Read SEBR SÕNGO, 1998 Tẽn‑tʋmdbã tʋʋmã 4 Bible Online

Tẽn‑tʋmdbã tʋʋmã 4 - SEBR SÕNGO, 1998 bible

Tẽn‑tʋmdbã tʋʋmã 4

¹A Pɩyɛɛr ne a Zã sẽn da ket n gomd ne nebã, maan-kʋʋdbã ne wẽnd-doog gũudbã naab la Saduusẽ-dãmbã waame.

²Bãmb sũyã puuga wʋsg ne tẽn-tʋmdbã a yiibã sẽn da zãmsd nebã la b moondẽ n yetẽ tɩ neb nins sẽn tũud a Zeezi wã na n vʋʋg n basa kũum wala a Zeezi sẽn vʋʋg n bas kũumã.

³La b yõga tẽn-tʋmdbã n kɩs gũudbã tɩ b gũ-b hal tɩ beoog vẽege, bala wĩndga da zoe n kẽeme.

⁴Baoosgo, neb nins sẽn da wʋm koe-moonegã, wʋsg tẽeme. Nebã sẽn tẽ wã sõor kolga tus a nu.

⁵La vẽkembeoogo, Zʋɩf-rãmbã nanambs la kãsem-dãmbã ne tõog karen-saam-dãmbã,

⁶la maan-kʋʋdbã kãsem a Ãnd ne a Kayiifi, la a Zã la a Alegsãndr la neb nins fãa sẽn dag n yaa maan-kʋʋdbã kãsem-dãmb buudã tigma taab Zeruzalɛm.

⁷Bãmb talla a Pɩyɛɛr ne a Zã n wa n yals bãmb sʋk n sok-b tɩ yaa ne pãn‑bʋgo, wala yaa ne ãnda yʋʋr la b maan bõn-kãnga.

⁸Dẽ, a Pɩyɛɛr sẽn pid ne Sɩɩg-sõngo, yẽnda yeel-b lame yaa: Zʋɩf-rãmbã nanambse, ne kãsem-dãmba,

⁹b sẽn sokd tõnd rũndã n dat bãng maan-neer ning sẽn maan koamsã, la sẽn yɩ to-to tɩ rao-kãng paam maagrã,

¹⁰Yãmb fãa ne Israyɛll nebã fãa bãng-y neere, tɩ yaa ne Nazarɛt dao a Zeezi Kiris yãmb sẽn ka da-pɩk zug tɩ Wẽnnaam vʋʋg-b n bas kũumã yʋʋre, n kɩt tɩ rao-kãngã paam laafɩ zãng n yas yãmb fãa taoore.

¹¹Wa gʋls sõamyã sẽn yetã, a Zeezi yaa: «Kugr ning yãmb a tãn-metbã sẽn dag n zãgsã, yaa kug-kãng n lebg roogã pãng kugri.»

¹²Fãagr ka be ne ned a to sã n ka a Zeezi ye. Bala, Wẽnnaam ka kõ ned yʋʋr a to ninsaalba sʋk dũniyã zug tɩ tõnd tõe n tũ n paam fãagr ye.

¹³La bãmb sẽn yãnd a Pɩyɛɛr ne a Zã pel-kɛgengã, b yɛɛsame, bala, b rag n bãngame t'a Pɩyɛɛr ne a Zã yaa nin-zaals sẽn ka paam zãmsgo. La b rag n bãngame t'a Pɩyɛɛr ne a Zã rag n tũuda a Zeezi.

¹⁴Kaorengã yɛl-bʋ-kaoodbã sẽn yã rao ningã sẽn paam maagrã t'a yik n yas a Pɩyɛɛr ne a Zã sɛɛgẽ wã, b rag n ka tar sẽn na leok ye.

¹⁵La b kõo a Pɩyɛɛr dãmb noor tɩ b yi kaoreng yɛl-bʋ-bʋʋdbã roogẽ. La kaoreng yɛl-bʋ-bʋʋdbã yẽsa ne taab n yeel yaa: Tõnd na n maana nin-kãensã bõe?

¹⁶Bala, Zeruzalɛm nebã fãa bãnga vẽeneg tɩ nin-kãensã maana bõn-bãn-kãsenga, la tõnd ka tõe n kɩɩs bõn-kãng ye.

¹⁷La sẽn na n yɩl tɩ yel-kãngã ra saag nebã sʋk n paase, wa-y tɩ d gɩdg-b tɩ b ra leb n gom ne ned ba a yembr a Zeezi yʋʋrã yell ye.

¹⁸Dẽ, b boola a Pɩyɛɛr ne a Zã n yeel-b tɩ b ra leb n tol n gom la b zãms nebã ne a Zeezi yʋʋr ye.

¹⁹La a Pɩyɛɛr ne a Zã leok-b lame yaa: Yaa tɩrg Wẽnnaam nifẽ tɩ tõnd sak yãmb n yaool n bas Wẽnnaam? Bɩ yãmb mens togse.

²⁰Bala, tõnd ka tõe n ka gom bũmb ning tõnd sẽn yã la d wʋmã yell ye.

²¹La kaoreng yɛl-bʋ-bʋʋdbã leb n lenga a Pɩyɛɛr dãmb n leb n bas-b n ka tõog n paam bũmb sẽn na n sɩbg-b ye, b sẽn zoet nebã yĩnga. Bala, nebã fãa ra pẽgda Wẽnnaam bũmb ning sẽn maanã yĩnga.

²²Bala, rao ning maagrã sẽn yɩ bõn-bãndã dag n tara sẽn yɩɩd yʋʋm pis-naase.

²³La b sẽn yiis a Pɩyɛɛr ne a Zã n base, bãmb kẽnga b ba-biis a taaba nengẽ, n tɩ togs-b bũmb ning fãa maan-kʋʋdbã kãsem-dãmbã ne kãsem-dãmbã sẽn da yeel bãmbã.

²⁴Tẽedbã sẽn wʋm yõwã, b lagma taab n pʋʋs Wẽnnaam n yeel yaa: Zu-soaba, yãmb n naan yĩngr la tẽnga, la ko-kãsengã, la bũmb nins fãa sẽn be b pʋsẽ wã,

²⁵yãmb n kɩt tɩ tõnd yaab a Davɩɩd sẽn yaa yãmb tʋmtʋmdã gom ne Sɩɩg-sõng pãnga, n yeel tɩ: «Yaa bõe yĩng tɩ buud toay-toayã sũy puudẽ, la yaa bõe tɩ nebã set sedb sẽn ka võore.

²⁶Dũniyã rĩm-dãmbã segla b mens zabr yĩnga, la nanambsã lagma taaba, n na n zab ne Zu-soabã la ne bãmb Kirisã.»

²⁷Bala, rĩm a Erood ne a Põns Pilat sɩd lagma taab Zeruzalɛm ka, ne bu-zẽmsã la ne Israyɛll nebã n zab ne yãmb tẽn-tʋmd-sõng a Zeezi yãmb sẽn yãkã.

²⁸Woto, bãmb pidsa bũmb ning fãa sẽn zems yãmb sẽn da pĩnd n yãk ne y pãngã la y ratmã.

²⁹La moasã, Zu-soaba, kelg-y bãmb zabr goamã. La y kõ y tẽn-tʋmdbã raood kãseng tɩ b moon yãmb koɛɛgã.

³⁰Tẽeg-y y nug n kɩt tɩ neb paam maagre, tɩ bõn-bãnã la bãnã maan ne y tʋmtʋmd-sõng a Zeezi yʋʋre.

³¹La bãmb sẽn pʋʋs n sɛ, bãmb sẽn dag n tigim taab roog ningã rigimdame. La b fãa pida ne Sɩɩg-sõngo. La b moona Wẽnnaam koɛɛgã ne raoodo.

³²Neb wʋsgã sẽn yaa Kiris tẽedbã sũyã la b yamã fãa ra yaa a yembre. Bãmb ned ba a yembr dag n ka yet tɩ bũmb nins yẽ sẽn so wã yaa a meng rẽnd ye. La paoongã fãa rag n yaa bãmb fãa n so.

³³La tẽn-tʋmdbã rag n kɩta Zu-soabã a Zeezi vʋʋgrã kaset ne pãn-kãsenga. La bark kãseng rag n sigda bãmb fãa zutu.

³⁴La bãmb sʋkã ned ba a yembr da ka naong soab ye. Bala, neb nins fãa sẽn da tar pʋto, wall rotã koosa bãmb fãa, n dɩk b sẽn koosã ligd n tall n wa.

³⁵La b kɩta tẽn-tʋmdbã ligdã, la b pʋɩta ligdã tɩ ned kam fãa paam sẽn zems a sõngre.

³⁶La a Zozɛfe, tẽn-tʋmdbã sẽn pʋd a soab yʋʋr t'a Barnabaas sẽn dat n togs tɩ ned sẽn belsd a taaba. Yẽnda yaa Leevi buudu la a yita Sɩpre.

³⁷Yẽnda koosa a pʋʋg n tall ligdã n wa rɩgl tẽn-tʋmdbã taoore.