Read SEBR SÕNGO, 1998 Tõodo 23 Bible Online

Tõodo 23 - SEBR SÕNGO, 1998 bible

Tõodo 23

¹Bɩ ned ba a yembr da peeg a ba paga, la a ra kẽ ne-a me ye.

²Ned lam-biis sẽn bedse, wall ned raoolem sẽn fiuug ka tõe n kẽ Sẽn-Ka-Saab nebã tiging pʋgẽ ye.

³Tãmpĩir ka tõe n kẽ Sẽn-Ka-Saab tiging pʋgẽ ye. Baa yẽnda yagens ne a yagen-tʋb-ra-kẽes n tɩ tãag zamaan piig ka tõe n kẽ beenẽ ye.

⁴Amo nebã ne Moaab nebã ka tõe n kẽ Sẽn-Ka-Saab nebã tiging zĩigẽ ye. Baa bãmb yagens ne a yagen-tʋb-ra-kẽes n tɩ tãag zamaan piig ka tõe n kẽ beenẽ ye. Bõn-kãng na n yɩɩ woto wakat fãa.

⁵Bala, bãmb ka tall rɩɩb ne koom n seg yãmb sorã zug y sẽn wa n yi Ezɩpt wakatẽ wã ye. La sẽn paas me, bãmb kõo a Bewoor biig a Balaam sẽn yit Petoor sẽn be Mezopotami soolmẽ wã ligd t'a kãab yãmb wẽnga.

⁶La Sẽn-Ka-Saab sẽn yaa yãmb Wẽnnaamã ka sak n kelg a Balaam ye. Sẽn-Ka-Saab sẽn yaa yãmb Wẽnnaamã teka kãab-wẽngã tɩ lebg bark yãmb yĩnga. La yaa Sẽn-Ka-Saab sẽn yaa yãmb Wẽnnaamã sẽn nong yãmbã yĩnga.

⁷Ra bao-y tɩ vɩ-bãan zĩnd bãmb sʋka, la ra bao-y b sũ-noogo, hal yãmb vɩɩmã tɛka.

⁸Ra ges-y Edom nebã wa yel-beed ye. Bãmb yaa yãmb saam-biisi. Ra ges-y Ezɩpt nebã wa yel-beed ye. Yãmb dag n yaa sãamb bãmb tẽngẽ.

⁹Bãmb yagen-tʋb-ra-kẽesã, sẽn sɩng ne zamaan a tãabã tõe n kẽe Sẽn-Ka-Saab nebã tiging pʋgẽ.

¹⁰Yãmb sã n yi n kẽng n na n tɩ zab ne y bɛɛbã, bɩ y gũus y mens ne wẽng buudã fãa.

¹¹Yãmb ned a yembr sã n gãand yʋng n dẽgem a menga, bɩ a yi kɛɛnga, n da kẽ tãb-sikã zĩigẽ ye.

¹²Wĩndgã sã n kɩlle, bɩ a so koom tɩ wĩndgã sã n kẽ, bɩ a yaool n kẽ tãb-sikã zĩigẽ.

¹³Yãk-y zĩig sẽn vẽsg bilf ne yãmb tãb-sikã, y we-kɛɛng yĩnga, tɩ we-kɛɛng sã n wa tar yãmba,

¹⁴bɩ y zã wãka, tɩ y sã n maan we-kɛɛngã n sa, bɩ y tuk bok n bus bĩndã.

¹⁵Bala, Sẽn-Ka-Saab sẽn yaa yãmb Wẽnnaamã bee yãmb tãb-sikã zĩigẽ, n na n fãag yãmba, la b sõng-y tɩ y tõog y bɛɛbã. Yaa woto n kɩt tɩ yãmb tãb-sikã tog n yɩ zĩig sẽn welg toore, tɩ Sẽn-Ka-Saab ra wa yãnd bũmb sẽn ka sõama yãmb sʋk n wẽnemd n bas yãmb ye.

¹⁶Yamb sã n bas a zu-soab n zoe n wa fo nengẽ, bɩ f ra tall-a n tɩ kɩs a zu-soabã ye.

¹⁷A na n paa ne foom, Israyɛll tẽng ning pʋg a sẽn yãk n na n zĩndã pʋga. Da kɩt t'a tʋm n kõ foom zaalem ye.

¹⁸Bɩ Israyɛll bi-pugl baa a yembr ra lebg wẽn-naandg pʋg-koos-m-meng ye. La bɩ Israyɛll rao baa a yembr da yɩ yoaad wẽn-naandg yĩng ye.

¹⁹Da tall-y pʋg-koos-m-meng yaood wall baag ligd n wa Sẽn-Ka-Saab sẽn yaa yãmb Wẽnnaamã roogẽ, n wa rol pʋleng ning yãmb sẽn dag n pʋlem Sẽn-Ka-Saabã ye. Baa sẽn yaa yaood ninga. Bala, bãmb b yiibã fãa yaa yel-beed Sẽn-Ka-Saab sẽn yaa yãmb Wẽnnaamã nifẽ.

²⁰Ra peng-y y saam-biig bũmb n bao roagleng ye. Sã n yaa ligdi, wall rɩɩbo, wall sẽn yaa bũmb ning fãa, bɩ y ra peng n bao roagleng ye.

²¹Yãmb tõe n penga sãan n bao roaglenga, la ra sak-y n peng-y y saam-biig n bao roaglenga, tɩ Sẽn-Ka-Saab sẽn yaa yãmb Wẽnnaamã ning yãmb bark ne tʋʋm nins fãa yãmb sẽn maand tẽng ning yãmb sẽn kẽ n na n soogã pʋgẽ.

²²Fo sã n pʋlem Sẽn-Ka-Saab sẽn yaa yãmb Wẽnnaamã, bɩ f ra kaoos n dol f pʋlemdã ye. Bala, Sẽn-Ka-Saab sẽn yaa yãmb Wẽnnaamã na n ninga foom taal tɩ lebg fo yel-wẽnde.

²³Fo sã n ka pʋlme, kongr ka be f zug ye.

²⁴Gũus ne bũmb nins fãa fo sẽn gomdã, la f rol pʋlemd ning fãa fo sẽn pʋlem Sẽn-Ka-Saab sẽn yaa yãmb Wẽnnaamã ne yamleoogã, tɩ yaa f meng noor n gome.

²⁵Fo tõe n kẽe f to reezẽ pʋʋgẽ n yãk reezẽ wã n dɩ tɩ sek-fo. La f ka tõe n yãk n ning f peoogẽ ye.

²⁶Fo sã n kẽ f to pʋʋgẽ, fo tõe n yãka kood n tẽg n wãbe, la f ka tõe n kẽ ne goeoog n na n wʋr ye.