Read SEBR SÕNGO, 1998 Tõodo 18 Bible Online

Tõodo 18 - SEBR SÕNGO, 1998 bible

Tõodo 18

¹Leevi buudã neb nins sẽn yaa maan-kʋʋdbã ne Leevi buudã fãa ka na n naag Israyɛll buud a taabã n paam zĩig Israyɛll soolmã pʋgẽ ye. Maoong sẽn yõogd bugmã sẽn kõt Sẽn-Ka-Saabã, ne b pʋɩɩrã n na n yɩ bãmb dɩɩbo.

²Bãmb ka na n paam pʋɩɩr b saam-biisã sʋk ye. Yaa Sẽn-Ka-Saab n yaa bãmb pʋɩɩr wa b sẽn dag n yeel bãmb wɛɛngẽ wã.

³Ad bũmb ning maan-kʋʋdbã sẽn tog n paam nebã nengẽ. Ned ning fãa sẽn na n kʋ loalg bɩ pesgo, wall bʋʋga, a na n kõo maan-kʋʋdã bãokã ne lemdã, la pʋʋrã.

⁴Yãmb na n kõo bãmb y koodã, la y reezẽ rãamã, ne y kaamã dẽenem biisi, la rũm-bãooneg nins yãmb sẽn wõrs pipi wã kõbdo.

⁵Bala, yaa bãmb ne b yagensã la Sẽn-Ka-Saab sẽn yaa yãmb Wẽnnaamã yãk buud fãa sʋka, tɩ b yaas bãmb taoor n tʋm ne bãmb yʋʋr wakat fãa.

⁶Leevi buud ned sã n dat n yi yãmb tẽmsã tẽng a yembr pʋgẽ, ba a sẽn be zĩig ning Israyɛll soolmã pʋga, a tõe n kẽnga zĩig ning a sẽn date, zĩig ning Sẽn-Ka-Saab sẽn na n yãkã pʋgẽ.

⁷Yẽnda tõe n tʋma ne Sẽn-Ka-Saab sẽn yaa yãmb Wẽnnaamã yʋʋr wa a saam-biis nins sẽn yaa a Leevi buudã nebã me sẽn be Sẽn-Ka-Saab taoor n tʋmdẽ wã.

⁸B na n kõo yẽnda pʋɩɩre, a rɩɩbã yĩng wa neb a taabã me sẽn paamdã, a sẽn na n koos a ba wã paoong sẽn yãk a toogo.

⁹«Yãmb sã n tɩ kẽ tẽng ning Sẽn-Ka-Saab sẽn yaa yãmb Wẽnnaamã sẽn kõ yãmbã, bɩ y ra zãms-y tɩ maan yel-beed nins buud a taabã sẽn be beenẽ n maandẽ wã ye.

¹⁰Bɩ b ra yãnd ned baa a yembr yãmb sʋkã sẽn dɩk a bi-ribl bɩ a bi-pugl n kɩt tɩ b yõog bugum ye. Bɩ b ra yãnd ned baa a yembr sẽn yaa tɩɩm soaba, kinkir baga, wall ned sẽn togsd beoog yelle, bɩ ned sẽn maand sõod tʋʋmã,

¹¹wall baga, bɩ tɩɩm soaba, wall ned sẽn gomd ne zĩn-dãmba, bɩ ned sẽn boond kɩɩms ye.

¹²Ned ning fãa sẽn maand woto yaa yel-beed Sẽn-Ka-Saab nifẽ. Yaa yel-be-kãng yĩng la Sẽn-Ka-Saab sẽn yaa yãmb Wẽnnaamã kɩt tɩ b rig neb nins sẽn dag n be beenẽ wã.

¹³Bɩ y yɩ neb sẽn zems zãng Sẽn-Ka-Saab sẽn yaa yãmb Wẽnnaamã nifẽ.»

¹⁴Bala, buud nins yãmb sẽn na n digã kelgda kinkir bagb ne tɩɩm dãmba. La Sẽn-Ka-Saab sẽn yaa yãmb Wẽnnaamã ka kõt yãmb noor tɩ y maan a woto ye.

¹⁵Sẽn-Ka-Saab sẽn yaa yãmb Wẽnnaamã na n zẽka yãmb saam-biig a yembr n maan b no-rɛɛs t'a yɩ wa maam n kõ yãmba. Kelg-y-yã a soaba.

¹⁶Yaa woto la yãmb sẽn dag n kos Sẽn-Ka-Saab sẽn yaa yãmb Wẽnnaamã Horɛɛb tigingã daarã. Yãmb yeelame: «D ka rat n leb n wʋm Sẽn-Ka-Saab sẽn yaa yãmb Wẽnnaamã koɛɛgã ye, la d ka rat n leb n yãnd bug-kãngã n wa ki ye.»

¹⁷La Sẽn-Ka-Saab yeela maam yaa: «Bãmb sẽn gom woto wã yaa neere.

¹⁸Mam na n yãka no-rɛɛs wa foom bãmb saam-biisã sʋk n kõ bãmba. Mam na n ninga m goamã a noorẽ t'a togs bãmb bũmb nins fãa mam sẽn na n yeelã.

¹⁹Ned sã n ka sak mam goam nins yẽnda sẽn gomd ne mam yʋʋrã, yaa mam meng n na n sok a soaba.

²⁰La no-rɛɛs sã n wuk a meng n yeel gomd ne mam yʋʋr tɩ mam ka yeel-a t'a gome, bɩ a sã n gom ne wẽnnaam-dãmb a taab yʋʋre, bɩ b kʋ no-rɛɛs-kãnga.»

²¹Daarninga, yãmb na n yeelame: «D na n maana a wãn n bãng goam nins Sẽn-Ka-Saab sẽn ka gomã?»

²²No-rɛɛsã sã n gom ne Sẽn-Ka-Saab yʋʋre, tɩ gomdã ka paam pidsgu, wall a sã n ka yɩ, ka Sẽn-Ka-Saab n gom gom-kãens ye. Yaa no-rɛɛsã n wuk a meng n gome. Bɩ y ra zoe-a ye.