Read SEBR SÕNGO, 1998 Tõodo 34 Bible Online

Tõodo 34 - SEBR SÕNGO, 1998 bible

Tõodo 34

¹A Moyiis basa Moaab tẽn-nabd-koɛɛngã n dʋ Nebo tãngã n ta Pisga tãngã zug sẽn teesd Zeeriko wã. Sẽn-Ka-Saab wilga yẽnda tẽngã fãa, sẽn sɩng ne Galaad hal tɩ ta Dan

²la a Neftali nebã tẽngã, la a Efrayiim ne a Manaase tẽngã, la a Zʋʋda tẽngã fãa hal tɩ ta ko-kãsengã sẽn be nin-taoorã,

³la Negɛɛv ne Zeeriko zĩig ning b sẽn boond tɩ koms tɩɩs tẽngã longã hal tɩ ta Soaare.

⁴Sẽn-Ka-Saab yeela a Moyiis yaa: «Woto yaa tẽng ning mam sẽn dag n wẽen ne a Abrahaam la a Izaak ne a Zakoob tɩ m na n kõo b yagensã. Mam kɩtame tɩ fo nin yãnd-a, la f ka na n pɩʋʋg n kẽ beenẽ ye.»

⁵Dẽ, Sẽn-Ka-Saab tʋmtʋmd a Moyiis kii beenẽ, Moaab tẽngã pʋgẽ, wa Sẽn-Ka-Saab sẽn yeelã.

⁶La Sẽn-Ka-Saab mum-a-la Moaab long ning sẽn teesd Bɛt-Pewoorã pʋgẽ, la hal tɩ ta rũndã, ned ka mi a yaoog zĩig ye.

⁷A Moyiis kaoosa yʋʋm koabg la pissi n yaool n ki. A ninã ne a yĩnsã pãng ka tol n boog ye.

⁸Israyɛll nebã yãba a Moyiis kũumã yĩng hal rasem pis-tã Moaab tẽn-nabd-koɛɛngã pʋgẽ. La rasem pis-tã wã, bãmb yãba kũumã yĩng n sɛ.

⁹A Nun biig a Zozoe pida ne yam wʋsgo. Bala, a Moyiis rag n tika yẽnda ne a nusi. La Israyɛll nebã saka a Zozoe n maan wa Sẽn-Ka-Saab sẽn dag n yeel a Moyiisã.

¹⁰Wẽnnaam no-rɛɛs a to ka leb n zĩnd Israyɛll nebã sʋka, tɩ Sẽn-Ka-Saab mi-a neng ne neng wa b sẽn mi a Moyiisã ye.

¹¹A to ka zĩnd n maan bãn ne bõn-bãn wa Sẽn-Ka-Saab sẽn tʋm a Moyiis t'a maan Faarõ ne a tʋmtʋmdbã, la Ezɩpt tẽngã soolmã fãa wã ye.

¹²A to ka zĩnd n tall pãng n maan tʋʋm-kãsems Israyɛll nebã fãa nifẽ wa a Moyiis sẽn maanã ye.