Read SEBR SÕNGO, 1998 A Luk koe‑noogo 15 Bible Online

A Luk koe‑noogo 15 - SEBR SÕNGO, 1998 bible

A Luk koe‑noogo 15

¹ Yaood-dɛɛgdbã fãa ne yel-wẽn maandbã fãa kolga a Zeezi n na n kelg-ba.

²La Fariizẽ-dãmbã la tõog karen-saam-dãmbã da yẽgemdame n yetẽ tɩ rao-kãngã reegda yel-wẽn maandba la b rɩt ne-ba.

³La a Zeezi wẽe bãmb yel-bũn‑kãngã n yeele:

⁴Nin-bʋg n be yãmb sʋkã n na n tar piis koabga, t'a yembr meneme, t'a ka bas pis-wɛ la a wɛ wã weoogẽ wã n kẽng n tɩ gẽes peosg ning sẽn menem-a wã hal n yãnd-a?

⁵La yẽnda sã n yãnd-a, a na n palg-a-la a bãgdẽ ne sũ-noogo.

⁶La yẽnda sã n lebg n ta yiri, a boonda a zo-rãmbã ne a yagsã a yir n yeel-b yaa: «Naag-y maam n maan sũ-noogo, bala, mam yãnda m peosgã sẽn dag n menemã.»

⁷Woto me, mam yeta yãmb tɩ sũ-noog na n zĩnda arzãn pʋgẽ, yel-wẽn maand a yembr sẽn tek yam n kos sugr yĩnga, n yɩɩd nin-tɩrs pis-wɛ la a wɛ sẽn ka baood sugr kosgã yĩnga.

⁸Walla, pʋg bʋg n na n tar ligd piiga, t'a yembr menem t'a ka yõgen fɩtla, n pɩɩs roogã la a gẽes-a neer hal n yãnd-a?

⁹La a sã n yãnd-a, a boonda a zo-rãmbã ne a yagsã a yir n yeel-b yaa: Naag-y maam n maan sũ-noogo, bala, mam yãnda m lagfã sẽn dag n menemã.

¹⁰Woto me, mam yeta yãmb tɩ yel-wẽn maand a yembr sã n tek yam n kos sugri, sũ-noog na n zĩnda Wẽnnaam malegsã sʋka.

¹¹A Zeezi leb n yeelame yaa: Rao n dag n tar kom-dibli a yiibu.

¹²La yao wã yeela a ba wã yaa: «M ba, pʋɩ-y y paoongã n yãk m pʋɩɩr n kõ-ma.» La ba wã pʋɩ-b-la a paoongã.

¹³Rasem bilf zugẽ, yao wã tigsa a sẽn da tarã fãa n kẽng tẽn-zãrgẽ, n tɩ sãam a paoongã be ne tʋʋm-dẽgd maanego.

¹⁴La yẽnda sẽn sãam a paoongã fãa n sa, kom kãseng n kẽ tẽn-kãngã, la komã sɩngame n nams-a.

¹⁵Yẽnda kẽng n tɩ noka tẽnga ned a yembre, t'a tʋm yẽnda a pʋtẽ t'a tɩ gũ kurkuyã.

¹⁶Yẽnda dag n datẽ-la zãbnã kurkuyã sẽn da rɩtã n dɩ n pid a pʋga, la ned ka kõt yẽnda ye.

¹⁷Yẽnda tagsa a sũurẽ n yeele: «M baaba tʋmtʋmdbã waooga, la b tara rɩɩb n dɩt n tɩgd n kelldẽ, tɩ kom kʋʋd maam ka.

¹⁸Mam na n yikame n kẽng m baaba nengẽ n tɩ yeel-b yaa: M ba, mam beega Wẽnnaam la m beeg yãmba.

¹⁹Mam ka leb n zems tɩ b bool maam tɩ yãmb biig ye. Ges-y maam wa yãmb tʋmtʋmd a yembre.»

²⁰La a yikame n kẽng a ba wã nengẽ. La yẽnda sẽn ket n be yɩɩga, a ba wã yãnd-a lame t'a nimbãanega yõk-a. A ba wã wudgame n tɩ mobg-a n mok-a.

²¹Biigã yeela a ba wã yaa: «M ba, mam beega Wẽnnaam la m beeg yãmba. Mam ka leb n zems tɩ b bool maam tɩ y biig ye.»

²²La a ba wã yeela a tʋmtʋmdbã yaa: «Wa-y ne fuug ning sẽn yaa-a neer n yɩɩdã tao-tao n yeelg-a. Ning-y-yã-a nug-bilã nugbĩnga, la y wid-a neooda.

²³Wa-y ne nag-bi-noabdgã, n kʋ-a tɩ d rɩ la d maan sũ-noogo.

²⁴Bala, mam bi-ribl‑kãngã rag n kiime, la a leb n vʋʋgame. A rag n menemame, la d leb n yãnd-a lame.» La bãmb sɩngame n kɩdemdẽ.

²⁵La bi-ribl kãsengã rag n bee pʋtẽ. La yẽnda sẽn lebg n watẽ n kolg yiri, a wʋma yʋʋmb ne saoog rãamde.

²⁶Yẽnda boola tʋmtʋmd a yembr n sok-a bũmb ning sẽn maandã võore.

²⁷Tʋmtʋmdã yeela yẽnda yaa: «Yãmb yao wã lebg n waame, tɩ yãmb ba wã kʋ nag-bi-noabdgã, a sẽn lebg n wa ne laafɩ wã yĩnga.»

²⁸Yẽnda sũurã puugame t'a ka sak n na n kẽ ye. A baaba wã yiime n na n bool-a t'a wa n kẽ.

²⁹Dẽ, a leoka a ba wã yaa: «Ade, yaa yʋʋm wʋsg la mam tʋmd n kõt yãmba. Mam nan ka kɩɩs yãmb noor ye. La maam yẽ, yãmb zɩɩ n kõ maam baa bull tɩ m maan sũ-noog ne m zo-rãmb ye.

³⁰La yãmb bi-kãngã, sẽn sãam-a yãmb paoongã ne pʋg-yoaadbã sẽn lebg n wa wã, yãmb kʋʋ nag-bi-noabdgã n kõ-a.»

³¹A ba wã yeel-a lame yaa: «M biiga, fo bee ne maam daar fãa, la bũmb nins fãa mam sẽn tarã yaa foom n so.

³²La a zemsame tɩ tõnd maan sũ-noog n kɩdem. Bala fo yao wã fo sẽn ne wã rag n kiime, la a leb n vʋʋgame. A rag n menemame, la m leb n yãnd-a lame.»