Read SEBR SÕNGO, 1998 A Zã koe‑noogo 8 Bible Online

A Zã koe‑noogo 8 - SEBR SÕNGO, 1998 bible

A Zã koe‑noogo 8

²La yibeoog bala, b leb n kẽnga wẽnd doogẽ wã, la nebã fãa waa bãmb nengẽ. Bãmb zĩndame n zãmsd nebã.

³Dẽ, tõog karen-saam-dãmbã ne Fariizẽ-dãmbã talla pag b sẽn yõk yoodem zug n wa ne-a

⁴a Zeezi taoore, n yals-a nebã fãa sʋk n yeel a Zeezi yaa: Karen-saamba, b linga pʋg-kãngã t'a maand yoobo.

⁵A Moyiis yeela tõnd a tõogã pʋgẽ tɩ d lob pagb a woto kuga. La yãmba, yãmb yetame tɩ bõe?

⁶B goma a woto n na n bẽd a Zeezi n paam n dõd-ba. La a Zeezi zõondame n sɩng n gʋls tomã pʋgẽ ne b nug-bila.

⁷La nebã sẽn dag n ket n pẽdgd bãmb ne b sokrã, b roogame n yeel-b yaa: Sẽn be-a yãmb sʋk n ka tar yel-wẽnde, bɩ a reng n lobg pagã kugri.

⁸A Zeezi leb n zõondame n gʋlsd tomẽ wã.

⁹Tõog karen-saam-dãmbã ne Fariizẽ-dãmbã sẽn wʋm gom-kãngã, tɩ b sũyã kaset kao b bʋʋdo, b yii yembr yembre, sẽn sɩng ne kãsem hal tɩ ta yaoolem soaba. La a Zeezi paa b yembr ne pagã sẽn dag n yɛs nebã sʋkã.

¹⁰Dẽ, a Zeezi roogame n yeel pagã yaa: Paga, sẽn dõt-b foomã bee yɛ? Baa a yembr ka kao fo bʋʋd la?

¹¹Pagã leokame tɩ: Zu-soaba, ned baa a yembre. La a Zeezi yeel-a lame yaa: Mam me ka kaood fo bʋʋd ye. Kẽnge, la f ra leb n saag n maan yel-wẽn ye.]

¹²A Zeezi leb n goma ne bãmb n yeele: Mam yaa dũni vẽenem. Ned ning sẽn tũud maam kõn kẽn lik pʋgẽ ye, la a na n paama vɩɩm vẽenem.

¹³Dẽ, Fariizẽ-dãmbã yeela bãmb yaa: Fo kɩta f meng kaseto, fo kaset ka sɩd ye.

¹⁴A Zeezi leoka bãmb n yeele: Baa ne mam sẽn kɩt m meng kasetã, mam kasetã yaa sɩda. Bala, mam mii m sẽn yiẽ, la m sẽn dabdẽ. La yãmb ka mi mam sẽn yiẽ, wall m sẽn dabdẽ ye.

¹⁵Yãmb bʋʋda wa ninsaalb sẽn data. La maam, mam ka bʋʋd ned baa a yembr bʋʋd ye.

¹⁶La mam sã n bʋʋdẽ me, mam bʋʋdã tũuda sɩda, bala mam ka m yembr ye. M ba, sẽn tʋm-a maamã bee ne maam.

¹⁷B gʋlsa yãmb tõogã pʋgẽ tɩ neb a yiib kaset yaa sɩda.

¹⁸Mam kɩta m meng kaseto, la m ba, sẽn tʋm-a maamã kɩta mam kaseto.

¹⁹Dẽ, b yeela a Zeezi yaa: F ba bee yɛ? A Zeezi leokame n yeele: Yãmb zɩ mam sẽn yaa a soaba, la y zɩ m ba sẽn yaa a soab me. Yãmb sã n dag n miẽ-la maam, y dag n na bãng m ba me.

²⁰A Zeezi goma woto, wakat ning b sẽn dag n zãmsd nebã wẽnd doogẽ wã, ligd lobrã koglg sɛɛgẽ, la ned baa a yembr ka yõk bãmb ye, bãmb wakatã sẽn ket n nan ka ta wã yĩnga.

²¹A Zeezi leb n yeela bãmb yaa: Mam loogdame, la yãmb na n baoo maam, la yãmb na n kii y yel-wẽndã pʋgẽ. Yãmb ka tõe n wa mam sẽn kẽndẽ wã ye.

²²Zʋɩf-rãmbã yeelame yaa: A sẽn yet tɩ tõnd ka tõe n wa zĩig ning a sẽn kẽndẽ wã, a na n kʋʋ a meng la?

²³La a Zeezi yeela bãmb yaa: Yãmb yaa tẽngr ka nebã, la mam yaa yĩngr neda. Yãmb yaa dũni‑kãngã nebã, la mam ka dũni‑kãngã ned ye.

²⁴Dẽnda n kɩt tɩ mam yeel yãmb tɩ y na n kii y yel-wẽnã pʋgẽ wã. Bala, yãmb sã n ka tẽed tɩ mam yaa m sẽn yaa a soabã, yãmb na n kii y yel-wẽnã pʋgẽ.

²⁵B soka a Zeezi b sẽn yaa a soaba. A Zeezi leoka bãmb n yeele: Pipi, bõe yĩng tɩ m na n gom ne yãmba?

²⁶Mam tara bũmb wʋsg n na n gome, sẽn kẽed ne yãmb yelle, la m bʋ b bʋʋdo. La sẽn tʋm-a maamã yaa sɩd soaba, la mam togsda dũni wã bũmb ning m sẽn wʋm bãmb nengẽ.

²⁷Nebã ka wʋm tɩ yaa b ba a Wẽnnaam yell la a Zeezi sẽn gomd ne bãmbã ye.

²⁸Dẽ, a Zeezi yeel-b lame yaa: Yãmb sã n wa n zẽk[8] Ninsaal Bi-riblã n sa, y na yaool n bãng tɩ mam yaa m sẽn yaa a soaba, la tɩ mam ka maand baa fɩ m toor ye, la tɩ mam gomda wa m ba sẽn zãms maamã.

²⁹Sẽn tʋm-a maamã bee ne maam. B ka bas maam m yembr ye, bala, wakat fãa, mam maanda sẽn noom bãmba.

³⁰A Zeezi sẽn gom a woto wã, neb wʋsg tẽe bãmba.

³¹Dẽ, a Zeezi yeela Zʋɩf-rãmb nins sẽn tẽ bãmbã yaa: Yãmb sã n tall mam goamã, yãmb sɩd yaa mam karen-biisi.

³²Yãmb na bãng sɩdã, la sɩdã na kɩt tɩ yãmb lebg burkĩmba.

³³Bãmb leoka a Zeezi n yeele: Tõnd yaa a Abrahaam yagense, la tõnd zɩ n yɩ ned yamb ye. Bõe tɩ yãmb yetẽ tɩ tõnd na n lebga burkĩmba?

³⁴A Zeezi leoka bãmb n yeele: Mam yeta yãmb sɩd-sɩd tɩ ned ning fãa sẽn maand yel-wẽnd yaa yel-wẽn yamba.

³⁵La yamb ka paad yir wakat fãa ye. La yirã bi-ribl paada be wakat fãa.

³⁶Dẽ, Bi-riblã sã n yols yãmba, yãmb na n yɩɩ burkĩmb meng-menga.

³⁷Mam miime tɩ yãmb yaa a Abrahaam yagense. La yãmb yaool n dat n kʋʋ maam, yãmb sẽn ka reegd mam goamã yĩnga.

³⁸Mam togsda bũmb ning m sẽn yã m ba wã nengẽ wã. La yãmba, yãmb maanda bũmb ning y sẽn wʋm y ba wã nengẽ.

³⁹Nebã leoka a Zeezi n yeele: Tõnd ba la a Abrahaam. A Zeezi yeela bãmb yaa: «Yãmb sã n yaa a Abrahaam kamba, bɩ y tʋm y ba a Abrahaam tʋʋmã.

⁴⁰La moasã, maam, soab ning sẽn togs yãmb sɩd m sẽn wʋm Wẽnnaam nengẽ wã, yãmb baooda maam n na n kʋ. A Abrahaam zɩ n maan bõn-kãngã buud ye.

⁴¹Yãmb tʋmda y ba tʋʋma.» Bãmb yeela a Zeezi yaa: «Tõnd ka tãmpĩib ye. Tõnd ba yaa a yembr tãa: Yaa Wẽnnaam.»

⁴²A Zeezi yeela bãmb yaa: «Wẽnnaam sã n dag n yaẽ yãmb ba, yãmb dag n na n nongẽ-la maam, bala, mam yii Wẽnnaam pʋgẽ, la m yii Wẽnnaam nengẽ n wa. Mam ka wa m toor ye, la yaa bãmb n tʋm maam.

⁴³Bõe tɩ yãmb ka wʋmd mam goamã võore? Yaa tɩ yãmb ka tõe n kelg mam gomd ye.

⁴⁴Yãmb ba la Sʋtãanã, la yãmb dat n pidsa y ba wã raabo. A yɩɩ nin-kʋʋd hal sɩngr wẽndẽ tɩ ta moasã, la a ka pa sɩd pʋgẽ ye, sɩd sẽn ka be yẽnda pʋgẽ wã yĩnga. A sã n yagd zĩrẽ, yaa a pʋga fãa la rẽnda, bala, a yaa zĩrẽ-yagda, la zĩrẽ wã ba.

⁴⁵La mam sẽn togsd sɩdã, yãmb ka tẽed maam ye.

⁴⁶Ãnda yãmb sʋkã n na n wilg maam tɩ m maana yel-wẽnde? Mam sã n togsda sɩda, bõe tɩ yãmb ka tẽed maam?

⁴⁷Wẽnnaam biig kelgda Wẽnnaam goamã. Yãmb ka kelgda, yãmb sẽn ka Wẽnnaam kambã yĩnga.»

⁴⁸Zʋɩf-rãmbã leoka a Zeezi n yeele: «Tõnd ka tar bʋʋm tɩ yeel tɩ fo yaa Samaari neda, la tɩ zĩn n tar foom sɩda?»

⁴⁹A Zeezi leokame n yeele: «Zĩn ka tar maam ye. Mam waoogda m ba, la yãmb paoogda maam.

⁵⁰Mam yẽ ka baood m meng waoogr ye. Ned a yembr tãa n baood waoogrã, la a bʋʋd bʋʋdã.

⁵¹Mam yeta yãmb sɩd-sɩd tɩ ned sã n tall mam gomdã, a kõn tol n ki ye.»

⁵²Zʋɩf-rãmbã yeela bãmb yaa: «Moasã wã yẽ, tõnd miime tɩ zĩn n tar foom. A Abrahaam kiime, Wẽnnaam no-rɛɛsdbã me kiime, tɩ fo yaool n yetẽ tɩ ned sã n tall fo goamã a kõn tol n ki ye.

⁵³Dẽ yĩnga, fo yɩɩda tõnd ba a Abrahaam, sẽn ki wã la? Wẽnnaam no-rɛɛsdbã me kiime. Fo tẽedame tɩ fo yaa ãnda?»

⁵⁴A Zeezi leokame n yeele: Mam sã n waoogd m menga, mam waoogrã yaa zaalem. Yaa m ba, soab ning yãmb sẽn boond tɩ y Wẽnnaamã n waoogd maam.

⁵⁵La yãmb ka mi bãmb ye. Mam yẽ mii bãmba. Mam sã n yeel tɩ m ka mi bãmba, mam na n yɩɩ zĩrẽ-yagd wa yãmba. La mam mii bãmba, n sakd bãmb noore.

⁵⁶Yãmb ba a Abrahaam dag n kɩdma ne sũ-noogo, a sẽn dag n tagsd t'a na n yãnda mam daarã yĩnga. A yãnd-a lame, n maan sũ-noogo.

⁵⁷Zʋɩf-rãmbã yeela a Zeezi yaa: Fo nan ka ta yʋʋm pis-nu, n yaool n yãnd a Abrahaam?

⁵⁸A Zeezi yeela bãmb yaa: «Mam yeta yãmb sɩd-sɩd tɩ sẽn deng a Abrahaam dogem, mam dag n beeme.»

⁵⁹Gom-kãng poorẽ, Zʋɩf-rãmbã wʋka kug n na n lob a Zeezi, la a Zeezi soondame, la b yii wẽnd doogẽ wã.