Read SEBR SÕNGO, 1998 1 Korẽnt‑rãmbã 13 Bible Online

1 Korẽnt‑rãmbã 13 - SEBR SÕNGO, 1998 bible

1 Korẽnt‑rãmbã 13

¹Mam sã n tõog n gomd ninsaalb la malegsã goam buud fãa, mam sã n ka tar nonglem, mam yaa wa waag sẽn maand bʋʋre, wall keoonf sẽn wẽeda.

²La mam sã n paam pĩnd-n-bãngr goam kũuni, la yel-soalma fãa bilgri, la bãngr fãa, la hal baa mam sã n tar tẽeb sẽn tõe n sers tãmse, mam sã n ka tar nonglem, mam ka fɩ.

³La mam sã n dɩk n paoongã fãa n pʋɩ tɩ naong rãmbã tõe n paam rɩɩbo, mam sã n kõ m yĩngã tɩ b yõog bugum, mam sã n ka tar nonglem, rẽ fãa ka yõod ye.

⁴Nonglem tara sũ-mare, nonglem sõngda neb a taaba, a ka maand sũ-kiir ye. Nonglem ka fʋʋmd a menga, a ka maand wilg-m-menga,

⁵a ka maand zãmb baa bilfu, a ka baood a meng nafr bal ye, a ka yikd a sũuri, a ka bĩngd wẽng ning b sẽn maan-a wã a sũurẽ ye,

⁶a ka maand sũ-noog ne ka-tɩrlem ye. Ayo! A maanda sũ-noog ne sɩda,

⁷a maanda sugr bũmb fãa yĩnga, a tẽeda bũmb fãa, a tara saag-sõng ne bũmb fãa, la a sakda bũmb fãa.

⁸Nonglem ka sɛt abada. Pĩnd-n-bãngr goam na sa, gom-zẽn na sa, bãngr na sa.

⁹Bala, tõnd sẽn bãngdã, yaa wɛdg-wɛdga, la pĩnd-n-bãngr goamã d sẽn togsdã yaa wedse.

¹⁰La sẽn zems-a zãngã sã n wa, b na n sɛɛsa sẽn yaa-a wedsã.

¹¹Mam sẽn dag n yaa biigã, mam goam dag n yaa yãag goamã, mam tagsg dag n yaa yãag tagsgo. Mam sẽn lebg raoã, mam sɛɛsa bũmb nins sẽn dag n yaa yãadrã.

¹²Tõnd sẽn ne rũndã wã, yaa wa nen-gɛtg pʋgẽ, pulum-pulum. La wakat sã n ta, tõnd na yãnd-b neng ne nenga. Mam sẽn mi rũndã wã yaa wedse, la wakat sã n ta, mam na bãng bãmb wa bãmb sẽn bãng maamã.

¹³Moasã, ad bũmb a tãab nins sẽn paadã: yaa tẽebo, la saag-sõngo, la nonglem. La sẽn yaa kãseng bãmb sʋk n yɩɩdã, yaa nonglem.