Read SEBR SÕNGO, 1998 A Luk koe‑noogo 11 Bible Online

A Luk koe‑noogo 11 - SEBR SÕNGO, 1998 bible

A Luk koe‑noogo 11

¹Daar a yembre, a Zeezi da bee zĩig a ye n pʋʋsdẽ. Bãmb sẽn pʋʋs n sɛ, b karen-biig a yembr yeela bãmb yaa: Zu-soaba, zãms-y tõnd pʋʋsgo, wa a Zã sẽn zãms b karen-biisã.

²A Zeezi yeela bãmb yaa: Yãmb sã n pʋʋsdẽ, bɩ y yeele: Tõnd ba! Bɩ yãmb yʋʋrã yɩ ne waoogre, tɩ yãmb soolmã wa.

³Kõ-y tõnd d daar o daar dɩɩbã daar fãa.

⁴Kõ-y tõnd d beegrã sugri, tɩ tõnd me kõta neb nins fãa sẽn beegd tõndã sugri, la y ra bas tõnd tɩ d kẽ makr pʋgẽ ye.

⁵A Zeezi leb n yeela bãmb a woto: Ãnda yãmb sʋkã n na n tar a zoa, t'a wa a nengẽ yʋn-sʋka, n yeel-a tɩ «m zoa, peng-m bur a tãab

⁶tɩ m zoa n yi sor n wa n sig-m tɩ m ka tar bũmb sẽn na kõ-a t'a rɩ ye.»

⁷A zoa wã sã n pa pʋgẽ n leok-a n yeele: «Ra nams maam tɩ rignoorã zoe n pagame, maam ne m kambã zoee n kẽe gãaga, mam ka leb n tõe n yik n kõ foom bur ye.»

⁸Mam yeta yãmb tɩ baa a sã n ka na n yik n kõ-a burã, a sẽn yaa yẽnda zoa wã yĩnga, a na yik n kõ-a bũmb nins fãa a sẽn datã, a pẽdgrã yĩnga.

⁹La maam, mam yeta yãmb tɩ y kose la b na kõ yãmba, tɩ y bao la y na yã, tɩ y kabse, la b na pak tɩ y kẽ.

¹⁰Bala, ned ning fãa sẽn kot deegdame. Ned ning sẽn baood yãtame, la b pakdame tɩ sẽn kabsd-a kẽ.

¹¹Yãmb sẽn yaa ba-rãmbã, ãndã yãmb sʋkã bi-ribl n na n kos-a bur t'a kõ-a kugri,

¹²wall a kos-a zĩnf t'a kõ-a waaf tɩ ka zĩnfu, wall a kos-a gell t'a kõ-a nanga?

¹³Sã n yaa tɩ yãmb sẽn yaa nin-wẽnsã miime tɩ kõ y kambã bõn-sõamyã, yãmb ba sẽn be arzãnã n mi n yɩɩda, n na n kõ neb nins sẽn kot bãmbã Sɩɩg-sõngo.

¹⁴A Zeezi dag n digda zĩn sẽn yaa muka. Zĩnã sẽn yi, mukã gomame, la neb kʋʋngã yɛɛsame.

¹⁵La neb kẽer yeelame tɩ yaa ne zĩn-dãmbã naab a Belzebull pãng la a Zeezi digd zĩn-dãmbã.

¹⁶La neb kẽer sẽn dat n mak bãmbã kosa bãmb tɩ b wa ne bãnd sẽn yit arzãna.

¹⁷La a Zeezi sẽn mi b tagsgã yeel-b lame yaa: soolem ning fãa neb sẽn welg taab n gõdg n zabd ne taaba, a na sãame, la rotã na n lʋɩt n yẽegda taaba.

¹⁸La sã n yaa tɩ Sʋtãanã welgame n gõdg n zabd ne a menga, a soolmã na n yɩɩ a wãn n yalse? Bõe yĩnga, yãmb yetame tɩ yaa ne a Belzebull pãng la mam digd zĩn-dãmbã.

¹⁹La sã n yaa tɩ mam digda zĩn-dãmbã ne a Belzebull pãnga, yaa ne ãnda soab pãng la yãmb kambã rigd-ba? Rẽndã n kɩt tɩ bãmb mensã na n yɩ yãmb bʋ-kaoodba.

²⁰La sã n yaa ne Wẽnnaam pãngã la mam digd zĩn-dãmbã, rẽnd Wẽnnaam soolem taa yãmb nengẽ.

²¹Pãng soab sẽn raoolem a meng sõama sã n gũud a zaka, bũmb kõn sɩɩs a paoongã ye.

²²La ned pãng sẽn yɩɩd yẽnda sã n wa n tõog-a, a reegda a zab-teedã fãa a sẽn dag n teegã, la a wʋk a teedã n pʋɩ nebã.

²³Sẽn ka be-a ne maam kisa maam, la sẽn ka naagd-a maam n tigsdẽ sãeegdame.

²⁴Sɩɩg sẽn yaa rẽgd sã n yi n bas neda, a saagda zĩ-pɛɛlã n baood vʋʋsgo. La a sẽn ka yãt vʋʋsgã yĩnga, a yetame t'a na n lebg n leba a yir ning a sẽn dag n yi n basã.

²⁵La a sã n ta, a mikdame tɩ yirã pɩɩsame n maneg n nagse.

²⁶Dẽ, a kẽngdame n tɩ peeg sɩɩs a yopoe a taab sẽn yaa wẽns n yɩɩd yẽnda. B wat n kẽe be n zĩndi, la rao-kãng vɩɩmã lebgda wẽng n yɩɩd pipi wã.

²⁷A Zeezi sẽn gom a woto, pag n zĩnd nebã sʋk n zẽk a koɛɛg n yeel tɩ pag ning sẽn zã-a a Zeezi pʋgã, la a yẽsem bãmbã yaa ned sẽn tar barka.

²⁸La a Zeezi leokame n yeel tɩ yaa neb nins sẽn kelgd Wẽnnaam goamã n sakdẽ wã n tar barkã.

²⁹Nebã sẽn tigsd taab n lebgd kʋʋngã, a Zeezi yeelame yaa: Zamaan‑kãngã neb yaa nin-wẽnse. B baooda bãnde, la b kõn kõ bãmb bãnd a to tɩ ka a Zonaas rẽndã ye.

³⁰Bala, a wa a Zonaas sẽn yɩ bãnd Niniiv nebã yĩngã, Ninsaal Bi-riblã me na n yɩɩ bãnd zamaan‑kãngã nebã yĩnga.

³¹Bʋʋdã wakate, rĩm-poak ning sẽn dag n yi wĩndg goabgã na n yikame n kao zamaan‑kãngã nebã bʋʋdo. Bala, a yii tẽngã satmẽ n na n wa n kelg a Salmo yam goamã. La gese, sẽn be-a ka wã yɩɩda a Salmo.

³²Bʋʋdã wakate, Niniiv nebã na n yika ne zamaan‑kãngã nebã n kao b bʋʋdo. Bala, a Zonaas sẽn moon bãmb koɛɛgã, b kosa sugri. La gese, sẽn be-a ka wã yɩɩda a Zonaase.

³³Ned kõn yõgen fɩtl n bao zĩig n solg-a, wall a fõgen-a ne peoog ye. Ayo! A dogend-a-la fɩtl doagendg zugu, tɩ neb nins sẽn kẽedã na yã vẽenem.

³⁴Fo nifã yaa f yĩngã fɩtla. Fo nif sã n yaa sõama, fo yĩngã tõr tara vẽenem. La a sã n ka sõama, fo yĩngã tõr me bee lik pʋgẽ.

³⁵Gũus f menga, tɩ vẽenem ning sẽn be fo pʋgẽ wã da wa n lebg lik ye.

³⁶Dẽ, fo yĩngã tõr sã n tar vẽenem, tɩ lik baa bilf ka be zĩig baa a ye, a na n paama vẽenem sõama wa wakat ning fɩtl sẽn yãgd ne a pãngã fãa n vẽnegd foomã.

³⁷A Zeezi sẽn gomdã, Fariizẽ a yembr bõosa bãmb tɩ b wa n dɩ ne yẽnda. A Zeezi kẽeme n zĩnd n na n dɩ.

³⁸Fariizẽ wã sẽn yã t'a Zeezi ka waas n yaool n na n dɩ wã, ling-a lame.

³⁹La Zu-soabã yeel-a lame yaa: Yãmb Fariizẽ-dãmbã, yãmb nedgda wamã ne laasã poaya, la yãmb pʋsã pida ne fãab la wẽnga.

⁴⁰Ka-yam-dãmba, ka sẽn maan-a yɩngã n maan pʋgẽ wã me la?

⁴¹Kõ-y naong rãmbã ne y sũyã fãa, la bũmbã fãa na n yɩɩ yolgemd yãmb yĩnga.

⁴²Yãmb Fariizẽ-dãmbã na n paama toogo! Bala, yãmb yaooda mant ne ru la zẽ-vãad buudã fãa piig pʋɩyã, n yaool n basd tɩrlem la Wẽnnaam nonglem. Yaool n yaa bõn-kãensã la yãmb tog n maane, la y ra bas sẽn ketã me ye.

⁴³Yãmb Fariizẽ-dãmbã, y na paam toogo! Bala, yãmb nonga pipi zaoog karen-dotẽ wã, la y nong nebã sẽn pʋʋsd yãmb daasẽ wã.

⁴⁴Yãmb na paam toogo! Bala, yãmb yaa wa yaado, bũmb sẽn ka wilgd b zĩiga, tɩ neb tabd n ka miẽ ye.

⁴⁵Tõog karen-saamb a yembr goma ne bãmb n yeele: Karen-saamba, yãmb sẽn gomd a woto wã, yãmb paoogda tõnd me.

⁴⁶A Zeezi leokame n yeele: Yãmb tõog karen-saam-dãmbã me na n paama toogo! Bala, yãmb dɩkda zɩɩbo, a tʋkr sẽn yaa toog n tʋkd nebã, tɩ yãmb mensã yaool n ka sɩɩsd-b ne y nug-bil ye.

⁴⁷Yãmb na paam toogo! Bala, yãmb meta Wẽnnaam no-rɛɛsdbã yaado, tɩ yaool n yaa yãmb ba-rãmbã n kʋ-ba.

⁴⁸Woto, yãmb yaa kaset rãmba, la y wilgdame tɩ yãmb saka y ba-rãmbã sẽn tʋmã. Bãmb n kʋ Wẽnnaam no-rɛɛsdbã, tɩ yãmb met b yaadã.

⁴⁹Yaa rẽndã n kɩt tɩ Wẽnnaam yamã yetẽ yaa: Mam na n tʋma no-rɛɛsdb la tẽn-tʋmdb b nengẽ. Bãmb na n kʋʋ kẽere, la b nams kẽere,

⁵⁰tɩ m tõe n sok zamaan‑kãngã nebã m no-rɛɛsdb nins fãa b sẽn kʋ hal dũni sɩngr tɩ ta moasã wã zɩɩm,

⁵¹sẽn sɩng ne a Abɛll zɩɩm tɩ ta a Zakari b sẽn kʋ tẽn-kugrã ne wẽnd doogã sʋkã zɩɩm. N-yẽe! Mam yeta yãmb tɩ b na n soka zamaan‑kãngã nebã bõn-kãnga.

⁵²Yãmb tõog karen-saam-dãmbã, yãmb na paam toogo! Bala, yãmb feooga bãngr kʋɩlen-bilã. Yãmb mens ka rat n kẽ ye, la y gɩdgda neb nins sẽn dat n kẽ wã tɩ b ka tõe n kẽ ye.

⁵³Bãmb sẽn yi be, tõog karen-saam-dãmbã ne Fariizẽ-dãmbã pẽdga bãmb wʋsgo, n sogs-b tɩ b gom bũmb wʋsg yelle,

⁵⁴n bẽt bãmba, n dat n paam gomd sẽn yi bãmb noorẽ n yõk-ba.