Read SEBR SÕNGO, 1998 Tõodo 4 Bible Online

Tõodo 4 - SEBR SÕNGO, 1998 bible

Tõodo 4

¹Moasã, Israyɛll nebã, bɩ y kelg minindã ne tõod nins mam sẽn zãmsd yãmbã, la y sak bãmb n tõog n vɩɩmde, la y kẽ tẽng ning Sẽn-Ka-Saab sẽn yaa yaab-rãmbã Wẽnnaamã sẽn kõ yãmb tɩ y soogã pʋgẽ.

²Ra-y paas-y bũmb goam nins mam sẽn kõ yãmbã pʋga, la y ra boog bũmb me a pʋgẽ ye. Sak-y Sẽn-Ka-Saab sẽn yaa yãmb Wẽnnaamã tõod nins mam sẽn kõ yãmbã.

³Yãmb nin yãnda bũmb ning Sẽn-Ka-Saab sẽn yaa yãmb Wẽnnaamã sẽn maan Baall-Pewoor yellã wakatã. Bãmb menesa neb nins fãa sẽn tũ Baall-Pewoorã.

⁴La yãmb fãa sẽn ket n vɩ rũndã wã, yaa yãmb sẽn tũud Sẽn-Ka-Saab sẽn yaa yãmb Wẽnnaamã.

⁵Ges-y-yã, mam zãmsa yãmb no-tũudsã ne noyã wa Sẽn-Ka-Saab sẽn yaa mam Wẽnnaamã sẽn kõ maam noor to-to wã, yaa sẽn na n yɩlẽ tɩ y tõe n sak bãmb tẽng ning yãmb sẽn na n tɩ kẽ n soogã pʋgẽ.

⁶Sak-y tõodã ne minindã n maan wa b sẽn wilg yãmbã. Woto n na n wilg tɩ yãmb tara yam la bãngre, buud a taabã sẽn na n wʋm tɩ b gomd yãmb minindã yellã nifẽ. Bãmb na n yeelame: «Bu-kãsen-kãngã yaa neb sẽn sɩd tar yam la bãngre.»

⁷Sɩd me, bu-kãsen-bʋg n be n tar wẽnnaam-dãmb sẽn pẽ ne-a wa Sẽn-Ka-Saab sẽn yaa tõnd Wẽnnaamã sẽn pẽ ne tõnd daar fãa d sẽn wat n boond bãmbã?

⁸Bu-kãsen-bʋg n be n tar tõod ne minind sẽn yaa tɩrs wa tõ-kãngã mam sẽn kõ yãmb dũndã wã?

⁹Bũmb sẽn be bala, gũus-y y mens neer y yõor tɛk n da wa bas bũmb nins yãmb ninã sẽn yãndã n yĩm b yell ye. Rɩk bãmb n zãms y kambã ne y yagensã n wilg bãmb tɩ

¹⁰daar ning yãmb sẽn yals Sẽn-Ka-Saab sẽn yaa yãmb Wẽnnaamã taoor Horɛɛb tãngã sɛɛgã, Sẽn-Ka-Saab yeela maam yaa: «Tigim nebã f nengẽ. Mam dat n togsa bãmb mam koɛɛgã, tɩ b zãms tɩ zoe wakat ning fãa bãmb sẽn be dũniyã zugã, la b rɩk-a n zãms b kom-dibli wã.»

¹¹Yãmb kolgame n yals yĩngr tãngã sɛɛga. Bugum n dag n wit tãngã zug n zẽkd n tat sa-gãongã. Rag n yaa lik ne sawad-taok la lik bida.

¹²Sẽn-Ka-Saab koɛɛgã yii bugum pʋg n gom ne yãmba. Yãmb wʋma goamã, la y ka yã bũmb ye. Yaa koɛɛgã bal la yãmb wʋm yã.

¹³Bãmb wilga yãmb b kaoolã sẽn yaa to-to. Kaool-kãng yaa tõod piigã yãmb sẽn tog n sakã. Bãmb gʋls-b-la kug-wals a yiib zutu.

¹⁴Wakat-kãnga, Sẽn-Ka-Saab yeela maam tɩ m zãms yãmb no-tũudsã ne noyã tɩ y sak-b tẽng ning yãmb sẽn na n tɩ kẽ n soogã pʋgẽ.

¹⁵«Gũus-y y mens neere, bala, wakat ning Sẽn-Ka-Saab koɛɛgã sẽn da yi bugum pʋgẽ Horɛɛb tãngã zug n gom ne yãmbã, yãmb ka yã bũmb ye.

¹⁶Gũus-y y mens n da wa maan wẽng ye. Da maan-y bõn-naandg baa a sẽn yaa bũmb ning y mens yĩnga tɩ yɩ raoa wall pag wẽnego,

¹⁷wall rũng sẽn be tẽng zug wẽnego, wall liuuli sẽn yɩgd yĩngrã wẽnego,

¹⁸wall bõn-vuudg wẽnego, wall zĩm sẽn be dũniyã koom pʋgẽ ye.

¹⁹La yãmb sã n nak n ges yĩngr n yãnd kiuugã ne wĩndgã la ãdsã la bũmb nins fãa sẽn be yĩngrã, bɩ y gũus t'a ra wa yɩ makr ne yãmb tɩ y wõgemd n waoog bãmb ye. Sẽn-Ka-Saab sẽn yaa yãmb Wẽnnaamã kõo dũniyã nebã fãa bõn-kãense.

²⁰La yãmba, Sẽn-Ka-Saab yiisa yãmb Ezɩpt tẽngã sẽn wẽnd wʋng sẽn yẽnegd kutã pʋga, tɩ y lebg bãmb meng neb wa y sẽn yaa bũmb ning rũndã wã.

²¹Yaa yãmb yĩnga, Sẽn-Ka-Saab sũur yika ne maam, tɩ b wẽen n yeel tɩ mam ka na n dʋʋg Zʋrdẽ kʋɩlgã, n kẽ tẽn-noog ning Sẽn-Ka-Saab sẽn yaa yãmb Wẽnnaamã sẽn kõ yãmb tɩ y soogã pʋgẽ ye.

²²Mam na n kii tẽn-kãngã pʋgẽ, mam ka na n dʋʋg Zʋrdẽ kʋɩlgã ye. La yãmb na n dʋʋgame n tɩ soog tẽn-sõngã.

²³Gũus-y neer n da wa yĩm kaool ning Sẽn-Ka-Saab sẽn yaa yãmb Wẽnnaamã sẽn maan ne yãmbã ye. Da maan-y bũmb baa a yembr wẽneg tɩ yɩ bõn-naandg ye. Tɩ bala, Sẽn-Ka-Saab sẽn yaa yãmb Wẽnnaamã yeela tõnd tɩ d ra maan bũmb a woto ye.

²⁴Bala, Sẽn-Ka-Saab sẽn yaa yãmb Wẽnnaamã yaa bugum sẽn dɩte. Bãmb yaa Wẽnnaam sẽn yaa sũ-kiir soaba.

²⁵Yãmb sã n wa rog kamb n paam yagense, la y zĩnd tẽngã pʋgẽ n kaoose, yãmb sã n wa maan wẽnga, n maan bũmb wẽneg t'a yɩ bõn-naandg n kɩɩs Sẽn-Ka-Saab sẽn yaa yãmb Wẽnnaamã, n maan sẽn ka noom bãmba,

²⁶mam dɩkda saasã ne tẽngã tɩ b yaa mam kaset dãmb dũndã, tɩ yãmb na n menema tẽng ning yãmb sẽn na n dʋʋg Zʋrdẽ kʋɩlgã n tɩ soogã pʋgẽ tao-tao. Yãmb ka na n zĩnd be n kaoos ye, yãmb na n sãama zãnga.

²⁷Sẽn-Ka-Saab na n kɩtame tɩ yãmb sãeeg n kẽ buud a taabã fãa tẽms pʋsẽ. La yãmb na n yɩɩ bilf bal buud a taab nins pʋs Sẽn-Ka-Saab sẽn na n tall yãmb n kẽngã sʋka.

²⁸La beenẽ, yãmb na n tɩ tũu bõn-naands ninsaalbã sẽn naan ne raado, la kuga. Bãmb ka ne, b ka wʋmde, b ka rɩte, b ka wʋmd yũugu.

²⁹La yãmb sã n zĩnd be n bao Sẽn-Ka-Saab sẽn yaa Wẽnnaamã ne y sũyã fãa, la ne y yamã fãa, y na n yãnd-b lame.

³⁰Y yel-pakrã pʋga, yel-kãensã fãa sã n wa paam yãmba, yãmb na n lebg n waa Sẽn-Ka-Saab sẽn yaa yãmb Wẽnnaamã nengẽ, la yãmb na n kelga bãmb koɛɛgã.

³¹Bala, Sẽn-Ka-Saab sẽn yaa yãmb Wẽnnaamã yaa nimbãan-zoeer soaba, la bãmb ka na n bas yãmba, la b kõn yĩm kãabg ning bãmb sẽn dag n kãab yãmb yaab-rãmbã yell ye.»

³²«M kot-y lame tɩ y sok n bãng bũmb ning sẽn zĩnd wakat nins sẽn loog tɩ yãmb dag n nan ka beẽ wã yelle, sẽn sɩng ne wakat ning bãmb sẽn naan ninsaalbã n ning tẽngã zugã, la y tags n ges zĩigã fãa sẽn be tẽng zugã yell n gese, bõn-kãseng a woto zoe n zĩndame, wall b zoe n wʋma bũmb a woto yell sɩda?

³³Dẽ yĩnga, buud zoe n zĩnda sẽn wʋm Wẽnnaam koɛɛg sẽn yit bugum pʋgẽ wa yãmb sẽn wʋm n ket n vɩ wã?

³⁴Wẽnnaam bʋg n zoe n mak tɩ reeg buud buud a to nugẽ ne bõn-makre, la bãn ne bõn-yɛɛsds la zabre, ne a nugã pãng n maan tʋʋm-kãsems sẽn kẽesd rabeem? Yaa bõn-kãens la Sẽn-Ka-Saab sẽn yaa yãmb Wẽnnaamã maan n kõ yãmb Ezɩpt tẽng tɩ y nin yãndã.

³⁵B wilga yãmb tɩ y bãng tɩ yaa Sẽn-Ka-Saab n yaa Wẽnnaam. B ka tar to ye.

³⁶Bãmb zĩnda saasẽ n kɩt tɩ yãmb wʋm bãmb koɛɛgã, la b zãmsa yãmba. Bãmb kɩtame tɩ y yãnd bãmb bug-kãsengã tẽng zugu, la y wʋm bãmb goam nins sẽn yi bugmã pʋgẽ wã.

³⁷Bãmb sẽn nong yãmb yaab-rãmbã yĩng n kɩt tɩ b loogrã poore, b yãk bãmb yagensã, la bãmb mengã n yiis yãmb Ezɩpt tẽngã ne pãn-kãsenga.

³⁸Bãmb diga bu-kãsems sẽn tar pãng n yɩɩd yãmba, n deeg b tẽmsã n kõ yãmb tɩ y soog wa bãmb sẽn maand rũndã wã.

³⁹Dẽ, yãmb na n tagsame, la y bãng rũndã, tɩ saasã sẽn be yĩngrã pʋga, la dũniyã sẽn be tẽngrã pʋga, Sẽn-Ka-Saab n yaa Wẽnnaam, la b ka tar to ye.

⁴⁰Woto yĩnga, sak-y bãmb no-tũudsã ne b tõodã mam sẽn kõ yãmb dũndã wã, tɩ yãmb ne y kambã vɩɩm tõe n yɩ noogo, la tɩ yãmb tõe n vɩɩmd n kaoos tẽng ning Sẽn-Ka-Saab sẽn yaa yãmb Wẽnnaamã sẽn kõ yãmb tɩ y soog wakat fãa yĩngã pʋgẽ.»

⁴¹Dẽ, a Moyiis yãka tẽms a tãab Zʋrdẽ kʋɩlgã rʋʋnd wĩndg sẽn yitẽ,

⁴²tɩ ned sã n kʋ a to ne yĩdgu, tɩ kisgr rag n ka be b sʋka, bɩ a zoe n kẽ tẽn-bãmb tẽng a ye pʋgẽ n fãag a vɩɩm.

⁴³Tẽmsã yaa Betsɛɛr sẽn be weoogã pʋgẽ wã, Rubɛn nebã yĩnga, Ramot sẽn be Galaad tẽngã Gaad nebã yĩnga, la Golan sẽn be Basan wã, Manaase nebã yĩnga.

⁴⁴Ad tõod nins a Moyiis sẽn kõ Israyɛll nebã.

⁴⁵Ad zãmsgã ne no-tũudsã ne noy nins a Moyiis sẽn wilg Israyɛll nebã b sẽn wa n yi Ezɩpt wakatã.

⁴⁶Dag n yaa b sẽn wa n be Amoor-dãmbã rĩm a Sihõn sẽn be Hɛsbõ wã tẽngẽ Zʋrdẽ kʋɩlgã rʋʋnd longã sẽn tot ne Bɛt-Pewoorã. Yaa yẽnda la a Moyiis ne Israyɛll nebã sẽn tõoge, b sẽn wa n yi Ezɩptã poorã.

⁴⁷Bãmb deega yẽnda tẽngã ne Basan rĩm a Oog tẽngã me. Bãmb n dag n yaa Amoor-dãmbã nanambs a yiibã sẽn be Zʋrdẽ kʋɩlgã rʋʋndã.

⁴⁸Bãmb soolmã sɩnga ne Arowɛɛr sẽn be Arno ko-soogã, hal n ta Sɩyõ tãngã, sẽn dat n togs tɩ Hɛrmo tãngã,

⁴⁹La tẽn-nabdr ning fãa sẽn be Zʋrdẽ kʋɩlgã rʋʋndã sẽn be yaang sẽnẽ wã, n tɩ tãag Araba kʋɩlgã sẽn be Pisga sigdgẽ wã.