Read SEBR SÕNGO, 1998 Tẽn‑tʋmdbã tʋʋmã 2 Bible Online

Tẽn‑tʋmdbã tʋʋmã 2 - SEBR SÕNGO, 1998 bible

Tẽn‑tʋmdbã tʋʋmã 2

¹Pãntekotã[2] daar sẽn ta, bãmb fãa rag n tigma taab zĩig a yembre.

²La tao-tao bala, bʋrg sẽn wẽnd sob-kãseng sẽn fugd bʋrg yii arzãn n wa n pid roog ning pʋg bãmb sẽn dag n zĩ wã.

³La bãmb yãnda bũmb sẽn wẽnd wa zɛlma, n yaa wa bug-witim, n welg taab n sig ned kam fãa zugu.

⁴Bãmb fãa pida ne Sɩɩg-sõngo. La b sɩngame n gom gom-zẽn wa sẽn zems Sɩɩgã sẽn kõ-b tɩ b gomã.

⁵La Zʋɩf-rãmb sẽn sakd tẽebã sõama, sẽn yi soolem nins fãa sẽn be dũniyã tɛkã, n dag n wa n be Zeruzalɛm.

⁶Bʋrgã sẽn maanã, neb kʋʋng wʋsg tigma taaba. La bãmb fãa yɛɛsa wʋsgo, ned kam fãa sẽn da wʋmd Kiris tẽedbã sẽn gomd ne yẽnda meng goamã yĩnga.

⁷La a linga bãmb tɩ b yɛɛs n yetẽ yaa: «Nin-kãensã fãa sẽn gomdã, b ka Galɩle neb wɛ?

⁸La maana a wãn tɩ tõnd ned kam fãa wʋmd bãmb sẽn gomd tõnd mens goam d sẽn dog ne‑a wã?

⁹Neb sẽn yit Part la Meed ne Elam dãmba, ne neb nins sẽn yi Mezopotami la Zʋʋde la Kapadoos la Põ ne Aazi soolem,

¹⁰la Firzi la Pamfili ne Ezɩpt la Libi soolem toadgã sẽn pẽ Sirɛnã.

¹¹La neb nins sẽn yi Rom n yaa Zʋɩf-rãmbã la bu-zẽms sẽn sakd Zʋɩf-rãmbã kaorengo, la Kɛrɛt nebã ne Araabi neb bee tõnd sʋka. La baoosgo tõnd wʋmda b sẽn gomd Wẽnnaam tʋʋm kãsemsã ne tõnd mens goamã!»

¹²Bãmb fãa yɛɛsame n dag n ka mi b sẽn na n tags tɩ bũmb ning ye. La b goma ne taab n yeel tɩ bõn-kãngã võor yaa bõe.

¹³La neb a taab rag n yaanda Kiris tẽedbã n yetẽ tɩ b yũu rãam n tɩge.

¹⁴Dẽ, a Pɩyɛɛr yika yĩngr ne neb piig la a yembrã n zẽk a koɛɛg n gom ne neb kʋʋngã a woto: Yãmb Zʋɩf-rãmba, la yãmb fãa sẽn be-b Zeruzalɛm, bãng-y bõn-kãnga, la y kelg mam goamã neere.

¹⁵Nin-kãensã ka yũ rãam wala yãmb sẽn tẽedã ye. Bala, nan ket n yaa yibeoogo, wakat a wɛ bala.

¹⁶La yaa bũmb ning Wẽnnaam no-rɛɛs a Zowɛll sẽn da togsã:

¹⁷Wẽnnaam yeelame yaa: «Yaoolem wakate, mam na n pʋdga m Sɩɩgã ninsaalbã buud fãa zutu. Yãmb kom-dibli la y kom-pugli na n togsa bãngr goamã. Yãmb kom-bɩɩs na n yãnda vẽnegre, la yãmb nin-kẽemb na n paama zãmsdo.

¹⁸N ye! Ra-kãens daare, mam na n pʋdga m Sɩɩgã m tʋmtʋmd-raopã la m tʋmtʋmd-pogsã zutu, la b na n togsa bãngr goamã.

¹⁹Mam na n maana bõn-yɛɛsds yĩngri, saasẽ, la bõn-bãn dũniyã zugu, zɩɩm, la bugum, la bug-zõos na n zĩndame.

²⁰Wĩndgã na n lebga lik bida, la kiuugã na n lebga wa zɩɩm, tɩ Zu-soabã daarã sẽn yaa ra-kãseng la sẽn be ziirã yaool n wa.

²¹La ned ning fãa sẽn na n pʋʋs ne Zu-soabã yʋʋr na n paama fãagre.»

²²Yãmb Israyɛll nebã, kelg-y gom-kãensã. Yãmb mens miime tɩ yaa Nazarɛt dao a Zeezi la Wẽnnaam tall n maan bõn-bãnã la bõn-yɛɛsds la bãn yãmb sʋkã, n wilg tɩ yaa bãmb n tʋm-ba.

²³B zãmba rao-kãngã, n yõk n kõ yãmb wa sẽn zems Wẽnnaam yam-yãkrã, la bãmb sẽn dag n pĩnd n yeelã. Yãmb kɩtame tɩ yel-wẽn maandb ka a Zeezi da-pɩk zug n kʋ-ba.

²⁴La Wẽnnaam vʋʋga bãmb n fãag-b kũum pãng nugẽ. Bala, kũumã pãng rag n ka tõe n tall bãmb ye.

²⁵Bala, a Davɩɩd dag n goma b yell n yeel yaa: «Mam dag n yãta Zu-soabã mam taoor wakat fãa. Bala, bãmb bee ne maam, sẽn na n yɩl tɩ bũmb da wa n miim maam ye.

²⁶Woto yĩnga, mam sũur pida ne sũ-noogo, la mam zelemd kɩdemdame. La baa mam yĩngã na n vʋʋsa tẽeb pidsg gũudum pʋgẽ.

²⁷Bala, yãmb ka na n bas maam kɩɩm-kulg pʋgẽ ye, la yãmb kõn bas y sõmblem soabã t'a pa yaoogẽ n põog ye.

²⁸Yãmb wilga maam vɩɩm soayã: Yãmb na n pida maam ne sũ-noog y nengẽ.»

²⁹M saam-biisi, kõ-y maam noor tɩ m gom ne yãmb tõnd yaab a Davɩɩd yell vẽenega: Bãmb kiime, tɩ b mum-ba, la b yaoog ket n bee tõnd sʋk hal tɩ ta rũndã.

³⁰La bãmb dag n yaa Wẽnnaam no-rɛɛsa, n mi tɩ Wẽnnaam dag n wẽename n kãab bãmb n yeel tɩ b na n kɩtame tɩ b yagensã sʋka, a yembr sẽn yit bãmb buud pʋgẽ zaoond b naamã geer zugu.

³¹A Davɩɩd da reng n goma Kirisã vʋʋgrã yell n yeel tɩ b ka bas Kiris kɩɩm-kulg ye, la b yĩngã ka pa yaoogẽ n põog ye.

³²Yaa Zeezi‑kãng la Wẽnnaam sẽn vʋʋgã, la tõnd fãa yaa bõn-kãng kaset dãmba.

³³A Zeezi zẽkame n be Wẽnnaam dɩtgo, la bãmb deega Sɩɩg-sõngã b sẽn da kãabã, b ba wã nengẽ, n pʋdg-a tõnd zutu. La yaa bõn-kãng la yãmb sẽn yãt la y wʋmd moasã wã.

³⁴Bala, a Davɩɩd mengã ka rʋ arzãn ye, la a yeelame tɩ Zu-soab a Wẽnd yeela yẽnda Zu-soabã yaa: «Wa n zĩnd mam dɩtgo,

³⁵hal tɩ m kɩt tɩ f tab f bɛɛbã.»

³⁶Dẽ yĩngã, Israyɛll buudã fãa, bãng-y sɩd-sɩd tɩ Zeezi‑kãng yãmb sẽn ka da-pɩkã zugã, Wẽnnaam kɩtame tɩ bãmb lebg Zu-soabã la Kirisi.

³⁷La nebã sẽn wʋm gom-kãnga, a sɩɩsa bãmb sũyã. La b soka a Pɩyɛɛr ne tẽn-tʋmdbã a taabã yaa: «D saam-biisi, tõnd tog n maana bõe?»

³⁸A Pɩyɛɛr yeel-b lame yaa: «Tek-y yam n kos sugri, la bɩ ned kam fãa sak n deeg koom lisg ne a Zeezi Kiris yʋʋr a yel-wẽnã sugr kũun yĩnga. Dẽ, y na yaool n deeg Wẽnnaam kũunã sẽn yaa Sɩɩg-sõngã.

³⁹Bala, Wẽnnaam kãabgã yaa yãmb ne y kambã yĩnga, la neb nins fãa sẽn be zĩ-zãrgã yĩnga, la neb nins fãa tõnd Wẽnnaam sẽn na n yaool n boolã me yĩnga.»

⁴⁰A Pɩyɛɛr leb n goma goam a taab n kɩs kaset n sagl-b ne pẽdgr n yeel-b tɩ b fãag b mens n yi zamaan‑kãnga sẽn yaa wẽngã pʋgẽ.

⁴¹Neb nins sẽn sak a Pɩyɛɛr goamã paama koom lisgu. La badaare, karen-biis sõor sẽn kolg tus a tãab n paase.

⁴²Bãmb dag n sakda tẽn-tʋmdbã zãmsg neere, n vɩ ba-biis lagem-n-taar pʋgẽ, la b kaood burã n dɩt ne taaba, la b pʋʋsd ne taaba.

⁴³La yɛɛsg rag n tara nebã fãa, bala, tẽn-tʋmdbã rag n maanda bõn-yɛɛsds ne bõn-bãn wʋsgo.

⁴⁴Tẽedbã fãa rag n naaga taab zĩ-yende, n dɩk b paoongã fãa n naagd taaba.

⁴⁵B rag n koosda b paoongã ne b sẽn tarã n pʋɩt ligdã tɩ tat nebã fãa, tɩ ned kam fãa paamd sẽn zemsd sẽn tõe n sõng-a.

⁴⁶Daar fãa, bãmb da naagda taab noor a yembr n be wẽnd doogẽ wã. Bãmb da naagda taab n dɩt rɩɩbã b yiyã pʋse, la b dag n dɩta b rɩɩbã ne sũ-noogo, la ne sũy sẽn yaa sõama.

⁴⁷Bãmb da pẽgda Wẽnnaam. La nebã fãa rag n nong-b lame. La daar fãa, Zu-soabã dag n fãagda neb n paasd wẽnd doogẽ wã.