Read SEBR SÕNGO, 1998 Tẽn‑tʋmdbã tʋʋmã 18 Bible Online

Tẽn‑tʋmdbã tʋʋmã 18 - SEBR SÕNGO, 1998 bible

Tẽn‑tʋmdbã tʋʋmã 18

¹Rẽ poore, a Poll basa Atɛn n kẽng Korẽnte.

²Yẽnda yãnda Zʋɩf a yembr beenẽ t'a yʋʋr boondẽ t'a Akɩlaas, yẽnda yaa soolem a yembr sẽn boond tɩ Põ neda. La yẽnda ne a pag a Pirsill yii Itali soolem n nan wa be paalem, naab a Kolood sẽn dag n yiis tõog n yet tɩ Zʋɩf-rãmbã fãa yi Rom tẽnga yĩnga. A Poll kẽnga bãmb nengẽ.

³La a Poll nug-tʋʋmdã ne bãmb dẽndã sẽn dag n ya bũmb a yembrã, yẽnda zĩnda bãmb yirã n naag taab n tʋmdẽ. Bãmb dag n sẽta fu-roto.

⁴Vʋʋsg daar fãa a Poll moonda koɛɛg karen-doogã pʋgẽ n maoodẽ tɩ Zʋɩf-rãmbã ne Gɛrk-rãmbã tẽ-a.

⁵La a Sɩlaas ne a Tɩmote sẽn yi Masedoan a wa, a Poll rɩka a weerã zãng n moon koe-noogã n yeel Zʋɩf-rãmbã tɩ yaa a Zeezi la Kirisã.

⁶La Zʋɩf-rãmbã ra kɩɩsda a Poll la b tʋʋd-a. Dẽ, yẽnda fugsa a fut n yeel-b yaa: «Yãmb sã n sãame, a taalã bee ne yãmba, la a ka be ne maam ye. La sẽn sɩng ne moasã, mam na n kẽnga bu-zẽmsã nengẽ.»

⁷Dẽ, a Poll yii be n kẽng ned a yembr yʋʋr sẽn boond t'a Titiyuus Zustuus yiri, yẽnda yaa ned sẽn zoet Wẽnnaam dabeem, la a zakã rag n pẽe ne karen-doogã.

⁸La a Kirispuus sẽn yaa karen-doog naabã ne a yirã rãmb fãa tẽe Zu-soabã. La Korẽnt tẽng neb wʋsg sẽn wʋm a Poll koe-moonegã, bãmb me tẽeme n paam koom lisgu.

⁹La yʋngo, Zu-soabã goma ne a Poll vẽnegr pʋg n yeel-a yaa: Da zoe rabeem ye, kẽng taoor n gom la f ra sĩnd ye.

¹⁰Bala, mam bee ne foom, la ned ba a yembr kõn tõog n yõk foom n maan-f wẽng ye. Bala, neb wʋsg n be tẽn-kãngã pʋg n yaa mam nebã.

¹¹A Poll zĩnda Korẽnt yʋʋmd la kiis a yoobe, n zãms nebã Wẽnnaam goamã beenẽ.

¹²La wakat ninga a Galyõ sẽn dag n yaa Akayi soolem Gʋvɛrneerã, Zʋɩf-rãmbã lagma taab n dõd a Poll n tall‑a n kẽng bʋʋd zĩigẽ.

¹³B tɩ yeelame yaa: Rao-kãngã sẽn baood n kɩt tɩ nebã waoog Wẽnnaam to-to wã ka zemsd ne tõogã ye.

¹⁴A Poll sẽn yet t'a na n gome, la a Galyõ sẽn yeel Zʋɩf-rãmbã yaa: Zʋɩf-rãmba, sã n dag ya bũmb sẽn ka tɩrg wala tʋʋm‑wẽng poorẽ, mam dag n na n maaga m meng n kelg yãmba.

¹⁵La sã n yaa nokoɛɛm goam poorẽ, la yʋy la yãmb mens tõogã poorẽ, yõwã yaa yãmb la pak-yã. Mam ka na n yɩ bõn-kãens bʋ-kaood ye.

¹⁶La a Galyõ riga bãmb tɩ b yi bʋʋdã zĩigẽ.

¹⁷Dẽ, b naaga taab n yõk a Sostɛn sẽn yaa karen-doog naabã n sɩng n pãbd-a bʋʋda zĩig noore. La a Galyõ dag n ka maand yɩɩr ne yel-kãng ye.

¹⁸A Poll kell n paa Korẽnt n kaoose. Dẽ, a yaool n basa ba-biisã n kẽ koom-koglg n kẽng Siiri la a Pirsill ne a Akilaas tũu yẽnda. La sẽn deng a Poll sẽn na n kẽ koom-koglgã, a kɩtame tɩ b põng a zugã Sãnkre, bala yẽ rag n pʋlma Wẽnnaam.

¹⁹Bãmb taa Efɛɛse, la a Poll basa a Akilaas ne a Pirsill beenẽ. A Poll kẽnga karen-doogẽ n tɩ sõs ne Zʋɩf-rãmbã.

²⁰La b kos-a lame t'a pa be n kaoose, la a zãgsame.

²¹A Poll pʋʋsa bãmb wẽnd-na-taas n yeel-b yaa: [Tigrã sẽn watã, yaa tɩlɛ tɩ mam maan-a Zeruzalɛm.] Wẽnnaam sã n data, mam na n leb n waa yãmb nengẽ. La yẽ kẽe koom-koglg Efɛɛs n looge.

²²A Poll sẽn sig Sezaare, a kẽnga Zeruzalɛm n na n tɩ pʋʋs Kiris tẽedbã n yaool n kẽng Ãntiyoose.

²³La yẽnda sẽn kaoos Ãntiyoos bilfu, a lebg n dɩka sor n kẽng tẽng-tẽnga, n pɩʋʋg Galasi soolem ne Firzi soolem n paas karen-biisã fãa pãng b tẽebã pʋga.

²⁴Zʋɩf a yembr yʋʋr sẽn boond t'a Apoloos n dag n wa Efɛɛse, yẽnda roga Alegsãndri. Yẽnda yaa ned sẽn ya gom-minim soaba, la yẽnda ra mii gʋls-sõamyã neere.

²⁵B rag n zãms-a-la Zu-soabã sore. La baa sẽn da yaa a Zã lisgã yell bal la yẽnda sẽn mi wã, a ra zãmsda nebã bũmb nins sẽn kẽed ne a Zeezi kibarã tɩrga, ne a sũurã fãa.

²⁶Dẽ, a Apoloos sɩngame n gom karen-doogã pʋg ne pɛl-kɛgenga. La a Pirsill ne a Akilaas sẽn wʋm yẽ koɛɛgã, b peeg-a lame n maneg n zãms-a Wẽnnaam sorã tɩrg n paase.

²⁷A Apoloos sẽn dat n kẽng Akayi wã, ba-biisã paasa yẽnda raood n gʋls sebr n tʋm karen-biisã sẽn be soolem kãngã n yet tɩ b reeg-a neere. La yẽnda sẽn ta beenẽ, a sõnga neb nins sẽn yaa Kiris tẽedbã wʋsg ne Wẽnnaam barkã.

²⁸Bala, yẽnda goma wʋsg ne Zʋɩf-rãmbã, n tall gʋls-sõamyã nebã taoor n wilg-b t'a Zeezi yaa Kirisã.