Read SEBR SÕNGO, 1998 A Luk koe‑noogo 16 Bible Online

A Luk koe‑noogo 16 - SEBR SÕNGO, 1998 bible

A Luk koe‑noogo 16

¹A Zeezi yeela b karen-biisã me yaa: Arzɛk soab a yembr n dag n be n tar a tʋʋm taoor soaba, la b togs-a lame t'a tʋmtʋmdã sãamda yẽnda paoongã.

²Yẽnda boola tʋʋmã taoor soab n yeel-a yaa: «Bõe tɩ b gomd fo yell a woto tɩ mam wʋmdẽ? Wilg maam fo tʋʋmã sẽn yɩ to-to. Bala, fo ka na n leb n yɩ mam tʋʋmã taoor soab ye.»

³Tʋʋmã taoor soab tagsa a sũurẽ n yeele: «Mam zu-soabã sẽn dat n yiis maam tʋʋmdẽ wã, mam na n maana bõe? Koobo? Mam ka tar pãng n na n ko ye, la bõsg yaa yãnd ne maam.

⁴Mam mii m sẽn na n maanega, tɩ b sã n wa n yiis maam m tʋʋmdẽ wã, bɩ neb deeg maam b yiyã.»

⁵Dẽ, yẽnda kɩtame tɩ b bool a zu-soaba sam-dãmbã yembr-yembre, n yeel pipi soabã yaa: «Fo tara mam zu-soaba samd wãna?»

⁶T'a leok tɩ kaam rʋg-bɛd koabga. La a yeela yẽnda t'a reeg a sebrã n zĩnd tao-tao n gʋls tɩ pis-nu.

⁷Yẽnda leb n soka a to yaa: «La fo yẽ samdã yaa wãna?» Tɩ yẽnda leok tɩ kood yond kobs-nu. La a yeela yẽnda t'a reeg a sebrã n gʋls tɩ kobs-naase.

⁸La a zu-soaba pẽga a tʋʋmã taoor soab sẽn ka tɩrgã, a sẽn maan yamã yĩnga. Bala, dũni‑kãnga neb maanda yam ne taaba, n yɩɩd vẽenem kambã.

⁹La mam yeta yãmb tɩ y rɩk dũni paoongã n bao zo-rãmba, tɩ paoongã sã n wa n sɛ n bas yãmba, bɩ Wẽnnaam reeg yãmb yiy sẽn paad wakat sẽn kõn sa wã pʋgẽ.

¹⁰Ned ning sẽn maand sɩd bõn-bãooneg pʋse, a maanda sɩd bõn-kãsems pʋse. La ned ning sẽn ka maand sɩd bõn-bãooneg pʋs ka na n maan sɩd bõn-kãsems pʋs me ye.

¹¹Dẽ, yãmb sã n ka maan sɩd ne dũniyã arzegse, ãndã n na n dɩk paoong sɩd-sɩd n gũnug yãmba?

¹²La yãmb sã n ka maan sɩd ne ned a to paoongo, ãndã n na n kõ yãmb y meng rẽnda?

¹³Tʋmtʋmd baa a ye ka be n tõe n sak zu-soben-dãmb a yiib ye. Bala, yẽnda na n kisga a yembr la a nong a to wã, wall a waoog a yembr la a paoog a to wã. Yãmb ka tõe n sak Wẽnnaam la ligd me ye.

¹⁴Fariizẽ-dãmbã sẽn da nong ligdã rag n kelgda bõn-kãensã fãa la b rag n yaanda a Zeezi.

¹⁵A Zeezi yeel-b lame yaa: yãmb yaa neb sẽn wilgd nebã tɩ y yaa tɩrse. La Wẽnnaam mii yãmb sũyã. Bala, bũmb ning nebã sẽn pẽgd wʋsgã yaa bõn-wẽng Wẽnnaam nifẽ.

¹⁶Hal tɩ ta a Zã wakate, dag n yaa tõogã ne no-rɛɛsdbã wakate. La sẽn sɩng ne a Zã wakatã, b moonda Wẽnnaam soolem koe-noogã, la ned kam fãa nangda pãng n dat n kẽ be.

¹⁷Yĩngr la tẽng loogr yaa naana n yɩɩd tõogã kargr a yembr menengo.

¹⁸Ned ning fãa sẽn dig a pag la a rɩk a to, maanda yoobo. La ned ning fãa sẽn dɩk pag a sɩd sẽn dig maanda yoobo.

¹⁹Rao a ye n dag n be n yaa arzɛk soaba, n yeelgd fu-sõama sẽn yaa neeba. La daar fãa, a tara bũmb fãa tɩ seke, t'a vɩɩmã ya noog wʋsgo.

²⁰Naong soab a yembr sẽn boond t'a Lazaar dag n gãee arzɛk soabã zak noore. La a yĩngã fãa da pida ne noada.

²¹A rag n nongẽ lame n paam rɩ-zeremsã sẽn yit arzɛk soaba taabl zug n lʋɩtẽ wã n dɩ. La sẽn paase, baasã wat n lelemda a noadã.

²²Naong soabã wa n kiime. La malegsã talla yẽnda n kẽng a Abrahaam nengẽ. La arzɛk soabã me wa n kiime, la b mum-a lame.

²³Kɩɩm-kulg pʋgẽ, yẽnda nak n gesame. La a namsgã pʋgẽ, a tool n yãnda a Abrahaam yɩɩga, t'a Lazaar be ne-a.

²⁴Yẽnda zẽka a koɛɛg n yeel: «M ba a Abrahaam! Zoe-y mam nimbãanega, n tʋm a Lazaar t'a tẽk a nug-bil koomẽ n wa n wʋlg m zelemdã. Bala, mam namsda wʋsg bug-kãngã pʋgẽ.»

²⁵A Abrahaam leoka yẽnda n yeele: «M biiga, bɩ f tẽeg tɩ fo paama arzegs f vɩɩmã wakate, la t'a Lazaar paama toodo. La moasã, yẽnda paamda belsg ka, tɩ fo be toog pʋgẽ.

²⁶La rẽ fãa sẽn yãk a toogo, bog-kãseng n be tõnd ne yãmb sʋka, sẽn na n yɩl tɩ neb nins sẽn dat n yi ka n wa yãmb nengẽ wã ra tõog ye, la tɩ sẽn be-b yãmb nengẽ wã me ra tõog n wa tõnd nengẽ ye.»

²⁷Arzɛk soabã yeelame yaa: «Sã n yaa a woto, m ba, mam kota yãmb tɩ y tʋm a Lazaar mam ba wã yiri.

²⁸Bala mam tara ba-bi-raop a nu. Bɩ a kẽng n tɩ kɩs bãmb kaset tɩ b ra wa n wa zĩ-kãngã sẽn yaa namsg zĩigã ye.»

²⁹A Abrahaam leokame tɩ b tara a Moyiis ne Wẽnnaam no-rɛɛsdbã, la b kelg bãmba.

³⁰La arzɛk soabã yeelame yaa: «Ayo, m ba a Abrahaam! La ned sẽn ki sã n vʋʋg n kẽng bãmb nengẽ, b na n teka yam n kos sugri.»

³¹La Abrahaam leoka yẽnda yaa: «Bãmb sã n ka kelg a Moyiis ne Wẽnnaam no-rɛɛsdbã, baa ned sẽn ki sã n vʋʋge, b kõn tẽ-a ye.» A Lazaar ne arzɛk soabã.