Read SEBR SÕNGO, 1998 A Luk koe‑noogo 23 Bible Online

A Luk koe‑noogo 23 - SEBR SÕNGO, 1998 bible

A Luk koe‑noogo 23

¹Bãmb fãa yikame n tall a Zeezi n kẽng a Pilat taoore.

²B sɩngame n dõd a Zeezi n yeel yaa: Tõnd yãnda rao-kãngã t'a rãmbd tõnd tẽngã n yetẽ tɩ b ra yao a rĩm a Sezaar yõor yaood ye. La a yetẽ tɩ yẽnda menga yaa Kirisã, la rĩmã.

³A Pilat soka a Zeezi a woto: Yãmb yaa Zʋɩf-rãmbã rĩmã? T'a Zeezi leok-a: Yaa wa yãmb sẽn yeelã.

⁴A Pilat yeela maan-kʋʋdbã kãsem-dãmb ne neb kʋʋngã yaa: «Mam ka ne yell nin-kãngã zug sẽn zems tɩ b sɩbg-a ye.»

⁵La nebã kẽnga taoor n kell n yeel yaa: «Zãmsgã bãmb sẽn sɩng Galɩle n zãms nebã Zʋʋde fãa hal tɩ ta ka wã wata ne rãmbg nebã sʋka.»

⁶A Pilat sẽn wʋm bõn-kãnga, yẽnda sokame n dat n bãng raoã sã n yaa Galɩle neda.

⁷La a Pilat sẽn wʋm t'a Zeezi yaa a Erood soolmã neda, a tʋma bãmb a nengẽ. A Erood me rag n bee Zeruzalɛm wakat‑kãnga.

⁸A Erood sẽn yãnd a Zeezi, a paama sũ-no-kãsenga, bala, yẽnda rag n wʋmame tɩ b gomd b yelle, la hal daar zãra, yẽnda rag n dat n yãnda a Zeezi. La a rag n tẽedame t'a Zeezi na n maana bõn-bãnd t'a yãnde.

⁹A Erood soka bãmb bũmb wʋsgo, la a Zeezi ka leok yẽnda tɩ bũmb ye.

¹⁰Maan-kʋʋdbã kãsem-dãmbã ne tõog karen-saam-dãmbã yalsa be n dõt a Zeezi ne b pãngã tɛka.

¹¹Erood ne a sodaasã paooga a Zeezi, n yaal-ba, n yeelg-b fu-neere, la a lebs-b a Pilat nengẽ.

¹²Badaar bala, a Pilat ne a Erood sẽn dag n yaa beemã lebga zoodo.

¹³A Pilat tigma maan-kʋʋdbã kãsem-dãmbã la nanambse, ne nebã

¹⁴n yeel-b yaa: Yãmb talla rao-kãngã n wa mam nengẽ n yeel t'a yaa tẽn-dãmbda. Ade, mam sok-a-la yãmb nifẽ, la mam ka yã yell nin-kãngã nengẽ sẽn zems tɩ b sɩbg-a ye, mam ka yã tʋʋm-wẽns nins yãmb sẽn dõt-a wã ba a yembr a zug ye.

¹⁵A Erood me ka yã bõn-wẽng ne-a ye. Bala, bãmb lebs n tʋm-a-la tõnd nengẽ. Ade, rao-kãngã ka maan bũmb sẽn tog ne kũum ye.

¹⁶Dẽ, mam na n kɩtame tɩ b sɩbg-a-la m bas-a.

¹⁷[Tigr fãa, rag n yaa tɩlɛ t'a Pilat yiis bi-bɛɛg a ye n bas n kõ nebã].

¹⁸Bãmb fãa naaga taab n kelem n yeel tɩ b kʋ rao-kãngã la b yiis a Barabaas n kõ-ba.

¹⁹B rag n kẽesa a Barabaas bi-bees roogẽ tẽn-dãmbg sẽn dag n zĩnd tẽngã pʋgẽ wã poorẽ, la a sẽn kʋ ned yĩnga.

²⁰A Pilat leb n goma ne nebã, n dat n bas a Zeezi.

²¹La nebã rag n kelemdame n yetẽ: Ka-y bãmb da-pɩk zugu! Ka-y bãmb da-pɩk zugu!

²²A Pilat leb n yeela bãmb naoor a tãab soab yaa: La bãmb maana bõe sẽn yaa wẽnga? Mam ka yã bũmb b sẽn maane, n tog kʋʋb ye. Dẽ wã mam na n kɩtame tɩ b sɩbg-ba la m bas-ba.

²³La nebã zẽka b koees wʋsg n kos tɩ b ka a Zeezi da-pɩk zugu. La b kelemsã tõogame t'a Pilat tũ b sẽn datã.

²⁴A Pilat kaoo bʋʋdã tɩ yɩ wa nebã sẽn kosã.

²⁵Yẽnda basa ned ningã nebã sẽn kosã, a soab b sẽn dag n kẽes bi-bees roog tẽn-dãmbgo, la nin-kʋʋr yĩngã. La a rɩk a Zeezi n kɩs-b tɩ b maan b sẽn dat ne-ba.

²⁶La bãmb sẽn tall a Zeezi n loogdẽ, bãmb yõka dao a yembr sẽn yi weoogẽ n kuiisẽ. A yʋʋr la a Sɩmo. B kɩtame t'a tʋk da-pɩkã n pʋg a Zeezi.

²⁷Neb kʋʋng wʋsgo, raop la pagb dag n pʋgda a Zeezi. La pagbã dag n yãbdame, n wiisdẽ, n pĩisd b gɛy a Zeezi yĩnga.

²⁸A Zeezi wẽnegame n yeel pagbã yaa: Zeruzalɛm pagba, da yãb-y mam yĩng ye. Yãb-y y mense, la y kamb yĩnga.

²⁹Bala, bãng-y tɩ ray n wate, tɩ b na n yeel tɩ pʋg-kiyã la sẽn ka tol n dog-bã, la sẽn ka yẽsem-b kambã n tar sũ-noogo.

³⁰La nebã na n sɩng n yeela tãmsã tɩ b sirg n zãb-ba, la b yeel kunkuba tɩ b lill bãmba.

³¹Bala, b sã n maand ra-maas a woto, b na n maana ra-koeemsã wãn-wãna?

³²B rag tara nin-wẽns a yiib n kẽnd n na tɩ lagem ne a Zeezi n kʋ.

³³La bãmb sẽn ta zĩig ning b sẽn boond tɩ zu-wangã, b kaa a Zeezi da-pɩkã zug be, ne nin-wẽns a yiibã: A yembr b rɩtgo, a to wã b goabga.

³⁴A Zeezi yeelame yaa: «M ba, kõ-y-b sugri, tɩ b ka mi bũmb ningã b sẽn maandã ye.» La bãmb maana bãnd n pʋɩ a Zeezi futã ne taaba.

³⁵Nebã rag yasa be n getẽ. La tẽngã nanambsã rag n yaanda a Zeezi n yetẽ: «B fãaga neb a taaba, bãmb sã n yaa Kirisã, Wẽnnaam sẽn yãk a soabã, bɩ b fãag b menga.»

³⁶Sodaasã me kolgame n yaal a Zeezi, la b kõ-b reezẽ rã‑miisga,

³⁷n yeel a Zeezi yaa: «Yãmb sã n yaa Zʋɩf-rãmbã rĩmã, bɩ y fãag y meng y toore.»

³⁸B rag n gʋlsa a woto bãmb zugẽ: Nin-kãngã yaa Zʋɩf-rãmbã rĩmã.

³⁹Nin-wẽnsã sẽn dag n be da-pɩgsã zutã ned a yembr tʋʋsa a Zeezi n yeel-b tɩ ka bãmb la Kirisã la? Tɩ b fãag b meng la b fãag bãmba.

⁴⁰La a to wã lenga yẽnda n yeel-a yaa: «Fo ka zoet Wẽnnaam la? Fo sɩbgrã sẽn yaa a yembr ne bãmb sɩbgrã?

⁴¹Tõnd yẽ sɩbgrã zemsame. Bala, tõnd deegda sẽn zems d tʋʋmã. La nin-kãngã ka maan bũmb sẽn yaa wẽng ye.»

⁴²La a yeela a Zeezi yaa: Yãmb sã n wa n deeg y naamã, bɩ y tẽeg mam yelle.

⁴³A Zeezi leok-a lame yaa: «Mam yeta foom sɩd-sɩd tɩ rũndã bala, fo na n zĩnda ne maam Paradi pʋga.»

⁴⁴Rẽ tɩ rag n zoe n kolga wĩnto-sʋka, la zĩiga fãa lebga lik bida hal tɩ ta wẽn-kaoore.

⁴⁵Wĩntoogã sobgame, la fu-lilldgã sẽn be wẽnd doogẽ wã pãrga pʋɩ-sʋka.

⁴⁶La a Zeezi zẽka b koɛɛg n yeel yaa. M ba, m basda m sɩɩgã yãmb nugẽ. La a Zeezi sẽn gom a woto n sɛ, b kiime.

⁴⁷Sodaas koabg naabã sẽn yã bũmb ning sẽn maana, a waooga Wẽnnaam n yeel tɩ: Hakɩɩka rao-kãngã rag n yaa nin-tɩrga.

⁴⁸La neb kʋʋngã sẽn da wa n na n ges bõn-kãngã sẽn yã bũmb nins sẽn maanã, b lebgdame la b pĩisd b yãado.

⁴⁹Neb nins fãa sẽn dag n mi a Zeezi wã, ne pagb nins sẽn yi Galɩle n yãag bãmbã dag n yasa yɩɩg n get bũmb nins sẽn maandã.

⁵⁰Kaorengã yɛl-bʋ-kaood a ye n da be t'a yʋʋr boond t'a Zozɛf n yaa nin-sõngo la nin-tɩrga.

⁵¹A rag n ka lagem ne bʋ-kaoodb a taabã n yãk yamã la a maan b sẽn maan bũmb ningã ye. A rag n yaa Arimate sẽn yaa Zʋɩf-rãmbã tẽng neda. La a rag n gũuda Wẽnnaam soolmã waoongo.

⁵²A kẽnga a pilat nengẽ n tɩ kos a Zeezi kũumã.

⁵³Yẽnda sika kũumã, da-pɩkã zugu, n vil-a ne lẽ peend n tɩ gãneg yaoogẽ sẽn tu kugr zugu, kũum sẽn nan ka mumẽ ye.

⁵⁴Badaar dag n yaa seglg daare, la vʋʋsg daarã da rat n sɩngame.

⁵⁵La pagbã sẽn da yi Galɩle n yãag a Zeezi wã tũu a Zozɛf n wa yã yaoogã la b sẽn gãneg a Zeezi kũumã be to-to.

⁵⁶La b lebgame n tɩ to tɩdar zom la b maan tɩdar kaam. La bãmb vʋʋsa vʋʋsg daarã wa sẽn zems a Moyiis tõogã. Yaoog sẽn tuk pĩigẽ.