Read SEBR SÕNGO, 1998 A Zã koe‑noogo 5 Bible Online

A Zã koe‑noogo 5 - SEBR SÕNGO, 1998 bible

A Zã koe‑noogo 5

¹Dẽ poore, Zʋɩf-rãmbã tigr n zĩndi, la a Zeezi kẽnga Zeruzalɛm.

²Bãk a ye n dag n be Zeruzalɛm, piisã dignoor[6] sɛɛgẽ, tɩ b boond ne Ebre goam tɩ Betɛsda, la zãn a nu n dag n be be.

³Bãad-dãmb wʋsg n dag n gãe zãnã tẽngre: zoense, wobse, ki-boaga. [B dag n bee be n gũud koomã rãmbgo.

⁴Bala, malɛɛk n sigd bãkã pʋgẽ wakat wakat n dãmbd koomã. La koomã sã n dãmb n sa, ned ning sẽn yɩ-a pipi n lʋɩ koomẽ wã paamda maagre, baa bãagã sẽn yaa bũmb ninga.]

⁵Dao a yembr n dag n be beenẽ n ka keemẽ, la a bãagã taa yʋʋm pis-tã la a nii.

⁶A Zeezi yãnda a sẽn gãe, la b sẽn mi t'a bee be hal daar zãrã, b sok-a lame yaa: «Fo rat n paama laafɩ bɩ?»

⁷Bãadã leoka bãmb yaa: «Zu‑soaba, mam ka tar ned sẽn na n kẽes maam bãkẽ wã koomã lengr wakat ye. La mam sã n dabd be, ned n dengd maam n lʋɩ be.»

⁸A Zeezi yeel-a lame yaa: «Yik n dɩk f gãagã n kẽne.»

⁹Wakat-kãng bala, dao wã paama laafɩ. A rɩka a gãag n sɩng kẽna.

¹⁰Badaar dag n yaa Zʋɩf-rãmbã vʋʋsg daare. Dẽ, Zʋɩf-rãmbã yeela rao ning sẽn paam-a maagrã yaa: «Yaa vʋʋsg daare, fo ka tar noor tɩ tʋk f gãagã ye.»

¹¹La a leoka bãmba: «Ned ning sẽn kõ-a maam laafɩ wã yeela maam tɩ m rɩk m gãagã n kẽne.»

¹²Zʋɩf-rãmbã soka dao wã tɩ yaa ãnda soab n yeel foom tɩ f rɩk f gãagã n kẽna?»

¹³La rao ning sẽn paam-a maagrã dag n ka mi sẽn yaa ned ning ye. Bala, a Zeezi dag n kẽe nebã sẽn dag n be beenẽ wã sʋk n meneme.

¹⁴Dẽ poore, a Zeezi yãnda raoã wẽnd doogẽ wã n yeel-a: Gese, fo paama laafɩ. Da leb n maan yel-wẽn ye, tɩ yell sẽn yɩɩd a woto da wa n paam foom ye.

¹⁵Raoã kẽngame n tɩ yeel Zʋɩf-rãmbã tɩ yaa a Zeezi la sẽn maag yẽnda wã.

¹⁶Rẽnda n kɩt tɩ Zʋɩf-rãmbã rag n namsd a Zeezi, b sẽn maand bõn-kãng vʋʋsg daarã yĩngã.

¹⁷La a Zeezi leoka bãmb n yeele: M ba tʋmda hal tɩ ta moasã. Mam me tʋmdame.

¹⁸Gom-kãng yĩnga, Zʋɩf-rãmbã rag n baooda a Zeezi n yɩɩd pĩnd n dat n kʋ. Ka b sẽn kɩɩs bãmb vʋʋsg daar tõogã yĩng bal ye, la yaa b sẽn boond Wẽnnaam tɩ b meng ba, n wilgd tɩ bãmb ne Wẽnnaam yaa yembrã yĩnga.

¹⁹Dẽ, a Zeezi leoka bãmb n yeele: Mam yeta yãmb sɩd-sɩd tɩ Bi-riblã ka tõe n maan baa fɩ a toor ye, yaa bũmb nins a ba sẽn maand t'a yãtẽ wã bal la a maanda. Bũmb nins fãa ba wã sẽn maanda, Bi-riblã me maanda rẽ me.

²⁰Bala, ba wã nonga Bi-riblã, n wilgd-a bũmb nins fãa b sẽn maandã, la b na n leb n wilg-a-la tʋʋm sẽn yaa kãsems n yɩɩd a woto, tɩ yãmb yɛɛse.

²¹Sɩd me, a wa ba wã sẽn vʋʋgd kũum, n kɩtdẽ tɩ b leb n vɩ wã, woto me, Bi-riblã kɩtdame tɩ bãmb sẽn dat t'a soab vɩɩmdã vɩɩmde.

²²Sẽn paase, ba wã ka kaood ned baa a yembr bʋʋd ye, b basa bʋʋdã fãa ne Bi-riblã,

²³tɩ nebã fãa na waoog-a wa b sẽn waoogd ba wã. Ned ning sẽn ka waoogd Bi-riblã ka waoogd ned ning sẽn tʋm-a wã me ye.

²⁴Mam yeta yãmb sɩd-sɩd tɩ ned ning fãa sẽn kelgd mam goamã, la a tẽed sẽn tʋm-a maamã a tara vɩɩm sẽn kõn sa. B ka na n sɩbg-a ye. A yii kũumẽ n kẽ vɩɩmẽ.

²⁵Mam yeta yãmb sɩd-sɩd tɩ wakat watame, la yaa moasã bala, tɩ sẽn ki-bã na n wʋm Wẽnnaam Bi-riblã koɛɛga. La neb nins sẽn wʋm-bã na n vɩɩmdame.

²⁶Sɩd me, a wa vɩɩmã sẽn be ba wã nugẽ wã, ba wã kõo Bi-riblã pãn-tõog tɩ b tar vɩɩmã b nugẽ,

²⁷la b kõ-a-la noor tɩ kao bʋʋdo, bala, a yaa Ninsaal Bi-ribla.

²⁸Da sak-y tɩ rẽ yɛɛs yãmb ye. Bala, wakat n wat tɩ neb nins fãa sẽn be yaadẽ na n wʋm bãmb koɛɛga.

²⁹Neb nins sẽn maan neerã na n yiime n paam vʋʋgr la vɩɩm. Neb nins sẽn maan wẽngã na n yiime n paam vʋʋgr la bʋʋdo.

³⁰Mam ka tõe n maan baa fɩ m toor ye. Mam bʋʋda bʋʋdã n zemsd m sẽn wʋmdã, la mam bʋʋdã yaa tɩrga, bala, mam ka baood tɩ maan m daab ye, la yaa sẽn tʋm-a maamã raabo.

³¹Sã n yaa maam n kɩt m meng kaseto, mam kasetã ka sɩd ye.

³²Yaa ned a to n kɩt mam kaseto, la mam miime tɩ kaset ning a soab sẽn kɩt mam wɛɛngẽ wã yaa sɩda.

³³Yãmb tʋma koe-toagsedb a Zã nengẽ, la a Zã kɩsa sɩdã kaseto.

³⁴Ne maam, mam kasetã ka yit ninsaal nengẽ ye, la mam gomda a woto tɩ yãmb tõe n paam fãagre.

³⁵A Zã dag n yaa fɩtl sẽn wita, n yãgda, la yãmb tʋlgame n maan sũ-noog wakat bilf bal yẽnda vẽenemẽ wã.

³⁶La maam, mam tara kaset sẽn yɩɩd a Zã rẽndã. Bala, tʋʋm nins m ba sẽn kõ maam tɩ m maana, tʋʋm-kãens meng mam sẽn maandã n kɩt mam kaseto, n wilgdẽ tɩ m ba n tʋm maam.

³⁷La m ba sẽn tʋm maamã, bãmb meng kɩsa mam kaseto. Yãmb zɩ n wʋm b koɛɛga, wall y yãnd b neng ye,

³⁸la bãmb goamã ka be yãmb pʋgẽ ye, yãmb sẽn ka tẽed bãmb sẽn tʋm a soabã yĩnga.

³⁹Yãmb feesda Wẽnnaam gʋls-sõamyã pʋse, bala, yãmb sẽn tẽed tɩ yãmb na n paama vɩɩm sẽn kõn sɛ, b maasem yĩngã. Yaa gʋls-sõamy-kãens n kɩt mam kaseto.

⁴⁰La yãmb yaool n ka rat n wa mam nengẽ n paam vɩɩmã ye.

⁴¹Mam ka reegd ziir sẽn yit ninsaalb nengẽ ye.

⁴²La mam mii yãmba: Wẽnnaam nonglmã ka be yãmb pʋsẽ ye.

⁴³Mam waa m ba yʋʋr yĩnga, la yãmb ka reegd maam ye. Ned a to sã n wa ne a meng yʋʋre, yãmb deegda yẽnda.

⁴⁴Yãmb sẽn paamd pẽgr taab nengẽ, la y ka baood pẽgr sẽn yit Wẽnnaam b yembr tãa nengẽ wã, yãmb tõe n yɩɩ wãn n tẽ?

⁴⁵Da tags-y tɩ mam na n yeela m ba tɩ yãmb ka maan neer ye. Sẽn na n yeel-a tɩ yãmb beegame wã, yaa a Moyiisi, yãmb teegr sẽn be ne a soabã.

⁴⁶Bala, yãmb sã n dag n tẽedẽ a Moyiisi, yãmb dag n na tẽ maam, bala, a gʋlsame n gom mam yelle.

⁴⁷La yãmb sã n ka tẽed bũmb nins a sẽn gʋlsã, yãmb na n tẽe mam goamã wãn-wãna?