Read SEBR SÕNGO, 1998 Tõodo 24 Bible Online

Tõodo 24 - SEBR SÕNGO, 1998 bible

Tõodo 24

¹Rao sã n peeg pag n wa mik t'a maana yãnd t'a sũur puugi, a na n gʋlsa basg sebr n kõ-a n yeel-a t'a leb a ba-yiri.

²A na n yii rao-kãng nengẽ n looge, la a tõe n tɩ lebga rao a to paga.

³La yẽnda sẽn tɩ rɩk rao ningã me sã n wa ka leb n dat-a, bɩ a gʋls basg sebr n kõ-a, la a yeel-a t'a loog la a bas zakã. Wall sã n mikame tɩ rao ning sẽn dɩk-a yẽnda wã kiime,

⁴a pipi sɩdã sẽn dag n bas-a wã ka leb n tõe n peeg-a n maan a paga, b sẽn dẽgm-a wã yĩnga. Bala, bõn-kãng yaa yel-beed Sẽn-Ka-Saab nifẽ. Da ning-y yel-wẽnd tẽng ning Sẽn-Ka-Saab sẽn yaa yãmb Wẽnnaamã sẽn kõ yãmb tɩ y soogã zug ye.

⁵Rao sã n peeg pʋg-paala, bɩ a ra tũ n kẽng zabr ye. La b ka tog n modg-a t'a maan bũmb ba a yembr ye. Bas-y-yã-a taal yʋʋmde, t'a pa yir n noog pag ning a sẽn peegã sũuri.

⁶Ned sã n dɩk neer bɩ ne-biig n wa n na n gãneg ne foom n deeg bũmb bɩ f ra reeg ye. Bala, wẽnda wa ned sẽn dɩk a vɩɩm n wa n na n gãneg ne foom.

⁷B sã n yãnd ned sẽn yõk a saam-biig sẽn yaa Israyɛll buudã ned n maan a yamba, wall a koos-a, bɩ y kʋ nin-kãng soaba. Woto, yãmb na n yiisa wẽngã yãmb sʋka.

⁸Maan-y gũusg ne yĩn-gãong bãagã, n tõog n gũus n ges n maan wa sẽn zems bũmb ning maan-kʋʋdbã sẽn yaa Leevi buudã sẽn na n zãms yãmbã, n gũus n maan wa noor ning mam sẽn kõ maan-kʋʋdbã bal kɛpɩ.

⁹Tẽeg-y bũmb ning Sẽn-Ka-Saab sẽn yaa yãmb Wẽnnaamã sẽn dag n maan a Miryam sorã zug yãmb sẽn wa n yi Ezɩpt wakatã.

¹⁰Fo sã n dɩk f bũmb n peng f to, bɩ f ra kẽ a zakẽ n dɩk bũmb ning a sẽn tog n gãnegã ye.

¹¹Yaas yɩng tɩ ned ning fo sẽn dɩk f bũmbã n pengã tall bũmb ning a sẽn tog n gãnegã n wa kɩs foom.

¹²Yẽnda sã n yaa naong soaba, bɩ f ra tall a bũmbã n gãand n vẽeg beoog n ka lebs-a ye.

¹³Wĩndgã sã n kẽ, lebs-a a fu-goabgã t'a pil n gãand la a ning-f barka. La fo na n paama tɩrlem Sẽn-Ka-Saab sẽn yaa fo Wẽnnaamã nifẽ.

¹⁴Fo saam-biig bɩ sãan sẽn yaa naong soaba, bɩ nimbãan ned sã n tʋmd fo nengẽ n baood ligdi, bɩ f ra nams-a ye.

¹⁵Yao-a a ligdã tɩ wĩndgã nan ka kẽ ye. Bala, yẽnda yaa naong soaba, la a ligdã yaa bõn-kãseng ne-a. Sã n ka woto, yẽnda tõe n dɩka foom n bas ne Sẽn-Ka-Saabo, tɩ lebg yel-wẽnd fo yĩnga.

¹⁶B ka tog n kʋ ba-rãmb b kamb yĩnga, la b ka tog n kʋ kamb b ba-rãmb yĩng ye. B tog kʋʋ ned kam fãa a meng yel-wẽnd yĩnga.

¹⁷Da bʋ-y sãan bɩ kɩɩb bʋʋd kegre, la ra reeg-y pʋg-kõor fuug n gãneg n yaool n kõ-a bũmb ye.

¹⁸Tẽeg-y tɩ yãmb me rag n yɩɩ yembs Ezɩpt tẽnga, tɩ Sẽn-Ka-Saab sẽn yaa yãmb Wẽnnaamã tɩ fãag yãmb be. Yaa rẽ yĩnga, tɩ mam yet yãmb tɩ y sak n tũ noor ning mam sẽn kõ yãmbã.

¹⁹Fo sã n wa tigsd f pʋʋgã koodo, n yĩm ka-gĩnd pʋʋgẽ wã, bɩ f ra lebg n leb n tɩ rɩk-a ye. Bõn-kãng na n yɩɩ sãambã ne kɩɩbsã la pʋg-kõapã rẽnda, sẽn na n yɩl tɩ Sẽn-Ka-Saab sẽn yaa yãmb Wẽnnaamã ning yãmb nus tʋʋmã fãa barka.

²⁰Fo sã n wa miimd f oliiv tɩɩse, bɩ f ra lebg n leb n tɩ yiis biis nins sẽn pa yĩngrã ye. Bãmb yaa sãambã ne kɩɩbsã, la pʋg-kõapã rẽnda.

²¹Fo sã n wob f reezẽ tɩɩse, bɩ f ra leb n leb poorẽ n tɩ yiis biis nins sẽn kellã ye. Bãmb yaa sãambã ne kɩɩbsã, la pʋg-kõapã rẽnda.

²²Tẽeg-y tɩ yãmb dag n yaa yembs Ezɩpt soolmẽ. Yaa rẽ yĩnga, tɩ mam yet yãmb tɩ y sak n tũ noor ning mam sẽn kõ yãmbã.