Read SEBR SÕNGO, 1998 A Luk koe‑noogo 24 Bible Online

A Luk koe‑noogo 24 - SEBR SÕNGO, 1998 bible

A Luk koe‑noogo 24

¹Dimaas daar yibeoog pĩnda, pagbã talla tɩdar-dambã b sẽn dag n seglã n kẽng yaoogẽ wã.

²B mikame tɩ b bilga kugrã n bas yaoogã noore.

³Bãmb kẽeme la b ka yã Zu-soab a Zeezi kũumã ye

⁴Bãmb sẽn dag n ka mi b sẽn tagsd tɩ bũmb ningã, ade, raop a yiib sẽn yer fut sẽn pɩnd puka b meng ne bãmba.

⁵Rabeem yõka bãmb tɩ b yĩgimd n sulg b nens tẽnga. La raopã yeel-b lame yaa: Yaa bõe tɩ yãmb baood nin-vɩɩg kũum sʋka?

⁶[Bãmb ka be ka ye, b vʋʋgame.] Tẽeg-y bũmb ning bãmb sẽn dag n gom ne yãmb b sẽn da ket n be Galɩle wã.

⁷B yeelame tɩ yaa tɩlɛ tɩ b zãmb Ninsaal Bi-riblã n yõk n kõ yel-wẽn maandbã tɩ b ka-b da-pɩk zugu, la tɩ rasem a tãab daare bãmb na n vʋʋgame.

⁸La pagbã tẽega a Zeezi goamã.

⁹La bãmb yii yaoogẽ wã n kẽng n tɩ togs karen-biis piig la a yembrã ne neb a taabã fãa bõn-kãens fãa.

¹⁰Da yaa a Maari sẽn yit Magdala, ne a Zan la a Zak ma a Maari, n paas pagb a taab sẽn da be ne bãmbã n tɩ togs tʋmtʋmdbã bõn-kãnga.

¹¹La tʋmtʋmdbã tagsame tɩ pagbã sẽn dag n gomdã yaa zʋbsgo, la b ka tẽ-b ye.

¹²La a Pɩyɛɛr yikame n wudg n kẽng yaoogẽ wã. Yẽnda sẽn zõonde, a ka yã bũmb tɩ sã n ka pɛɛlã sẽn dʋr tẽngã. La bũmb ning sẽn maanã yɛɛsa yẽ, la a lebg n leba a yiri.

¹³La mikame tɩ badaare, karen-biis a yiib n da rabd tẽn-bil a yembr sẽn boond tɩ Emayuusi, n zems kɩlometr piig la a yembr ne Zeruzalɛm.

¹⁴Bãmb da gomda bũmb nins fãa sẽn maanã yell ne taaba.

¹⁵La bãmb sẽn gomd n kɩɩsd taaba, a Zeezi meng waame n kẽn ne bãmba.

¹⁶La bãmb yam ludame tɩ b ka bãng a Zeezi ye.

¹⁷A Zeezi soka bãmb tɩ yaa bõe yell la b gomd ne taab la b kẽnda. La b yalsame tɩ b nensã gãnem.

¹⁸La bãmb ned a yembr sẽn boond t'a Keleopaas soka a Zeezi yaa: Yãmb y yembr bal n be Zeruzalɛm n ka bãng bũmb ning sẽn maan be rasmã noorã?

¹⁹A Zeezi soka bãmb tɩ yaa bõe yelle. La b leoka bãmb yaa: Yell ning sẽn paam Nazarɛt dao a Zeezi wã. Sẽn da yaa Wẽnnaam no-rɛɛs sẽn tar pãng ne b tʋʋmã la b goamã, Wẽnnaam la nebã fãa taoorã.

²⁰Tɩ tõnd maan-kʋʋdbã kãsem-dãmb ne tõnd nanambsã sẽn yɩ to-to n yõk bãmb n kɩs tɩ b kao b bʋʋd n yeel tɩ b zemsa kũumã, n ka-b da-pɩk zugã.

²¹Tõnd da tẽedame tɩ yaa bãmb n na n fãag Israyɛlle, la sẽn paas rẽ fãa, ad yaa rasem a tãab rũndã la bõn-kãens maan yã.

²²Yaa sɩd tɩ pagb kẽer sẽn be tõnd sʋk yɛɛsa tõnd wʋsgo. B kẽnga yaoogẽ wã yibeoogẽ pĩnda,

²³n tɩ ka yã a Zeezi kũumã ye. B waa n yeelame tɩ malegs n puk b mens ne bãmba, n yeel bãmb t'a Zeezi vɩɩme.

²⁴La neb kẽer sẽn da be ne tõndã kẽnga yaoogẽ wã n tɩ mik tɩ bũmbã fãa yaa wa pagbã sẽn dag togsã bala. La bãmb ka yãnd a Zeezi ye.

²⁵Dẽ, a Zeezi yeel-b lame yaa: Neb yam sẽn ka weke, yãmb ka tẽed bũmb nins fãa Wẽnnaam no-rɛɛsdbã sẽn togsã tao-tao ye!

²⁶Dẽ yĩnga, Kiris rag n ka tog n nams a woto n yaool n deeg b naamã sɩda?

²⁷A Zeezi bilga bãmb bũmb nins sẽn be gʋls-sõamyã fãa pʋgẽ n gomd bãmb yellã, sẽn sɩng ne a Moyiis tɩ ta Wẽnnaam no-rɛɛsdbã fãa.

²⁸La b sẽn kolg tẽn-bil ning bãmb sẽn dag n dabdã, a Zeezi maana wa bãmb dat n taa taoore.

²⁹La karen-biis a yiibã pẽdga bãmb n yeel tɩ b pa ne bãmba, bala, yʋng kolgame la wĩndgã dat n kẽeme. A Zeezi kẽe n siga ne bãmba.

³⁰A Zeezi sẽn zĩ ne bãmb n na n dɩ, b rɩka burã n pʋʋs Wẽnnaam bark n kao-a n kõ bãmba.

³¹Dẽ, karen-biisã yamã vẽnegame tɩ b bãng tɩ yaa a Zeezi, la a Zeezi menema bãmb taoor bala.

³²La bãmb goma ne taab n yeel yaa: Bãmb sẽn dag n gomd ne tõnd sorã zug la b bilgd tõnd gʋls-sõamyã, tõnd ka paam sũ-no-kãseng sɩda?

³³La bãmb yika wakat-kãng bal n leb Zeruzalɛm n tɩ yã karen-biis piig la a yembrã ne b tũud-n-taas sẽn tigim taaba,

³⁴la b yeela bãmb tɩ hakɩɩka! Zu-soabã vʋʋgame la b vẽnega b meng ne a Sɩmo.

³⁵Bãmb me togsa bũmb ning sẽn maan bãmb sorã zugã, la bãmb sẽn bãng a Zeezi to-to b sẽn wa n kaood burã.

³⁶Bãmb sẽn dag n ket n gomd a woto, a Zeezi meng puka bãmb sʋk [n yeel-b yaa: Bɩ laafɩ zĩnd ne yãmba].

³⁷Dabeem yõka bãmb la b yɛɛsame n tẽed tɩ b yãnda kɩɩma.

³⁸La a Zeezi yeel-b lame yaa: Bõe yĩng tɩ yãmb yɛɛsdẽ, la yaa bõe tɩ y sãmbd y sũyã pʋsẽ a woto?

³⁹Ges-y mam nusã ne m naoã. Yaa maam bala, Sɩɩs-y maam n gese. Kɩɩm ka tar nemd wall kõab wa mam sẽn tarã ye.

⁴⁰A Zeezi sẽn gom a woto, b wilga karen-biisã b nusã la b naoã.

⁴¹Karen-biisã sẽn ket n ka tẽeda, b sũ-noogã yĩnga, la sẽn yaa lingr ne bãmbã, a Zeezi sok-b lame b sã n tara rɩɩb be sẽn na rɩ.

⁴²Bãmb kõo a Zeezi zĩm-sẽedgo ne sɩɩd bilfu.

⁴³A Zeezi reeg-a lame n dɩ bãmb nifẽ.

⁴⁴Dẽ poore, a Zeezi yeel-b lame yaa: «Yaa woto la mam sẽn da togs yãmb mam sẽn dag n ket n be ne yãmbã: Ra yaa tɩlɛ tɩ bũmb nins fãa sẽn gʋls a Moyiis tõogã pʋgẽ, la Wẽnnaam no-rɛɛsdbã sɛb pʋsẽ, la yɩɩn-sõamyã pʋgẽ n gomd mam yellã paam pidsgu.»

⁴⁵Dẽ, a Zeezi vẽnega b yamã tɩ b tõog n wʋm Wẽnnaam gʋls sõamyã võore.

⁴⁶La a Zeezi yeel-b lame yaa: Woto, b gʋlsame n yeel tɩ Kirisã tog n namsame, la b na n vʋʋg n basa kũum rasem a tãab daare.

⁴⁷La tɩ sẽn sɩng ne Zeruzalɛm, b na n moona yam tekr koɛɛg buudã fãa sʋk ne bãmb yʋʋr tɩ b tõe n paam yel-wẽnã sugri.

⁴⁸Yãmb yaa bõn-kãng kaset-dãmba.

⁴⁹La ade, mam na n tʋma yãmb bũmb ningã m ba sẽn dag n kãabã. Pa-y Zeruzalɛm hal tɩ y wa pid ne pãng sẽn yit yĩngri.

⁵⁰La a Zeezi peega bãmb n kẽng Betani sẽnẽ, la b zẽka b nus n ning karen-biisã zut barka.

⁵¹La barkã ningr wakate, a Zeezi basa karen-biisã n zẽk n kẽng arzãna.

⁵²La karen-biisã waooga a Zeezi, la b leb Zeruzalɛm ne sũ-no-kãsenga.

⁵³La bãmb bee wẽnd doogã pʋg wakat fãa n pẽgd Wẽnnaam.