Read SEBR SÕNGO, 1998 A Luk koe‑noogo 12 Bible Online

A Luk koe‑noogo 12 - SEBR SÕNGO, 1998 bible

A Luk koe‑noogo 12

¹Wakat-kãnga, neb tus‑tusa tigma taaba, n sẽbg taaba, tɩ yaa wa b na n fẽda taaba. A Zeezi deng n goma ne b karen-biisã n yeel-b yaa: Gũus-y y mens ne Fariizẽ-dãmbã rã-bɩllã sẽn yaa zãmbã.

²Bũmb ka be sẽn ludi, sẽn kõn puk ye. La bũmb ka be sẽn solge, b sẽn kõn bãng ye.

³Yaa woto yĩng tɩ bũmb ning fãa yãmb sẽn na gom lik bida pʋgẽ, b na n wʋm-a-la vẽenemẽ. La bũmb nins yãmb sẽn na n walem tʋbẽ, rot pʋsẽ, b na n moon-b-la rot zutu.

⁴M zo-rãmba, mam yeta yãmb tɩ y ra zoe neb nins sẽn kʋʋd yĩngã n yaool n ka tõe n maan bũmb a to n paasã ye.

⁵Mam na n wilga yãmb y sẽn tog n zoe a soaba. Zoe-y soab ning sẽn tõe n kʋ, la b tõe n kẽes bug-tẽngẽ me wã. N-yẽe! Mam yeta yãmb tɩ yaa soab‑kãng la yãmb tog n zoe.

⁶B ka koosd yirs a nu su a yiib sɩda? Baoosgo, Wẽnnaam ka yĩmd b baa a yembr yell ye.

⁷Baa yãmb zugã zoobd fãa sõdame. Dẽ yĩngã, bɩ y ra zoe rabeem ye. Yãmb bee yõod n yɩɩd yirs wʋsgo.

⁸Mam yeta yãmb tɩ ned ning fãa sẽn na n kɩs kaset nebã taoor t'a yaa mam neda, Ninsaal Bi-riblã me na n kɩsa kaset Wẽnnaam malegsã taoor tɩ soab‑kãng yaa bãmb neda.

⁹La ned ning fãa sẽn na n kɩɩs nebã taoor t'a ka mi maam, Ninsaal Bi-riblã me na n kɩɩsa Wẽnnaam malegsã taoor tɩ bãmb ka mi-a ye.

¹⁰Ned ning fãa sẽn gomã Ninsaal Bi-riblã wẽng tõe n paama sugri. La ned ning sẽn na n paoog-a Sɩɩg-sõng kõn tol n paam sugr ye.

¹¹B sã n tall yãmb n kẽng karen-dotẽ wall bʋ-kaoodbã la pãn-soaadbã taoore, bɩ y da maan yɩɩr ne yãmb sẽn na n gom to-to n yiis y menga, wall y sẽn na n yet tɩ bũmb ning ye.

¹²Bala, wakat-kãng bala, Sɩɩg-sõng na n wilga yãmb bũmb ning y sẽn tog n yeelã.

¹³Ned a yembr zĩnda kʋʋngã sʋk n yeel a Zeezi yaa: Karen-saamba, yeel-y m ba-biigã t'a pʋɩ tõnd dogem pʋɩɩrã n yãk m dẽnd n kõ-ma.

¹⁴A Zeezi leok-a lame yaa: Daoa, ãndã n yãk maam tɩ m yɩ yãmb bʋ-kaooda, wall y te-pʋɩta?

¹⁵Dẽ, a Zeezi yeela nebã yaa: Gũus-y y mens ne rat wʋsgã. Bala, hal baa naar pʋgẽ, ninsaal vɩɩmã ka tũud ne bũmb nins a sẽn tarã ye.

¹⁶La a Zeezi wẽe bãmb yel-bũnd n yeele: Arzɛk soab a yembr pʋt n dag n sak sõama.

¹⁷La a da tagsda a sũurẽ n yetẽ yaa: Mam na n maana a wãna? Bala, mam ka tar zĩig n na n bĩng m koodã ye.

¹⁸A yeelame yaa: «Ad bũmb ning mam sẽn na n maane: Mam na n wãa m baoã n lebs n me sẽn yaa bɛd n yɩɩda, n bĩng m koodã fãa ne m teedã be.

¹⁹La mam a n yeela m meng yaa: Fo tara paoong wʋsg sẽn sekd yʋʋm wʋsg yĩnga. Bɩ f vʋʋse, n dɩ la f yũ, la f maan sũ-noogo.»

²⁰La Wẽnnaam yeela yẽnda yaa: «Yalma! Yʋn-kãngã bala, mam na n deega fo vɩɩmã. La bũmb nins fo sẽn seglã na n yɩɩ ãnda rẽnda?»

²¹Yaa a woto ne ned ning fãa sẽn tigsd paoong a meng yĩnga, n yaool n ka tar Wẽnnaam arzegsã.

²²Dẽ poore, a Zeezi yeela b karen-biisã yaa: Yaa woto yĩng tɩ mam yet yãmb tɩ y ra maan yɩɩr ne y vɩɩmã yelle, yãmb sẽn na n dɩ bũmb ninga, wall ne y yĩngã yelle, y sẽn na n yeelg bũmb ning ye.

²³Bala, vɩɩm yɩɩda rɩɩbo, la yĩng yɩɩda futu.

²⁴Ges-y gãabdã! B ka bʋta, b ka tigsda, b ka tar pilgu, wall baoor ye. La Wẽnnaam rɩlgd-b lame. Yãmb ka be yõod n yɩɩd bõn-yɩgdɩ wã sɩda?

²⁵Ãndã yãmb sʋkã n tõe n paas a vɩɩmã woglem kãntɩɩg a yembre, a sẽn maand yɩɩr yĩnga?

²⁶Dẽ, yãmb sã n ka tõe n maan bũmb sẽn yaa bilf n yɩɩda, bõe yĩng tɩ yãmb maand yɩɩr ne bũmb nins sẽn ketã?

²⁷Ges-y rulg-lɛlem sẽn bɩt to-to. B ka tʋmda, la b ka wĩid lamdo. Baoosgo, mam yeta yãmb t'a Salmo mengã ne a naamã fãa ka tõog n maneg a meng ne fut n yɩ neer wa rulg-lelemd a yembr ye.

²⁸Yãmb tẽeb bilf rãmba, sã n yaa tɩ Wẽnnaam nagsa mood sẽn be weoogẽ rũndã, tɩ b na n tugl-b bugum beoogã a woto, bãmb kõn ges yãmb fut yell n yɩɩda?

²⁹Dẽ wã, bɩ y da nams y mens n baood y sẽn na n dɩ bũmb ninga, wall y sẽn na n yũ bũmb ning ye.

³⁰Bala, yaa dũni neb nins sẽn ka pʋʋsd Wẽnnaamã n baood bõn-kãense. Yãmb ba wã miime tɩ yãmb dat-b lame.

³¹Bas-y rẽ la y bao Wẽnnaam soolmã, la b na n kõo yãmb bõn-kãensã n paase.

³²Mam piisi, da zoe-y dabeem ye. Bala, a taa yãmb ba wã yam tɩ b kõ yãmb b soolmã.

³³Koos-y yãmb sẽn tarã n dɩk a ligdã n kõ naong rãmba. Bao-y kord sẽn ka sãamda, la paoong sẽn ka sɛt arzãn pʋga, zĩig ning wagdr sẽn ka kolgdã, la mogd sẽn ka sãamda.

³⁴Bala, yãmb paoong sẽn beẽ wã, yãmb sũurã me na n zĩnda be.

³⁵Bɩ y sẽb y sees sẽbdse, la y yõgen y fɩtl-dãmba,

³⁶la y yɩ wa neb sẽn gũud tɩ b zu-soab yi pʋg-peegr tigr n lebg n wa, t'a sã n ta bal n wẽ bɩ b pak t'a kẽ.

³⁷Bark bee tʋmtʋmd kãens zutu, b zu-soabã sẽn na n wa n ta n mik tɩ b neeme. Mam yeta yãmb sɩd-sɩd tɩ b zu-soabã na n sẽba a sẽbdga, n kɩt tɩ b zĩnd rɩɩb zĩigẽ, t'a wa n kõ-b rɩɩbo.

³⁸Yẽnda wat yʋn-sʋk tɩ yaa no-kɛlenga, a sã n wa n mik tɩ b ka gõe, b sũur na yɩ noogo.

³⁹Bãng-y neer tɩ roog soab sã n dag n miẽ wakat ning wagdr sẽn na n wa, a rag n na n neendame n ka bas t'a poog a roogã ye.

⁴⁰Bɩ yãmb me segl n sɛ. Bala, Ninsaal Bi-riblã na n waa wakat ning yãmb sẽn ka tagsd tɩ b na n waame wã.

⁴¹Dẽ, a Pɩyɛɛr soka a Zeezi yaa: Zu-soaba, yaa tõnd bal la yãmb wẽ yel-bũn‑kãngã bɩ, bɩ yaa nebã fãa?

⁴²T'a Zeezi leok yaa: Dẽ, ãndã n yaa tʋmtʋmd sẽn maand sɩda la a tar yam, t'a zu-soabã yeel-a t'a ges a tʋmtʋmdbã yelle, n kõt-b rɩɩb wakat fãa sẽn zemse?

⁴³Tʋmtʋmd‑kãng zu-soabã sã n wa n mik t'a maanda a woto, tʋmtʋmdã sũur na yɩ noogo.

⁴⁴Mam yeta yãmb sɩd-sɩd t'a zu-soabã na n kɩtame tɩ yẽnda ges a arzegsã fãa yelle.

⁴⁵La tʋmtʋmd‑kãng sã n yeel a sũurẽ t'a zu-soabã kaoosda waoongo, n sɩng n pãbd tʋmtʋmd daopã la tʋmtʋmd‑pogsã, n dɩtẽ la a yũud n gãeemdẽ,

⁴⁶tʋmtʋmd‑kãng zu-soabã na n waa daar ning yẽnda sẽn ka gũud-a, la wakat ning a sẽn ka mi. A zu-soabã na n sɩbga yẽnda sõama, n kɩt tɩ bũmb nins sẽn paamd neb nins sẽn ka maand sɩdã paam yẽnda me.

⁴⁷Tʋmtʋmd ning sẽn mi‑a a zu-soab raabo, n yaool n ka segl bũmbu, la a ka maan a zu-soabã sẽn datã, b na n pãb-a la wʋsgo.

⁴⁸La ned ning sẽn ka mi‑a zu-soabã raabo, n maan tʋʋmd sẽn tog ne sɩbgre, b na n pãba yẽnda bilfu. B sã n kõ ned bũmb wʋsgo, b na n sok-a-la bũmb wʋsgo. La b sã n gũnug ned bũmb wʋsgo, b na n sok-a-la wʋsg n yɩɩda.

⁴⁹Mam waame n na n lob bugum dũni zugu. La mam nonga a sã n dag n zoe n widgẽ!

⁵⁰La lisg n be mam sẽn tog n deege, la a yellã na n namsa maam hal t'a wa n pidsi.

⁵¹Yãmb tẽedame tɩ mam waame tɩ laafɩ na zĩnd tẽng zugu? Mam yeta yãmb tɩ ayo. La yaa tɩ welgr na zĩndi.

⁵²Bala, sẽn sɩng ne moasã, neb a nu sẽn be zak a yembr pʋg na n welga taaba, tɩ tãabã kɩɩs yiibã, tɩ yiibã kɩɩs tãabã.

⁵³Ba na n welga ne a bi-ribla, tɩ bi-ribl welg ne a ba. Ma na n welga ne a bi-pugla, tɩ bi-pugl welg ne a ma. Sɩd‑ma na n welga ne a bi-paga, tɩ bi-pag welg ne a sɩd‑ma.

⁵⁴A Zeezi leb n yeela neb kʋʋngã yaa: Yãmb sã n yãnd sawadg sẽn yikd nin-taoore, tao-tao bala, yãmb yetame tɩ saagã na n niime, la a yɩta a woto.

⁵⁵La yãmb sã n yãnd tɩ sobg yita wĩndg goabga, yãmb yetame tɩ zĩigã na n yɩɩ tʋʋlgo, la a yɩta a woto.

⁵⁶Zãmb-dãmba, yãmb mii tẽng yɛla, la yĩngr yɛl sẽn yaa to-to. Bõe tɩ yãmb ka mi moasã wakatã yɛl n welge?

⁵⁷La yaa bõe tɩ yãmb ka tõe n bãng sẽn yaa tɩrg y toor n bake?

⁵⁸Fo sã n dabd bʋʋd zĩigẽ ne f zabd-n-taaga, bɩ f modg n maneg f yellã ne-a, yãmb sẽn ket sorã zug wakate, tɩ yẽnda ra wa tall foom n kẽng bʋ-kaoodbã taoore, tɩ bʋ-kaoodbã yõk foom n kõ bi-bees roog gũud t'a kẽes-f bi-bees roog ye.

⁵⁹Mam yet-f lame tɩ fo kõn yi be hal tɩ f yao a samdã yaoolem lagf ye.