmba. La baoosgo, bãng-y tɩ Wẽnnaam soolmã pẽnegame.›

¹²Mam yeta yãmb tɩ da-kãnga[2], Sodom sɩbgrã toolem kõn ta tẽng‑kãng rẽndã ye.»

¹³«Korazin, fo na paam toogo! Betsayɩda, fo na paam toogo! Bala, bõn-bãn nins sẽn maan yãmb sʋkã sã n dag n maanẽ Tɩɩr ne Sɩdõ, yaa hal daar zãr la b da na n yeelg boto, la b yug b zug tompeglem n kos sugri.

¹⁴Dẽ n kɩt tɩ bʋʋdã daare, Tɩɩr ne Sɩdõ sɩbgr kõn ta yãmb dẽndã ye.

¹⁵La foom, Kapɛrnaom, b na n zẽka foom n taas saasẽ bɩ? Ayo! B na n sigsa foom hal n taas kɩɩm-kulgu.

¹⁶Ned ning sẽn kelgd yãmb kelgda maam. La ned ning sẽn zãgsd yãmb zãgsda maam. La sẽn zãgsd-a maam zãgsda sẽn tʋm-a maamã.»

¹⁷Neb pis-yopoe la a yiibã lebg n waa ne sũ-noog n yeele: «Zu-soaba, baa zĩn-dãmbã mens sakda tõnd noor yãmb yʋʋrã yĩnga.»

¹⁸A Zeezi yeel-b lame: «Mam dag n nee a Sʋtãan sẽn yi yĩngr n lʋɩt wa sa-yãgbo.

¹⁹La ade, mam kõo yãmb pãng tɩ y tab wiis la namse, la bɛyã pãngã fãa, la baa fʋɩ kõn tõog n maan yãmb wẽng ye.

²⁰Baoosgo, da maan-y sũ-noog zĩn-dãmbã sẽn sakd yãmbã yĩng ye. Maan-y sũ-noogo, yãmb yʋyã sẽn gʋls arzãn pʋgẽ wã yĩnga.»

²¹Wakat-kãng bala, Sɩɩg-sõng kɩtame t'a Zeezi paam sũ-no-kãseng n yeele: «M ba sẽn yaa arzãn la tẽng Zu-soaba, mam pẽgda yãmba, yãmb sẽn solg bõn-kãens ne yam-dãmba, la yẽesem-dãmbã, n yaool n vẽneg-b ne kom-bãoonegã yĩnga. N‑yẽe, m ba, yaa yãmb n dat tɩ yɩ a woto.

²²M ba kõo maam bũmbã fãa, la ned baa a yembr ka mi Bi-riblã sẽn yaa a soaba, sã n ka a ba wã ye. La ned baa a yembr ka mi ba wã sẽn yaa a soaba, sã n ka Bi-riblã bala, la ned ning Bi-riblã sẽn dat n vẽneg bãmb ne-a wã ye.»

²³A Zeezi wẽnemdame n gom ne b karen-biisã b yeyn-yeyn n yeel-b yaa: «Bark bee neb nins nin sẽn yãt bũmb nins yãmb sẽn yãtã zutu.

²⁴Bala, mam yeta yãmb tɩ Wẽnnaam no-rɛɛsdb wʋsgo, la rĩm-dãmb dag n dat n yãnda bũmb nins yãmb sẽn yãtã la b ka yãnd ye. B rag n dat n wʋma bũmb nins yãmb sẽn wʋmdã la b ka wʋm ye.»

²⁵La gese, tõog karen-saamb a yembr yikame n na n mak a Zeezi n yeele: «Karen-saamba, bõe la mam tog n maan n paam vɩɩm sẽn kõn sa wã tɩ yɩ m pʋɩɩre?»

²⁶A Zeezi sok-a lame: «Bõe la b gʋls tõodã sebrã pʋgẽ, bõe la fo karemd be?»

²⁷A leokame n yeele: «Nong Zu-soabã fo Wẽnnaamã ne f sũur fãa, ne f yalẽ fãa la ne f pãngã fãa, la f yamã fãa, la f nong f to wa f menga.»

²⁸A Zeezi leok-a lame yaa: «Fo leokrã yaa sõama. Maan a woto, tɩ f na vɩɩmde.»

²⁹La yẽnda sẽn dat n wilg t'a yaa tɩrga, a soka a Zeezi yaa: «Ãnda la mam to?»

³⁰Dẽ, a Zeezi leb n gomame n yeele: Dao n dag n yi Zeruzalɛm n dabd Zeriko. A tɩ lʋɩɩ fãadb sʋka, tɩ b rees a sẽn tarã, n pãb-a hal t'a kolg kũum, tɩ b bas-a n looge.

³¹Mikame tɩ maan-kʋʋd n dag n dɩk so-kãnga. A yãnda raoã, la a gilg n loog n bas-a lame.

³²Woto me, Leevi ned a yembr taa zĩ-kãngã. A yãnda raoã, la a gilg n loog n bas-a lame.

³³La Samaari ned a yembr sẽn dag n togd sor taa raoã sɛɛgẽ n yãnd-a, t'a nimbãaneg yõk-a.

³⁴A kolga raoã, n tɩbs a noadã ne kaam la reezẽ rãam, la a vil-b ne pɛɛla. Rẽ sẽn sa, a rɩk-a lame n zombg a meng bõn-zoambdga, n tall-a n kẽng sik zĩigẽ n tɩ ges a yelle.

³⁵Vẽkembeoogo, a yãka deniye a yiib n kɩs sik zĩigã soab n yeel-a t'a yõdg n ges bãadã yelle, la t'a ligd sã n kẽ, a lebgre a meng na lebs-a.

³⁶Bãmb b tãabã sʋka, bʋg n wẽnda a yaa ned ning sẽn lʋɩ-a fãadbã sʋkã to?

³⁷Tõog karen-saambã leokame tɩ yaa ned ning sẽn zoe-a yẽnda nimbãanegã. La a Zeezi yeel-a lame t'a me kẽng n tɩ maan a woto.

³⁸A Zeezi sẽn kẽnd ne b karen-biisã, b taa tẽng a yembre, la pag sẽn boond t'a Mart sika bãmb a yiri.

³⁹A dag n tara ma-bi-poak sẽn boond t'a Maari. La a Maari zĩnda Zu-soabã sɛɛgẽ n kelgd bãmb goamã.

⁴⁰Rɩɩbã seglg yɛl toay-toayã dag n sooga a Mart tagsgã. A waame n yeel yaa: Zu-soaba, mam ma-bi-poakã sẽn bas maam m yembr tɩ m get seglgã yellã ka namsd yãmba? Dẽ wã yaa, yeel-y-yã-a t'a sõng-ma.

⁴¹Zu-soabã yeela a Mart yaa: Marte! Marte! Fo maanda yɩɩre, n sidgd ne bũmb wʋsgo.

⁴²Bũmb a yembr tãa n yaa tɩlɛ. A Maari yãka pʋɩ-sõng b sẽn kõn deeg n bas-a ye.