Read SEBR SÕNGO, 1998 Tõodo 26 Bible Online

Tõodo 26 - SEBR SÕNGO, 1998 bible

Tõodo 26

¹Yãmb sã n kẽ tẽng ning Sẽn-Ka-Saab sẽn yaa yãmb Wẽnnaamã sẽn kõ yãmb tɩ y soogã n tilg y yiya,

²bɩ y yãk kood nins fãa yãmb sẽn paam tẽn-kãng pʋgẽ wã, tẽng ning Sẽn-Ka-Saab sẽn yaa yãmb Wẽnnaamã sẽn kõ yãmbã dẽenem biisi, n ning peoog pʋgẽ, n tall n kẽng zĩig ning Sẽn-Ka-Saab sẽn yaa yãmb Wẽnnaamã sẽn yãk n ning b yʋʋrã.

³Kẽng-y maan-kʋʋd ning sẽn tʋmd wakat-kãngã nengẽ n tɩ yeel-a yaa: «Rũndã, mam wilgda Sẽn-Ka-Saab sẽn yaa fo Wẽnaamã tɩ m kẽe tẽng ning Sẽn-Ka-Saab sẽn dag n wẽen n yeel d yaab-rãmbã tɩ b na n kõo tõndã.»

⁴La maan-kʋʋdã na n deega peoogã fo nugẽ n tẽgen Sẽn-Ka-Saab sẽn yaa yãmb Wẽnnaamã tẽn-kugrã taoore.

⁵Bɩ f yeel Sẽn-Ka-Saab sẽn yaa yãmb Wẽnnaamã taoor yaa: «Mam yaabã rag n yaa Siiri neda, n saad tẽng-tẽnga. La bãmb ne b nebã sẽn ka waoogã wa n siga Ezɩpt tẽnga, n pa sãand weoog beenẽ. Dẽ, bãmb paa beenẽ n lebg bu-kãseng sẽn tar pãnga, n yaa wʋsgo.

⁶Ezɩpt nebã namsa tõnd n maan tõnd pãnga, n kẽes-d yembd sẽn yaa toog pʋgẽ.

⁷La tõnd kelmame n kos Sẽn-Ka-Saab sẽn yaa tõnd yaab-rãmbã Wẽnnaamã tɩ b wa sõng-do. La Sẽn-Ka-Saab wʋma tõnd koɛɛgã, n yãnd d sũ-sãangã ne tõnd tʋʋm-toogã, la d namsgã.

⁸Bãmb tẽega b nug sẽn tar pãngã, la sẽn wat ne yɛɛsg wʋsgã, ne bãnã, la bõn-bãnã, n yiis tõnd Ezɩpt tẽnga.

⁹Bãmb talla tõnd n wa ka, n wa kõ tõnd tẽn-kãngã. Yaa tẽng sẽn pid ne bĩisim la sɩɩd wʋsgo.

¹⁰La ade, Sẽn-Ka-Saabo, mam waa ne tẽn-gãongã dẽenem biis nins yãmb sẽn kõ maamã!» Dẽ, bɩ f tẽgen dẽenem biisã Sẽn-Ka-Saab sẽn yaa yãmb Wẽnnaamã taoor be, la f waoog-ba.

¹¹Bɩ yãmb ne a Leevi buudã nebã, la sãamb nins sẽn be ne yãmbã maan sũ-noog ne bõn-sõama nins fãa Sẽn-Ka-Saab sẽn yaa yãmb Wẽnnaamã sẽn kõ yãmb ne y yirã rãmbã.

¹²Yʋʋm a tãab yʋʋmdã sẽn yaa piig pʋɩɩr yʋʋmdã sã n ta, tɩ y tigs y paoongã fãa piig pʋɩɩrã zãnga, bɩ y rɩk n kõ a Leevi buudã nebã ne sãambã, la kɩɩbsã ne pʋg-kõapã, tɩ b rɩ n tɩg y tẽmsã pʋsẽ.

¹³Dẽ, bɩ y yeel Sẽn-Ka-Saab sẽn yaa yãmb Wẽnnaamã taoor yaa: Mam yiisa bũmb ning sẽn welg toorã m zakã pʋgẽ n kõ a Leevi buudã nebã, ne sãambã la kɩɩbsã la pʋg-kõapã, wa sẽn zems tõod nins fãa yãmb sẽn kõ maamã. Mam ka bas tõog baa a yembre, la m ka yĩm ba a yembr yell ye.

¹⁴Mam ka tol n yãk-a n dɩ m sũ-sãang pʋgẽ, mam ka sɩɩs-a m sẽn yaa rẽgd wakate, la m ka yãk-a n pʋʋs kʋʋr ye. Mam kelga Sẽn-Ka-Saab sẽn yaa mam Wẽnnaamã koɛɛgã, n maan wa bãmb sẽn yeel maamã bal kɛpɩ.

¹⁵Zĩnd-y y zĩig sẽn welg toorã sẽn be yĩngrã pʋgẽ, n sulg n ning Israyɛll sẽn yaa yãmb nebã, ne tẽng ning yãmb sẽn kõ tõndã barka, wa yãmb sẽn dag n wẽen ne tõnd yaab-rãmbã. Yaa tẽng sẽn pid ne bĩisim la sɩɩd wʋsgo.

¹⁶Rũndã, Sẽn-Ka-Saab sẽn yaa yãmb Wẽnnaamã yeta yãmb tɩ y sak no-tũudsã ne noy-kãensã, la y reeg-b neer n sak-b ne y sũyã fãa, la ne y yamã fãa.

¹⁷Yãmb maana kaool ne Sẽn-Ka-Saab rũndã n yeel tɩ bãmb yaa yãmb Wẽnnaam, la y na n tũu bãmb soayã, la y sak bãmb no-tũudsã ne b tõodã la b noyã, la y kelg bãmb koɛɛgã.

¹⁸La Sẽn-Ka-Saab me maana kaool ne yãmb rũndã, n yeel tɩ yãmb yaa bãmb nebã, wa b sẽn dag n yeel yãmbã, la y sak bãmb tõodã fãa.

¹⁹Dẽ, bãmb na n zẽka yãmb n kõ yãmb waoogre, la b kɩt tɩ y yʋʋr yi, la b kõ yãmb ziir n yɩɩg buud a taabã fãa bãmb sẽn naanã, tɩ yãmb tõe n lebg neb sẽn welg toor Sẽn-Ka-Saab sẽn yaa yãmb Wẽnnaamã yĩnga, wa b sẽn dag n yeel yãmbã.