Read SEBR SÕNGO, 1998 Tõodo 19 Bible Online

Tõodo 19 - SEBR SÕNGO, 1998 bible

Tõodo 19

¹«Sẽn-Ka-Saab sẽn yaa yãmb Wẽnnaamã sã n wa sãam buud nins bãmb sẽn dɩk b tẽmsã n kõ yãmbã, tɩ y reeg b tẽmsã ne b rotã n kẽ b pʋsẽ.

²Yãk-y tẽms a tãab tẽng ning Sẽn-Ka-Saab sẽn kõt yãmb tɩ y soogã pʋgẽ,

³n maneg soayã, la y welg tẽng ning Sẽn-Ka-Saab sẽn yaa yãmb Wẽnnaamã sẽn kõ yãmbã zĩis a tãabo, tɩ ned sã n kʋ ned bɩ a zoe n tɩ kẽ be.

⁴Ad sẽn na n tũ ne bũmb ning tɩ nin-kʋʋdã wa zoe n tõog n kẽ tẽn-bãmb pʋsẽ n paam n põsã. Yaa a sẽn na n kʋ ned ne yĩdgu, tɩ beem yaool n dag n ka be b sʋk ye.

⁵Yaa a sẽn na n tũ a to n kẽng weoogẽ n na n tɩ kɛ raado, n zẽk larã t'a na n kɛ tɩ larã baag n kɛ a to wã n kʋ. Nin-kãng soabã tõe n zoee n kẽe tẽn-bãmb tẽng a yembr pʋgẽ n fãag a yõore.

⁶Yaa sẽn na n yɩlẽ tɩ ned ning sẽn ki wã ned ra paam ned ning sẽn kʋ nedã n kʋ ne sũ-toog ye. Yẽnda ka zems kũum ye, yẽnda sẽn dag n ka kis a to wã yĩnga.

⁷Yaa rẽ yĩng la mam kõt yãmb noor tɩ y welg tẽms a tãab toore.

⁸Sẽn-Ka-Saab sẽn yaa yãmb Wẽnnaamã sã n wa yalg yãmb soolmã wa b sẽn dag n wẽen ne y yaab-rãmbã, la b sã n kõ yãmb soolem ning fãa bãmb sẽn dag n kãab tɩ b na n kõ yãmb yaab-rãmbã.

⁹Yãmb sã n maan gũusg n sak tõ-kãensã fãa mam sẽn kõ yãmb dũndã wã n nong Sẽn-Ka-Saab sẽn yaa yãmb Wẽnnaamã, n tũ bãmb sorã daar fãa, dẽ, bɩ y yãk tẽms a tãab n paas tẽn-bãmbã.

¹⁰Yaa sẽn na n yɩlẽ tɩ b ra wa raag bʋʋm-soab zɩɩm tẽng ning Sẽn-Ka-Saab sẽn yaa yãmb Wẽnnaamã sẽn kõ yãmb tɩ y soogã pʋgẽ, tɩ zɩɩm taal ra wa zĩnd yãmb zug ye.

¹¹La ned sã n kis a to n solg n gũus-a n tɩ wẽ-a n kʋ, yẽnda sã n zoe n tɩ kẽ tẽn-bãmb tẽng a yembr pʋgẽ,

¹²bɩ a tẽngã kãsem-dãmb tʋm tɩ b tɩ yõk-a beenẽ n tall n tɩ kɩs yẽnda sẽn kʋ ned ningã ned t'a kʋ-a n lebse.

¹³Bɩ y ra zoe a nimbãaneg ye. Bɩ y yiis bʋʋm soabã zɩɩm daagr taal Israyɛll nebã zutu, n paam sũ-noogo.

¹⁴Bɩ y ra serg toadgã kugr ning sẽn be yãmb ne y yak pʋʋg sʋkã, y yaab-rãmbã sẽn dag n ning tẽng ning Sẽn-Ka-Saab sẽn yaa yãmb Wẽnnaamã sẽn na n kõ yãmb tɩ y soogã pʋgẽ wã ye.»

¹⁵Nin-yend kaset yĩng ka sek tɩ b wilg tɩ ned maana kongr bɩ yel-wẽnde, baa sẽn yaa yel-wẽnd ning yĩng ye. B ka tog n kao ned bʋʋdo, tɩ ka ne neb a yiib bɩ a tãab kaset yĩng ye.

¹⁶Ned sã n kɩs kaset zirẽ n dõd ned n yeel t'a maana wẽnga,

¹⁷bɩ neb nins sẽn zabd taabã kẽng n tɩ yaas Sẽn-Ka-Saab ne maan-kʋʋdbã la bʋ-kaoodb nins sẽn kaood bʋʋd wakat-kãngã taoore.

¹⁸Bɩ bʋ-kaoodbã fees yellã neere. La bãmb sã n mik tɩ kaset-soabã yaga zirẽ n dõd a saam-biigã,

¹⁹bɩ y maan-a wa yẽnda sẽn dag n dat tɩ b maan a saam-biigã to-to wã. Woto, yãmb na n yiisa wẽngã yãmb sʋka.

²⁰Dẽ, neb a taabã na n wʋmame n zoe rabeem. La b kõn leb n maan wẽng a woto yãmb sʋk ye.

²¹Bɩ y ra zoe a soab nimbãaneg ye. Yaa vɩɩm vɩɩm yĩnga, la nif nif yĩnga, la yẽnd yẽnd yĩnga, la nug nug yĩnga, la naoor naoor yĩnga.