Read SEBR SÕNGO, 1998 Tõodo 8 Bible Online

Tõodo 8 - SEBR SÕNGO, 1998 bible

Tõodo 8

¹Gũus-y la y sak tõod nins fãa mam sẽn kõt yãmb dũnda wã n tõog n vɩɩmde, n lebg wʋsgo, n kẽ tẽng ning Sẽn-Ka-Saab sẽn wẽen n yeel tɩ b na n kõ y yaab-rãmbã pʋgẽ n soog-a.

²La y tẽeg Sẽn-Ka-Saab sẽn yaa yãmb Wẽnnaamã sẽn tall yãmb n gilim we-raoogã pʋgẽ yʋʋm pis-naasã, sẽn na n yɩl n nams yãmb la b mak yãmb n bãng bũmb ning sẽn be yãmb sũyẽ wã, y sã n na n saka bãmb tõodã, wall y sã n ka na n sake.

³Bãmb kɩtame tɩ y yã toogo, n kɩt tɩ kom nams yãmba, n yaool n kõ-y mande, yãmb ne y yaab-rãmbã sẽn dag n ka mi, sẽn na n yɩl tɩ y bãng tɩ ninsaal ka na n vɩ ne rɩɩb bal ye, la a na n vɩɩ ne bũmb ning fãa sẽn yit Sẽn-Ka-Saab noorẽ wã.

⁴Yãmb sẽn dag n yer fut ninsã ka ki ye, la y naoã ka mod yʋʋm pis-naasã pʋgẽ me ye.

⁵Bãng-y tɩ Sẽn-Ka-Saab sẽn yaa yãmb Wẽnnaamã rag n sagenda yãmb wa ned sẽn sagend a biiga.

⁶Sak-y Sẽn-Ka-Saab sẽn yaa yãmb Wẽnnaamã tõod la y tũ bãmb soayã, la y zoe bãmba.

⁷Bala, Sẽn-Ka-Saab sẽn yaa yãmb Wẽnnaamã na n talla yãmb n tɩ kẽes tẽn-noog ning ko-zoetem ne bulsi, la ko-bunds koom sẽn pusgd a toor pʋt pʋsẽ, la tãms zutu.

⁸Yaa tẽng sẽn sakd koodo, oorze, la reezẽ tɩɩse, ne kankamse, la gernaad tɩɩse, ne oliiv tɩɩse, la sẽn tar sɩɩdo.

⁹Yaa tẽng yãmb sẽn na n dɩt y yam n ka kẽgsdẽ, bũmb sẽn ka na n paoog yãmbã yĩnga. Tẽn-kãng kugã yaa kutu, la yaa tẽng yãmb sẽn na n yãkd zũud a tãmsã pʋse.

¹⁰Yãmb sã n wa rɩ n tɩge, bɩ y pʋʋs Sẽn-Ka-Saab sẽn yaa yãmb Wẽnnaamã bark tẽn-noog ning b sẽn kõ yãmbã yĩnga.

¹¹Gũus-y y mens n da wa yĩm Sẽn-Ka-Saab sẽn yaa yãmb Wẽnnaamã yelle, n bas bãmb tõodã ne b minindã, la b no-tũuds nins mam sẽn kõt yãmb dũndã wã ye.

¹²Yãmb sã n wa rɩ n tɩge, la y wa me ro-sõama n kẽ,

¹³tɩ y rũm-bɛdã ne y rũm-bãoonegã fɩɩgdẽ, tɩ y wanzuri wã ne y sãnemã paasdẽ, tɩ y paoongã fɩɩgdẽ,

¹⁴bɩ y gũus n da wa wuk y mens n yĩm Sẽn-Ka-Saab sẽn yaa yãmb Wẽnnaamã sẽn yiis yãmb Ezɩpt yembdã pʋgẽ wã yell ye.

¹⁵Yaa bãmb n kɩt tɩ yãmb kẽn we-raoog ning sẽn kẽesd rabeemã pʋgẽ, tẽng ning sẽn tar wag-toose, la namse, n yaa ko-bulga, la ko-yũudã. La bãmb kɩtame tɩ koom yi pĩig pʋgẽ yãmb yĩnga.

¹⁶Bãmb dɩlga yãmb we-raoogã pʋgẽ, n kõ yãmb mand y yaab-rãmbã sẽn dag n ka mi. Sẽn na n yɩl n sãam y sũurã, n mak yãmb n ges n yaool n maan-y neere.

¹⁷Ra wa n yeel-y tɩ yaa y pãngã ne y nus tʋʋm yĩng la y paam arzegs a woto ye.

¹⁸Tẽeg-y Sẽn-Ka-Saab sẽn yaa yãmb Wẽnnaamã yelle. Bala, yaa bãmb n kõ yãmb pãng tɩ y paam arzɛka, n na n pids bãmb kaool ning b sẽn dag n wẽen ne y yaab-rãmbã wa b sẽn maand dũndã wã.

¹⁹Yãmb sã n saag n yĩm Sẽn-Ka-Saab sẽn yaa yãmb Wẽnnaamã yelle, n tũ buud a taab wẽnnaam-dãmb n waoog-ba, mam yeta yãmb hakɩɩk rũndã, tɩ yãmb na n menema zãnga.

²⁰Yãmb na n menema wa buud nins Sẽn-Ka-Saab sẽn kɩt tɩ b menem yãmb taoorã. Bala, yãmb ka kelg Sẽn-Ka-Saab sẽn yaa yãmb Wẽnnaamã koɛɛg ye.