Read SEBR SÕNGO, 1998 A Zã koe‑noogo 6 Bible Online

A Zã koe‑noogo 6 - SEBR SÕNGO, 1998 bible

A Zã koe‑noogo 6

¹Rẽnda poore, a Zeezi kẽnga Galɩle ko-kãsengã sẽn boond tɩ Tiberyaad rʋʋnde.

²Neb kʋʋng dag n pʋgda bãmba, b sẽn yãt bõn-bãn nins a Zeezi sẽn maand n maagd bãad-dãmbã yĩnga.

³A Zeezi rʋʋ tãngã n zĩnd be ne b karen-biisã.

⁴La Zʋɩf-rãmbã tigr b sẽn boond tɩ Pakã dag n kolgame.

⁵A Zeezi zẽka b nenga, la b yãnda neb kʋʋng sẽn wat bãmb nengẽ, la b yeela a Filip yaa: «Tõnd na n daa bur yɛɛnẽ tɩ nin-kãensã paam rɩɩbo?»

⁶A Zeezi goma a woto n na n mak a Filip n gese. Bala, b meng rag n mii b sẽn na n maan bũmb ninga.

⁷A Filip leoka bãmb n yeel tɩ deniye kobsi bur ka tõe n sek tɩ ned fãa paam bur-gɩrg ye.

⁸A Zeezi karen-biig a yembre, a Sɩmo Pɩyɛɛr ba-biig a Ãndere yeela bãmb yaa:

⁹Bi-ribl bil n be ka n tar Oorz bur a nu ne zĩm a yiibu. La rẽnda yaa bõe ne neb sõor a woto?

¹⁰A Zeezi yeelame: «Kɩt-y tɩ nebã zĩndi.» Mood n dag n be zĩ-kãng wʋsgo. Dẽ, nebã zĩndame, la raopã sõor tata tus a nu.

¹¹A Zeezi deega burã, n pʋʋs Wẽnnaam barka, n pʋɩ neb nins sẽn dag n be-b be wã. B maana a woto me ne zĩmã, tɩ ned fãa deeg a sẽn dat tɛka.

¹²Nebã sẽn dɩ n tɩge, a Zeezi yeela b karen-biisã tɩ b wʋk rɩ-zersã sẽn kellã, tɩ bũmb baa a yembr da pa n sãam ye.

¹³Dẽ, b wʋka Oorz bur a nu wã gɩrsã, nebã sẽn dɩ tɩ kellã, n pids pet piig la a yiibu.

¹⁴Nin-kãens sẽn yã bõn-bãn nins a Zeezi sẽn maanã, b yeelame yaa: «Sɩd yaa bãmb la Wẽnnaam no-rɛɛs ning sẽn da tog n wa-a dũni pʋgẽ wã.»

¹⁵A Zeezi sẽn mi tɩ nebã na n waa n yõka bãmb n tɩ maan b rĩmã yĩnga, b yii be n leb n dʋ tãngã zug b yembre.

¹⁶Zaabr sẽn ta, a Zeezi karen-biisã sigame n ta ko-kãsengã noore.

¹⁷Bãmb kẽe koom koglg pʋgẽ n na n kẽng Kapɛrnaom, ko-kãsengã rʋʋnd a to wã. Zĩigã rag n zoe n sobga zãnga, la a Zeezi dag n ka wa b nengẽ ye.

¹⁸Sebg n dag n fugd ne pãng hal wʋsgo, la ko-pɛmã dag n zẽkdame.

¹⁹Karen-biisã sẽn dugs koglgã n zãag sẽn zems kɩlo a nu bɩ a yoobe, b yãnda a Zeezi sẽn kẽnd ko-kãsengã zug n kolgd koom-koglgã. La rabeem yõk-b lame.

²⁰La a Zeezi yeel-b lame: «Da maan‑y rabeem ye yaa maam.»

²¹Karen-biisã dag n dat n dɩka a Zeezi ne koom-koglgã, la tao-tao bala, koom-koglgã rʋʋga tẽnga. Bala, b taa b sẽn dag n dabdẽ wã. Koom-koglg sobg sẽn lengda.

²²Vẽkembeoogo, neb kʋʋngã sẽn dag n yals ko-kãsengã rʋʋndã tẽegame tɩ dag n yaa koom-koglg a yembr tãa n dag n be be, la t'a Zeezi dag n ka kẽ kogl-kãng ne b karen-biisã ye, la tɩ karen-biisã b yeyn-yeyn n looge.

²³La koom-kogend a taab yii Tiberyaad n wa n yals zĩig sẽn pẽ ne zĩig ning a Zeezi sẽn ning burã bark n kõ neb kʋʋngã tɩ b wãbã.

²⁴La kʋʋngã sẽn yã t'a Zeezi bɩ b karen-biisã ka be be wã, b mensã kẽe koom-kogendẽ wã n kẽng Kapɛrnaom n na n tɩ bao a Zeezi.

²⁵B yãnda a Zeezi ko-kãsengã rʋʋnd a to wã, n sok-b yaa: «Karen-saamba, yãmb waa ka rabʋre?»

²⁶A Zeezi leoka bãmb n yeele: «Mam yeta yãmb sɩd-sɩd tɩ yãmb sẽn baood maamã, ka bõn-bãnã yãmb sẽn yã wã yĩng ye, la yaa yãmb sẽn wãb burã n tɩgã yĩnga.

²⁷Da tʋm-y rɩɩb sẽn sãamdã yĩng ye. Tʋm-y rɩɩb ning sẽn paad vɩɩm sẽn kõn sa wã yĩnga: Ninsaal Bi-riblã n na n kõ-a yãmba. Bala, yaa ba a Wẽnnaam n yãk yẽnda.»

²⁸Nebã soka a Zeezi yaa: «Bõe la tõnd na n maan n tʋm Wẽnnaam tʋʋmdã?»

²⁹A Zeezi leoka bãmb n yeele: «Wẽnnaam tʋʋmde, yaa tɩ yãmb tẽ a soab ning bãmb sẽn tʋmã.»

³⁰La b yeela a Zeezi yaa: «Bõe bõn-bãnd la yãmb maand tɩ tõnd na n yãnd n tẽ yãmba? Bõe tʋʋm la yãmb tʋmda?»

³¹Tõnd ba-rãmbã dɩɩ man we-rasempʋɩɩgã pʋgẽ wa b sẽn gʋls n yeel tɩ: «A Moyiis kõo bãmb bur sẽn yit arzãn tɩ b wãbe.»

³²A Zeezi yeela bãmb yaa: «Mam yeta yãmb sɩd-sɩd tɩ ka a Moyiis n kõ yãmb bur sẽn yi arzãnã ye, la yaa m ba n kõt yãmb bur sɩd-sɩd sẽn yi arzãnã.

³³Bala, Wẽnnaam burã, yaa soab ning sẽn yit-a arzãn n sigda, n kõt dũni neb vɩɩmã.»

³⁴La nebã yeela a Zeezi yaa: Zu-soaba, kõt-y tõnd bur kãng daar fãa.

³⁵A Zeezi yeela bãmb yaa: Maam la bur sẽn kõt vɩɩmã. Ned ning fãa sẽn wat-a mam nengẽ, Kom kõn leb n yõk yẽnda ye, la ned ning fãa sẽn tẽed-a maam, ko-yũud kõn leb n yõk yẽnda abada.

³⁶La mam yeela yãmb tɩ yãmb yãnda maam la y ka tẽed ye.

³⁷Neb nins fãa m ba sẽn kõt maamã na n waa mam nengẽ, la mam kõn dig ned baa a yembr sẽn wat mam nengẽ ye.

³⁸Bala, mam sẽn yi arzãn n sigã, ka tɩ maan m sẽn dat ye, la yaa tɩ maan sẽn tʋm-a maamã raabo.

³⁹La sẽn tʋm-a maamã raab la woto: Yaa tɩ m da bas ned baa a yembr bãmb sẽn kõ maamã tɩ menem ye, la mam na n vʋʋg-a-la yaoolem daarã.[7]

⁴⁰Sɩd me, ad m ba raabo: Yaa tɩ ned ning fãa sẽn yã Bi-riblã n tẽ bãmb na paam vɩɩm sẽn kõn sa. La mam na n vʋʋg-a-la yaoolem daarã.

⁴¹Zʋɩf-rãmbã dag n yẽgemda ne taab a Zeezi poorẽ, bala, a Zeezi yeelame tɩ bãmb la bur sẽn yi arzãn n sigã.

⁴²Nebã yeelame yaa: Ka yẽnda la a Zeezi wɛɛ, a Zozɛf bi-riblã, tɩ tõnd mi a ba ne a ma wã la? La yaa a wãn t'a yetẽ tɩ yẽnda yii arzãn n sigi?

⁴³A Zeezi leoka bãmb n yeele: Da yẽgm-y ne taab ye.

⁴⁴Ned baa a yembr ka tõe n wa mam nengẽ, tɩ sã n ka m ba, sẽn tʋm-a maamã n tak a soab n wa ne ye. La mam na n vʋʋg-a-la yaoolem daarã.

⁴⁵A Gʋlsa Wẽnnaam no-rɛɛsdbã sɛbẽ tɩ: «B fãa na n deega zãmsg Wẽnnaam nengẽ.» Ned ning fãa sẽn wʋm m ba koɛɛg la a reeg bãmb zãmsgã wata mam nengẽ.

⁴⁶Ka rat n yeel tɩ ned n zoe n yãnd d ba wã ye, sã n ka soab ning sẽn yi-a Wẽnnaam nengẽ wã. Soab‑kãng yẽ yãnda d ba wã.

⁴⁷Mam yeta yãmb sɩd-sɩd tɩ ned ning sẽn tẽedã tara vɩɩm sẽn kõn sa.

⁴⁸Mam yaa bur sẽn kõt vɩɩm.

⁴⁹Yãmb yaab-rãmbã rɩɩ mand we-rasempʋɩɩgẽ wã, la b kiime.

⁵⁰Bur ning sẽn yit-a yĩngrã yell la woto: Ned ning sẽn dɩt-a kõn ki ye.

⁵¹Maam, mam yaa bur-vɩɩg sẽn yi arzãn n sigi. Ned sã n dɩ bur‑kãngã, a na n vɩɩmda wakat sẽn kõn sa. La bur ning mam sẽn na n kõ dũni wã vɩɩm yĩngã, yaa mam yĩngã.

⁵²Gom-kãng poorẽ, Zʋɩf-rãmbã wẽe no-koeemd ne taab wʋsg n yeele: Nin-kãngã na n yɩɩ wãn n kõ tõnd a yĩngã tɩ d wãbe?

⁵³A Zeezi yeela bãmb yaa: Mam yeta yãmb sɩd-sɩd tɩ yãmb sã n ka wãb Ninsaal Bi-riblã nemdo, la yãmb sã n ka yũ a zɩɩmã, yãmb ka tar vɩɩm y pʋsẽ ye.

⁵⁴Ned ning sẽn wãbd mam nemd la a yũud mam zɩɩm tara vɩɩm sẽn kõn sa, la mam na n vʋʋg-a-la yaoolem daarã.

⁵⁵Bala, mam nemdã yaa rɩɩb sɩd-sɩda, la mam zɩɩmã yaa bõn-yũudl sɩd-sɩda.

⁵⁶Sẽn wãbd-a mam nemd la a yũud mam zɩɩmã paada mam pʋgẽ, tɩ mam paad yẽnda pʋgẽ.

⁵⁷A wa m ba wã sẽn vɩ, n tʋm maam, tɩ mam vɩ m ba wã maasem yĩngã, woto me, ned ning sẽn dɩt maam na n vɩɩ mam maasem yĩnga.

⁵⁸Ada la bur sẽn yi arzãn n sigi. A ka wẽnd bur ning yãmb ba-rãmbã sẽn wãbã ye: Bãmb kiime. Sẽn dɩt-a bur‑kãngã wã na n vɩɩmda wakat sẽn kõn sa.

⁵⁹Yaa woto la a Zeezi gom wakat ning b sẽn dag n zãmsd nebã Kapɛrnaom karen-doogẽ wã.

⁶⁰A Zeezi karen-biisã sẽn wʋm bãmb goamã, wʋsg yeelame yaa: Zãms-kãngã reegr yaa toogo. Ãnda n tõe n sak-a?

⁶¹A Zeezi sẽn mi b yamẽ tɩ b karen-biisã yẽgemda gomdã poorẽ, b yeela bãmb yaa: Yõwã tuka yãmb sũur la?

⁶²La yãmb sã n yãnd Ninsaal Bi-riblã t'a zẽkd n lebd a sẽn dag n beẽ wã, na n yɩɩ a wãna?

⁶³Yaa Sɩɩg-sõng n kõt vɩɩm. Yĩngã ka sõngd ne baa fɩ. Goam nins mam sẽn togs yãmbã wata ne Sɩɩg-sõng la vɩɩm.

⁶⁴La neb kẽer n be yãmb sʋkã n ka tẽed ye. Bala, hal sɩngr wẽndẽ, a Zeezi dag n mii neb nins sẽn ka tẽed bãmba, la ned ning sẽn na n zãmb-a bãmb n yõk n kõ wã.

⁶⁵A Zeezi gomame n paas n yeele: «Dẽ n kɩt tɩ mam yeel yãmb tɩ ned baa a yembr ka tõe n wa mam nengẽ, tɩ sã n ka m ba n kõ-a noor ye.»

⁶⁶Sẽn sɩng ne wakat-kãnga, bãmb karen-biis wʋsg leba poorẽ, n bas n ka leb n tũud a Zeezi ye.

⁶⁷Dẽ, a Zeezi yeela b karen-biis piig la a yiibã yaa: La yãmb yẽ, yãmb ka rat n loog la?

⁶⁸A Sɩmo Pɩyɛɛr leoka bãmb n yeele: «Zu-soaba, tõnd na n kẽnga ãnda soab nengẽ? Yãmb tara vɩɩm sẽn kõn sa wã goamã.

⁶⁹La tõnd tẽeme, la tõnd bãngame tɩ yãmb yaa sõmblem soab sẽn yi Wẽnnaam nengẽ.»

⁷⁰A Zeezi leoka bãmb n yeele: Ka maam n tũus yãmb piig la a yiibã wɛ? La yãmb ned a ye n yaa zĩnã.

⁷¹Bãmb dag n gomda a Sɩmo Iskaryo biig a Zʋdaas yelle. Bala, yaa yẽnda, bãmb piig la a yiibã sʋk ned ning sẽn da na n zãmb-a bãmbã.