Read SEBR SÕNGO, 1998 Tõodo 5 Bible Online

Tõodo 5 - SEBR SÕNGO, 1998 bible

Tõodo 5

¹A Moyiis boola Israyɛll nebã fãa n yeel-b yaa: «Israyɛll nebã, kelg-y no-tũudsã ne noy nins mam sẽn togsd yãmb dũndã wã, la y zãms bãmb n gũus la y maan wa b sẽn yeelã.

²Sẽn-Ka-Saab sẽn yaa tõnd Wẽnnaamã maana kaool ne tõnd Horɛɛb tãngã zugu.

³Ka yɩ ne tõnd yaab-rãmbã la Sẽn-Ka-Saab maan kaoolã ye, yaa ne tõnd sẽn be ka rũndã n vɩ wã.

⁴Sẽn-Ka-Saab meng kɩtame tɩ b koɛɛgã yi bugum pʋgẽ, n gom ne yãmb neng ne neng tãngã zugu.»

⁵Wakat-kãnga, mam dag n yasa Sẽn-Ka-Saab ne yãmb sʋk n na n togs yãmb bãmb goamã. Bala, rabeem dag n tara yãmb bugmã yĩnga, tɩ y ka rʋ tãngã ye. Bãmb yeelame yaa:

⁶«Mam yaa Sẽn-Ka-Saabo, n yaa fo Wẽnnaam, la yaa maam n yiis foom Ezɩpt soolem yembdã pʋga.

⁷Ra bao wẽnnaam-dãmb a taab ye, sã n ka maam bala.

⁸Ra maan bõn-naandg ba a yembre, sẽn yaa bũmb sẽn be saasẽ wẽnego, wall sẽn be tẽngã zugu, wall sẽn be koom pʋsẽ dũniyã tẽngr ye.

⁹Ra wõgemd bõn-kãens taoor n waoog-b ye. Bala, maam a Sẽn-Ka-Saab sẽn yaa fo Wẽnnaamã yaa Wẽnnaam sẽn yaa sũ-kiir soaba, la m kɩtdame tɩ ba-rãmbã sẽn kis maamã kongr sɩbgr lʋɩ bãmb kambã zutu, n tãag zamaan a tãabo, ne zamaan a naase.

¹⁰La mam maanda neb nins sẽn nong maam n sakd mam tõodã yagensã neere, hal tɩ ta zamaan tusri.

¹¹Ra pʋd Sẽn-Ka-Saab sẽn yaa fo Wẽnnaamã yʋʋr zaalem ye. Bala, ned sã n pʋd Sẽn-Ka-Saab yʋʋrã zaalem, b ka na n bas-a soab taal ye.

¹²Sak-y vʋʋsg daarã tõogo, n kɩt t'a yɩ daar sẽn welg toor wa sẽn zems Sẽn-Ka-Saab sẽn yaa yãmb Wẽnnaamã sẽn yeel yãmbã.

¹³Rɩk-y rasem a yoobã n tʋm y tʋʋmã fãa, la y maan y sẽn dat n maanã.

¹⁴La rasem a yopoe wã daare, yaa vʋʋsg daar Sẽn-Ka-Saab sẽn yaa yãmb Wẽnnaamã waoogr yĩnga. Bɩ yãmb ne y kom-dibli wã, la y kom-pugli wã, ne y yem-daadã la y yem-pogsã, ne y loalga, la y bõanga, la sẽn yaa yãmb rũng fãa, la sãamb nins sẽn be yãmb tẽmsã pʋgẽ wã bas b tʋʋmã fãa, tɩ yãmb yem-daadã ne y yem-pogsã paam n vʋʋs wa yãmba.

¹⁵Tẽeg-y tɩ yãmb me rag n yaa yembs Ezɩpt tẽnga. La Sẽn-Ka-Saab sẽn yaa yãmb Wẽnnaamã zẽka b nug sẽn tar pãngã n yiis yãmb beenẽ. Yaa rẽ n kɩt tɩ Sẽn-Ka-Saab sẽn yaa yãmb Wẽnnaamã yetẽ tɩ yãmb maan vʋʋsg daare.

¹⁶Waoog f ba la f ma, wa Sẽn-Ka-Saab sẽn yaa fo Wẽnnaamã sẽn yeel foomã, n tõog n paam yõ-wok la sũ-noog tẽng ning Sẽn-Ka-Saab sẽn yaa fo Wẽnnaamã sẽn kõ foomã pʋgẽ.

¹⁷Da kʋ ned ye.

²⁰Da kɩs kaset sẽn yaa zirẽ n dõd f to ye.

²¹Ra maan sũ-kiir ne f to pag ye. Ra tʋlg f to zaka, wall a pʋʋgo, bɩ a yem-daoogo, wall a yem-poaka, bɩ a loalga, wall a bõanga, bɩ bũmb ning fãa sẽn yaa fo to rẽnd ye.»

²²Gom-kãensã yaa Sẽn-Ka-Saab n gom ne yãmb nebã fãa ne koe-kãseng tãngã zugu, bugum la sawat la lik bida pʋgẽ. Bãmb ka paas gomd ye. Bãmb gʋlsa bãmb kug-wals a yiib zut n kõ maam.

²³Wakat ning yãmb sẽn wʋm koɛɛgã sẽn yit lik bidã pʋgẽ tɩ tãngã zãng wit bugmã, yãmb buudã nanambsã ne kãsem-dãmbã kolga maam

²⁴n yeele: Gese, rũndã, Sẽn-Ka-Saab sẽn yaa tõnd Wẽnnaamã kɩtame tɩ tõnd yãnd b ziirã ne b naamã, la tõnd wʋma bãmb koɛɛg sẽn yit bugum pʋgẽ. Rũndã, tõnd bãngame tɩ Wẽnnaam tõe n goma ne ninsaal t'a kell n vɩɩmd n ka ki ye.

²⁵Moasã, bõe yĩng tɩ d na n ki? Tõnd sã n ket n wʋmd Sẽn-Ka-Saab sẽn yaa tõnd Wẽnnaamã koɛɛga, bug-kãsengã na n dɩɩ tõndo! Tõnd na n kiime.

²⁶Yaa yɛ ned n na n wʋm Wẽnnaam sẽn vɩ koɛɛgã sẽn yit bugum pʋgẽ n ket n vɩ?

²⁷Kolg n kelg bũmb nins fãa Sẽn-Ka-Saab sẽn yaa tõnd Wẽnnaamã sẽn na n yeel foomã, la fo na yaool n wa wilg tõnd bũmb nins Sẽn-Ka-Saab sẽn yaa tõnd Wẽnnaamã sẽn gom ne foomã tɩ d kelge, la d sake.

²⁸Sẽn-Ka-Saab wʋma goam nins yãmb sẽn yeel maamã. Dẽ, bãmb yeela maam yaa: Mam wʋma goam nins nebã sẽn gom ne foomã. Bãmb sẽn yeel bũmb ninsã fãa yaa sõama.

²⁹Mam dag n nongẽ lame tɩ bãmb yam yɩ woto wakat fãa tɩ b zoe maam n sak mam tõodã fãa, tɩ bãmb ne b kambã paam sũ-noog daar fãa.

³⁰Kẽng n tɩ yeel bãmb tɩ b lebg n leb b fu-rotẽ wã.

³¹La foom, bɩ f yaas ka ne maam tɩ m wilg-f tõodã fãa, la no-tũudsã, ne noy nins fo sẽn na n zãms bãmb tɩ b sak-b tẽng ning mam sẽn kõ-b tɩ b soogã pʋgẽ wã.

³²Gũus-y la y maan wa Sẽn-Ka-Saab sẽn yaa yãmb Wẽnnaamã sẽn yeel yãmbã. La y ra bʋdg n leb goabg wall rɩtg ye.

³³Bũmb fãa pʋgẽ, tũ-y sor ning Sẽn-Ka-Saab sẽn yaa yãmb Wẽnnaamã sẽn wilg yãmbã bala, tɩ yãmb tõe n vɩɩmde, la y paam sũ-noogo, ne yõ-wok tẽng ning yãmb sẽn na n tɩ reeg n soogã pʋgẽ.