Read SEBR SÕNGO, 1998 A Luk koe‑noogo 2 Bible Online

A Luk koe‑noogo 2 - SEBR SÕNGO, 1998 bible

A Luk koe‑noogo 2

¹Wakat-kãnga, rĩm a Sezaar Ogust yiisa tõog n yeel tɩ b sõd dũniyã nebã fãa.

²Sõd-kãng sẽn yɩ dẽenem soabã zĩnda Siiri Gʋvɛrneer a Kiriniyuus zamaanẽ.

³Ned kam fãa dag n kuiisa a meng tẽngẽ tɩ b tɩ sõd-a.

⁴A Zozɛf me yii Nazarɛt sẽn be Galɩle soolmẽ n kẽng a Davɩɩd tẽngẽ wã sẽn boond tɩ Betlehɛm n be Zʋʋde soolmẽ, yẽ sẽn yaa a Davɩɩd buud la a yagengã yĩnga.

⁵Yẽnda kẽnga be ne a pʋg-bil a Maari tɩ b sõd-a. La a Maari da tʋtame.

⁶La bãmb sẽn be be, a Maari rogem wakat taame.

⁷La yẽnda roga a pipi biigã, n vil-a ne peend n gãneg rũms rɩɩb koglg pʋgẽ, weer sẽn ka be sik-zĩigẽ wã yĩnga.

⁸La tẽn-kãng pʋgẽ, pe-kɩɩmb n dag n be we-kɛɛng ne yʋng n gũud b piisi.

⁹Zu-soabã malɛɛk puka a meng ne bãmba, la Zu-soabã ziir vẽenem yãgame n gũbg bãmba. Dabeem kãseng yõka bãmba.

¹⁰La malɛɛkã yeel-b lame yaa: «Da zoe-y rabeem ye. Bala, mam togsda yãmb koe-noog sẽn na n wa ne sũ-no-kãseng nebã fãa yĩnga.

¹¹Fãagd la b rog yãmb yĩng dũndã, a Davɩɩd tẽngẽ wã. Bãmb la Kirisã, Zu-soabã.

¹²Ad bãnd ning sẽn na n kɩt tɩ yãmb bãng bãmba: Yãmb na n yãnda bi-pɛɛlg sẽn vil ne peend n gãe rũms rɩɩb koglgẽ.»

¹³La zĩig pʋgẽ bala, malegs wʋsg yii arzãn n wa n paas malɛɛkã n pẽgd Wẽnnaam n yetẽ:

¹⁴«Wẽnnaam sẽn be hal saasẽ-saasẽ wã paam pẽgre! La laafɩ zĩnd dũniyã zugu, neb nins bãmb sẽn nongã sʋka.»

¹⁵Malegsã sẽn bas bãmb n leb n leb arzãna, pe-kɩɩmbã yeela taab yaa: «Wa-y tɩ d kẽng Betlehɛm n tɩ ges bũmb ning sẽn maan tɩ Zu-soabã togs tõndã.»

¹⁶Bãmb kẽnga tao-tao n tɩ yã a Maari ne a Zozɛfe, la bi-pɛɛlgã sẽn gãe rũms rɩɩb koglgẽ wã.

¹⁷Bãmb sẽn yã bi-pɛɛlgã, b togsa bũmb nins fãa b sẽn dag n gom ne bãmb biigã wɛɛngẽ wã.

¹⁸Yellã linga neb nins fãa sẽn wʋm bũmb nins pe-kɩɩmbã sẽn togsd bãmbã.

¹⁹A Maari bĩnga gom-kãens fãa a sũurẽ n tagsd b yelle.

²⁰Pe-kɩɩmbã lebgame, n waoogd Wẽnnaam la b pẽgd bãmba, bũmb nins fãa bãmb sẽn wʋme, la b sẽn yã tɩ sɩd yaa wa malɛɛkã sẽn dag n togs bãmbã yĩnga.

²¹La rasem a nii daarã sẽn yaa biigã bãong kẽesg daarã sẽn ta, b pʋda a yʋʋr t'a Zeezi, wala malɛɛkã sẽn dag n yeel sẽn deng a ma sẽn na n dɩk a pʋgã.

²²La a Maari ne biigã yɩlgr wakat sẽn pidi, wa sẽn zems ne a Moyiis tõogã, yẽnda ne a Zozɛf talla biigã n kẽng Zeruzalɛm n na n tɩ kõ Zu-soabã.

²³Bãmb maana wa sẽn gʋls Zu-soabã tõog pʋgẽ wã. A yetame: «Bi-ribl fãa sẽn yaa a ma bi‑rẽenga, b tog n dɩk‑a lame n kõ Zu-soabã.»

²⁴La b maana wal a yiib bɩ manwan-bi a yiib maoongo, wa sẽn gʋls Zu-soabã tõog pʋgẽ wã.

²⁵La mik rao a yembr n dag n be Zeruzalɛm n boond t'a Sɩmyõ. Rao-kãng dag n yaa nin-tɩrga, la a sakda Wẽnnaam. Yẽnda dag n gũuda Israyɛll belsgo, la Sɩɩg-sõng dag n bee a zugu.

²⁶Sɩɩg-sõng dag n wilg-a lame t'a kõn ki, hal t'a yã Kirisã, Zu-soabã sẽn na n tʋmã.

²⁷Sɩɩg-sõng kɩtame t'a Sɩmyõ kẽng wẽnd doogẽ wã. La a Zeezi ba wã ne b ma wã sẽn tall bãmb n wa n na n pids bũmb ning tõogã sẽn yetã,

²⁸a Sɩmyõ deega biigã a nusẽ, n pẽg Wẽnnaam n yeele:

²⁹Zu-soaba! Moasã, yãmb basa y tʋmtʋmdã t'a loogd ne laafɩ. Wa yãmb sẽn dag n yeelã,

³⁰mam nin yãnda fãagr ning yãmb sẽn kõ tõndã,

³¹fãagr y sẽn segl nebã fãa nifẽ wã.

³²A yaa vẽenem sẽn vẽnegd bu-zẽmse, la a yaa Israyɛll sẽn yaa yãmb nebã ziiri.

³³B sẽn gom a Zeezi yell a woto wã yɛɛsa b ba ne b ma.

³⁴A Sɩmyõ ning-b-la barka, la a yeel a Zeezi ma a Maari yaa: Ad bi-kãngã waa Israyɛll neb wʋsg lʋɩɩse la b yikr yĩnga, la a na n yɩɩ bãnd neb sẽn na n zãgse.

³⁵A na n puka neb wʋsg sũy pʋsẽ yɛla, la sũ-sãang sẽn wẽnd sʋʋg sẽn kõs ned n na n paam foom.

³⁶Wẽnnaam no-rɛɛs-poak a ye n dag n be be. A yʋʋr la a Ãnde, a Fanuwɛll bi-pugla, n yaa a Azɛɛr buudu. A ra kʋʋla wʋsgo. A zĩnda ne a sɩdã yʋʋm a yopoe a pʋg-sademd wakate,

³⁷n lebg pʋg‑kõore, n kell n paa a woto. La baa ne a sẽn tar yʋʋm pis-nii la a naasã, a dag n ka yit wẽnd doogẽ wã ye. A dag n maanda Wẽnnaam tʋʋmd wĩntoog ne yʋngo, ne no-loeer la pʋʋsgo.

³⁸Yẽnda me waa wẽnd doogẽ wã wakat-kãng bala. Yẽnda dag n pẽgda Wẽnnaam la a gomd biigã yell ne neb nins sẽn dag n gũud Zeruzalɛm fãagrã a Zeezi yelle.

³⁹La bãmb sẽn pids bũmb fãa wa sẽn zems Zu-soabã tõogo, a Zozɛf ne a Maari leb n leba b tẽngẽ, Nazarɛte.

⁴⁰Biigã rag n bɩtame, la a pãng paasdame, la a da pida ne yam, la Wẽnnaam barkã da bee a zugu.

⁴¹A Zeezi ba-rãmbã dag n kẽngda Zeruzalɛm yʋʋmd fãa, Pakã tigr yĩnga.

⁴²A Zeezi sẽn ta yʋʋm piig la a yiibu, b kẽnga Zeruzalɛm wa sẽn zems tigrã miningu.

⁴³La tigrã sẽn sa tɩ bãmb lebg n kuiisẽ, biig a Zeezi paa Zeruzalɛm, la b ba-rãmbã ka bãng ye.

⁴⁴Bãmb sẽn dag n tags t'a Zeezi bee b kẽnd-n-taasã nengẽ wã yĩnga, b kẽna daar a ye kẽnde, n yaool n gẽes a Zeezi b mitinsã sʋka.

⁴⁵La b ka yãnd-b ye. La b lebg n lebda Zeruzalɛm la b gẽesd a Zeezi.

⁴⁶Rasem a tãab daarã, bãmb yãnda a Zeezi wẽnd doogẽ wã tɩ b zĩ karen-saam-dãmbã sʋk n kelgd-b la b sogsd-b sokdse.

⁴⁷A Zeezi bãngrã ne b leokdsã linga neb nins fãa sẽn da wʋmd bãmbã.

⁴⁸A Zeezi ba-rãmbã sẽn yãnd-bã, b yɛɛsame. A Zeezi ma wã yeel-b lame yaa: M biiga, yaa bõe tɩ fo maan tõnd a woto? Gese, maam ne f baaba baoo foom ne sũ-sãanga.

⁴⁹A Zeezi yeel-b lame yaa: Bõe yĩng tɩ yãmb da baood maam? Yãmb ka mi tɩ mam maanda tʋʋmd m ba wã roogẽ la?

⁵⁰La bãmb ka wʋm bũmb ning a Zeezi sẽn da gomd ne bãmbã võor ye.

⁵¹Dẽ poore, a Zeezi tũu bãmb n leb Nazarɛte, la b saka bãmb noore. Bãmb ma wã dag n bĩngda bõn-kãens fãa a sũurẽ.

⁵²A Zeezi rag n bɩtame, tɩ b yamã paasdẽ, la b paama Wẽnnaam barka la ninsaalb rẽnd me.