Read SEBR SÕNGO, 1998 Tõodo 11 Bible Online

Tõodo 11 - SEBR SÕNGO, 1998 bible

Tõodo 11

¹Yãmb na n nonga Sẽn-Ka-Saab sẽn yaa yãmb Wẽnnaamã, n sak bãmb no-tũudsã ne b noyã la b tõodã daar fãa.

²Bãng-y rũndã, tɩ mam ka gomd ne yãmb kambã sẽn ka bãng la b ka yã Sẽn-Ka-Saab sẽn yaa yãmb Wẽnnaamã zãmsgã, b kãosengã, ne b nug sẽn tar pãngã la b nugã sẽn tẽegã ye.

³B ka yãnd bãnã ne tʋʋm nins bãmb sẽn maan Ezɩpt tẽngã pʋgã, la b sẽn maan Faarõ sẽn yaa Ezɩpt rĩmã ne a tẽngã fãa wã,

⁴la bũmb nins bãmb sẽn dag n maan Ezɩpt tãb-biisã ne b wiidã la b saar-dãmbã, ne bãmb sẽn maan to-to n kɩt tɩ rudum ko-kãsengã lim bãmb wakat ning b sẽn digd yãmbã ye. Sẽn-Ka-Saab menesa bãmb hal tɩ ta rũndã.

⁵B ka yãnd bũmb nins bãmb sẽn maan n kõ yãmb we-raoogã pʋgẽ hal tɩ y wa ta zĩ-kãngã wã ye.

⁶Bãmb ka yãnd bũmb ning bãmb sẽn maan a Rubɛn biig a Eliyaab yagensã, a Datã ne a Abiramã, tẽngã sẽn yaag a noor n vel bãmb ne b yirã rãmba, la ne b fu-rotã, ne neb nins fãa sẽn tũ bãmb Israyɛll nebã fãa sʋkã ye.

⁷Yaa yãmb mens nin n yãnd tʋʋm-kãseng ning Sẽn-Ka-Saab sẽn maanã.

⁸Rẽ yĩnga, sak-y tõod nins fãa mam sẽn kõt yãmb dũndã wã n paam pãng n tõog n deeg tẽng ning yãmb sẽn dabd n na n tɩ soogã,

⁹la y kaoos tẽng ning Sẽn-Ka-Saab sẽn dag n wẽen n yeel y yaab-rãmbã tɩ b na n kõo bãmb ne b yagensã tɩ b soogã pʋgẽ. Yaa tẽng sẽn pid ne bĩisim la sɩɩd wʋsgo.

¹⁰Tẽng ning yãmb sẽn na n tɩ kẽ n soogã ka wẽnd Ezɩpt tẽngã yãmb sẽn yiẽ wã ye. Beenẽ, yãmb dag n bʋta y bõn-buudã, n zãgsd-a koom wa ned sẽn zãgsd zẽedo.

¹¹La tẽng ning yãmb sẽn dabd n na n tɩ soogã tara tãms ne londo. Saag niida beenẽ n kõt-a koom.

¹²Yaa tẽng Sẽn-Ka-Saab sẽn yaa yãmb Wẽnnaamã sẽn get a yell daar fãa, sẽn sɩng ne yʋʋmdã sɩngr n tɩ tãag a saabo.

¹³Yãmb sã n sak mam tõod nins mam sẽn kõt yãmb rũndã wã, n nong Sẽn-Ka-Saab sẽn yaa yãmb Wẽnnaamã n sak bãmb ne y sũyã fãa la ne y yamã fãa,

¹⁴mam na n kɩtame tɩ saag ni yãmb tẽngã sẽn zems a wakate. Na n yɩɩ dẽenem saaga, la yaoolem saaga, tɩ y paam bɩle la reezẽ rãam ne kaam.

¹⁵Mam na n kɩtame tɩ yamd yi wetã pʋsẽ, y rũmsã yĩnga. Yãmb na n dɩ n tɩgame.

¹⁶Gũus-y neer tɩ ned ra belg yãmb n kɩt tɩ y bʋdg n tũ wẽnnaam-dãmb a taab n wõgemd n waoog-b ye.

¹⁷Woto na n kɩtame tɩ Sẽn-Ka-Saab sũur yik ne yãmb tɩ b pag saasã tɩ saag ka leb n ni, tɩ tẽngã ka leb n kõ bõn-koaadl ye. Dẽ, na n kɩtame tɩ y menem tao-tao tẽn-noog ning Sẽn-Ka-Saab sẽn kõ yãmbã pʋgẽ.

¹⁸Bĩng-y gom-kãensã mam sẽn kõt yãmbã y sũyã pʋsẽ, ne y yamẽ, la y loe bãmb y nugẽ, la y teeg-a y rĩirẽ, y ninã sʋka, tɩ b yɩ bãnde.

¹⁹Rɩk-y bãmb n zãms y kambã, yãmb sã n wa zĩ y rotã pʋsẽ, wall y sã n bee sor zugu, wall y gãandg ne y yikr wakate.

²⁰Gʋls-y bãmb y lugã, ne y rotã noy yĩngri, la y tẽngã rignoy zutu.

²¹Dẽ, yãmb ne y kambã rasem na n kaoosa wa saasã sẽn be yĩngrã sẽn kaoosd to-to wã, tẽng ning Sẽn-Ka-Saab sẽn wẽen n yeel y yaab-rãmbã tɩ b na n kõ-b lame tɩ b soogã pʋgẽ.

²²Yãmb sã n gũus neer n sak tõod nins fãa mam sẽn kõt yãmb tɩ y tũ wã, n nong Sẽn-Ka-Saab sẽn yaa yãmb Wẽnnaamã n tũ bãmb sorã, la y loe y meng ne bãmba,

²³Sẽn-Ka-Saab na n kɩtame tɩ y rig bu-kãensã fãa. Yãmb na n tõoga buud sẽn yaa kãseng n tar pãng n yɩɩd yãmba.

²⁴Zĩig ning fãa yãmb naoã sẽn tabã na n yɩɩ yãmb n na n sooge. Yãmb soolmã na n sɩnga ne we-raoogã hal tɩ ta Libã, la a sɩng ne Efrat kʋɩlgã hal tɩ ta ko-kãsengã sẽn be wĩndgã sẽn lʋɩtẽ wã.

²⁵Ned baa a yembr ka na n tõog n yals n zab ne yãmb ye. Sẽn-Ka-Saab sẽn yaa yãmb Wẽnnaamã na n kɩtame tɩ zĩig ning fãa yãmb sẽn kẽngã pʋgẽ, bɩ rabeem la rigb yõk tẽngã nebã fãa wa bãmb sẽn dag n yeel yãmbã.

²⁶Gese, rũndã, mam ningda bark la kãab-beed yãmb taoore.

²⁷Yãmb sã n sak Sẽn-Ka-Saab sẽn yaa yãmb Wẽnnaamã tõod nins mam sẽn kõt yãmb dũndã wã, a na n yɩɩ bark yãmb yĩnga.

²⁸La yãmb sã n ka kelg Sẽn-Ka-Saab sẽn yaa yãmb Wẽnnaamã tõodo, yãmb sã bʋdg n bas sor ning mam sẽn wilgd yãmb dũndã wã, n na n tũ wẽnnaam-dãmb a taab yãmb sẽn ka mi, na n yɩɩ kãab-beed yãmb yĩnga.

²⁹Sẽn-Ka-Saab sẽn yaa fo Wẽnnaamã sã n tall foom n tɩ kẽes tẽng ning fo sẽn na n soogã pʋgẽ, bɩ f zĩnd Garizim tãngã zug n ning barka, la f zĩnd Eball tãngã zug n kãab wẽnga.

³⁰Tãn-kãens bee Zʋrdẽ kʋɩlgã rʋʋnde, n teesd wĩndg sẽn lʋɩtẽ, Kana nebã sẽn be zĩig ning sẽn yaa tẽn-nabd-koɛɛngã, Araba sẽn tot ne Gilgall sẽn yeg Moore terebẽnt tɩɩsã.

³¹Bala, yãmb na n dʋʋga Zʋrdẽ kʋɩlgã n tɩ soog tẽng ning Sẽn-Ka-Saab sẽn yaa yãmb Wẽnnaamã sẽn kõ yãmbã. Yãmb na n deega tẽngã n sooge, n kẽ beenẽ n zĩndi.

³²Bɩ y maan gũusg n sak no-tũudsã la noy nins mam sẽn kõt yãmb dũndã wã.»