Read SEBR SÕNGO, 1998 A Zã koe‑noogo 12 Bible Online

A Zã koe‑noogo 12 - SEBR SÕNGO, 1998 bible

A Zã koe‑noogo 12

¹Pakã tigr ket tɩ rasem a yoobe, a Zeezi waa Betani, tẽng ning a Lazaar bãmb sẽn vʋʋg-a t'a yi n bas kũumã sẽn be wã.

²La b segla rɩɩb be bãmb yĩnga. A Mart dag n pʋɩta rɩɩbã, la a Lazaar dag n naaga ne neb nins sẽn zĩ ne a Zeezi n dɩtẽ wã.

³A Maari dɩka tɩdar sẽn maan ne naar halaale, n tat litr pʋɩ-sʋka, t'a ligd ya wʋsgo, n waal a Zeezi nao wã, n yẽes-b ne a zoobdo. La roogã fãa lebga tɩdarã yũugu.

⁴A Zeezi karen-biig a yembre, a Zʋdaas Iskaryo, soab ning sẽn na n zãmb-a bãmbã yeelame yaa:

⁵«Bõe tɩ b ka koos tɩdarã deniye kobs-tã n kõ naong rãmba?»

⁶A sẽn gom woto wã, ka rat n yeel t'a kũmda naong rãmbã ye. Yaa t'a rag n yaa wagdre, la yẽnda sẽn zãad ligdã korgã, b sã n ning bũmb be fãa, a vaagd-a lame.

⁷La a Zeezi yeelame yaa: «Bas-y pagã t'a bĩng tɩdar-kãngã mam mumb yĩnga.

⁸Naong rãmbã bee ne yãmb wakat fãa, la yãmb kõn paam tɩ mam be ne yãmb wakat fãa ye.»

⁹Zʋɩf-rãmbã wʋsg wʋmame t'a Zeezi bee Betani, la neb kʋʋng waa be. B sẽn wa wã, ka a Zeezi yĩng bal ye, la yaa tɩ yã a Lazaar a Zeezi sẽn vʋʋg t'a yi kũum sʋkã.

¹⁰Maan-kʋʋdbã kãsem-dãmb yẽsa ne taab n na n kell n kʋ a Lazaar me,

¹¹bala, Zʋɩf-rãmbã wʋsg basda bãmba n tẽed a Zeezi, a Lazaar yĩnga.

¹²Vẽkembeoogo, neb kʋʋng wʋsgã sẽn wa Zeruzalɛm tigrã yĩngã, wʋmame t'a Zeezi kẽeda Zeruzalɛm.

¹³Dẽ, nebã kaoo koms-vãad n yi n seg bãmba, n kelemdẽ n yetẽ: Hozaana, bark bee ned ning sẽn wat ne Zu-soabã yʋʋre, Israyɛll Rĩmã zugu.

¹⁴A Zeezi yãnda bõn-bila, n zomb-a wa b sẽn gʋlsã. B gʋlsame n yeele:

¹⁵Siyõ[14] nebã, da maan-y rabeem ye. Ad yãmb Rĩma zomba bõan-bil n watẽ.

¹⁶Bãmb karen-biisã ka wʋm ad-a võor sɩngrẽ wã ye. La a Zeezi sẽn wa n paam waoogrã, karen-biisã yaool n tẽegame tɩ b dag n gʋlsa yel-kãens yell a Zeezi wɛɛngẽ, la tɩ nebã pidsa sẽn gʋlsã.

¹⁷Neb kʋʋngã sẽn dag n be ne a Zeezi wakat ning bãmb sẽn bool a Lazaar yaoogẽ wã, n vʋʋg-a t'a yik n bas kũumã rag n kɩta a Zeezi kaseto.

¹⁸Rẽ n kɩt tɩ nebã yi n seg bãmbã, bala, b wʋmame t'a Zeezi maana bõn-bãn‑kãnga.

¹⁹Dẽ, Fariizẽ-dãmbã yeela taab yaa: «Yãmb neeme tɩ y ka tõogd baa bilf ye. Nebã fãa pʋgda bãmba.»

²⁰Gɛrk-rãmb n dag n be neb nins sẽn wa Zeruzalɛm n na n pʋʋs Wẽnnaam tigrã wakatã sʋka.

²¹Bãmb kolga Galɩle Betsayɩda ned a Filip n kos-a n yeele: «M Kẽema, tõnd dat n yãnda a Zeezi.»

²²A Filip kẽngame n tɩ togs a Ãndere, la bãmb b yiibã kẽngame n tɩ togs a Zeezi.

²³A Zeezi leoka bãmb a woto: Wakat taame tɩ ninsaal Bi-riblã tog n paam waoogre.

²⁴Mam yeta yãmb sɩd-sɩd tɩ ka-buug sã n ka kẽ tãndẽ n pa be n ki, a paada a yembre. La a sã n ki, a womda biis wʋsgo.

²⁵Ned ning sẽn nong a vɩɩm menesd-a lame. La ned ning sẽn na kisg a vɩɩm dũni‑kãngã pʋgẽ, a na n bĩng-a‑la wakat sẽn kõn sa wã yĩnga.

²⁶Ned sã n dat n tʋm mam yĩnga, bɩ a tũ maam. La mam sẽn be zĩig ninga, mam tʋmtʋmdã me na n bee be. Ned sã n tʋmd mam yĩnga, m ba na n waooga a soaba.

²⁷Moas-moasã wã, sũ‑sãang n tar maam. La mam na n yeelame tɩ bõe? Mam na n yeela m ba tɩ b fãag maam ne wakat-kãngã bɩ? La hal tɩ ta moasã, yaa wakat‑kãng yĩng la mam wa-yã.

²⁸M ba, waoog-y y yʋʋrã! Dẽ, koɛɛg zĩnda yĩngr n yeele: Mam waooga m yʋʋrã, la m na n leb n waoog-a lame yɛsa.

²⁹Neb kʋʋngã sẽn dag n yas be, n wʋm koɛɛgã dag n yetame tɩ yaa sa-tãsga. Neb a taab dag n yetame tɩ malɛɛk n gom ne a Zeezi.

³⁰A Zeezi leb n gomame n yeele: «Ka mam yĩng la koɛɛgã sẽn gom tɩ yãmb wʋma ye, yaa yãmb yĩnga.

³¹Moasã yaa dũni‑kãngã bʋʋd wakate. Moasã, b na n diga dũni‑kãngã naabã n yiis yɩnga.

³²La b sã n wa n zẽk maam[15] tɩ m bas tẽn-gãongã, mam na n taka nebã fãa tɩ b wa m nengẽ.»

³³A Zeezi goma a woto n na n wilg kũum ninga buud bãmb sẽn na n ki wã.

³⁴Kʋʋngã leoka bãmb n yeele: «A Moyiis tõogã wilga tõnd tɩ Kirisã paada wakat sẽn kõn sa. Bõe tɩ yãmb yetẽ tɩ yaa tɩlɛ tɩ b zẽk Ninsaal Bi-riblã? Ninsaal Bi-ribl‑kãng yaa ãnda?»

³⁵A Zeezi yeel-b lame yaa: Vẽenemã ket n bee yãmb sʋk wakat bilf yĩnga. Yãmb sẽn tar vẽenemã wakate, bɩ y kẽne, tɩ lik bida da wa n ling yãmb ye. Sẽn kẽnd-a lik bida pʋgẽ ka mi a sẽn dabdẽ ye.

³⁶Wakat ning yãmb sẽn tar vẽenemã, bɩ y tẽ-a, tɩ y na lebg vẽenem kamba. A Zeezi yeela rẽnda, la b loog n zãag ne nebã n tɩ soonde.

³⁷Baa ne a Zeezi sẽn maan bõn-bãn wʋsg a woto nebã taoorã, b ka tẽ bãmb ye,

³⁸tɩ gomd ning Wẽnnaam no-rɛɛs a Ezayi sẽn yeelã pidi. A yeelame yaa: «Zu-soaba, ãnda n tẽ koɛɛg ning tõnd sẽn moona? La Zu-soabã pãng puka ne ãnda?»

³⁹Sẽn paase, b ka tõe n tẽ ye, bala, a Ezayi leb n yeela a woto:

⁴⁰«Wẽnnaam luda b ninã, la b keng b sũyã, tɩ b ra wa n yãnd ne b ninã, tɩ b ra tags n wʋm a võore, la tɩ b da wa n tek yam, tɩ mam maag-b ye.»

⁴¹Yaa woto la a Ezayi gom wakat ning a sẽn yãnd a Zeezi ziirã n gom bãmb yellã.

⁴²Baoosgo, baa nanambsã sʋka, wʋsg tẽe a Zeezi, la Fariizẽ-dãmbã yĩnga, b ka sak n togs tɩ b tẽedame ye, tɩ b ra wa n rig-b n yiis karen-doogẽ wã ye.

⁴³Bala, b dag n nonga ninsaalbã waoogr n yɩɩd Wẽnnaam sẽn na n waoog bãmbã.

⁴⁴A Zeezi zẽka b koɛɛg n yeele: «Sẽn tẽed-a maam ka tẽed maam ye, yaa sẽn tʋm-a maamã la a tẽeda,

⁴⁵la sẽn yãa maam yãa sẽn tʋm-a maamã.

⁴⁶Mam sẽn yaa vẽenemã, mam waa dũni pʋgẽ, tɩ ned ning fãa sẽn tẽed maam kõn pa lik pʋgẽ ye.

⁴⁷Ned sã n wʋm mam goamã n ka reege, ka maam n bʋʋd a soabã bʋʋd ye: Bala, mam sẽn wa wã, ka tɩ bʋ dũni nebã bʋʋd ye, la yaa tɩ fãag-ba.

⁴⁸Sẽn tõdg-a maam la a ka reegd mam goamã, a tara a bʋ-kaooda: Goam nins mam sẽn goma n na n kao yẽnda bʋʋd yaoolem daare.[16]

⁴⁹Bala, mam goamã ka yit mam nengẽ ye. La m ba, sẽn tʋm-a maamã, bãmb b toor n wilg maam m sẽn tog n yeel la m gome.

⁵⁰La mam miime tɩ bãmb noorã yaa vɩɩm sẽn kõn sa. Woto, bũmb nins mam sẽn gomdã, yaa wa m ba sẽn yeel maamã»