Read SEBR SÕNGO, 1998 Rom‑dãmbã 3 Bible Online

Rom‑dãmbã 3 - SEBR SÕNGO, 1998 bible

Rom‑dãmbã 3

¹Zu-noog ning Zʋɩf sẽn tarã yaa bõe, wall bãongã kõom yõod yaa bõe?

²A bee nafr bũmb fãa pʋgẽ. Pipi, Wẽnnaam deng n dɩka b goamã n gũnug ne Zʋɩf-rãmbã.

³La d na n yeelame tɩ bõe? Bãmb neb kẽer sã n ka maan sɩd ne Wẽnnaam, dẽ yĩnga, bãmb sẽn ka maan sɩdã na n kɩtame tɩ Wẽnnaam sɩdã ka maan a tʋʋmde?

⁴Yaa vẽeneg tɩ ayo. Nebã tog n bãngame tɩ baa ninsaalbã fãa sã n yagda zĩrẽ, Wẽnnaam yaa sɩd-soaba, wa b sẽn gʋlsã: Tɩ ne yãmb goamã, b na mik tɩ yãmb yaa tɩrga, la tɩ yãmb bʋʋda kaoob wakate, bɩ y paam tõogre.

⁵La tõnd ka-tɩrlmã sã n kɩtdẽ tɩ Wẽnnaam tɩrlmã pukdẽ, tõnd na n yeelame tɩ bõe? Wẽnnaam sã n sak tɩ b sũur yiki, b yaa ka-tɩrlem soab sɩda? Mam sẽn gomda yaa ninsaalemdo.

⁶Yaa vẽeneg tɩ ayo. Sã n ka rẽ, Wẽnnaam na n yɩɩ a wãn n kao dũni bʋʋdo?

⁷La sã n yaa tɩ ne mam zĩrẽ wã Wẽnnaam sɩdã pukdame n paasde tɩ yaa bãmb waoogre, bõe tɩ b na n leb n kao mam bʋʋd wa yel-wẽn maanda?

⁸La wa tẽn-kãn-neb kẽer sẽn kãnegd tõnd n yetẽ tɩ d gomda a woto wã, bõe tɩ tõnd ka na n maand wẽng tɩ sẽn yaa sõmb tõe n tũ be n wa? Nin-kãens sɩbgrã yaa bũmb sẽn zemse.

⁹La rẽ wã, tõnd yɩɩda neb a taabã la? Baa bilfu! Bala, tõnd zoe n wilgame tɩ nebã fãa, Zʋɩf-rãmbã la sẽn ka-b Zʋɩf-rãmbã bee yel-wẽnã yembd pʋgẽ

¹⁰wa sẽn gʋlsã: Ned sẽn zems ka be ye! Baa a yembr ka ye.

¹¹Ned baa a yembr yam ka weke, baa a yembr ka baood Wẽnnaam ye. Neba fãa menemame, n naag taab n lebg ka-barka.

¹²Ned baa a yembr ka be sẽn maand neer ye, baa a ye!

¹³Bãmb kokorã yaa wa yaoog b sẽn fõke. B zɛlmã wã belgda nebã. Ruruug zẽnem n be bãmb no-bɩmsẽ wã.

¹⁴Bãmb noor pida ne kãab-wẽng la toolem.

¹⁵B nao wã tʋʋla ne a kẽng n tɩ raag zɩɩm.

¹⁶B sẽn pɩʋʋgẽ fãa, yaa sãoong ne toog bala.

¹⁷B ka mi bũmb ning sẽn wat ne laafɩ ye.

¹⁸B toor ka be ne Wẽnnaam zoees ye.

¹⁹Tõnd yaool n miime tɩ bũmb ning fãa tõogã sẽn yetã, a yeta neb nins fãa sẽn loe ne tõogã, tɩ noyã fãa na mume, tɩ nebã na bãng tɩ Wẽnnaam nifẽ, nebã fãa yaa bɛɛgdba.

²⁰Sɩdã, ned baa a yembr ka na n paam zemsg Wẽnnaam taoor tõogã sakr yĩng ye. Bala, tõogã kɩtdame bal tɩ ned bãng yel-wẽnd sẽn yaa a soaba.

²¹La moasã Wẽnnaam tɩrlem pukame tɩ tõog toog kaẽ ye, la tõogã ne Wẽnnaam no-rɛɛsdbã sɛb kɩta tɩrlmã kaseto,

²²sẽn yaa tɩ tẽeb ne a Zeezi Kiris wata ne Wẽnnaam tɩrlem neb nins fãa sẽn tẽedã yĩnga. Bala, welgr ka ye:

²³Sɩda, nebã fãa maana yel-wẽna, n kong Wẽnnaam ziirã.

²⁴La b paamda zemsgã zaalem bala, Wẽnnaam nimbãan-zoeerã yĩnga, fãagr ning sẽn be a Zeezi Kiris pʋgẽ wã maasem yĩnga.

²⁵Yaa bãmb la Wẽnnaam pĩnd n yãk n kõ, neb nins sẽn na n tẽ bãmbã yel-wẽna yiisg yĩnga, ne b zɩɩmã. Woto na n wilga Wẽnnaam tɩrlem. Bãmb sẽn bas nebã n ka sɩbg-b b yel-wẽn nins b sẽn dag n maan Wẽnnaam sũ-marã wakatã yĩnga,

²⁶bãmb da rat n wilga b tɩrlmã moasã wakatã, tɩ nebã na bãng tɩ bãmb yaa tɩrga, bãmb sẽn kɩtd tɩ ned ning sẽn tẽed a Zeezi wã zemsã.

²⁷Woto yĩngã, bõe pʋgẽ la ned tõe n waoog a menga? Bũmb ka be ye. Ne tõ-bʋgo? Ne tʋʋm tõogo? Ayo! La yaa ne tẽeb tõogo.

²⁸Bala, tõnd geendame tɩ ninsaal paamda zemsg tẽeb yĩnga, tɩ tõog tʋʋmã toog kaẽ ye.

²⁹Walla, Wẽnnaam yaa Zʋɩf-rãmbã bal Wẽnnaam la? Bãmb ka buud a taabã me Wẽnnaam la? N-yẽe, bãmb yaa buud a taabã me Wẽnnaam,

³⁰bala, Wẽnnaam a yembr tãa n be n na n kɩt tɩ sẽn kẽ-b bãongã zems tẽeb yĩnga, la b kɩt tɩ sẽn ka kẽ-bã me zems tẽeb yĩnga.

³¹Woto wã, dẽ yĩnga tõnd dɩkda tẽebã n kiisd tõogã la? Yaa vẽeneg tɩ ayo. Ka woto ye, tõnd wilgdame tɩ tõogã yaa sõama.