Read SEBR SÕNGO, 1998 Tẽn‑tʋmdbã tʋʋmã 1 Bible Online

Tẽn‑tʋmdbã tʋʋmã 1 - SEBR SÕNGO, 1998 bible

Tẽn‑tʋmdbã tʋʋmã 1

¹Teofilli, mam dẽenem sebrã pʋgẽ, mam wilga bũmb nins fãa a Zeezi sẽn sɩng n maan la b zãms nebã,

²hal tɩ ta daar ning bãmb sẽn zẽk n kẽng arzãna. Sẽn deng a Zeezi sẽn na n zẽke, b kõo b tõodã tẽn-tʋmdb nins bãmb sẽn tũusã, ne Sɩɩg-sõng pãnga.

³A Zeezi namsgã zugẽ, b maana bũmb wʋsg n na n wilg b karen-biisã tɩ b vɩɩme. A Zeezi puka b meng ne tẽn-tʋmdbã rasem pis-naase, n gom ne bãmb Wẽnnaam soolmã yelle.

⁴Daar a yembre, a Zeezi da zĩi ne tẽn-tʋmdbã n dɩtẽ, la b yeel-b lame yaa: Da zãag-y ne Zeruzalɛm ye. Pa-y be n gũ bũmb ning m ba sẽn da kãabã, kũun ning mam sẽn da gom ne yãmb a yellã.

⁵Bala, a Zã rag n lisa nebã koomẽ. La yãmba, rasem bilf sã n paase, yãmb na n paama lisg Sɩɩg-sõng pʋgẽ.

⁶La tẽn-tʋmdbã sẽn da tigim taabã soka a Zeezi yaa: Zu-soaba, yaa moasã la y na n deeg Israyɛll soolmã n lebs-ba?

⁷A Zeezi leok-b lame yaa: Ka be ne yãmb tɩ y bãng wakate la sasa ning m ba sẽn yãk ne noor ning b sẽn tarã ye.

⁸La Sɩɩg-sõng sã n wa yãmb zutu, y na n deega pãnga, la yãmb na n yɩɩ mam kaset dãmb Zeruzalɛm, la Zʋʋde soolmã fãa, la Samaari, hal tɩ ta dũniyã tɛk fãa.

⁹A Zeezi sẽn gom a woto n sɛ, b zẽkame tɩ nebã get-ba. La sawadg lilla a Zeezi tɩ nebã ka leb n ne-b ye.

¹⁰La bãmb sẽn dag n ket n get yĩngr wakat ning a Zeezi sẽn zẽkdã, haya! Raop a yiib sẽn yer fu-peels waa n yalsa bãmb sɛɛgẽ

¹¹n yeel-b yaa: Galɩle nebã, yaa bõe tɩ y yas n get yĩngri? Zeezi‑kãngã Wẽnnaam sẽn zẽk tɩ b yi yãmb sʋk to-to n kẽng arzãn tɩ yãmb yã wã, b na n lebg n waa a woto bala.

¹²Dẽ, tẽn-tʋmdbã yii tãng ning sẽn boond tɩ Oliiv tɩɩs tãngã n sig n leb Zeruzalɛm. Tãngã zãrem ne Zeruzalɛm zemsa vʋʋsg daar kẽnd[1] bala.

¹³La bãmb sẽn ta Zeruzalɛm, b rʋʋ yĩngr doogã, zĩig ning bãmb sẽn minim n sigdã. Dag n yaa a Pɩyɛɛr ne a Zã la a Zak la a Ãndere ne a Filip la a Toma la a Bartelemi ne a Matye la a Alfe biig a Zak la a Sɩmo sẽn yaa Zelot ne a Zak biig a Zʋʋde.

¹⁴Bãmb fãa lagma taab ne yam a yembr n kẽngd taoor n pʋʋsd daar fãa, ne pagbã, la a Zeezi ma a Maari ne a Zeezi ma-biisã.

¹⁵Badaare, a Pɩyɛɛr yika a ba-biis a taabã sʋka, la b sõorã da taa neb koabg la pisi. A yeelame:

¹⁶M saam-biisi, rag n yaa tɩlɛ tɩ bũmb ning Sɩɩg-sõng sẽn da gom ne a Davɩɩd noor tɩ b gʋls gʋls-sõamyã pʋsẽ, n deng n togs t'a Zʋʋdaas na n lʋɩɩ neb taoor tɩ b wa n yõk a Zeezi wã paam pidsgu.

¹⁷A Zʋʋdaas rag n yaa tõnd sullã ned a yembre, la a rag n paama a pʋɩɩr ne tõnd tʋʋmdã.

¹⁸La rao-kãng rɩka ligd ning a sẽn paam a yel-wẽndã poorẽ wã n da pʋʋgo, la a lʋɩɩme t'a zugã reng taoore, t'a pʋgã pusg t'a yãadã yʋlem.

¹⁹La Zeruzalɛm tẽngã nebã fãa wʋma bõn-kãnga. Rẽ n kɩt tɩ b pʋd pʋʋgã yʋʋr ne b buudã goam tɩ «Hakeldama» sẽn dat n togs tɩ zɩɩm pʋʋgo.

²⁰Mik b gʋlsa yɩɩn-sõamyã sebr pʋgẽ n yeel yaa: «Bɩ a yirã lebg raboogo, tɩ ned ra zĩnd be ye. La tɩ ned a to reeg yẽnda tʋʋmdã.»

²¹Rẽ wã, tɩ d gẽes neb nins sẽn zĩnd-b ne tõnd wakat ning Zu-soab a Zeezi sẽn dag n tar tõnd n kẽnd la b watẽ, sẽn sɩng ne wakat ning a Zã sẽn lis bãmbã n tãag daar ning Wẽnnaam sẽn zẽk bãmb n bas tõndã sʋka, n yãk ned a yembr t'a naag tõnd n kɩs a Zeezi vʋʋgrã kaseto.

²³Bãmb wilga neb a yiibu: A Zozɛf b sẽn boond t'a Barsabaas la b boondẽ me t'a Zustuus ne a Matyaase.

²⁴Dẽ, bãmb fãa pʋʋsa a woto: Zu-soaba, yãmb sẽn mi nebã fãa sũyã, wilg-y ned ning yãmb sẽn yãk bãmb b yiibã sʋka,

²⁵t'a kẽ tʋʋmdã pʋgẽ, n yɩ tẽn-tʋmd n led a Zʋʋdaas zĩigẽ, t'a basame n kẽng zĩig ning sẽn segd ne-a.

²⁶Bãmb maana bãnde n na n yãk ned a yembre, la bãndã yõka a Matyaase. La yẽnda naaga tẽn-tʋmdb piig la a yembrã sullẽ.