Read SEBR SÕNGO, 1998 Rom‑dãmbã 9 Bible Online

Rom‑dãmbã 9 - SEBR SÕNGO, 1998 bible

Rom‑dãmbã 9

¹Mam yeta sɩd Kiris pʋgẽ, mam ka yagd zĩrẽ ye. Mam sũ-bãngrã kɩta maam bõn-kãng kaseto, Sɩɩg-sõng maasem yĩnga.

²Sũ-sãoon-kãsenga, la sũ‑sãang n be mam sũurẽ wã daar fãa.

³Bala, mam dag n nongẽ lame tɩ kãab wẽng zĩnd mam zugu, la m welg ne Kiris m ba-biisã, la m ba-rãmba ne yĩng yelle, sõngr yĩnga.

⁴Bãmb yaa Israyɛll rãmba, b rãmb Wẽnnaam sẽn deeg n maan b kamba tɩ b so ziiri, la kaoolã, la tõogã, la kaorengo, la kãabdo, la yaab-rãmba.

⁵Sã n yaa ne yĩng yelle, yaa bãmb n dog Kirisã, soab ning sẽn yɩɩd bũmba fãa, n yaa Wẽnnaam sẽn yaa bark soab wakat sẽn ka sɩngr n kõn zĩnd saabã. Ãmina!

⁶A ka tɩ Wẽnnaam goamã lebga zaalem ye. Bala, ka b rãmb fãa sẽn yaa a Israyɛll yagensã n yaa Israyɛll ye.

⁷Ka b sẽn yaa a Abrahaam roogã neb yĩng la b yaa a yagens ye. La b yeelame yaa: Na n tũnuga a Izak tɩ fo paam yagens sẽn tar fo yʋʋre,

⁸sẽn dat n togs tɩ ka kamb nins sẽn yaa b yĩng neongã n yaa Wẽnnaam kamb ye, la yaa neb nins b sẽn kãab-bã la b geend wa b yagense.

⁹Sɩd me, ad kãabgã gomde: Vẽer woto wẽnde, mam na n lebg n waame, la rẽ t'a Saara paama bi-ribla.

¹⁰Sẽn yɩɩda, yɩɩ woto me ne a Rebeka, sẽn tall tõnd ba a Izak bal pʋgã.

¹¹Bala, kambã da nan ka rog ye, la b ra nan ka maan neer bɩ wẽng ye. Baoosgo, Wẽnnaam daabã kell n yalsa wa sẽn zems bãmb sẽn yãkã, la yãkrã ka tũud ne tʋʋmã ye, a tũuda ne sẽn bool-a wã.

¹²B yeela a Rebeka yaa:

¹³Yao wã na n sooga kẽemã, wa sẽn gʋlsã: Mam nonga a Zakoobe, la mam kisga a Ezayu.

¹⁴Dẽ, tõnd na n yeelame tɩ bõe? Dẽ yĩnga, ka-tɩrlem bee Wẽnnaam pʋgẽ la? Yaa vẽeneg tɩ ka ye.

¹⁵Bala, b yeela a Moyiis yaa: Mam na n zoee ned ning m sẽn na n zoe a nimbãanegã nimbãanega, la m na n yãba ned ning m sẽn na n yãbã.

¹⁶Woto yĩnga, yel-kãng ka tũud ne soab ning sẽn data, wall ne soab ning sẽn zoet ye, bee ne Wẽnnaam, soab ning sẽn zoet nimbãanegã.

¹⁷Bala, Wẽnnaam gʋls-sõamyã yeela Farawõ yaa: Mam zẽka foom ne m raabo, n na n tall foom n wilg m pãngã, tɩ b na moon mam yʋʋrã tẽng zug tɛk fãa.

¹⁸Woto, bãmb zoeta ned ning b sẽn dat n zoe a nimbãanegã nimbãanega, la bãmb sẽn dat t'a soab sũur yɩ kɛgenga, b kengda a soabã sũurã.

¹⁹Dẽ, fo na n yeela maam yaa: Bõe la bãmb na n leb n yeel tɩ ka zemse? Bala, ãnda n tõe n kɩɩs bãmb sẽn datã?

²⁰La fo yẽ, foom la ãnda n tõe n wẽ no-koeemd ne Wẽnnaam? Bũmb ning yagbã sẽn yagdã na n yeela yagbã tɩ yaa bõe yĩng t'a yagd yẽnda a woto?

²¹Ka yagbã n so yagdã, n yãkd yagd a yembr pʋgẽ n yagd teoogo a tʋʋm sẽn be waoogre, la a yagd teoogo a tʋʋm sẽn be paoogr la?

²²La Wẽnnaam sã n maan sũ-mar wʋsg ne lagd sẽn wat ne sũ-yikri la sẽn maan sãoong yĩngã, n na n wilg b sũ-yikri la b kɩt tɩ nebã bãng bãmb pãngã?

²³La bãmb sã n dag n datame n kɩt tɩ lagd sẽn zems ne nimbãan-zoeere, la bãmb sẽn pĩnd n yãk tɩ b paam ziirã bãng bãmb ziirã sẽn zems to-to?

²⁴Dat n togs tɩ tõndo, neb b sẽn boole, ka Zʋɩf-rãmbã sʋk bal ye, la bu-zẽmsã sʋk me,

²⁵wa bãmb sẽn yeel a Ooze sebrã pʋgẽ wã: Ned ning sẽn dag ka mam nedã, mam na n boola a soab tɩ m neda, la ned ning sẽn dag n ka m noangã, mam na n bool-a lame tɩ m noanga.

²⁶La zĩig ning meng b sẽn dag n yet bãmb tɩ b ka mam nebã, be bala, b na n boola bãmb tɩ Wẽnnaam sẽn vɩ kom-dibli.

²⁷A Ezayi me goma Israyɛll yell n yeele: Baa Israyɛll nebã sõor sã n ta ko-kãsengã bĩisrã sõore, neb bilf bal n na põse.

²⁸Bala, bũmb ning Zu-soabã sẽn yeelã, b na n maan-a-la zãng tẽng zugu, la b na n maan-a-la tao-tao.

²⁹La a wa a Ezayi sẽn da pĩnd n yeelã, Saasẽ sodaas naabã sã n dag ka kellẽ tõnd buudã, tõnd dag n na n lebgẽ la wa Sodom, la tõnd dag n na n wẽnegẽ‑la Gomoore.

³⁰Dẽ, tõnd na n yeelame tɩ bõe? Bu-zẽmsã, sẽn dag n ka baood-b tɩrlmã paama tɩrlem, tɩrlem ning tẽeb sẽn kõtã.

³¹Tɩ Israyɛll nebã sẽn dag n baood tõog sẽn wat ne tɩrlmã ka paam tõ-kãng ye.

³²Bõe yĩnga? Yaa tɩ Israyɛll ka bao tɩrlmã ne tẽeb ye, la yaa ne tʋʋmã. Bãmb laka kug-lakdgã,

³³wa sẽn gʋlsã: Ade, mam ningda kug-lakdgã la kugr sẽn lubd neb Sɩyõ pʋgẽ. La ned ning sẽn tẽed-a bãmb kõn paam yãnd ye.