Read SEBR SÕNGO, 1998 A Luk koe‑noogo 20 Bible Online

A Luk koe‑noogo 20 - SEBR SÕNGO, 1998 bible

A Luk koe‑noogo 20

¹Daar a yembre, a Zeezi sẽn zãmsd nebã wẽnd doogẽ wã la b moond koe-noogã, maan-kʋʋdbã kãsem-dãmbã, la gʋlsdbã ne kãsem-dãmbã waame.

²La b yeela a Zeezi yaa: «Togs-y tõndo: Yaa ne no-bʋg la yãmb maand bõn-kãensã, wall ãnd n kõ yãmb no-kãnga.»

³A Zeezi leok-b lame yaa: «Mam me na n soka yãmb sokre.

⁴Togs-y maam: A Zã lisgã yii arzãn bɩ, bɩ yaa ninsaalb nengẽ?»

⁵La bãmb yẽsa ne taab n yeele: «Tõnd sã n yeel t'a yii arzãna, b na n yeelame tɩ la yaa bõe tɩ tõnd ka tẽ a Zã,

⁶la tõnd sã n yet t'a yii ninsaalb nengẽ, nebã fãa na n loba tõnd kuga, bala nebã tẽeda hakɩɩk t'a Zã yaa Wẽnnaam no-rɛɛsa.»

⁷Dẽ bãmb leokame tɩ b ka mi lis-kãng sẽn yi zĩig ning ye.

⁸A Zeezi yeel-b lame yaa: «Mam me ka na n togs yãmb mam sẽn paam noorã zĩig ning n maand bõn-kãensã ye.»

⁹La a Zeezi sɩngame n wẽ nebã yel-bũn‑kãngã n yeele: Dao a ye n da sel reezẽ tɩɩs pʋʋgo, n dɩk-a n peng reezẽ tɩɩs pʋʋg koaadba, la a yi n tog sor n na n tɩ kaoose.

¹⁰La bõn-bɩʋʋng sẽn ta, a tʋma tʋmtʋmd reezẽ tɩ‑koaadbã nengẽ tɩ b kɩs-a reezẽ tɩɩs biis t'a wa n kõ-a. La reezẽ tɩ‑koaadbã pãba yẽnda n lebs-a t'a kuil nug-zaala.

¹¹Yẽnda leb n tʋma tʋmtʋmd a to yɛsa. La koaadbã pãba yẽnda n paoog-a n lebs-a t'a kuil nug-zaala.

¹²Yẽnda leb n tʋma tãabẽ soaba, la b pogla yẽnda n dig-a.

¹³La reezẽ tɩɩs pʋʋgã soab yeelame yaa: «Mam na n maana bõe? Mam na n tʋma m bi-ribl-nongrã tɩ tõeeme tɩ b waoog-a.»

¹⁴La reezẽ tɩ‑koaadbã sẽn yã biigã, b yẽsa ne taab n yeele: «Yaa yõwã n na n soog a ba wã paoongã bɩ d kʋ‑a tɩ arzɛkã lebg tõnd dẽnda.»

¹⁵La b yõka yẽnda n yiis reezẽ tɩɩs pʋʋgẽ wã n kʋ-a. Moasã reezẽ tɩɩs pʋʋgã soab na n maan-b-la bõe?

¹⁶A na n waame, n sãam koaadb-kãense, la a rɩk pʋʋgã n peng koaadb a taaba. La nebã sẽn wʋm bõn-kãnga, b yeelame tɩ: Bɩ ra yɩ a woto ye.

¹⁷La a Zeezi gesa bãmb n yeel yaa: Gʋlsg sõngã sẽn yeel tɩ: «Kugr ning tãn-metbã sẽn zãgsã lebga roogã pãng kugri, a soakã zĩigẽ wã» võor yaa bõe?

¹⁸Ned ning sẽn na n lʋɩ-a kug-kãngã zug na n tõtmame, la kug-kãngã sẽn na n lʋɩ ned ning zugu, a na n beds-a lame.

¹⁹Maan-kʋʋdbã kãsem-dãmb ne tõog karen-saam-dãmbã baoome tɩ yõk a Zeezi wakat-kãng bala, la bãmb zoee nebã. B rag n bãngame tɩ yaa bãmb yĩng la a Zeezi sẽn wẽ yel-bũn‑kãngã wã.

²⁰Bãmb sɩngame n gũusd a Zeezi, sẽn na yɩl n paam a Zeezi gomd n bẽd-b n yõk n tɩ kɩs pãn-soaadbã ne Gʋvɛrneerã sẽn so noorã.

²¹Nin-kãens soka a Zeezi a woto: Karen-saamba, tõnd miime tɩ yãmb gomda tɩrlem la y zãmsd nebã ne tɩrlem, la tɩ yãmb ka tũusd neb ye. La yãmb zãmsda nebã Wẽnnaam sor wa sẽn zems sɩdã.

²²Tõnd tara noor tɩ yao rĩm a Sezaar yõor yaood bɩ? Bɩ d ka tare?

²³La a Zeezi sẽn bãng bãmb sɩlmã leok-b lame yaa:

²⁴Wilg-y maam lagfo. Maasmã ne gʋlsmã sẽn be a zugã yaa ãndã rẽnda? Tɩ b leok tɩ rĩm a Sezaare.

²⁵Dẽ, a Zeezi yeela bãmb yaa: Rẽ wã, kõ-y rĩm a Sezaar bũmb ning sẽn yaa rĩm a Sezaar dẽnda, la y kõ Wẽnnaam bũmb ning sẽn yaa Wẽnnaam dẽnda.

²⁶Bãmb ka tõog n yõk a Zeezi b gomd baa a yembr pʋgẽ nebã taoor ye. La a Zeezi leokrã yɛɛs-b lame tɩ b sĩndi.

²⁷ Saduusẽ-dãmbã sẽn yet tɩ kũum vʋʋgr ka be wã neb kẽer kolgame n sok a Zeezi a woto:

²⁸«Karen-saamba, a Moyiis dag n gʋlsame n yeel tõnd tɩ: Ned ba-biig sã n tar pag n ki n bas-a n ka paam biiga, bɩ yẽnda peeg pagã n dog kamb a ba-biigã yĩnga.»

²⁹La raop a yopoe n dag n be n yaa ba-biisi. La kãsma peega paga la a kiime n ka paam biig ye.

³⁰La yiib soabã reega pʋg‑kõorã, n ki n bas-a tɩ tãab soaba reeg-a.

³¹La a yɩɩ woto ne bãmb b yopoe wã fãa, b kiime n ka paam kamb ye.

³²La pagã me yaool n kiime.

³³Kũum vʋʋgr daare, bãmb sʋkã, yẽnda na n yɩɩ ãndã soab paga? Bala yẽnda sẽn dag n zĩnd ne neb a yopoe wã fãa la?

³⁴A Zeezi leoka bãmb yaa: «Dũni‑kãnga nebã peegda pagba, tɩ pagbã kuiis sɩdba,

³⁵la neb nins b sẽn na n mik tɩ b zemsame tɩ zĩnd dũni ning sẽn watã pʋgẽ wã la tɩ vʋʋg n bas kũumã ka na n leb n peeg pagba, wala kuil sɩdb ye.

³⁶Bãmb ka tõe n leb n ki yɛs ye, bala, b na n yɩɩ wa malegse, la b na n yɩɩ Wẽnnaam kamba, bãmb sẽn vʋʋg n bas kũumã yĩnga.

³⁷Zĩig ning b sẽn gomd tuugã bugmã sẽn be a zugã yellã, a Moyiis wilgame tɩ kũum vʋʋgdame, yẽnda sẽn boond Zu-soabã t'a Abrahaam ne a Izak la a Zakoob Wẽnnaamã.

³⁸La Wẽnnaam ka kũum Wẽnnaam ye, b yaa nin-vɩɩs Wẽnnaam. Bala ne bãmba nebã fãa vɩɩme.»

³⁹Gʋlsdb kẽer leokame yaa: «Karen-saamba, yãmb goma sõama.»

⁴⁰La bãmb ka saag n leb n sok a Zeezi sokr a to yɛs ye.

⁴¹A Zeezi sok-b lame yaa: «B tõe n yɩɩ a wãn n yeel tɩ Kiris yaa a Davɩɩd yagenga?

⁴²A Davɩɩd meng yeela yɩɩn-sõamyã sebr pʋgẽ tɩ: ‹Zu-soabã yeela mam Zu-soabã yaa: Zĩnd mam dɩtgo,

⁴³hal tɩ m kɩt tɩ f bɛɛbã yɩ fo nao roagendga.»

⁴⁴Dẽ, a Davɩɩd boonda bãmb tɩ Zu-soaba, woto bãmb na n yɩɩ a wãn n yaa a yagenga?› »

⁴⁵La nebã fãa sẽn kelgd a Zeezi, bãmb yeela b karen-biisã yaa:

⁴⁶Gũus-y y mens ne gʋlsdbã sẽn nong n gõod ne fu-wogdo, n nongẽ tɩ nebã pʋʋsd bãmb raasẽ, la b baood n zĩnd waoogr goeels zut karen-dotẽ, la rɩɩb zĩisẽ wã.

⁴⁷Bãmb deesda pʋg‑kõapã paoong zãnga, la b pʋʋsd pʋʋs-wogd nebã nin gesg yĩnga. Bãmb na n paama sɩbgr sẽn yaa toog n yɩɩda.