Read SEBR SÕNGO, 1998 A Luk koe‑noogo 4 Bible Online

A Luk koe‑noogo 4 - SEBR SÕNGO, 1998 bible

A Luk koe‑noogo 4

¹A Zeezi sẽn pid ne Sɩɩg-sõngo, bãmb yii Zʋrdẽ n lebg n wa, la Sɩɩgã talla bãmb n kẽng weoogẽ.

²La Sʋtãanã maka bãmb beenẽ dasem pis-naase. La dasem kãens pʋgẽ, bãmb ka tol n dɩ bũmb ye. La rẽ sẽn looge, kom yaool n yõka bãmba.

³Dẽ, sʋtãanã yeela bãmb yaa: «Yãmb sã n yaa Wẽnnaam Bi-ribla, bɩ y yeel kug-kãensã tɩ b lebg buri.»

⁴La a Zeezi leoka yẽnda: «A gʋlsame: «Ninsaal kõn vɩ ne rɩɩb bal ye.»

⁵Rõatã talla bãmb n dʋ yĩngr n paase, n wilg bãmb dũniyã soolem dãmbã nif kamsg pʋgẽ,

⁶n yeel-b yaa: «Mam na n kõo yãmb dũni naamã fãa, ne soolem kãensã ziirã, bala, b kõ-a-la maam, la mam kõt-a la m sẽn dat a soaba.

⁷Dẽ, yãmb sã n wõgemd mam taoore, a fãa na n lebga yãmb n so.»

⁸A Zeezi leok-a lame n yeele: B gʋlsame: «Waoog Zu-soaba, fo Wẽnnaam, la f pʋʋs bãmb b yembr bala.»

⁹Rõatã leb n talla a Zeezi yɛs n kẽng Zeruzalɛm, n yals bãmb wẽnd doogã zug n yeel-ba: Yãmb sã n yaa Wẽnnaam Bi-ribla, bɩ y yɩk ka n tiimd tẽnga.

¹⁰Bala, b gʋlsame: ‹Bãmb na n yeela b malegsã tɩ b gũ yãmba,

¹¹la malegsã na n zãa yãmb ne b nusi, sẽn na n yɩl tɩ yãmb naoor da wa n lak kugr ye.› »

¹²A Zeezi leoka yẽnda tɩ b gʋlsame: «Ra mak Zu-soaba, fo Wẽnnaamã ye.»

¹³Rõatã sẽn mak a Zeezi ne makr buud toor-toor n sɛ, a loogame n bas bãmba, hal tɩ ta a sẽn na n leb n paam weer a to n mak-ba.

¹⁴A Zeezi lebg n leba Galɩle ne Sɩɩg-sõngã pãnga. La bãmb yʋʋrã saaga soolmã fãa.

¹⁵A Zeezi dag n zãmsda nebã karen-dot pʋse, la nebã fãa rag n pẽgda bãmba.

¹⁶A Zeezi kẽnga Nazarɛte, tẽng ning b sẽn dag n wub bãmbã. La vʋʋsg daare, bãmb kẽe karen-doogẽ wã wa bãmb sẽn minim n maandẽ wã. Bãmb yikame n na n karem.

¹⁷La b kõo bãmb Wẽnnaam no-rɛɛs a Ezayi sebre. Bãmb laka sebrã, n yãnd zĩig ning b sẽn da gʋls n yeel tɩ:

¹⁸«Zu-soabã Sɩɩg bee mam zugu, bala, b kõ maam pãng tɩ m togs koe-noogã naong rãmb sʋka. Bãmb tʋma maam tɩ m tɩ moon yembsã yolsg koɛɛga, la m moon n togs zoensã, tɩ b na n leb n paama b nini, la m kɩt tɩ neb nins b sẽn namsdã loog ne lohorem,

¹⁹la m moon bark yʋʋmd Zu-soabã sẽn kõtã.»

²⁰A Zeezi pila sebrã n kɩs tʋmtʋmdã la b zĩndi. Nebã fãa sẽn be karen-doogẽ wã dag n geta bãmba.

²¹A Zeezi sɩngame n gom ne-b n yeele: «Gʋls-sõng‑kãngã yãmb sẽn wʋm moas-moasã wã paama pidsg rũndã.»

²²La nebã fãa dag n kɩta bãmb kaset n pẽgd bãmba, gom-sõamy nins sẽn dag n yit bãmb noorẽ wã yĩnga. La bãmb dag n yetame: «Bãmb ka a Zozɛf biigã wɛ?»

²³A Zeezi yeel-b lame yaa: Mam miime tɩ yãmb na n wẽe maam yel-bũn‑kãnga: «Tɩpa, tɩp f meng f toor n sãooge, la bɩ y maan bũmb nins fãa yãmb sẽn maan Kapɛrnaom tɩ tõnd wʋma, y tẽngẽ ka.»

²⁴A Zeezi leb n yeel-b lame yaa: «Sɩda, mam yeta yãmb tɩ Wẽnnaam no-rɛɛs baa a yembr zɩ n paam tɩ b reeg-a sõama a meng tẽngẽ ye.

²⁵Mam yeta yãmb sɩd t'a Eli wakate, yĩngr sẽn pag tɩ saag ka ni yʋʋm a tãab la kiis a yoobe, tɩ kom kãseng kẽ tẽngã fãa wã, pʋg‑kõap wʋsg n dag n be Israyɛlle.

²⁶Baoosgo, Wẽnnaam ka tʋm a Eli pʋg‑kõor baa a yembr nengẽ, sã n ka Sɩdõ soolem pʋg‑kõor a yembr sẽn dag n be Sarɛpta nengẽ bala.

²⁷La Wẽnnaam no-rɛɛs a Eliize wakate, yĩn-gãong bãas sẽn tar b rãmbã me rag n yaa wʋsg Israyɛlle. La baoosgo, baa a yembr bãmb sʋkã ka paam yɩlgr ye, sã n ka Siiri rao a Naama bala.»

²⁸Nebã fãa sẽn dag n be karen-doogẽ wã sẽn wʋm gom kãensã, b sũyã puugame.

²⁹Dẽ, bãmb yikame n veo a Zeezi n yiis tẽngã, n tall-b n tɩ ta tãng ning bãmb tẽngã sẽn tiẽ wã zugu, n na n tus bãmb tɩ b yi tãngã zug n lʋɩ.

³⁰La a Zeezi tũu bãmb sʋk bal n looge.

³¹A Zeezi kẽnga Kapɛrnaom, Galɩle tẽng a ye, la bãmb dag n zãmsda nebã vʋʋsg daare.

³²La bãmb zãmsgã yɛɛsa nebã. Bala, bãmb dag n zãmsda ne noore.

³³Dao a yembr n dag n be karen-doogẽ wã tɩ zĩn-dẽgd tar-a.

³⁴A kelma ne pãng n yeele: «Hey! Nazarɛt dao a Zeezi, yãmb data tõnd ne bõe? Yãmb waame n na n sãam tõnd la? Mam mii yãmb sẽn yaa ned ninga. Yãmb yaa Wẽnnaam sõmblem soaba.»

³⁵A Zeezi tãsa yẽnda n yeel-a: «Sĩndi, la f yi n bas raoã.» Zĩnã luba raoã nebã sʋka, la a yi n bas-a n ka maan-a wẽng baa bilfu.

³⁶Nebã fãa yɛɛsame n gomd ne taab n yetẽ tɩ koe-kãngã yaa bõe koɛɛga? Bãmb tara noor la pãnga, tɩ b sã n yeel zĩn-dãmb nins sẽn yaa rẽgdã tɩ b yi, b yitame.

³⁷La a Zeezi yʋʋrã dag n saagda soolmã fãa.

³⁸A Zeezi sẽn yi karen-doogẽ wã, b kẽnga a Sɩmo yiri. A Sɩmo reem-poakã yĩns rag n wɩnga hal wʋsgo, la b kosa a Zeezi tɩ b maag-a.

³⁹A Zeezi sulga a zugẽ n tãs yĩn-wɩngrã, la a yĩn-wɩngrã sigame. La wakat-kãng bala, a yikame n maan-b sãando.

⁴⁰Wĩndg sẽn kẽ, neb nins fãa sẽn dag n tar‑b bãad-dãmba, bãas buud toay-toay sẽn tare, tall-b lame n wa a Zeezi nengẽ. A Zeezi tika bãmb ned kam fãa ne b nusi, n maag-ba.

⁴¹Zĩn-dãmb me dag n yit n basda neb wʋsgo, la b kelemdẽ n yetẽ: «Yãmb yaa Wẽnnaam Bi-ribla.» La a Zeezi dag n tãsda bãmba, n gɩdgd-b tɩ b ra gom ye. Bala, zĩn-dãmbã rag n miime t'a Zeezi yaa Kirisã.

⁴²Beoogã sẽn vẽege, bãmb yiime n kẽng zĩig sẽn yaa we-rasempʋɩɩga. Neb kʋʋngã sɩngame n gẽesd bãmba, n wa n ta bãmb nengẽ. Bãmb dag n datame n gɩdg a Zeezi tɩ b ra loog n bas-b ye.

⁴³La a Zeezi yeel-b lame: «Yaa tɩlɛ tɩ mam moon Wẽnnaam soolem koe-noogã tẽms a taabã me. Bala, yaa bõn-kãng yĩng la b sẽn tʋm maamã.»

⁴⁴La a Zeezi dag n moonda koe-noogã Galɩle karen-dotã pʋse.