Read SEBR SÕNGO, 1998 Tõodo 28 Bible Online

Tõodo 28 - SEBR SÕNGO, 1998 bible

Tõodo 28

¹Yãmb sã n sɩd kelg Sẽn-Ka-Saab sẽn yaa yãmb Wẽnnaamã koɛɛgã n gũus y mens n sak tõod nins mam sẽn kõ yãmb rũndã wã, Sẽn-Ka-Saab sẽn yaa yãmb Wẽnnaamã na n zẽka yãmb tɩ y yɩɩg buud a taabã fãa sẽn be dũniyã zugã.

²Ad bark nins fãa sẽn na n sig yãmb zugu, yãmb sẽn na n sak Sẽn-Ka-Saab sẽn yaa yãmb Wẽnnaamã koɛɛgã yĩnga:

³Yãmb na n paama bark y tẽngã ne y pʋʋgã pʋga.

⁴Yãmb kambã la y rũmsã kamba, y rũm-bɛdã ne y rũm-bãoonegã kamb na n paama barka.

⁵Yãmb peoogã ne y teoogã ne y koodã na n paama barka.

⁶Yãmb na n paama bark y kõom la y yiib wakate.

⁷Sẽn-Ka-Saab na n kɩtame tɩ y tõog y bɛɛb nins sẽn dat n zab ne yãmbã. Bãmb sã n yi n na n zab ne yãmba, b na n tũu sor a ye n wa. La yãmb na n diga bãmb tɩ b tũ soay a yopoe n zoe.

⁸Sẽn-Ka-Saab na n kɩtame tɩ barkã zĩnd yãmb baoã ne y tʋʋmã pʋga. Bãmb na n kɩtame tɩ barkã zĩnd yãmb tẽng ning Sẽn-Ka-Saab sẽn yaa yãmb Wẽnnaamã sẽn kõ yãmbã pʋgẽ.

⁹Yãmb sã n sak Sẽn-Ka-Saab tõodã la y tũ bãmb sorã, bãmb na n welga yãmb toor b meng yĩng wa b sẽn dag n wẽen n yeel yãmbã.

¹⁰Neb nins fãa sẽn be tẽng zugã na n yãame tɩ b boond yãmb ne Sẽn-Ka-Saab yʋʋre, la bãmb na n zoee yãmba.

¹¹Sẽn-Ka-Saab na n maana yãmb neer wʋsgo, n kɩt tɩ yãmb kambã ne y rũmsã la y koodã fɩɩg tẽng ning bãmb sẽn dag n wẽen n yeel y yaab-rãmbã tɩ b na n kõo yãmbã pʋgẽ.

¹²Sẽn-Ka-Saab na n paka saasã sẽn yaa bãmb laog-sõngã zĩigã n kɩt tɩ saag ni sẽn zems a wakat yãmb tẽngã pʋgẽ. La bãmb na n ninga yãmb nus tʋʋmã fãa barka. Buud wʋsg na n wa pemsa yãmba, la yãmb kõn peng bũmb bãmb nengẽ ye.

¹³Yãmb sã n kelg Sẽn-Ka-Saab tõod nins mam sẽn kõt yãmb dũndã wã neer n sak-ba, la y ka bʋdg goabg bɩ rɩtg n bas goam nins mam sẽn wilg yãmb dũndã wã, n tũ buud a taab wẽnnaam-dãmba, Sẽn-Ka-Saab na n kɩtame tɩ yãmb yɩ zugu, n da yɩ zʋʋr ye. Yãmb na n yɩ taoor-dãmba, y ka na n yɩ poorẽ dãmb ye.

¹⁴

¹⁵La yãmb sã n ka kelg Sẽn-Ka-Saab sẽn yaa yãmb Wẽnnaamã koɛɛgã, n gũus y mens n sak tõodã ne minind nins fãa mam sẽn kõ yãmb dũndã wã, ad kãab-wẽns nins sẽn na n paam yãmba:

¹⁶Yãmb na n paama kãab-wẽng y tẽmsã ne y pʋtã pʋse.

¹⁷Kãab-wẽng na n zĩnda y petã ne y toɛyã pʋse.

¹⁸Yãmb kambã ne y koodã la y rũm-bɛdã ne y rũm-bãoonegã na n paama kãab-wẽnga.

¹⁹Yãmb na n paama kãab-wẽng y kõom la y yiib wakate.

²⁰Sẽn-Ka-Saab na n tʋma kãab-wẽngã t'a sig yãmb zugu, bãmb na n yɛɛsa yãmb n kẽes-y rabeem y tʋʋmã fãa pʋgẽ, hal tɩ yãmb wa sãam zãnga, n menem tao-tao, yãmb manesmã sẽn yaa wẽngã, la yãmb sẽn bas maamã yĩnga.

²¹Sẽn-Ka-Saab na n kɩtame tɩ bã-loangdg yõk yãmb hal n sãam-y zãng n kɩt tɩ y wa menem tẽng ning yãmb sẽn na n kẽ n soogã pʋgẽ.

²²Sẽn-Ka-Saab na n kɩtame tɩ yĩn-faagr ne yĩn-wɩngre, bã-motem, la nod-kegems sẽn yõogd wa bugum, ne ware, la wãoong ne gãnem yõk yãmb hal tɩ y wa sãam zãnga.

²³Saasã sẽn be y zugẽ wã na n lebga wa zũudu, tɩ tẽngã yãmb sẽn tabdã lebg wa kutu.

²⁴Sẽn-Ka-Saab na n kɩtame tɩ bĩisr ne wubsg led sa-koomã zĩigẽ n sig yãmb zut hal tɩ y wa sãame.

²⁵Sẽn-Ka-Saab na n kɩtame tɩ yãmb bɛɛbã tõog yãmba. Yãmb na n tũu sor a ye n tɩ zab ne-ba, la y bɛɛbã na n diga yãmb tɩ y tũ soay a yopoe n zoe. La yãmb na n kẽe dũniyã nebã fãa soolem pʋsẽ n lebg wa bõn-wẽnga.

²⁶Liuuli ne we-rũms na n wãba yãmb nemd tɩ ned ka rig-b ye.

²⁷Sẽn-Ka-Saab na n kɩtame tɩ Ezɩpt nod-tãooda wã ne se-noadã la zãnkadã ne tarmangãsã yõk yãmb n ka tõe n maag ye.

²⁸Sẽn-Ka-Saab na n kɩtame tɩ gãeemd ne zondo, la nen-yiling yõk yãmba.

²⁹Yãmb na n babla wĩnto-sʋk wa zõang sẽn babend lik-bida pʋgẽ. Bũmb nins yãmb sẽn dat n maanã ka na n tõog ye. B na n maana yãmb pãnga, n fã yãmb daar fãa tɩ ned ka be sẽn na n sõng yãmb ye.

³⁰Fo na n belma pag tɩ ned a to reeg-a n gãande. Fo na n mee roogo, la f ka na n kẽ ye. Fo na n sela reezẽ tɩɩs f pʋʋgẽ, la f ka na n dɩ-a biis ye.

³¹B na n kʋʋ fo naaf f nifẽ, la f ka na n wãb a nemd ye. B na n deega fo bõang ne pãng f nifẽ, la b ka na n lebs-a ye. B na n dɩka fo piis n kõ f bɛɛba, tɩ ned ka be sẽn na n fãag foom ye.

³²B na n dɩka fo kom-dibli wã ne kom-pugli wã n kõ buud a to tɩ f yã. Fo na n dat-b-la daar fãa hal tɩ f sũur sãame, la f ka tõe n maan bũmb ye.

³³Buud yãmb sẽn ka mi na n dɩɩ yãmb tẽn-gãongã koodã ne y sẽn tʋm n paam bũmb ninsã fãa. La bãmb na n namsa yãmb n maan-y pãng daar fãa.

³⁴Bũmb nins y nin sẽn yã wã na n kɩtame tɩ y yik gãeemdo.

³⁵Sẽn-Ka-Saab na n kɩtame tɩ nod-tãooda yõk yãmb dũma ne y gɛy wã tɩ ka tõe n maag ye. Nod-tãooda wã na n yõka yãmb nao-sɩlpamã n tall n tãag y zug tẽn-sʋkã.

³⁶Sẽn-Ka-Saab na n kɩtame tɩ yãmb ne y rĩmã sẽn so yãmbã kẽn ne nao n kẽng tẽng yãmb ne y yaab-rãmbã sẽn ka mi. La beenẽ, yãmb na n tũu buud a taab wẽnnaam-dãmb b sẽn maan ne raado, la ne kuga.

³⁷Sẽn-Ka-Saab sẽn na n tall yãmb n kẽng zĩig ning fãa, nebã na n yɛɛsame, la b rɩk yãmb yellã n maan yel-bũndi, la b yaal yãmba.

³⁸Yãmb na n bʋda bõn-buud wʋsgo, la y na n tigsa bilfu. Bala, sʋy na n dɩ-a lame.

³⁹Yãmb na n sela reezẽ tɩɩs n maneg-b n ko, la y ka na n paam reezẽ rãam n yũ, wall y rɩ b biis me ye. Bala, zũnzũiy na n dɩ-b lame.

⁴⁰Oliiv tɩɩs wʋsg na n zĩnda yãmb soolmã fãa pʋgẽ, la yãmb ka na n paam kaam n sõog y nens ye. Bala, b biisã na n sʋʋgame.

⁴¹Yãmb na n doga kom-dibli, ne kom-pugli, la y ka na n soog-b ye. Bala, b na n kẽes-b-la yembdo.

⁴²Sʋy na n dɩɩ yãmb tɩɩsã ne y tẽn-gãongã koodã fãa.

⁴³Sãamb nins sẽn be yãmb sʋkã na n paama pãng n yɩɩg yãmba, la b na n paama paoong n paase, tɩ yãmb pãngã boog n lebg bilfu.

⁴⁴Yãmb na n kẽnga sãamb nengẽ n tɩ peng bũmbu, la bãmb ka na n wa yãmb nengẽ n wa peng bũmb ye. Bãmb na n lebga zug tɩ yãmb yɩ zʋʋre.

⁴⁵Kãab-wẽn-kãensã fãa na n waa yãmb zutu. Kãab-wẽn-kãensã fãa na n diga yãmb n paam hal tɩ y sãame, yãmb sẽn ka kelg Sẽn-Ka-Saab sẽn yaa yãmb Wẽnnaamã koɛɛga, la y sẽn ka sak bãmb tõodã ne b noy nins bãmb sẽn kõ yãmbã yĩnga.

⁴⁶Bãmb na n lebga bãnã, la bõn-bãn ne yãmb ne y yagensã wakat fãa.

⁴⁷Yãmb sẽn ka sak Sẽn-Ka-Saab sẽn yaa yãmb Wẽnaamã ne sũ-noogo, la ne y sũyã fãa wã yĩnga, yãmb sẽn paam bũmb fãa wʋsgã pʋgẽ wã,

⁴⁸yãmb na n tʋma bɛɛb nins Sẽn-Ka-Saab sẽn na n tʋm yãmb nengẽ wã yĩng ne kom, la ko-yũudu, la bɛɛla, n ka tar baa fɩ ye. Bɛɛbã na n balga yãmb kut yubl balgre, n zɩsg y poayã, hal n wa sãam yãmba.

⁴⁹Sẽn-Ka-Saab na n kɩtame tɩ buud sẽn be zĩ-zãrgẽ wa rɩk yãmb wa sɩlg sẽn dɩk noaaga. Yaa buud yãmb sẽn ka wʋmd b goamã.

⁵⁰Yaa buud sẽn yaa kegemse. Bãmb ka waoogd nin-kẽema, la b ka zoet yãag nin-bãaneg ye.

⁵¹Bãmb na n dɩɩ yãmb rũmsã kamb ne y koodã hal tɩ yãmb sãame. Bãmb ka na n bas yãmb koodã, wall y rã-noodã, wall y kaamã ne y rũm-bɛdã, ne y rũm-bãoonegã kamb tɩ kelle, hal tɩ b wa kɩt tɩ yãmb sãame.

⁵²Bãmb na n gũbga yãmb tẽmsã fãa tɩ yɩ sẽbgr ne yãmba, hal tɩ tẽmsã lal-bɛdã sẽn tar pãng tɩ yãmb teeg-bã lʋɩ yãmb soolmã zĩig fãa. Bãmb na n gũbga yãmb tẽmsã fãa noyã, tẽng ning Sẽn-Ka-Saab sẽn yaa yãmb Wẽnnaamã sẽn kõ yãmbã pʋgẽ.

⁵³Yãmb yel-pakrã pʋgẽ, wakat ning y bɛɛbã sẽn gũbg yãmbã, yãmb na n wãba y kambã, yãmb na n wãba yãmb mensã kom-dibli, la y kom-pugli nins Sẽn-Ka-Saab sẽn yaa yãmb Wẽnnaamã sẽn kõ yãmbã.

⁵⁴Rao ning sẽn nong a meng t'a nug são n yɩɩd a taabã na n zoee bõn ne a ba-biig ne a pʋg-rʋmd la a kamb nins sẽn ketã,

⁵⁵n ka rat n sak n yãk a kamb nins a sẽn kʋ wã nemd n kõ-b ye. Tɩ bala, yẽnda bũmb ka na n kell ye, yãmb bɛɛbã sẽn gũbg yãmb n wa ne yel-pakr yãmb tẽmsã fãa pʋsẽ wã yĩnga.

⁵⁶Pag sẽn nong a meng t'a nug são n yɩɩd a taabã t'a ka rat n tabg tẽngã me ka na n zoe a kambã nimbãaneg ye.

⁵⁷Yãmb bɛɛbã sẽn na n gũbg yãmb tẽmsã noy tɩ lebg yel-pakr sẽn yaa toog ne yãmb y tẽmsã pʋsẽ wã yĩng na n kɩtame tɩ pag ning sẽn nong a meng t'a nug são n yɩɩd a taabã soos n wãb a zãr ning sẽn lʋɩt a naoã tẽngrã, la kamb nins a sẽn dogã me.

⁵⁸Yãmb sã n ka gũus y mens n sak tõodã goam nins fãa sẽn gʋls seb-kãngã pʋgẽ wã, la y zoe Sẽn-Ka-Saab sẽn yaa yãmb Wẽnnaamã yʋʋrã sẽn zems waoogr la zoeesã,

⁵⁹Sẽn-Ka-Saab na n kɩtame tɩ bã-sãams ne bã-toos sẽn kaoosda, la bã-wẽns sẽn ka maagd yõk yãmb ne y yagensã.

⁶⁰Bãmb na n kɩtame tɩ Ezɩpt bã-longds nins yãmb sẽn da zoetã leb n wa yõk yãmba.

⁶¹Sẽn paase, Sẽn-Ka-Saab na n kɩtame tɩ bãas ne bã-longds nins sẽn ka gʋls seb-kãngã pʋgẽ wã yõk yãmb hal tɩ yãmb sãame.

⁶²Yãmb sẽn dag n yaa wʋsg wa yĩngr ãdsã, y na n lebga bilf bala, yãmb sẽn ka sak Sẽn-Ka-Saab sẽn yaa yãmb Wẽnnaamã koɛɛgã yĩnga.

⁶³Sẽn-Ka-Saab sũur sẽn dag n yɩ noog to-to tɩ b maan yãmb neer n kɩt tɩ y lebg wʋsgã, woto me, Sẽn-Ka-Saab sũur na n leb n yɩɩ noog tɩ b menes yãmba, la b sãam-yã. Sẽn-Ka-Saab na n yiisa yãmb tẽng ning yãmb sẽn na n tɩ kẽ n soogã pʋgẽ.

⁶⁴Sẽn-Ka-Saab na n kɩtame tɩ y sãeeg n kẽ buud a taabã fãa sʋka, n ta dũniyã ween-vɩɩsã fãa. La beenẽ, yãmb na n tũu neb a taab wẽnnaam-dãmb sẽn maan ne daad la kuga, yãmb ne y yaab-rãmbã sẽn dag n ka mi.

⁶⁵Yãmb ka na n paam vɩ-bãan bu-kãens sʋk ye. La yãmb ka na n paam zĩig n tabg y naoor n paam n vʋʋs me ye. Sẽn-Ka-Saab na n kɩtame tɩ rabeem yõk-yã, tɩ y ninã pãng booge, tɩ y sũyã sãame.

⁶⁶Yãmb na n vɩɩ wa y kiime. Yãmb na n zoee rabeem yʋng ne wĩntoogo, yãmb vɩɩmã ka na n tall yõod ne yãmb ye.

⁶⁷Yibeoogo, yãmb na n yeelame tɩ y ratẽ lame tɩ yaẽ-la zĩ-sobdo, la zĩ-sobdo, yãmb na n yeelame tɩ y ratẽ lame tɩ yaẽ-la yibeoogo, yãmb sũyã sẽn kiuusdã yĩnga, la bũmb nins y nin sẽn yãtã yĩnga.

⁶⁸Sẽn-Ka-Saab na n kɩtame tɩ y kẽ koom kogend n leb n leb Ezɩpt tẽnga, tɩ y tũ sor ning mam sẽn dag n yeel yãmb tɩ y ka na n leb n yãnd-a wã. Yãmb na n dat n koosa y meng ne y bɛɛbã beenẽ, n lebg bãmb yembse. La bãmb ned ba a yembr ka na n da yãmb ye.

⁶⁹Ad kaool ning Sẽn-Ka-Saab sẽn yell a Moyiis t'a maan ne Israyɛll nebã Moaab tẽngã n paas kaool ning bãmb sẽn dag n maan ne bãmb Horɛɛbã.