Read SEBR SÕNGO, 1998 1 Korẽnt‑rãmbã 3 Bible Online

1 Korẽnt‑rãmbã 3 - SEBR SÕNGO, 1998 bible

1 Korẽnt‑rãmbã 3

¹Sã n yaa ne maam, m ba-biisi, mam ka tõog n gom ne yãmb wa neb sẽn tagsd sɩɩgã yell ye, la yaa wa ne neb sẽn vɩ yĩng sakr pʋgẽ, wall kom-bãooneg Kiris pʋgẽ.

²Mam ka kõ yãmb rɩ-taok ye, yaa bĩisim, bala, yãmb pʋgã da ka tõe rɩ-taok ye. La baa ne moasã me, yãmb pʋsã ket n ka tõe-a ye. Bala, yãmb ket n tũuda yĩngã ratem.

³Sũ-kiirã ne ka-wʋm-taabã sẽn be yãmb sʋkã, dẽ yĩnga, yãmb ka neb sẽn sakd yĩngã ratem, la y kẽnd wa ninsaal sẽn maandã sɩda?

⁴Ned a yembr sã n yeel tɩ yẽnda yaa a Poll karen-biiga, tɩ ned a to yeel tɩ yẽnda yaa a Apoloos karen-biiga,

⁵ka ninsaalemd la rẽnda sɩda? A Apoloos yaa bõe, t'a Poll ya bõe? Bãmb yaa tʋmtʋmdb bal Wẽnnaam sẽn tall n kɩt tɩ yãmb tẽ a Zeezi, n zems ne Zu-soabã sẽn tees yãmb a soaba.

⁶Maam n sele, t'a Apoloos zãgs koom, la yaa Wẽnnaam n kɩtd tɩ koodã bɩtẽ.

⁷Woto, ka ned ning sẽn sel-a wã la bũmb ye. Ka ned ning sẽn zãgs-a koomã me n yaa bũmb ye. Yaa Wẽnnaam, soab ning sẽn kɩtd-a tɩ koodã bɩtẽ wã n yaa bũmbu.

⁸Ned ning sẽn sel-a wã, la ned ning sẽn zãgs-a koomã yaa yembr bala, la ned fãa na n deega a keoor wa zems a tʋʋmde.

⁹Bala, tõnd yaa tʋmd-n-taas ne Wẽnnaam. Yaa yãmb la Wẽnnaam Pʋʋgo, Wẽnnaam roogo.

¹⁰Wẽnnaam nimbãan-zoeerã b sẽn maana yĩnga, mam yẽbga roogã wa tãn-met sẽn tar yam, la ned a to waa n mee yẽbgrã zugu. La bɩ ned fãa gũus ne a sẽn met to-to yẽbgrã zugã.

¹¹Bala, ned baa a yembr ka tõe n yẽbg yẽbgr a to tɩ ka sẽn be-a wã ye, sẽn dat n togs t'a Zeezi Kiris bala.

¹²La ned sã n me yẽbg-kãng zug ne sãnem, wall wanzuri, wall kug buud sẽn be yõodo, wall raado, wall yamdo, wall moodo, ned fãa tʋʋmd na n pukame.

¹³Bala, daarã[2] na n kɩtame tɩ b bãng-a. Tɩ bõe bugmẽ la ned fãa Tʋʋmd na n puki, la bugmã na n maka ned fãa tʋʋmd n ges a sẽn yaa ne bũmb ninga.

¹⁴Bugmã sã n ka rɩ tʋʋmd ned sẽn maan yẽbg-kãng zugã, sẽn tʋm-a wã na paam keoore.

¹⁵La bugmã sã n dɩ tʋʋmd ning ned sẽn maane, na n yɩɩ bõn ne a soaba. Soab‑kãng na n paama fãagre, la a na yɩɩ wa ned sẽn pɩʋʋg bugum n põse.

¹⁶Yãmb zɩ tɩ yãmb yaa Wẽnnaam doogo, la tɩ Wẽnnaam sɩɩgã bee yãmb pʋgẽ la?

¹⁷Ned sã n sãam Wẽnnaam doogã, Wẽnnaam na n sãama a soaba. Bala, Wẽnnaam doogã welga toore, la yaa yãmb la ro-kãngã.

¹⁸Bɩ ned da belg a meng ye. Ned yãmb sʋkã sã n tagsd t'a tara dũni yam, bɩ a lebg yalma, t'a tõe n lebg yam soaba.

¹⁹Bala, dũni yam yaa yalemd wẽnnaam taoore. Dẽ n kɩt tɩ b gʋls n yeel tɩ: Wẽnnaam yõkda yam dãmbã b sɩlmã pʋga.

²⁰B leb n gʋlsame n yeel tɩ: Zu-soabã mii yam dãmba sẽn tagsd n lebd zĩig ninga, n miẽ tɩ b tagsgã yaa zaalem bala.

²¹Dẽ, bɩ ned baa a yembr da teeg ned n na n bao waoogr ye. Bala, bũmba fãa yaa yãmb dẽnda.

²²A Poll woo, a Apoloos woo, a Sefaas woo, dũni wã woo, vɩɩmã woo, kũumã woo, bũmb nins sẽn be moasã wã woo, bũmb nins sẽn wat taoorã woo, fãa yaa yãmb dẽnda.

²³Tɩ yãmb ya Kiris rẽnda, tɩ Kiris ya Wẽnnaam dẽnda.