Read SEBR SÕNGO, 1998 A Luk koe‑noogo 18 Bible Online

A Luk koe‑noogo 18 - SEBR SÕNGO, 1998 bible

A Luk koe‑noogo 18

¹A Zeezi wẽe bãmb yel-bũnd n na n wilg-b tɩ b tog n pʋʋsa wakat fãa n da yɛ ye.

²A Zeezi yeelame: Bʋ-kaood a ye n dag n be tẽng a yembr pʋgẽ n ka zoet Wẽnnaam, la a ka zoet ned baa a yembr nif ye.

³Pʋg‑kõor a ye me n dag n be tẽn-kãng pʋga, n wat n yet bʋ-kaoodã yaa: ‹Bʋ‑y maam ne m bʋʋd‑n‑taaga bʋʋd tɩrga, n kõ‑ma.›

⁴Bʋ-kaoodã zãgsame n kaoos t'a ka na n sõng-a ye. La a yaool n wa tagsa a sũurẽ n yeele: «Baa ne mam sẽn ka zoet Wẽnnaamã, la m ka zoet ned nifã,

⁵pʋg‑kõ-kãngã sẽn pẽdgd maamã yĩnga, m na bʋ a bʋʋdã n kõ‑a bʋʋm t'a ra leb n wat n pẽdgd maam woto daar fãa ye.»

⁶Zu-soabã leb n yeelame yɛsa: Kelg-y bʋ-kaood-wẽngã sẽn yeelã.

⁷Dẽ, Wẽnnaam kõn sõng bãmb nin-tũusdsã sẽn zẽkd b koees wĩndg la yʋng n kot bãmbã sɩda? B na kaoos n sõng-ba?

⁸Mam yeta yãmb tɩ b na n sõnga bãmb tao-tao. La Ninsaal Bi-riblã sã n wa, b na n yãnda tẽeb tẽng zugu?

⁹A Zeezi leb n wẽe yel-bũn-kãngã neb kẽer yĩnga, b sẽn da tẽed tɩ b yaa tɩrse, la b paoogd neb a taabã yĩnga, n yeele:

¹⁰Daop a yiib n dag n kẽng wẽnd doogẽ n na n tɩ pʋʋse. A yembrã yaa Fariizẽ neda, la a to wã yaa yaood dɛɛgda.

¹¹Fariizẽ nedã yalsa yĩngr n pʋʋs a sũurẽ a woto: «Mam Wẽnnaam, m pʋʋsda yãmb bark mam sẽn ka wẽnd wa neb a taabã sẽn yaa wagda la nin-wẽnse, la yoaadbã, la m ka wẽnd baa yaood-deegd-kãnga wã yĩnga.

¹²Mam loeta noor naoor a yiib rasem a yopoe pʋgẽ, mam yãkda m sẽn tarã piig pʋɩɩr n kõtẽ.»

¹³Yaood-dɛɛgdã yalsa yɩɩga, n pʋs n ka saagd n na n doog a neng yĩngr ye. La a ra pĩisda a yãoog n yetẽ: «Mam Wẽnnaam! Zoe-y mam nimbãaneg tɩ m yaa yel-wẽn-maanda.»

¹⁴Mam yeta yãmb tɩ rao-kãng lebg n kuila a yir ne tɩrlem. La Fariizẽ nedã ka paam ye. Bala, b na n sika ned ning sẽn zẽkd a menga, la b na zẽka ned ning sẽn sikd a menga.

¹⁵Neb n dag n talld hal baa kom-peels n wat a Zeezi nengẽ tɩ b sɩɩs-ba. La karen-biisã sẽn yã bõn-kãnga, b sɩngame n lengd neb nins sẽn tall-b kambã n wa wã.

¹⁶La a Zeezi kɩtame tɩ b wa ne kambã, la b yeele: Bas-y kom-bãoonegã tɩ b wa mam nengẽ la y ra gɩdg-b ye. Bala, Wẽnnaam soolmã yaa neb nins sẽn wẽnd-b bãmbã yĩnga.

¹⁷Sɩd-sɩdã, mam yeta yãmb tɩ ned ning fãa sẽn ka reegd Wẽnnaam soolmã wa bi-bilf ka na kẽ be ye.

¹⁸Naab a yembr soka a Zeezi yaa: «Karen-saam-sõngo, bõe la mam tog n maan n paam vɩɩm sẽn kõn sa?»

¹⁹A Zeezi yeel-a lame yaa: «Bõe yĩng tɩ f boond maam tɩ nin-sõngo? Ned kae n yaa sõama tɩ sã n ka Wẽnnaam b yembr bal ye.

²⁰Fo mii tõodã: ‹Da yo ye, da kʋ ye, da zu ye, da kɩs kaset zĩrẽ ye, waoog f ba la f ma›. »

²¹Raoã yeelame tɩ yẽnda saka bõn-kãensã fãa hal sẽn sɩng a yãadem wakate.

²²A Zeezi sẽn wʋm woto, b yeel-a lame yaa: Bũmb a ye n ket n paoog foom. Koos fo sẽn tarã fãa n pʋɩ naong rãmbã, la f na n paama paoong arzãna. La f wa tũ maam.

²³Yẽnda sẽn wʋm bõn-kãnga, a sũurã sãama hal wʋsgo, bala yẽnda ra tara arzegs wʋsgo.

²⁴A Zeezi sẽn yã [t'a sũurã sãama wʋsgã], b yeelame: Ad na n yɩɩ toog ne neb nins sẽn tar arzegsã tɩ kẽ Wẽnnaam soolmẽ.

²⁵Bala, yʋgemd sẽn na n tũ fu-pĩim yõorẽ n loog yaa naana n yɩɩd arzɛk soab sẽn na n kẽ Wẽnnaam soolmẽ.

²⁶Neb nins sẽn da kelgd bãmbã yeelame tɩ rẽ, ãndã n tõe n paam fãagre.

²⁷La a Zeezi leokame tɩ ninsaalbã sẽn ka tõe bũmb ningã, Wẽnnaam tõeeme.

²⁸La a Pɩyɛɛr yeelame yaa: Ade, tõnd basa d sẽn tarã n tũ yãmba.

²⁹La a Zeezi yeela bãmb yaa: Sɩd-sɩdã, mam yeta yãmba, tɩ ned ka be sẽn na n bas a yiri, a paga, a buudu, wall a kamba, Wẽnnaam soolmã yĩnga,

³⁰n ka reeg wʋsg n yɩɩd a woto zamaan‑kãngã pʋgẽ, la a paam vɩɩm sẽn kõn sa zamaan ning sẽn watã pʋgẽ ye.

³¹A Zeezi peega karen-biis piig la a yiibã kɛɛng n yeel-b yaa: Ade, tõnd dabda Zeruzalɛm, la bũmb ning fãa Wẽnnaam no-rɛɛsdbã sẽn da gʋls Ninsaal Bi-riblã yell wɛɛngẽ wã na n pidsame.

³²Bala, b na n yõka bãmb n kõ bu-zẽmsã. Bu-zẽmsã na n yaala bãmba, n gom bãmb wẽnga, n tʋbs bãmb kolkoodo.

³³La b na n pãba bãmb ne kalwaase, n yaool n kʋ-ba. La rasem a tãabẽ daarã, bãmb na n vʋʋgame.

³⁴La karen-biisã ka wʋm b gomdã võor baa bilf ye. Gom-kãensã rag n solga ne bãmba, la b rag n ka mi gom‑kãng sẽn dat n yɛɛlg ye.

³⁵A Zeezi sẽn kolg Zeriko, zoang a ye n da zĩ sorã kɩreng n bõsdẽ.

³⁶Yẽnda wʋma kʋʋngã sẽn loogdã rãamde, a sokame n na n bãng sẽn yaa bũmb ninga.

³⁷La b togsa yẽnda tɩ yaa Nazarɛt dao a Zeezi n dag n loogde.

³⁸La a kelmame n yeele: «Zeezi, a Davɩɩd Bi-ribla, zoe-y mam nimbãanega!»

³⁹Neb nins sẽn dag n kẽnd taoorã lenga yẽnda n dat t'a sĩndi. La a kelmame n yɩɩd pĩnda n yeel tɩ: «Davɩɩd bi-ribla, zoe-y mam nimbãanega.»

⁴⁰A Zeezi yalsame n yeel tɩ b tall-a n wa. La a sẽn kolge, a Zeezi sok-a lame:

⁴¹Bõe la fo rat tɩ m maan n kõ-fo? Yẽnda leokame tɩ: «Zu-soaba, m dat n leb n paama m ninã.»

⁴²La a Zeezi yeela yẽnda: Leb n paam f nini. Fo tẽeb n fãag-fo.

⁴³Wakat-kãng bala, a ninã pukame t'a tũ a Zeezi la a waoogd Wẽnnaam. Nebã fãa sẽn yã rẽnda wã, b pẽga Wẽnnaam.