Read SEBR SÕNGO, 1998 Tõodo 32 Bible Online

Tõodo 32 - SEBR SÕNGO, 1998 bible

Tõodo 32

¹Yĩngri, yok f tʋb tɩ m na n gomame! Tẽnga, kelg goam nins sẽn yit m noorẽ wã!

²Bɩ mam bãngrã sig wa saag sẽn niida! Bɩ m goamã rʋʋg wa meenem, wa sa-luk sẽn madgd moogo, wa koom sẽn tosd moog zugu!

³Bala, mam na n moona Sẽn-Ka-Saab yʋʋre! Bãng-y tɩ tõnd Wẽnnaamã yaa kãsenga!

⁴Bãmb yaa Pĩiga! Bãmb tʋʋmã zemsa zãnga! Bãmb soayã fãa yaa tɩrse! Bãmb tʋʋmã zemsa zãnga! Bãmb yaa sɩd soab wakatã fãa! Zãmb ka be bãmb pʋgẽ ye. Bãmb yaa sɩda, la tɩrga.

⁵Israyɛll kambã sã n maand wẽnga, ka Wẽnnaam yell ye. Yaa Israyɛll kambã la b tog n paooge. Bãmb zamaanã yaa zamaan-yoog sẽn pid ne yel-kɛga.

⁶Yaa woto la yãmb lebsd Sẽn-Ka-Saabo? Buud sẽn yaa yalemb n ka tar yam, ka bãmb n yaa y ba n naan yãmb la? Ka bãmb n naan yãmb la b zĩndg yãmb tẽng zug la?

⁷Tẽeg-y kʋdemd wẽndẽ wã yelle. Tẽeg-y zamaan nins sẽn loogã yelle. Sok f ba t'a wilg-fu. Sok f kãsem-dãmbã tɩ b togs-fo.

⁸Wakat ning Sẽn-Ka-To sẽn kõ bu-zẽmsã zĩisã, n welg ninsaalbã, bãmb ninga soolmã tods wa sẽn zems Israyɛll nebã sõore.

⁹Bala, Sẽn-Ka-Saab nebã yaa bãmb pʋɩɩre. Bãmb dɩka a Zakoob yagensã n kõ b menga.

¹⁰Sẽn-Ka-Saab tɩ yãnda bãmb we-raoog pʋgẽ, yaa we-raoog sẽn yaa koɛɛng n pid ne we-rũms yãbre. Sẽn-Ka-Saab gũbga bãmba. Bãmb gesa b yelle. Bãmb gũu bãmb wa b nin-beelle.

¹¹Sẽn-Ka-Saab maana bãmb wa sɩl-kẽeng sẽn nekd a kamb a tʋkẽ, n zãmsd bãmb yɩgbo, n yaool n tẽegd a pɩgs n kokd bãmb tɩ b zao a pɩgsã zutu.

¹²Yaa Sẽn-Ka-Saab b yembr bal n tɛ bãmba, Wẽn-sãang a to ka zĩnd ne bãmb ye.

¹³Sẽn-Ka-Saab zĩniga bãmb tẽngã tãms zutu, tɩ b rɩt b pʋtã kood biisi. B rag n kõta bãmb kugr zug sɩɩd tɩ b rɩtẽ, la b kõt-b kaam sẽn yit pĩig zugu,

¹⁴la b kõt bãmb niig bĩis-gõeem ne piis la bʋʋs bĩis-naare, ne pe-bi kaam la Basan pe-raad ne a boees nemdo, la zom bãanega! Yãmb dag n yũuda reezẽ biis ko-miuugu, yaa reezẽ rã-toaaga.

¹⁵Israyɛll nobame n lebg tõata. Bãmb nobame n lebg bɛda. La bãmb basa Wẽnnaam sẽn yaa b naandã, n paoog pĩig ning sẽn fãagd bãmbã.

¹⁶Bãmb kɩtame tɩ sũ-kiir yõk Sẽn-Ka-Saabo. Bãmb sẽn tũud wẽn-sãamsã yĩnga. Bãmb kɩɩsda Sẽn-Ka-Saab ne yel-beed nins b sẽn maandã.

¹⁷Bãmb maana maand n kõ zĩn-dãmb sẽn ka Wẽnnaam ye, la wẽnnaam-dãmb bãmb sẽn ka mi sẽn yaool n wa, yãmb yaab-rãmb sẽn dag n ka waoogda.

¹⁸Yãmb basa pĩig ning sẽn dog-a yãmbã, n yĩm Wẽnnaam ning sẽn wa-a ne yãmb dũniyã pʋgẽ wã yelle.

¹⁹Sẽn-Ka-Saab yãnda yõwã, la b sũur yika ne bãmb kom-dibli wã, la b kom-pugli wã sẽn kɩɩsd bãmbã yĩnga.

²⁰Bãmb yeelame: Mam na n solga m meng ne bãmb n gese, b na n maana wãna. Bala, bãmb yaa nin-tõtse. Bãmb yaa zamaan neb yam sẽn yuusda.

²¹Bãmb tũu sẽn ka Wẽnnaam, n kɩt tɩ sũ-kiir yõk maam. Bãmb yika mam sũur ne b bõn-naandse. Woto, mam na n kɩtame tɩ buud sẽn ka buud meng-meng sũ-kiir yõk bãmba. Mam na n kɩtame tɩ buud sẽn yaa yalem yik bãmb sũyã.

²²Bala, mam sũ-puugrã bugum widgame. A na n dɩɩme hal n ta kɩɩm-kulgu. A na n dɩɩ tẽngã ne a koodã fãa. A na n dɩɩ n tãaga tãmsã yẽbgrẽ.

²³Mam na n sama tood bãmb zutu. Mam na n dɩka m pɛɛmã fãa n tão bãmba.

²⁴Komã sã n wa yõk bãmb tɩ b faage, tɩ b yĩnsã wɩng tɩ bã-longdsã rɩt bãmb wa bugum, mam na n tʋma rũm-toos ne wag-toos tɩ b wãb bãmba.

²⁵Yɩnga, zabr sʋʋs n na n kʋ bãmb kambã, la rotã pʋsẽ, na n yɩɩ rabeem. B na n kʋʋ kom-bɩɩsã ne b pʋg-sadbã, la nusẽ kambã ne nin-kẽembã.

²⁶Mam dag n yeelame, tɩ m na n sãam-b-la zãnga, n kɩt tɩ b yʋʋr menem dũniyã,

²⁷la mam zoee b bɛɛbã na n wa paoog maam n tudg n yeel tɩ yaa bãmb n tõoge, la ka Sẽn-Ka-Saab n maan yõwã fãa ye.

²⁸Bala, bãmb yaa buud sẽn ka tar saagr ye. Bãmb ka mi baa fɩ ye.

²⁹Bãmb sã n dag n tarẽ yam, b rag n na n tagsẽ lame n bãng bõn-kãng võore, n tõog n gũus ne b beoog vɩɩmã yelle.

³⁰Nin-yend na n yɩɩ wãn n dig neb tusri, la neb a yiib na n yɩɩ wãn n dig neb tus piiga, tɩ sã n ka kugr ning bãmb sẽn teegã n koos bãmba? Yaa Sẽn-Ka-Saab n bas bãmba.

³¹Bala, bãmb fãagr kugrã ka wẽnd tõnd fãagr pĩigã ye. Tõnd bɛɛbã mens mii bõn-kãnga.

³²Bala, bãmb reezẽ tɩɩsã yẽgr yita Sodom ne Gomoor soolmã reezẽ tɩɩsã yẽgrẽ. Bãmb reezẽ biisã tara zẽnem. B reezẽ-gĩnã yaa toog liga.

³³Bãmb reezẽ rãamã yaa wa wag-bees zẽnem. Yaa wa wag-toos zẽnem.

³⁴Bõn-kãens solga mam nengẽ. B bee mam laogã bĩngr zĩigẽ.

³⁵Bãmb sã n saad n yuusdẽ, sũ-dokr bee ne maam, tɩ m na n dol ned kam fãa! Bala, bãmb sãoong daar kolgame. Bũmb ning sẽn segl bãmb yĩngã wata tao-tao.

³⁶N-yẽe! Sẽn-Ka-Saab n na n kao b nebã bʋʋdo. Bãmb sã n yãnd tɩ b nebã pãng sɛɛme, tɩ yembs ne burkĩmb ka leb n beẽ, bãmb na n zoee b tʋmtʋmdbã nimbãanega.

³⁷Dẽ, bãmb na n sokame yaa: Bãmb wẽnnaam-dãmbã bee yɛ? Bãmb sẽn da teeg a soabã bee yɛ?

³⁸Wẽnnaam-dãmb nins sẽn dag n dɩt yãmb maand nemd kaamã la b yũud y reezẽ rãamã bee yɛɛnẽ? B yik moasã n sõng-yã. B yik n kogl-yã!

³⁹Moasã, bãng-y tɩ yaa maam, Wẽnnaam a to ka be tɩ ka maam ye. Yaa maam n kõt vɩɩm, yaa maam n kʋʋde. Yaa maam n pogende, la maam n maagde. Ned ka tõe n deeg bũmb mam nugẽ ye.

⁴⁰Bala, mam zẽkda m nug yĩngri, n yetẽ tɩ m vɩɩ wakat sẽn ka sɛta.

⁴¹Mam sã n saas m sʋʋgã n dat n maan sɩda, mam sã n yãk m bʋʋdã daare, mam na n doka m sũur ne m bɛɛbã, la m sɩbg neb nins sẽn kis-b maamã.

⁴²Mam na n kɩtame tɩ pɛɛmã monem ne zɩɩm, la m tɩgs m zabr sʋʋgã ne b sẽn yõg-b rãmb n kʋ wã nemdo, la b zɩɩm, la ne zɩɩm sẽn yit bɛɛbã nanambs zutu.

⁴³Bu-zẽmse, pẽg-y bãmb nebã. Bala, Sẽn-Ka-Saab rokda b sũur b tʋmtʋmdbã zɩɩm daagr yĩnga. Bãmb dokda b sũur ne b bɛɛbã. La bãmb na n yɩlga b tẽngã ne b nebã.

⁴⁴A Moyiis ne a Nun biig a Zozoe kẽngame n togs yɩɩn-kãngã goamã fãa Israyɛll nebã taoore.

⁴⁵La a Moyiis sẽn togs Israyɛll nebã fãa gom-kãensã n sɛ, yẽnda yeela bãmb yaa:

⁴⁶«Tags-y goam nins fãa mam sẽn togs yãmb dũndã wã yell neere, la y rɩk bãmb n wilg y kamba, tɩ b gũus b mens n sak tõ-kãensã fãa goamã.

⁴⁷Bala, b yaa bõn-kãseng ne yãmba. B yaa yãmb vɩɩm. Yaa ne bãmb la yãmb na n vɩɩmd n kaoos tẽng ning yãmb sẽn na n dʋʋg Zʋrdẽ kʋɩlgã n tɩ soogã pʋgẽ.»

⁴⁸Baraar bala, Sẽn-Ka-Saab yeela a Moyiis yaa:

⁴⁹«Rʋ Nebo tãng ning sẽn be Abarim tãmsã sʋkã, Moaab tẽngã pʋgẽ n teesd Zeeriko wã n ges Kana tẽngã mam sẽn kõ Israyɛll nebã tɩ b soogã.

⁵⁰Fo na n kii tãng ning fo sẽn na n dʋ wã zugu, n tɩ lagem f nebã sẽn ki wã, wa f kẽem a Aarõ sẽn da ki Hoor tãngã zug n tɩ lagem a nebã sẽn ki wã.

⁵¹Bala, fo beega maam Israyɛll nebã sʋk Kadɛɛs Meriba koomã zĩigẽ, Sĩn we-raoogã pʋgẽ, n ka wilg mam pʋ-peelmã Israyɛll nebã sʋk ye.

⁵²Fo na n yãnda tẽngã sẽn be yɩɩga, tẽng ning mam sẽn kõ Israyɛll nebã, la fo ka na n kẽ beenẽ ye.»