Read SEBR SÕNGO, 1998 Tẽn‑tʋmdbã tʋʋmã 10 Bible Online

Tẽn‑tʋmdbã tʋʋmã 10 - SEBR SÕNGO, 1998 bible

Tẽn‑tʋmdbã tʋʋmã 10

¹Dao a ye n da be Sezaare t'a yʋʋr boond t'a Korney n ya sodaas koabg naab n be soda-kʋʋngã b sẽn boond tɩ Itali-rãmbã sʋka.

²Rao-kãng ra yaa wẽn-tũuda, la yẽnda ne a yirã rãmb ra zoeta Wẽnnaam. Yẽnda ra sõngda neb wʋsg sẽn yaa naong rãmba, la a ra pʋʋsda Wẽnnaam wakat fãa.

³Sẽn zems zaabr lɛɛr a tãab sasa, yẽnda yãnda Wẽnnaam malɛɛk vẽeneg vẽnegr pʋgẽ t'a kẽ n yeel yẽnda tɩ Korney.

⁴La yẽnda gesa malɛɛkã ne rabeem n yeel-a yaa: Yaa a wãna m Zu-soaba? Malɛɛkã yeel-a lame yaa: Fo pʋʋsgã, ne f sẽn sõngd naong rãmbã zẽk n taa Wẽnnaam, la b ka yĩm f yell ye.

⁵Dẽ moasã, bɩ f tʋm neb Zope tɩ b tɩ bool ned a yembr yʋʋr sẽn boond t'a Sɩmo Pɩyɛɛr t'a wa.

⁶Yẽnda siga zap a Sɩmo zakẽ, yirã bee ko-kãsenga noore.

⁷La malɛɛk ning sẽn gom ne yẽnda wã sẽn looge, a Korney boola a tʋmtʋmdb a yiib ne a sodaag a yembr sẽn yaa nin-sõng sodaas nins yẽnda sẽn so wã sʋka.

⁸A Korney togsa bãmb bũmb nins fãa sẽn maanã la a tʋm-b Zope.

⁹Vẽkembeoogo, bãmb sẽn waa n be sorẽ n kolgd Zope, sẽn zems wĩnto-sʋka, a Pɩyɛɛr dʋʋ roogã zug n na n pʋʋse.

¹⁰La kom yõka a Pɩyɛɛr t'a rat rɩɩb n dɩ. La b sẽn segend rɩɩbã n na n kõ-a wakate, yẽnda paama vẽnegre.

¹¹A Pɩyɛɛr yãnda saasẽ sẽn pake, la bũmb sẽn wẽnd wa peen-bedr b sẽn loe a noy a naasã t'a sigd n pẽnegd tẽnga.

¹²La rũms buud fãa sẽn tar nao a naase, la bõn-vuudsã la bõn-pɩgs buud fãa n dag n be a pʋgẽ.

¹³La koɛɛg n yeel a Pɩyɛɛr t'a yik n kʋ n dɩ.

¹⁴La a Pɩyɛɛr leokame yaa: Ayo, Zu-soaba, tɩ bõe mam zɩɩ n dɩ bũmb sẽn ka zems wala sẽn yaa rẽgd ye.

¹⁵La yẽnda leb n wʋma koɛɛg sẽn gomd ne yẽnda n yetẽ tɩ Wẽnnaam sẽn yeel tɩ bũmb ning yaa yɩlgemdã bɩ a ra bool bõn-kãng tɩ yaa rẽgd ye.

¹⁶Bõn-kãng maana naoor a tãabo. La tao-tao bal rẽ zugẽ bõn-kãng leb n zẽk n leba saasẽ.

¹⁷Wakat ning a Pɩyɛɛr sẽn nan tagsd a sũurẽ n dat n bãng vẽnegr ninga yẽnda sẽn yã wã võore, rẽ t'a Korney sẽn tʋm neb ninsã sok n bãnga a Sɩmo yirã zĩig n wa n be zakã noore.

¹⁸Bãmb boolame n sok tɩ yaa ka la a Sɩmo Pɩyɛɛr sẽn be wã?

¹⁹A Pɩyɛɛr sẽn dag n ket n tagsd n baood vẽnegrã võore, sɩɩgã yeela yẽnda tɩ ad neb a

²⁰tãab n be beenẽ n baood-a. T'a yik n sig n tũ la a ra sãmbe, tɩ bala, yaa bãmb n tʋm‑ba.

²¹Dẽ, a Pɩyɛɛr sigame n yeel rap‑kãens yaa: «Yaa maam la ned ning yãmb sẽn baoodã. Yaa bõe yell n wa ne yãmb ka?»

²²Bãmb leokame yaa: «Sodaas koabg naab a Korney n tʋm tõndo. Bãmb yaa nin-tɩrga, n zoet Wẽnnaam, la Zʋɩf-rãmbã fãa kɩta bãmb kaset sõngo. Wẽnnaam malɛɛk n sagl-b tɩ b kɩt yãmb wa b yirã, tɩ b kelg bũmb ning yãmb sẽn tar n na n gom ne-bã.»

²³Dẽ, a Pɩyɛɛr kɩtame tɩ b kẽ, la yẽnda reeg-b-la sãando. Vẽkembeoogo, a Pɩyɛɛr yikame n tũ-b n looge. La ba-biisã sẽn be Zope wã neb kẽer yãaga bãmba.

²⁴La ra-yɩt-n-daare, bãmb taa Sezaare. A Korney ra gũud‑b lame, la yẽnda ra boola a roagdbã la a zo-nongds tɩ b tigim yẽnda yirã.

²⁵A Pɩyɛɛr sẽn wa n kẽedẽ wã, a Korney wa n sega yẽnda n lʋɩ n wõgemd a taoore, n na n pʋʋs-a ne waoogre.

²⁶La a Pɩyɛɛr roog-a lame n yeel-a yaa: Yiki, bala mam me yaa ninsaal bala.

²⁷Dẽ, yẽnda kell n sõsda ne a Korney. La a kẽe roogẽ wã n mik neb wʋsg sẽn tigim be.

²⁸A Pɩyɛɛr yeel-b lame yaa: Yãmb miime t'a ka zems ne Zʋɩf-rãmbã tõog tɩ ned sẽn yaa Zʋɩf lagem ne buud sẽn ka Zʋɩf wala kẽ a zakẽ ye. La Wẽnnaam wilga maam tɩ m ka tog n yeel ned ba a yembr t'a ka zemse, wala a yaa rẽgd ye.

²⁹Yaa woto yĩng n kɩt tɩ yãmb sẽn bool maamã, m waame n ka kɩɩs ye. Dẽ, mam dat n bãnga bũmb ning sẽn kɩt tɩ yãmb tʋm tɩ b bool maamã.

³⁰A Korney leokame yaa: Rab-tãtẽ sẽn zems wakat-kãnga, mam dag n bee m doogẽ zaabr lɛɛr a tãab wakat n pʋʋsdẽ. Tao-tao bala, rao sẽn da yer fut sẽn pɩnd n yals mam taoorã,

³¹n yeel yaa: Korney! Wẽnnaam wʋma fo pʋʋsgã, la b ka yĩmd sõngr ning fo sẽn sõngd naong rãmbã yell ye.

³²Dẽ, bɩ f tʋm neb Zope tɩ b tɩ bool a Sɩmo Pɩyɛɛr t'a wa. Yẽnda siga a Sɩmo sẽn yaa zapã zakẽ sẽn be ko-kãsengã sɛɛgã.

³³La tao-tao bala mam tʋma neb tɩ b bool yãmba. La yãmb maana neer n sak n wa. Moasã, tõnd fãa bee Wẽnnaam taoor ka n na n kelg bũmb nins fãa Zu-soabã sẽn yeel yãmb tɩ y togs tõndã.

³⁴Dẽ, a Pɩyɛɛr gomame n yeel yaa: Moasã, mam sɩd bãngame tɩ Wẽnnaam ka tũusd neb ye.

³⁵Ned ning fãa, sẽn yaa buud ning fãa sẽn zoet Wẽnnaam la a maand tɩrlem, yẽnda soab tata bãmb yam.

³⁶Wẽnnaam tʋma b koɛɛgã Israyɛll yagensã nengẽ n togs-b tɩ laafɩ Koe-noog wata a Zeezi sẽn yaa nebã fãa Zu-soabã maasem yĩnga.

³⁷Yãmb mii bũmb ning sẽn sɩng n maan Galɩle la Zʋʋde soolmã fãa a Zã sẽn dag n moond nebã koom lisg koɛɛg zugẽ.

³⁸Yãmb bãnga sẽn yɩ to-to tɩ Wẽnnaam sik b Sɩɩg-sõng pãngã Nazarɛt dao a Zeezi zugã. La sẽn yɩ to-to me t'a Zeezi saag tẽngã n maan neer n maag neb nins fãa sẽn dag n be Sʋtãanã yembd pʋgẽ wã, bala, Wẽnnaam bee ne bãmba.

³⁹A Zeezi sẽn maan bũmb nins fãa Zʋɩf-rãmbã tẽngẽ wã la Zeruzalɛm pʋgẽ, tõnd yaa kaset dãmba. Bãmb kaa a Zeezi da-pɩk zug n kʋ-ba,

⁴⁰la rasem a tãab daare, Wẽnnaam vʋʋga bãmb n kõ-b noor tɩ b vẽneg b menga.

⁴¹La b ka vẽneg b meng ne nebã fãa ye. La yaa ne tõndo, Wẽnnaam sẽn dag n pĩnd n yãk tɩ yaa kaset dãmbã, sẽn dag n dɩ la d yũ ne bãmb b vʋʋgrã zugẽ wã.

⁴²La a Zeezi kõo tõnd noor tɩ d moon nebã sʋk n kɩs kaset n yeel tɩ Wẽnnaam yãka bãmba, tɩ b na n kao nin-vɩɩse, la kũum bʋʋdo.

⁴³Wẽnnaam no-rɛɛsdbã fãa goma Zeezi yell n yeel tɩ ned ning fãa sẽn tẽeda bãmb na n paama a yel-wẽnã sugr kũun ne bãmb yʋʋre.

⁴⁴A Pɩyɛɛr sẽn ket n gomda, Sɩɩg-sõng siga neb nins fãa sẽn dag n kelgd yẽnda goamã zutu.

⁴⁵Tẽedb nins sẽn yaa Zʋɩf buud n tũ a Pɩyɛɛr n wa wã yɛɛsa wʋsg ne Sɩɩg-sõng sẽn yaa Wẽnnaam kũunã sẽn sigd neb nins me sẽn ka Zʋɩf-rãmbã zutã.

⁴⁶Bala, b da wʋmda b sẽn gomd gom-zẽn n waoogd Wẽnnaam.

⁴⁷Dẽ, a Pɩyɛɛr leb yeelame yaa: Nin-bãmbã sẽn paam Sɩɩg-sõng pidb wala tõndã, moasã b tõe n gɩdga bãmb tɩ b ka paam koom lisg sɩda?

⁴⁸A Pɩyɛɛr kõo noor tɩ b lis-b ne a Zeezi Kiris yʋʋre. Dẽ, bãmb kosa a Pɩyɛɛr t'a pa ne-b rasem bilfu.