Read SEBR SÕNGO, 1998 Tõodo 22 Bible Online

Tõodo 22 - SEBR SÕNGO, 1998 bible

Tõodo 22

¹Fo sã n yãnd f saam-biig naaf bɩ a pesgo, wall a bʋʋg sẽn meneme, ra bas-a n loog ye. Tall-a n tɩ kɩs f saam-biigã.

²Fo saam-biigã yir sã n ka pẽ ne foom wall fo sã n ka mi sẽn yaa a soab rũnga, bɩ f tall-a n kuil f yiri, hal tɩ f saam-biigã sã n wa bolge, bɩ f yaool n kɩs-a.

³Maan a woto me ne a bõanga, baa ne a fuugu, la fo sẽn na n yãnd f saam-biig bũmb sẽn menem fãa. Ra maan f toor ka ye.

⁴Fo sã n yãnd f saam-biig bõang bɩ a loalg sẽn lʋɩ n gãe sor zugu, ra maan f toor ka be ye. Sõng f saam-biigã n yik-a.

⁵Bɩ pag ra yeelg rao fuug ye, la bɩ rao ra yeelg pag fuug ye. Bõn-kãng yaa yel-beed Sẽn-Ka-Saab sẽn yaa yãmb Wẽnnaamã yĩnga.

⁶Fo sã n kẽnd sor zug n yãnd liuul tʋk tɩɩg zugu, bɩ tẽnga, tɩ liuun-bi wall gɛl be beenẽ, tɩ b ma põg be, bɩ f ra yõk ma wã la f wʋk a kambã ye.

⁷Bas b ma wã t'a looge, la f wʋk a kambã, tɩ fo vɩɩm tõe n yɩ noogo, la f tõe n paam yõ-woko.

⁸Fo sã n me ro-paalga, bɩ f ning a zugã kogre, tɩ ned ra wa rʋ a zug n lʋɩ t'a zɩɩmã taal wa be fo roogã zug ye.

⁹Ra bʋd reezẽ tɩɩs buud a yiib f reezẽ tɩɩs pʋʋgẽ, tɩ fo sẽn bʋd bũmb ningã biis ne fo reezẽ wã zãng biis ra wa lebg bũmb sẽn welg toor Sẽn-Ka-Saab yĩng ye.

¹⁰Da rɩk loalg ne bõang n balg n naag taab n ko ye.

¹¹Da rɩk pe-kõbd ne lamd gĩs n lagem taab n wʋg fuug n yeelg ye.

¹²Ning f fu-goabg noy a naasã fãa zerdo.

¹³Ned sã n peeg pag n kẽ ne-a n yaool n yeel t'a ka nong-a,

¹⁴la a sã n dõd-a ne tʋʋm-beed n sãam a yʋʋrã, n yeele: «Mam peega pʋg-kãngã, la mam sẽn kẽ ne-a wã, mam mikame t'a ka tar bãnd ning sẽn wilgd t'a ka bãng rao ye.»

¹⁵Bɩ pʋg-sadã ba wã ne a ma wã tall a pʋ-peelmã bãnã n kẽng n tɩ wilg tẽngã kãsem-dãmbã tẽngã rignoorẽ.

¹⁶Bɩ pʋg-sadã ba wã yeel tẽngã kãsem-dãmbã a woto: «Mam dɩka m bi-pugl n kõ rao-kãngã t'a maan a paga, la a ka nong-a ye.

¹⁷Yẽnda rõd-a-la ne tʋʋm-beedo, n yeel t'a ka yãnd bãnd sẽn wilg tɩ mam bi-puglã ka mi rao ye. Ad mam bi-puglã sẽn ka mi raoã bãnde.» Dẽ, bɩ b tẽeg fuugã tẽngã kãsem-dãmb taoore.

¹⁸Bɩ tẽngã kãsem-dãmbã yõk raoã n sɩbge.

¹⁹La raoã sẽn sãam Israyɛll pʋg-sad sẽn ka mi rao yʋʋrã yĩnga, bɩ tẽngã kãsem-dãmb yaoolg-a wanzuri wakɩ-koeems koabga, tɩ b rɩk n kõ pʋg-sadã baaba. La pʋg-sadã na n kell n yɩɩ yẽnda paga, la yẽnda ka tõe n leb n bas-a hal n tãag a yõor tɛka.

²⁰La sã n mikame tɩ yellã yaa sɩda, tɩ b ka yãnd pagã sẽn ka mi raoã bãnde,

²¹bɩ b yiis-a a ba wã zak noore, t'a tẽngã neb lob-a kug t'a ki, yẽnda sẽn maan yel-wẽnd Israyɛll nebã sʋka, a sẽn zĩnd a ba wã zakẽ n maan yoobã yĩnga. Woto yãmb na n yiisa wẽngã yãmb sʋka.

²²B sã n yãnd tɩ rao maand yoob ne pag sẽn tar sɩda, bɩ b kʋ raoã ne pagã fãa n yiis wẽngã Israyɛll nebã sʋka.

²³B sã n dɩk pʋg-sad sẽn ka mi rao n kõ ned t'a na n maan a paga, tɩ rao a to yãnd-a tẽngã pʋg n peeg-a n gãande,

²⁴bɩ y yiis bãmb b yiibã fãa tẽngã rignoorẽ, n lob-b kug tɩ b ki, la yaa pʋg-sadã sẽn sĩnd a noor n ka wẽ no-bɩng tẽngã pʋgẽ wã yĩnga, la raoã sẽn sãam a to pagã yĩnga. Woto, yãmb na n yiisa wẽngã yãmb sʋka.

²⁵La sã n yaa weoogẽ la raoã yãnd pʋg-sadã b sẽn pʋlem sɩdã, n yõk-a n gãand ne pãnga, yaa rao ning sẽn gãand-a pʋg-sadã a yembr bal la b tog n kʋ.

²⁶Bɩ y ra maan pʋg-sadã bũmb ye. Pʋg-sadã ka maan bũmb sẽn yaa yel-wẽnde, sẽn sek kʋʋb ye. Yẽnda yellã yaa wa ned sẽn zab ne a to n kʋ-a.

²⁷Bala, yaa weoog pʋgẽ la raoã paam yẽnda. La tõeeme tɩ pʋg-sadã b sẽn pʋlem sɩdã kelmame tɩ ned rag n ka be n na n fãag-a ye.

²⁸Ned sã n yãnd pʋg-sad sẽn ka mi raoa, b sẽn ka pʋlem sɩda, n yõk-a n gãande, tɩ b yãnd-ba,

²⁹bɩ rao ning sẽn gãand-a pʋg-sadã yao pʋg-sadã ba wã wanzuri wakɩ-koeems pis-nu, la a peeg-a n maan a paga, yẽnda sẽn sãam-a wã yĩnga. La yẽnda ka tõe n leb n bas-a hal n tãag a yõor tɛka.