Read SEBR SÕNGO, 1998 Tõodo 27 Bible Online

Tõodo 27 - SEBR SÕNGO, 1998 bible

Tõodo 27

¹A Moyiis ne Israyɛll kãsem-dãmbã yeela nebã yaa: «Sak-y tõod nins tõnd sẽn kõt yãmb rũndã wã.

²Daar ning yãmb sẽn na n tɩ rʋʋg Zʋrdẽ kʋɩlgã n kẽ tẽng ning Sẽn-Ka-Saab sẽn yaa yãmb Wẽnnaamã sẽn kõ yãmbã, bɩ y lugl kug-bɛd n bolg-b goore.

³La y gʋls tõ-kãensã goamã fãa bãmb zut n yaool n yik n kẽ tẽng ning Sẽn-Ka-Saab sẽn kõ yãmbã pʋgẽ. Yaa tẽng sẽn pid ne bĩisim la sɩɩd wʋsgo, wa Sẽn-Ka-Saab sẽn yaa yãmb Wẽnnaamã sẽn yeel yãmbã.

⁴Yãmb sã n wa rʋʋg zʋrdẽ kʋɩlgã, yãmb na n lugla kug nins mam sẽn yeel yãmb dũndã tɩ y lugl Eball tãngã zug n bolg-b ne goorã.

⁵La beenẽ, yãmb na n mee tẽn-kugr ne kug sẽn ka pees ne kutu, Sẽn-Ka-Saab sẽn yaa yãmb Wẽnnaamã yĩnga.

⁶Yãmb na n mee Sẽn-Ka-Saab sẽn yaa yãmb Wẽnnaamã tẽn-kugr ne kug sẽn ka peese. La yaa beenẽ, la yãmb na n maan y maand sẽn yõogd bugmã Sẽn-Ka-Saab sẽn yaa yãmb Wẽnnaamã yĩnga.

⁷La yãmb na n maana zems-n-taar maand me beenẽ, la y zĩnd beenẽ n dɩ la y maan sũ-noog Sẽn-Ka-Saab sẽn yaa yãmb Wẽnaamã taoore.

⁸Gʋls-y tõ-kãensã goamã fãa kugã zut tɩ yɩ vẽenega.»

⁹A Moyiis ne maan-kʋʋdbã sẽn yaa Leevi buudã yeela Israyɛll nebã fãa yaa: «Israyɛll nebã, sĩnd-y sɩddd... n kelge! Rũndã, yãmb lebga Sẽn-Ka-Saab sẽn yaa yãmb Wẽnnaamã nebã.

¹⁰Woto yĩnga, bɩ y kelg Sẽn-Ka-Saab sẽn yaa yãmb Wẽnnaamã koɛɛga, la y sak bãmb tõodã ne b minindã wa mam sẽn wilgd yãmb dũndã wã.»

¹¹Badaar bala, a Moyiis yeela nebã yaa:

¹²«Yãmb sã n wa rʋʋg Zʋrdẽ kʋɩlgã, bɩ a Simeyõ ne a Leevi, la a Zʋʋda ne a Izakaar, la a Zozɛf ne a Benzame buudã yaas Garizim tãngã zug n ning nebã barka.

¹³La bɩ a Rubɛn ne a Gaad la a Azɛɛr ne a Zabulõ, la a Dan ne a Neftali buudã yaas Eball tãngã zugu n kãab nebã wẽnga.»

¹⁴La Leevi buudã na n zẽka b koɛɛgã Israyɛll nebã fãa taoor n yeel yaa:

¹⁵«Kãab-wẽng bee ne ned ning sẽn peesd-a, wall sẽn dõogd-a bõn-naandg zugu. Sẽn-Ka-Saab ka nong tʋʋm-mit sẽn maand bõn-naandg n soos n solg-a ye. La bɩ nebã fãa yeel tɩ ãmina.

¹⁶Kãab-wẽng bee ne ned ning sẽn paoogd a ba ne a ma. La bɩ nebã fãa yeel tɩ ãmina.

¹⁷Kãab-wẽng bee ne ned ning sẽn sersd toadg ning sẽn be yẽnda ne a yak pʋʋg sʋkã bãnã. La bɩ nebã fãa yeel tɩ ãmina.

¹⁸Kãab-wẽng bee ne ned ning sẽn kɩtd tɩ zõang tudg sore. La bɩ nebã fãa yeel tɩ ãmina.

¹⁹Kãab-wẽng bee ne ned ning sẽn kaood sãan ne kɩɩb la pʋg-kõor bʋʋd kegrã. La bɩ nebã fãa yeel tɩ ãmina.

²⁰Kãab-wẽng bee ne ned ning sẽn gãand ne a ba paga, n lak a fuugu. La bɩ nebã fãa yeel tɩ ãmina.

²¹Kãab-wẽng bee ne ned ning sẽn gãand rũnga, baa sẽn yaa rũng ninga. La bɩ nebã fãa yeel tɩ ãmina.

²²Kãab-wẽng bee ne ned ning sẽn gãand ne a tãoã, sã n yaa a ba-biig bɩ a ma-biiga. La bɩ nebã fãa yeel tɩ ãmina.

²³Kãab-wẽng bee ne ned ning sẽn gãand ne a pag ma. La bɩ nebã fãa yeel tɩ ãmina.

²⁴Kãab-wẽng bee ne ned ning sẽn soos n kʋ a to. La bɩ nebã fãa yeel tɩ ãmina.

²⁵Kãab-wẽng bee ne ned ning sẽn deegd kũun n kʋʋd bʋʋm soaba. La bɩ nebã fãa yeel tɩ ãmina.

²⁶Kãab-wẽng bee ne ned ning sẽn ka tũud tõ-kãensã fãa la a ka sakd bãmbã. La bɩ nebã fãa yeel tɩ ãmina.»