Read SEBR SÕNGO, 1998 Rom‑dãmbã 1 Bible Online

Rom‑dãmbã 1 - SEBR SÕNGO, 1998 bible

Rom‑dãmbã 1

¹Maam a Polle, a Zeezi Kiris tʋmtʋmd b sẽn yãk t'a yɩ tẽn-tʋmdã, n welg-a toor Wẽnnaam koe-noogã yĩnga,

²koe-noog ning Wẽnnaam sẽn dag n tũnug b no-rɛɛsdbã n kãab bãmb gʋls-sõamyã pʋgẽ,

³la sẽn gomd bãmb Bi-ribl sẽn yaa a Davɩɩd yageng ne yĩng yelle,

⁴la ne sɩɩgã yelle, b welga toore, la Wẽnnaam wilga ne pãng n yeel t'a Zeezi yaa Bãmb Bi-ribla, bãmb sẽn vʋʋg-b n yiis kũum sʋkã yĩngã.

⁵Yaa tõnd Zu-soab a Zeezi Kirisi. Yaa bãmb maasem yĩng la tõnd deeg barka, la tẽn-tʋmdo, tɩ ne bãmb yʋʋre, tõnd na tall soolem toay-toayã fãa neb tɩ b wa tẽ Bãmba, la b sak Bãmba.

⁶A Zeezi Kiris sẽn bool yãmbã, yãmb me yaa soolem kãens rãmba.

⁷Maam n tʋmd seb-kãngã neb nins fãa sẽn be Rom n yaa Wẽnnaam nin-nongdse, tɩ Wẽnnaam bool-b tɩ b yɩ sõama n welg toorã nengẽ: Bɩ tõnd ba a Wẽnnaam la tõnd Zu-soab a Zeezi Kiris ning yãmb zut barka la b kõ-y bãane.

⁸Pipi, mam deng n pʋʋsda m Wẽnnaamã bark a Zeezi maasem yĩnga, yãmb fãa yĩnga. Bala, yãmb tẽebã yell saaga dũni gill fãa.

⁹Wẽnnaam mam sẽn sakd ne m sũur fãa, n moond bãmb bi-riblã koe-noogã yaa mam kaset soab tɩ mam pʋtã yãmb yell daar fãa,

¹⁰la wakat fãa m pʋʋsg pʋgẽ. Mam kota Wẽnnaam tɩ b sã n data, bɩ b kõ-m weer sẽn zems tɩ wa yãmb nengẽ.

¹¹Bala, mam data ne m sũur fãa n yãnd yãmba, tɩ m tõe n taas yãmb Sɩɩgã kũuni, tɩ yãmb tẽebã na paam pãnga,

¹²wall tɩ tõnd pʋs n naag taab n paam raood paoosg ne tẽeb a yembr tãa ning yãmb la maam sẽn tarã.

¹³M ba-biisi, mam ka rat tɩ yãmb zɩ tɩ mam saaga naoor wʋsg n dat n wa n ges yãmba, tɩ m tõe n wom biis yãmb sʋk wa soolem a taabã pʋsẽ wã. La hal tɩ ta moasã, gɩdgr n gɩdg maam.

¹⁴Mam tog n tʋma ne neb yam sẽn weke, la ne neb yam sẽn ka weke, la ne bãngdba la ne zɩtbã me.

¹⁵Dẽnda n kɩt tɩ mam dat ne n sũur fãa n moon yãmb me sẽn be Rommã koe-noogã.

¹⁶Bala, koe-noogã mooneg yãnd ka tar maam ye. Sɩdã, a yaa Wẽnnaam pãng sẽn fãagd ned ning fãa sẽn tẽeda: Pipi yaa Zʋɩf-rãmba, tɩ sẽn ka-b Zʋɩf-rãmbã pʋgda.

¹⁷Bala, Wẽnnaam tɩrlmã pukda be ne tẽebo, la tẽeb yĩnga, wa b sẽn gʋlsã: Nin-tɩrg na n vɩɩ ne tẽebo.

¹⁸Sɩdã, Wẽnnaam sũ-puugrã yita yĩngr n sigd ninsaalbã zutu, bãmb wẽn-kɩɩsgã la b tʋʋm-wẽnsã sẽn gɩdgd sɩdã t'a ka tõe n maan a tʋʋmdã yĩnga.

¹⁹Bala, bũmb ning fãa ned sẽn tõe n bãng sẽn kẽed ne Wẽnnaam yellã yaa vẽeneg ne bãmba, bala, Wẽnnaam puk-a la bãmba.

²⁰Sɩd me, sẽn sɩng ne dũni naanego, nebã nee Wẽnnaam pãng kãsengã sẽn ka sɛtã nin sẽn ka tõe n yã wã, la b Wẽnnaamlemã sõama, b sã n tags n ges bũmb nins bãmb sẽn maanã.

²¹Dẽ, bãmb ka tõe n yãnd bũmb n dõd n yi ye, bala, bãmb sẽn bãng Wẽnnaamã, b ka waoog-b wa b yaa Wẽnnaam ye, la b ka pʋʋs-b bark ye. La bãmb tagsgã sẽn ka yõodã kẽesa bãmb moogo, la bãmb sũyã sẽn be zɩɩlem pʋgẽ wã kẽe lik bida pʋgẽ.

²²Bãmb wukda b mens n yet tɩ b yaa yam dãmbã, la b lebga yalemba.

²³Bãmb teka Wẽnnaam sẽn ka kiidã ziir ne bõn-naands sẽn mamsd ninsaal sẽn kiidã, la liuuli, la nao a naase, la bõn-vuudsi.

²⁴Yaa woto yĩng n kɩt tɩ Wẽnnaam bas-b tɩ b kẽ rẽgd pʋgẽ, wa b sũyã sẽn data, tɩ b paoog b yĩnsã b toore.

²⁵Bãmb teka Wẽnnaam yellã sẽn yaa sɩdã ne zĩrẽ. Bãmb sẽn pʋʋsd bõn-naands n sakd-bã, n yaool n bas Naandã sẽn tog n paam waoogr wakat sẽn kõn sa wã, Ãmina.

²⁶Dẽ n kɩt tɩ Wẽnnaam bas-b tɩ b maan yĩng ratem sẽn paoogd neda. Bala, bãmb pagbã basa gãag ning sẽn zems Wẽnnaam sẽn seglã n maand sẽn ka segd ye.

²⁷Raopã me basa pagbã gãag sẽn zems Wẽnnaam sẽn seglã, tɩ ratem taab yĩngã rɩt bãmb wa bugum. B maanda yãnde, rao ne raoa, la b yĩnsã paamda sɩbgr sẽn zemsd ne b menengã sẽn wat ne bũmb ningã.

²⁸Bãmb sẽn ka tags tɩ yaa sõama tɩ bãng Wẽnnaamã, Wẽnnaam basame tɩ b tũud b tagsdã sẽn yaa wẽnsã, tɩ b maand bũmb sẽn ka zems ye.

²⁹Ka-tɩrlem buud fãa, la pʋ-toogo, la yão-beedo, la wẽnga, la ratem-wẽnga, la nin-kʋʋbo, la zaba, la zãmbo, la sɩlem n pid bãmba.

³⁰B yaa tẽn-kãn-nebã, nin-sãbsdba, wẽn-kɩɩsdbã, sũ-tʋʋls rãmba, wilg-m-mens rãmba, wuk-m-mens rãmba, n mi soay sẽn na tũ n maan wẽnga, ba-rãmb la ma-rãmb kɩɩsdba, b yam ka weke.

³¹B yaa neb sẽn ka be teegre, sẽn ka tar nonglem, n ka mi sugri, n ka tar nimbãan-zoeere ye.

³²La baa ne b sẽn mi Wẽnnaam yelsem sẽn yet tɩ neb nins sẽn maand bõn-kãensã zemsa ne kũumã, b maand-b lame. La ka rẽ bal ye, b yetame me tɩ neb nins sẽn maand bõn-kãensã maanda neere.